شوفوا لكم حل في البلطجه
 

انا انهارده يا جماعه كنت راحه درس الكيمياء الساعه11 الصبح وكنت ماشيه في شارع علي الرصيف لوحدي وفجاه طلع شاب لابس شيك جدااا علي الرصيف وفضل ماشي عادي لغايه ما وصل لعندي وشد الشنطه مني بس انا صرخت وطلعت اجري في الشارع جريت الشارع كله لغايه ما وصلت الدرس وطبعا واصله في حاله مش طبيعيه كنت بعيط وبنهج وبرتعش كنت في حاله الله لا يكتبها علي احد منكم انا لغايه دلوقتي مش عارفه اهدي مش عارفه انام قاعده افكر انه لو كان معاه مطوه او سكينه كنت هعمل ايه؟؟؟ ربنا يسطرها معانا ومع بنات المسلمين
انا انهارده بس عرفت يعني ايه كلمه امن يعني ايه كلمه امان كلمات لا يفهماها الا من فقدها
وبعدين يا جماعه هتفضل لحد امتي عايشين كده البلطجه كل يوم بتزيد انا كل يوم بسمع عن حاجات بالشكل ده كتير من ناس قريبين مننا جدااااا هنفضل ساكتين لحد امتي ؟؟؟؟؟؟؟؟؟؟؟؟؟؟ده سؤال معرفش هلاقي اجابته فين لو حد عنده ليه اجابه يرد عليا
اللهم احفظ بلدي امنه سالمه

بتمني اني الاقي الاجابة دي برضو ..بس الحمد لله انها جت ع الشنطة و ربنا يستر
والله بشوف حاجات مايعلم بيها الا ربنا ..من سنة تقريبا ف شارعنا شوية حثالة بموتوسيكل سرقوا شنطة واحدة كانت ماشية وفيها الدهب بتاعها
عارفة من سنة نقريبا اختي كانت راجعة من برا وواحد مشي وراها لحد ما وصلت البيت وجاية تقفل باب العمارة قعد يزق الباب عليها ومعرفش نيته كانت ايه
ربنا يستر ويا رب همك يفرج

كويس انها جات ع الشنطة وبس
اهم حاجة انتى كويسة
اكيد طبعا الموقف مش سهل واعصابك تعبانة
خلى بالك من نفسك وابقى خلى حد يوصلك

والهي كويس فعلا انها جت علي الشنطه ربنا يستر بس ياتري ده فين بالظبط حصل كده

الحمد لله ان ربنا ستر
ابقي اقري قران وانتي ماشية في سرك وان شاء الله ربنا هايحفظك
وبلاش تروحي لوحدك لو مفيش حد يوصلك ابقي مثلا اتفقي انتي وصاحباتك وروحوا كلكم مع بعض
لان الكلام ده زي ماحصلك ممكن يحصل مع اي حد
ربنا يحفظنا كلنا ويسترها معانا يا رب


ومش مهم يا هبة الكلام ده حصل فين لانه بيحصل في كل مكان

قولى الحمد لله وكويس انها جت ع الشنطه المهك الشنطه كان فيها كام ها؟ههههههه بهزر معاكى ربنا يهديهم او يهدهوم

ديه كانت اول مره امشي لوحدي علشان صحبتي كان عندها درس قبل الدرس بس احنا علي طول بنعدي علي بعض وبنمشي مع بعض
الكلام ده حصل يا هبه في مساكن الشناوي عندنا في المنصوره عند ابراج المهندسين

علي فكره انا الشنطه ما اتخدش مني انا شلتها وجريت بيها اصل كان فيها مذكرات الدروس الكيمياء والفيزياء ودول ما يتقدروش بثمن ولا ايه (هههههههه) سبحان الهادي بجد اللي اداني القدره اني اتصرف كده واجري المسافه ديه كلها يلا الحمد لله علي كل شئ اللهم لا اعتراض
بس انا الحمد لله بقيت كويسه وشبه نسيت الموضوع

الحمد لله انك كويسة
ده هو لو عرف ان الشنطة كان فيها مذكرات فيزياء وكيمياء كانت جاتله ازمة قلبية هههههه
ربنا معاكى ويحفظك انتى وكل الناس فى ظل الظروف الى احنا فيها

الحمد لله
احمدى ربنا ( الحمد على كل شئ )
وخلى بالك من نفسك البلطجية دول ملهوش غير ربنا ( ربنا ينتقم منهم )
امشى مع صحابك دايما خصوصا لو كانت الشوارع مفهاش حد كتير
ربنا يحفظك ويحميكى يا رب

بجد انتوا خوفتوني اكتر منا بخاف
انا كل دروسي بروحها لوحدي وبرجع لوحدي وبرجع بليل كمان و منطقتنا هادية خالص والله الحفيظ
ربنا يحمينا و يحفظنا كلنا انه ولي ذلك والقادر عليه

ههههههههه انا لو مكانك ولو كان عايز الملازم انا هعرفه طريق البيت ومكان المكتب كمان او انا اجيبهملو لغايه عنده بس هو يخدهوم بس

والله انا لو كنت في وعي كنت هدي له المكتب و مكتبه الكتب كلها بس للاسف انا كنت مخضوضه ومش عارفه اتلم علي اعصابي انا بجد مش عارفه ربنا سترها معايا ازاي الحمد لله
بس علي فكره هو كان امور جداا ولابس شيك اوي انا كنت عايزه اخد نمره موبايله بس خلاص خيرها في غيرها

دا لو مكنتش اسرع يا دوك
لو كنت ماشي ف الشارع يا محمد ف الوقت دا كنت هتجري وراه و تساعدها ولا؟؟
اكيد هتساعدها

يا نهار كروهات ..ادي اخرة نيتك
و خيرها ف غيرها كمان شكلك محرمتيش
ربنا يحميكي و يحفظك ياhala:)

ربنا يكرمك يا ArabianPDA ,ويا ريت الشباب كلهم يبقوا زيك ويحسوا ان احنا اخواتهم بجد ده هيحل مشاكل كتير جدااا من البلطجه والمعاكسات اللي بيتعرض ليها بنات كتير وغيرها

انا نفسي عايزه اعرف انا كنت بجري ازاي انا لغايه دلوقتي معرفش ايه اللي حصل وانا ازاي عرفت اجري وهو كان لزقني في السور وكنت ماسكه الموبايل في ايدي وموقعش مني وانا بجري بجد انا مش عارفه ربنا سطرها ازاي الحمد لللللللللللللله (احبك ربي)

حمدلله علي سلامتك
والحمدلله ان محصلش حاجه
بصي هقولك علي حاجه حلوه امشي في الشنطه و خلي معاكي اسبراي صغير من اي حاجه
بس خليكي جهزه بيه لو حصل حاجه في اي وقت ترشيه علي عين الشخص ده وتجري
انا كنت حضرت ماده قبل كده للحوارات بس كانت فيها مشكله شويه بس انا قلت مثلا برفان او اسبراي او اي حاجه كده ان شاء الله حته ازازه بيرسول لما تترش علي علينه هتتعبه غصب عنه هيغمضها تقومي انت جاريه بعيد
فهمه قصدي ؟؟ وان شاء الله مش تحتاجي لاي حاجه