لكل الى داخل هندسه اسكندريه نبذه عن (مواد - دكاتره - كورسات وكل شىء)
 

:022yb4:

اولا انا كنت طالب فى اعدادى ودلوقتى اولى قسم وحابب يعنى على قد ما اقدر افيد الناس الى داخله لانى زيكوا كنت داخل تايه وعلى فكره موضوع التوهان ده ظاهره صحيه وعادى جدا انك تتوه الفرق بين الناس بقى الى بيتوه ومش بيدور على الطريق الى يرجعه وده فى الباى باى لانو حيدخل فى طاحونه شهر اتنين وتلاقى امتحانات ميد تيرم وده غير تسليم شيتات وفى ناس تتوه شويه لكن تفوق وتبدا تذاكر من اول السنه ودى ان شاء الله تقدير عالطول.

اولا بالنسبه للكليه والله لذيذه وسهله وبالذات اعدادى بس عاوزه مذاكره بجد مش دلع عاوزه حل وحضور محاضرات وسكاشن طبعا الى حيعمل كده يتاكد انوان شاء الله يجيب تقدير اما الى بيدخل يدلع ويفرح انو فى هندسه صدقنى النتيجه حتكون كارثيه لانك ليك فى اعدادى سنتين بس يعنى تسقط لا قدر الله سنه التانيه تسقط بره عالطول ؟!

ثانيا بقى حديكوا فكره سريعه عن المواد حتاخدوا فى التيرم الاول

*رياضه حيكون متقسمه حاجتين تفاضل(سهل جدا ) فى التيرم الاول وتكامل (سهل بس مش جدا)فى التيرم التانى وبيديه دكتوره اعتدال رحمى ودكتوره ميرفت كوجك كل دكتوره بتدى مجموعه لان الدفعه زى ما انتوا عارفين حتتقسم على حسب العدد احنا كنا مجموعتين لان عددنا كان صغير .

* تكنولوجيا انتاج (مش مكمله تيرم اول وبس ) والماده دى انا كنت بعيط منها عشان الى يدخل حيكتأب منها لكن الماده الوحيده الى جبت فيها جيد التيرم الاول والله ماده لذيذه اوى وسهله صعوبتها فى الحفظ ومكينات وبتاع ودى ليها معمل الى هو السيكشن وبيتحضرلوا ببلطوا هى الماده فيها لك كتير جدا وكلها نظرى اللهم الا شويه مسائل كده حتاخدوها وسهله برضو وبيديها كوكبه من الدكاتره هههههه ومش حتفهم منهم حاجه وبامانه انا مكنتش بحضر غير هىا محاضرتين تلاته وبس لانى كنت حتشل

*فيزياء (حتكمل يعنى حتمتحن فيها التيرم الاول وحتاخدها التيرم التانى برضو بس مختلفه شويه وحتمتحن فيها وحيجمعوا على بعض )لاتعليق طبعا هههههه بيديها دكتور عمرو محروس ودكتور احمد عماره وانا بقول يجماعه اسماء الى كانوا بيدرسولنا وبيختلفوامن سنه لسنه لكن هيا دكاترتها كتير جدا وحتعرفوهم لما تدخلوا متقلقوش

*حاسبات _ مش مكمله تيرم اول حتمتحن فيها وخلاص مش حتاخدها تانى ) حتدرسوا فيها البيزك برمجه وحجات تانيه خفيفه كده بس هيا مضافه جديد السنه الى فاتت بعد ما كنت ملغيه وهيا يعنى عاوزه مذاكره وبالذات البيزك

*ميكانيكا (ودى بقى بتنقسم الى حاجتين استاتيكا ودى فى التيرم الاول وبيديهالنا دكتور عاطف عطا وهو كويس جدا ومحترم وجزء تانى ديناميكا ودى فى التيرم التانى والاتنين مش حتمتحنهم الا مع بعض فى التيرم التانى) ولكن الاستاتيكا ليها متحان ميد تيرم فى النص الاول والديناميكا ميد تيرم التيرم التانى وهى ماده برضو عاوزه مزاكره وشغل لان ليها اسكتش وشيتات بتتسلم

*رسم هندسى (بينقسم الى رسم هندسى واسقاط هندسى) والاتنين برضو حتمتحنهم كل ماده لوحدهم اخر السنه ولكن الرسم ليه ميد تيرم نص اول والاسقاط ليها ميد تيرم نص تانى او حسب ميحدد الدكتور ( اتمنى مكونش لخبطكوا) لكن هتاخد محاضرات فيهم من اول السنه واهم حاجه فيهم الحضور وبالذات السكاشن لانك بتسلم لوح فيها وعليها درجات

* حقوق انسان ماده عاديه مش بتنضاف لكن فيها سقوط ونجاح


وان شاء الله حنكمل الموضوع لمواد التيرم التانى وورق الكورسات والمكتبات الى حتجيبوا منها والى ليه اساله لحد كده يسال ودمتم:)

الله يكرمك يا بشمهندس

يعني ال 7 مواد ... ثابتين في كل كليات هندسة ؟؟ مفيش اختلاف اقصد ؟

و المواد اللي تيرمين زى الفيزيا كده ... نتيجة امتحان التيرم الاولاني بتظهر على طول و لا في اخر السنة تظهر نتيجتها توتال ؟؟




شكرا يا بشمهندس ربنا يكرمك و يكرمنا

لا بص بتختلف طبعا يعنى ليه زميلى فى الاسماعيليه بياخد مثلا كيميا التيرم الاول وانتاج التيرم التانى يعنى هيا المواد باسمها بس ممكن تلاقيها متبدله

لا الفيزيا بتطلع تيرم اول لوحده والتيرم التانى بقى بيظهر مجموعك فى الاتنين اول وتانى

80 واحد شافوا الموضوع ومفيش غير تعليق واحد بسسسسس؟ واضح ان الموضوع مش فى اهتمامكم

ازاي طبعا الموضوع يهمنا و كنت عايزة اسأل ايه رأيك في الاقسام الخاصة اللي في الكلية ادخلها و لا لأ و ايه طبيعة الدراسة فيها وهل في دكاترة كويسين بيشرحوا فيها و ادواتها و كتبها متوفرة ولا لأ لأن اسمع انها جديدة

شكرا بس انا معرفش انا تخصصى اى سؤالى فى اعدادى بصفتى عديت منها بس انا اسمع ان الاقسام الخاصه كويسه ومستقبلها حلو وبرضو بسمع كلام مش حلو انو مثلا احيانا يشيلوا ناس مواد ويسقطوهم عشان ياخدوا منهم فلوس فانا والله معرف ومقدرش افيدك وشكرا تانى مره

شكرا لمجهودك ومنتظرين تكملة الموضوع - جزاك الله خيرا كثيرا

thanks al ot great subject

هوا مفيش مادة انجليزى؟؟؟

شكرا لردك ان شاء الله نكمله قريب

شكرا ليك شرفتينا بمرورك

فى التيرم التانى ان شاء الله

طب يا ريت اعرف هوا اعدادى الهندسة مختلف من كلية لكلية فى الدراسة
يعنى انا لو فضلت فى هندسة طنطا سنة و حولت بعد الاعدادى هشيل مواد لما احول اسكندرية ولاهيمنعوا عنى قسم زى النووى او البحرية مثلا؟؟؟؟

والله انا بسمع ان الى بيحول وبيبقى فى اختلاف فى المناهج بيشيلوه مواد وكمان انا كان معايا واحد صاحبى دخل انتاج فبساله ليه قالى لان المحولين مكنش ليهم غير انتاج وكام قسم تانى فالافضل انك تسال فى الكليه هما يفيدوك اكتر لانها ممكن بتختلف من سنه للتانيه والله اعلم

المصيبة ان مفيش بنزين فى البلد بالزمة مش حاجة تكسف انا بس خايف لا التحويل يخلص و يقفل قبل ما اقدر اروح و المواصلات صعبة عليا لانى عامل عملية و كدا و نفسى احول عشان ارتاح بئى

الف سلامه عليك ربنا يقومك بالسلامه وممكن اى حد يخلصلك الاجراءات دى وربنا يوفقك

شرفنى مرورك وان شاء الله حكمله حاضر متقلقيش:)




وعلى فكره نسيت ماده من التيرم الاول وهى جبر وطبعا ضمن الرياضه (التفاضل)

ممكن حد يعدلى مواد الاعدادى فى اسكندرية و يكون فى الجامعة من غير نبذة مختصرة ولا اى كلام
يعنى
1-
2-
كدا و يقول ايه المواد الى بالعربى و ايه بالانجليزى و يقولى بتوع السنة كلها الترم الاول لوحده و الترم التانى لوحده
عشان انا عايز اقارنهم بكلية طنطا

و مواد الاعدادى فى طنطا
1-رياضيات (1) (أ)
2-فيزيقا هندسية (1) أ
3-ميكانيكا هندسيه
4-الرسم الهندسى و الاسقاط
5-كيمياء هندسيه
6-تكنولوجيا الحاسبات
و الترم التانى
1-رياضيات هندسيه 1 ب
2-فيزيقا هندسيه 1 ب
3-ميكانيكا هندسيه
4-الرسم الهندسى و الاسقاط
5-هندسه الانتاج
6-لغه انجليزيه فنيه
7-تاريخ الهندسه و التكنولوجيا
8-حقوق الإنسان

و كل المواد بالانجليزى ما عدا الرياضة و الفيزياء و احتمال السنة دى يبئى الرياضة او الفيزيا انجليزى كمان

يا ريت حد يرد عشان انا قلقان جدا جدا و عايز اعرف

تكمله للموضوع الى بدأته حكلمكم عن مواد التيرم التانى

*رياضه وبتبقى متقسمه حاجتين (احنا اخدنا فى التيرم الاول تفاضل وجبر) فى التيرم التانى حيبقى تكاامل وهندسه تحليليه والاتنين ساهلين بس التكامل عاوز شغل جامد وحل ومتابعه لان ليه انواع كتير جدا اما التحليليه سهله جدا وان شاء الله تحلها بصباع رجلك الكبير:d
*فيزياء ودى طبعا اتكلمنا عنها وحتبقى التيرم التانى مختلفه طبعا عن الاول لان التيرم الاول حتاخدوا ديناميكا حراريه وخواص مواد والتيرم التانى كهربيه وحجات تانيه بصريات وكده وطبعا الفيزيا تيرم اول وتانى بيبقى ليها معمل يعنى فى 5 تجارب تقريبا كل تيرم بتعملهم وبيبقى فيهم امتحان عملى فى الاخر

*كيمياء وطبعا ماده شيقه جدا جدا وسهله جدا جدا وهديه للطالب وفيها برضو معمل بتحضرلوا بالبلطوا وليه ادوات حيطلبوها منك ( جوانتى - انابيب اختبار - حامل انابيب - فوطه - نظاره) طبعا معملها مهم

* ديناميكا ودى حتبقى تكمله للاستاتيكا الى حتاخدوها فى التيرم الاول وحتمتحنوا فى الاتنين على بعض اخر السنه وهى من وجهه نظرى كل الناس حتقولك صعبه:o وايه ده هى اه تقيله لكن الى يفهمها حيحس انها هبله قوى وسهله وحيحل فيها برضو كويس ان شاء الله

*انجليزى لاتعليق كلام فاضى انا زاكرته قبل الامتحان وجبت جيد فيه عادى جدا ومش صعب ولا حاجه

*تاريخ علوم هندسيه ماده نظرى كلها برضو قبل الامتحان الصبح تبقى تقراها وتحل لك امتحانين من بتوع السنين الى فاتت مش حيطلع منهم ان شاء الله.
* رسم هندسى واسقاط وده طبعا شغال معاك من التيرم الاول عادى جدا والى بيحب الرسم حيمشى فيه لانو عاوز تخيل جامد وانا الحمد لله كنت بحبه وجبت جيد فيه وهو عاوز بس التزام فى السكاشن من ناحيه الحضور وتسليم اللوحات المطلوبه فى السكشن لان عليها درجات

وحاولوا بجد بقى نصيحه محدش يستهتر بالحجات الصغيره دى لانها بجد هيا الى بتلم بيها درجات لان فى ناس معلش يعنى دماغها تعبانه يقولك يعم فكك المهم امتحان التيرم والرد عليه حقوله:slap1qk6: وايه ضمنك ان امتحان التيرم تحل فيه طب متحل فى الميد تيرم وتسلم لوحك وشيتاتك وتشتغل وتلم درجات تساعدك فى الفاينل حليت فيه كويس خير وبركه محلتش حلو اهى تشيل معاك وبالتوفيق واى سؤال انا فى الخدمه...

حاليا الحمد لله كشوفات الاسماء وصلت الكليه و تم تحديد ميعاد الكشف الطبي و التقديم يوم الاحد بعد العيد مباشرة يوم 4 سبتمبر 2011 حتي يوم الخميس 8 سبتمبر 2011
مواعيد العمل غالبا بتكون رسميا من 8 لكن الاحسن انكم تيجوا من 9 لحد 1 ان شاء الله
الاوراق المطلوبة منكم
1- اصل شهادة الميلاد كمبيوتر
2- عدد 10 صور حديثه
...3- صورة بطاقة الرقم القومي
4- اصل المؤهل ( اللي هو ملف المدرسة و شهادة الثانوية )
5- استمارة 2 جند للذكور
و دي الصورة اللي فيها الطلبات
http://www.facebook.com/photo.php?fbid=10150283730414566&set=o.1492723151552 35&type=1&theater

سوال بس هو مش انت بتتكلم عن كليه هندسه

امال ايه لازمه الكشف الطبى ده ممكن تفهمنى بس عشان انا ناويها على رأى حماقى:049gc0:

الكشف الطبى ده ههههههه حاجه لذيذه كده بتتعمل بس ولا يهشك منها كلام فاضى يعنى حتروح للعياده حيعملك ايه حيوقفك قدام اللوحه الى فيها دواير دى ويقولك الفتحه دى فين ؟؟؟؟ وانته اصلا حتبقى واقف فى وشها هههههههه واحد صاحبى كان لابس نظاره كاتبله فى التقرير انو مش لابس عادى يعنى حجات هبله كده عادى انته فى مصر;)

طب بالنسبه للمستنين تحوبل الورقى لو ان شاء الله قبلوا يقدموا امتى اوازاى واصلا هى نتيجه تحويل الورقى امتى فى جامعه اسكندريه؟؟؟

معلش مش فاهم سؤالك وضحى اكتر

يعنى اذا كان تقديم للكليه من 4 ل8 اومال المحولين بالورق يقدموا امتى ؟؟؟ وكمان هى نتيجه تحويل بالورق امتى باظيط؟؟؟

اوك طيب انا عموما حسال وحبلغك بس متقلقيش فى وقت لان الدراسه اصلا اتاجلت بقت اول اكتوبر فخير ان شاء الله

المحولين للتحويل الورقي لسه النتيجه بتاعتهم هتبان وبعد النتيجه بايام هيوصل الكشف بتاعهم للكليه و هيبداوا تقديم عادي جدا
امتي النتيجه هتطلع في الاغلب هتكون بعد العيد في وسط ايام الكشف الطبي العادي و متقلقوش بيتم مد فترة التقديم ليهم

شكرا للا فاده

عفوا يا فندم يارب بس الناس تستفاد

بصى اولا عشان نبقى صادقين الكورسات موجوده وبيديها معيدين فممكن المعيد يظبط فى نطاق معين يعنى يحضرك سكشن فى غير مكانك او يديكى درجات مثلا بس ده للامانه على حسب المعيد لكن اهم نقطه ان الى بيزاكر مش بيتظلم لو انتى زاكرتى كويس وحضرتى حتاخدى حقك جدا لكن بقى مش حتاخدى كورس وتضمنى الامتحان والكلام الفارغ ده لا لان المعيد اخره معيد لكن الى بيحط الامتحان الدكتور وده مش بيدى كورسات ممنوع بس والمهم انك متركزيش على الحجات دى كبرى دماغك المهم اعملى الى عليكى وربنا مش حيضيع تعب حد وشكرا

طيب وبالنسبه لكورسات التاهيل فى الاجازه قبل الكليه على طول ايه نظامها

؟؟؟؟؟؟؟؟؟؟ ودى اى دى كمان مش فاهم انته داخل هندسه مش كليه عسكريه يجماعه الموضوع بسيط مش مستاهل تاهيل والحجات دى

اصل عندى ناس صحابى داخلين طب ورايحين ياخدو كورسات فافتكرت الموضوع هو هواه فى الهندسه

لالا مفيش الكلام ده انته ممكن بعد كده تاخد فى الاجازه دوره فى برنامج او كورس انجليزى كده لكن من اولها كده لا :d

اوك شكرا للتوضيح

التقديم في هندسة اسكندريه بعد العيد مباشرة

بجد جزاك الله كل خير استفدت كتييييييييييييير

بس لو ممكن اعرف الشيتات دى عبارة عن ايه وكنت عايزة اعرف احنا هنحتاج كورسات والكلام ده ولا ممكن الواحد يذاكر مع نفسه .وكنت عايزة اعرف الادوات بتعتنا نشتريها منين.وعايزة اعرف كورس الانجلش الحينرال مهم نخدة من اعدادى ولا ممكن نستنى شويه واحسن مكان في اسكندريه ناخدفيه ؟

Merci مرة ثانية.

جزانا واياكى يارب

الشيتات دى بتبقى عباره عن مسائل على المحاضره الدكتور بينزلها وانتوا بتصوروها وتحلوها وهى فى اعدادى مش عليها درجات كبيرره بس مهمه جدا لانها مسائل الدكتور بينزلها وبتعرفك ازاى هو بيفكر وكده واحتمال يجى منها حاجه فى الامتحان وان مجاش اهو بدربى ايدك

الكورسات انا حكلمك عن نفسى انا ماخدتش غير كورس فيزيا تيرم اول وهما يومين وطلعت تانى لانو بيضيع وقت ده غير انى بسافر فطلعت منه والموضوع عادى جدا لو حضرتى محاضراتك وذاكرتى اول باول كبرى دماغك ولا كورسات ولا غيره وانا بصراحه مكنتش حاببها لان المعيد بيديكى المعلومه جاهزه انتى مش بتتعبى انك تفهمى ابدا وده مش حلو الافضل انك تدربى نفسك انك تفهمى لوحدك واعدادى مش محتاجه كورسات من وجهه نظرى

الادوات فى مكاتب كتير قدام الكليه حتلاقيها بتبيع كل حاجه متقلقيش

كورس انجليزى مش حيفيدك فى اعدادى لكن ان لم يفيد فلن يضر ولو عاوزه تاخديه عادى كويس حينفعك قدام
واحسن مكان والله انا معرف بس بسمع عن الاكاديميه البحريه او فى فى المنطقه العسكريه سمعت انها كويسه واسالى برضو واسف لو طولت

السلام عليكم ورحمه الله وبركاته
ممكن سؤال من فضلكم يا بشمهندسين
ايه هو افضل قسم ف الهندسه بالنسبه للبنات وشكررررررررررررررا

السلام عليكم
انا كان ليه سؤال وارجو الرد
ايه افضل قسم للبنات فى كليه الهندسه؟؟؟؟؟؟؟؟؟؟؟؟؟؟؟؟؟؟

بسم الله الرحمن الرحيم
ممكن سؤال يا بشمهندسين
انا لسه مستنيه التحويل الورقى هى نتجته هتطلع امتى؟؟؟؟؟؟؟؟؟؟؟؟؟؟؟

10 صور بجد؟؟؟
قالوا 6 !!!!


10 ليييييييه؟

لو حتسالينى مفيش ولا قسم ينفع للبنات هههههههههه لان كلها اقسام بهدله اللهم الا العماره كويس ليكوا بس انتى طبعا تدخلى الى انتى حاباه محدش يقولك ايه الكويس وايه الوحش ثم ان البنات بيزاحمونا فى كل حاجه عادى ادخلى اى قسم ولا يهمك:)

ايه يجماعه كلمونا عن اول يوم دراسه والمشاكل الى قابلتوها واى اسئله عاوزين تسالوها

thanks al ot great subject

شكرا لمرورك

شكرررررررا جزيلا وجزاك الله خير وجعله في ميزان حسناتك

اشكرك شرفتنا بمرورك