كل ماتريد معرفته عن هندسة القاهرة ##واتمشي في الكلية كمان وانت في بيتك ##
 

بداية ببارك لكل الناس الي داخلة معايا هندسة القاهرة .... وحاولت من خلال النت اني أجمعلكوا كل شئ عن الكلية ....




فى التوبيك ده إن شاء الله هنشرح إزاى نوصل زايد من معظم الأماكن إللى فيها طلبة كتير

وإللى بعيد عنهم يبقى هياخد مواصلة زيادة يروحلهم وبعدين يركب معاهم



شوفتوا الموضوع سهل إزاى



عندنا كام مكان رئيسى نروح منه.....

طيب تعالوا نبدأ ونقول

لو أنت ساكن قريب من ميدان لبنان يبقى اركب أى حاجة رايحة لميدان لبنان وأما تنزل من الميكروباص أسئل أى حد ميكروباصات زايد منين واركب الميكروباص واعمل حسابك هتقعد فيه من تلت ساعة لساعة إلا ربع تقريبا -حسب المحور وظروفه - وأول ما توصل عند هايبر يبقى خلاص ناقص دقائق وتنزل.. أول ما توصل عند هايبر السواق هيدخل يمين قوله بقى ينزلك عند السوق.. هتنزل وتعدى الناحية التانية وامشى قدامك شوية واسأل أى حد كلية هندسة منين هم تقريبا 4 دقائق مشى... ومرة ورا مرة هتحفظ الطريق

لو انت ساكن قريب من الهرم.. اركب ميكروباص من شارع الهرم وانزل موقف اسكندرية إللى عند مشعل وخد ميكروباص لزايد .... هتلاقى ميكروياصات بتنادى هندسة زايد اركبها هتنزلك قدام باب الكلية
أو ممكن يشترك فى أتوبيس الكلية خط الهرم

(لسه فيه شوية حاجات هتتظبط فى موضوع بتوع الهرم دول)

لو انت قريب من الجامعة فى الجيزة.. اركب المكروباصات بتاعت الهيئة -دى شكلها زى المينيباصات بس من غير رقم-.. اركب بتاع بولاق لولاء أو ساعات بينادى بولاق إمبابة وانزل ميدان لبنان واعمل نفس القصة وفيه ميني باص (1) ده من الجيزة لزايد على طول لو قابلته بالصدفة يعنى
أو ممكن يشترك فى أتوبيس الكلية خط الجامعة


طيب لو انت قريب من التحرير... اركب أى حاجة للتحرير واتمشى شوية لغاية ميدان عبد المنعم رياض أو ابقى اسأل الأتوبيس بيعدى على الميدان ولا لأ عشان لو بيعدى تنزل الميدان على طول... المهم أول ما توصل عبدالمنعم رياض اسأل على موقف الميكروباص فين.. واسأل على ميكروباصات زايد وهتعمل زى إللى ركب من ميدان لبنان... وفيه مواصلة تانية غير الميكروباص من نفس الموقف.. أتوبيس 570 بس نصيحة بلاش تستخدمه غير فى الضرورة القسوى وهتعرف ليه لما تسأل صحابك
أو ممكن يشترك فى أتوبيس الكلية خط التحرير


طيب لو انت قريب من رمسيس: عندك ميكروباصات من رمسيس اسأل على موقف أحمد حلمى الجديد أو موقف أكتوبر هو هو... وخد ميكروباص لزايد على طول وهتعمل زى إللى جاى من ميدان لبنان وعندك أتوبيس 370 لو قابلته اركبه بس برده فى الضرورة القسوى
أو ممكن يشترك فى أتوبيس الكلية خط رمسيس


طيب لو أنت من حلوان: عندك حاجة من 2: إنك تركب هرم وتنزل تركب زايد... أو إنك تركب مترو وتنزل التحرير أو رمسيس وارجع شوفهم بيركبوا إزاى
أو ممكن يشترك فى أتوبيس الكلية خط حلوان


بالنسبه للمقطم عشان لو حد جاي منه
مواصلات يا اما ينزل السيده عائشه و بعد كده جيزه و يركب لموقف اسكندريه وبعدها الشيخ زايد أو يركب من الجيزة لميدان لبنان ومنها للشيخ زايد
أو يروح للسابع و من السابع يركب رمسيس و يركب الشيخ زايد
او يركب من المفارق اتوبيس 951 اللي بيودي عبد المنعم رياض و منه على اتوبيس 570 ينزل جنب الكليه أو يركب ميكروباص الشيخ زايد من التحرير
ولو هيشترك فى أتوبيس الكلية هو بيبقى موجود في ميدان النافوره جنب مترو

طب وإللى ساكن فى مدينة نصر
لو هتكرب أتوبيس الجامعة هيبقى واقف فى ميدان رابعة العدوية
لو مواصلات
يبقى اركب لرمسيس وانزل اسأل على موقف السبتية أو أحمد حلمى الجديد واركب لزايد من هناك

طيب لو فضلت واقف مستنى زايد وملقتش أعمل إيه؟؟؟؟

ممكن تركب 6 أكتوبر وتنزل عند هايبر ومن هايبر اركب تاكسى للكلية هتلاقى ناس كتير بتنزل هايبر وتعمل زيك اركبوا التاكسى مع بعضكوا قولوله نزلنا هندسة

طب وأنا راجع أرجع إزاى
بص عندنا فى الرجوع 3 طرق ترجع بيهم
- إنك تقف قدام الكلية تستنى ميكروباص
- إنك تتمشى لغاية الجامع الأبيض تركب من هناك
- وفيه ناس كانت بتركب لغاية هايبر وتركب من هناك... تاحد تاكسى من قدام الكلية أو تمشى للجامع الأبيض وتاخد ميكروباص لهايبر

طيب إيه المكروباصات إللى بتيجى قدام الكلية
1- هرم ده بيبقى موجود تقريبا على طول
2- ساعات كده قليلة بتلاقى ميكروباصات بتنادى ميدان لبنان بس دى نادرة

طيب فين الجامع الأبيض ده؟؟؟
هقولك يا سيدى
أنت تخرج من باب الكلية وامشى شمال وخليك مع سور الكلية وهيقابك جراج الكلية خليك مكمل مع نفس اللفة أوعى تدخل الجراج ... هتلاقى كلية أو معهد أزهرى كده خليك مع اللفة لغاية ما تلاقى فيه شارع جانبى على أيدك اليمين أدخله وآخره الجامع الأبيض وأنت هتكون شوفته من بعيد أساسا...


من عند الجامع فيه ميكروباصات
هيبر, تحرير, اسعاف, رمسيس, ميدان لبنان, هرم
والأتوبيسات إللى قولنا عليها بتعدى من هناك كمان
370, 570, 1

بس خلى بالك إللى بيبقى موجود دايما: هرم وهيبر وميدان لبنان
لكن تحرير, رمسيس, اسعاف... بيجوا قليل شوية, يعنى لو انت خارج يوم من الكلية بدرى.... 11 ولا 12 ممكن تلاقيهم, لكن بعد كده بيبقى صعب شويتين, فأنت أحسنلك تركب لهايبر وتعدى الشارع وتركب من هناك هتلاقى موجود ميكروباصات أكتر لتحرير ورمسيس واسعاف

طيب إللى عايز يركب مترو يعمل إيه أسهل؟؟؟؟
يركب أى حاجة بتعدى على ميدان لبنان ويقول للراجل نزلنى عند سلم السودان
هينزله فوق الكبرى اسأل الناس هتوريك السلم انزل السلم هتلاقى ميكروباصات بتروح محطة مترو البحوث دى بين إللى الجامعة والدقى

وإللى عايز يرجع الجامعة فى الجيزة
يركب برده لميدان لبنان وينزل عند السلم وينزل السلم ويستنى المكروباصات بتاعت الهيئة إللى ركبها وهو جاى ويركب ويوصل بالسلامة


ومتخافش أنت بعد فترة قصيرة هتلاقى نفسك بقيت خبرة
ممكن تتبهدل شوية لغاية ما تاخد الخبرة دى
بس كله فداءً للعلم .
################################################## ###############
ثانيا الدكاترة والمعيدين :

اولا الرياضه

الماده دي مقسمه علي التيرمين
التيرم الاول هتاخدو فيها جبر وتفاضل ..التيرم التاني هندسه تحليليه وتكامل
.
.

اولا الجبر والتحليليه
د / شهوار رجب : هي استاذه الماده والي بتحط الامتحان ..وشرحها كويس جدا بس محتاجه حد مركز معاها علطول

د/ احمد عبد السميع :ده من اكتر الدكاتره الممتازة في الكليه ..اسلوبه سهل جدا وبسيط ..محتاج تكون مركز برده معاه لانه بيحل كتير في المحاضره


.
.

ثانيا التفاضل والتكامل

د/ حاتم الحسيني :من افضل الدكاتره الي هيفهمك الماده .. وبيلخص القوانين في كل محاضره ..بيشرح باسلوب سهل وبيسط ..سهل تجيب معاه امتياز مستريح
د/ عزة :من اكتر الشخصيات المحبوبه في الكليه منظمه جدا في الشرح ..سريعه شويه بس بتلم كل نقاط المنهج ..بتدي افكار كتير ومسائل من محاضرتها بتيجي في الامتحان
د/ حسن كامل : دكتور كويس جداا .. ومن الدكاتره الي بتشرح بالانجليزي .. يعني الي هيرتاح معاه في الشرح طلبه اللغات

د/ لبيب اسكندر :من اكفأ الدكاتره ..بيدرب الطلبه في المحاضره انها تحل باديها وتشارك معاه

.
.

بالنسبه للسكاشن
من افضل المعيدين في السكاشن الاتى :
م/احمد عاطف : من اكتر الناس المحبوبه من الطلبه في الكليه .. بيفهم كل حاجه ..بيجاوب علي كل الاسئله وفي ناس بتكتفي بالسكن بتاعه بس لانه بيشرح افكار كتير

م/ احمد يحي : مهندس رائع بيكتبلك كل القوانين وبيفهمك طريقه حل المسائل ماشيه ازاي

م/محمد ابراهيم :سريع شويه في الشرح لكن بيحل مسائل وافكار كتير اوى ..محتاج بس انك تكون بتركز وانت بتكتب معاه

وفي دكاتره بيدخلو السكاشن برده زي الدكتور احمد عبد السميع ودكتورة عزة ودكتور ممدوح محفوظ ودكتور حسن كامل
.
--------------------------------------------------------------

ثانيا الفيزياء

الماده مقسمه علي التيرمين
التيرم الاول خواص ماده وكهربيه ..التيرم التاني حراريه ومغناطيسيه
.
.
.
.
اولا خواص الماده والحراريه

د/مدحت المسيري :هو استاذ الماده ..شرحه فوق الممتاز ..بيحاول يفهمك الماده من الامثله الملموسه حوالينا
بيشرح الاول وبعدين بيسيب وقت عشان تكتبو وراه ..كشكول المحاضرات يكفي انك تقفل الماده وتوصل للامتياز ان شاء الله
في نهايه كل باب بيلخص الاثباتات الي عليه ..وبيحل مسائل كتير من نفس نوعيه مسائل الامتحان

د/ منال عوض : دكتورة عسوله جداا ..بتشرح باسلوب لذيذ وبتفهمك الماده كويس جدااااا

د/ اسامه النبوي : عدد الطلبه الي بتحضر معاه مش كتير اوى ..بس ده بيساعد الي بيحضر معاه علي التركيز والفهم ..وبينزل محاضراته مكتوبه جاهزة

.
.
ثانيا الكهربيه والمغناطيسيه

د/ساميه : شرحها ممتااز .. بتوصل المعلومه للكل بسهوله جداا ..وبتكرر عشان لو حد فاتته جزئيه يقدر يتابع معاها ويكمل
وفي بدايه كل محاضره بتراجع علي القوانين الي شرحتها في المحاضره الي قبلها


د/صلاح النحوى : استاذ الماده ..بيشرح بالبروجكتور والسلايدز ..والافضل للي متابع معاه يطلب منه السلايدز دي ويذاكر منها


د/ احمد صادق : دكتور طيب جدا ..كل الطلبه بتحبه وهو بيحبهم ..شرحه رائع ومعظم الطلبه كانت بتحضرله
بيحل مسائل من الشيت والامتحانات ..بيحتاج تركيز جامد عشان المحاضره بتكون مليانه


د/ياسر البطاوى : اسلوبه حلو اوى ..يدخل يراجع علي الي فات .. بيحب يسأل الطلبه عشان الكل يكون مركز والمعلومات تثبت
سريع شويه بالنسبه للنظري ..لكن معظم المحاضره مسائل


د/ برهام :دكتور طيب جداااااااااا.. بيعيد المعلومه اكتر من مره ..وبيحل مسائل كويسه في المحاضره ..وبيكز علي كل جزئيات المنهج

د/مجدي سعد : دكتور كويس برده ..بيدي في المعمل كتير ..فركز في شرحه لانه بيجيب منها في اسئله الشفوي

د/حسن رشدي : من اكتر الدكاتره الي بتحب طلبتها في الكليه .. لدرجه انه بيحفظ الطلبه الي معاه وبيحب يتابع مستواهم
بيشرح الاول وبيحل مسائل من الامتحانات ..يعني الي يتابع معاه في نهايه المنهج هيلاقيه حل حوال 4 امتحانات كامله

.
.

السكاشن

د/ سحر : دكتورة ممتازة .. بتحل مسائل الشيت .. وبتجاوب علي كل الاسئله سواء في الكليه
او هنا علي السايت


د/ عصام : دكتور طيب جدا .. وبيفهم كويس اوى .. وبيحل معانا برده مسائل الشيت


م/ هيثم : شرحه اكتر من رائع .. بيفهمك كل حاجه ..وبيجاوب علي كل الاسئله .. ويوصلك كل المسائل الي بيحلها معاك في السيكشن

وفي دكاتره برده بيدخلو السكاشن زي د/ ساميه ود/ ياسر

------------------------------------------------------------------------

ثالثا الميكانيـــكا
.

الماده مقسمه علي التيرمين ..التيرم الاول استاتيكا ..التيرم الثاني ديناميكا
.
.
.

الاستاتيكا
د/طوسـون : استاذ المــاده ..اكتر من ممتاز .. بيحب يفهمك الماده كويس
بيحب يشغل الطلبه من الكتاب ..بيدي امثله كتيره وكويسه اوى


د/ خالد فصيح : من الدكاتره الي هتحبهم جدا في الكليه .. وبيحب يفهم الطلبه كل جزئيه
وبجد شرحه كويس جدااااااااا

د/ عابدين : دكتور كويس جدا ..ومن الدكاتره الي بترتاح في محاضرتهم ومن اسلوبهم في الشرح


الديناميكــــــا

د/ محمد هلال : استاذ الماده .. ودكتور اكتر من رائع .. بيحب الي قدامه يكون فاهم كويس
وهتحس معاه بالهندسه فعلا ..وبيحل امثله كتيره وكلها بتكون افكار قريبه لافكار الامتحان


د/زكريا : دكتور شرحه كويس .. وبيدي اوقات في السكاشن
د/اسامه فهمي : دكتور كويس جدا ..بس محتاج تركيز ومتابعه اول بأول

السكاشن
م/ شريف :ممتــــــــــــــاز .. بيشرح الاول شرح عام .. بعدين يبدأ يحل مسائل الشيت
وبيحب الطلبه تكون فاهمه كويس .. بيجاوب علي اسئله الطلبه في اي وقت

م/ محمد زين : اسلوبه كويس جدااا ..وبرده بيحب يشرح الاول ثم يحل مسائل الشيت

-----------------------------------------------------------------------------------

رابعا الحاسبات
د/ايهاب يحي :استاذ الماده .. وكل الطلبه بتحبه ..بيحب يشتغل من الكتاب ..بيحب اوى الطلبه تشارك وتتفاعل معاه ..بيحل امثله كتير اوى
وبيجاوب علي كل الاسئله سواء في المحاضره او هنا علي يوني

د/ محمد ناجي : بيشتغل بالبروجيكتور والسلايدز .. شرحه كويس جداااا وبيحل امتحانات ..وبيجاوب علي كل الاسئله
د/ عبد الحكم : اسلوبه كويس في الشرح..بيفهمك الدرس وهو بيدردش معاك ..وبيجاوب علي كل اسئلتك
دكتوره دعاء:شرحها كويس جدا ده غير أنها بتطلب حاجات معينه من طلبتها زي ريبورتات وتمارين علشان تزود مهارتهم

السكاشن

م/أحمد عبد النبي : اسلوبه هادي جدا.. كل الطلبه بترتاح معاه سواء الي حابب يفهم او الي عايز يحفظ

م/محمد ابراهيم :اسلوبه سهل اوى في الشرح وبيبسط المعلومات للطلبه

-------------------------------------------------------------------------

خامسا الكيمياء الهندسيه

دي بقى هيدخلكوا فيها كل الدكاتره
وهما
دكتوره شاكيناز ..دكتورة هانم ..دكتور نبيل

الدكاتره كلهم كويسين وشرحهم رائع وأسلوبهم بسيط ..وهتلاقوا محاضرات الكيمياء مريحه وسهله جدا
بجد أسرة الكيميا في كليتنا حاجه مشرفه


السكاشن

دكتوره شاكيناز الصغيره : بجد شرحها ملوش حل بتدي افكار للمسائل بصراحه
م / معتز: شرحه كويس جداا .. وبيفهم كل حاجه وبيحل كتير
وفي معيدين كتير .. بس المهم تحضر سكشنك عشان الغياب والكويزات

------------------------------------------------------------------------------

سادسا هندسه الانتاج
.

د/ يحيى شاش :استاذ الماده ..محاضراته قويه جدا وخصوصا في المسائل احيانا بيعمل كويزات مفاجأه في المحاضره وتكون اسئلتها مهمه في الفينال والميدتيرم

د/عبد الله ويفي : شرحه كويس جدا وخصوصا النظري
د/ حباك : شرحه كويس وبيحب الطلبه تكون مركزة معاه
----------------------------------------------------------------------

سابعا اللغه الفنيه

كل المعيدين كويسين الى جانب انك لازم تلتزم مع المعيد بتاعك لأن في غياب وحضور وأسيمنتات ومفيهاش محاضرات
فالسكاشن مهمه جدا


--------------------------------------------------------------------------

ثامنا تاريخ العلوم الهندسيه

الماده عباره عن محاضرات بس مفيهاش سكاشن .. هيدخل دكاتره من كل الاقسام تقريبا
تعرفكو بكل ما يخص القسم ..وكلهم دكاتره ممتازين
بس المحاضرات بتكون محتاجه تركيز جامد لان الامتحان مبيخرجش عنها
.
--------------------------------------------------------------------------------
واخيرا الرسم الهندسي والاسقاط
.
.

كل واحد هيحضر في السكشن بتاعه .. وكل دكاتره الرسم كويسين جدااا وهيفهمكو باذن الله الرسم كويس
################################################## ##############



هنا ان شاء الله هنلملكم الحاجات اللي هتحتاجوا تشتروها في هندسة

يلا نبدأ؟

*.*.*.*.*.*.*.*.*.*.*.*.*.*.*.*.*.*.*.*.*.*.*.*.*. *.*.*
أولا بالنسبه للإنتاج والكيمياء


هتحتاج فيهم بالطو ابيض
وده ممكن تشتروه من عند القصر العيني
أو
من أي مكتبة سمير وعلي وفي منها في الجيزة والدقي
أو لو تعرف حد في كلية طب ممكن تاخده منه
وممكن تبدله مع أصحابك اللي في السكاشن التانيه


*.*.*.*.*.*.*.*.*.*.*.*.*.*.*.*.*.*.*.*.*.*.*.*.*. *.*.*.*

وبالنسبه للرسم الهندسي

مسطره حرف تي : وتكون 80 سم وسعرها بيتراوح من 40 الى 60 جنيه
وهتلاقوها في مكتبات سمير وعلي

ونصيحه بقى للناس اللي ناويه على قسم عماره ومتأكده انها هتدخله
يجيبوا مسطره 120 سم علشان ميضطروش يجيبوا مسطرتين


وهيطلبوا منكم طقم براجل في الكليه وسعره تقريبا 98 جنية
وانتو ممكن تستغنوا عنه ببرجل ب 4 جنية يقضي الموضوع



مثلثين
الأول زواياه 30؛ 60 درجة
والثاني زواياه 45 ؛45 درجه
وملحوظه مهمه : انهم ميكونوش مشطوفين من الأطراف
يعني الحدود بتاعتهم قايمه مش مايله


وكمان هتحتاجوا روول
وهو عباره عن اسطوانه سوده بنشيل فيها اللوح
وهو شبه الأر بي جي


وبالنسبه للأساتيك
انتو محتاجين استيكه نوعها كويس لأن نظافه اللوحه وتنظيمها بيبقى عليها 20%من الدرجه


وبالنسبه لمسح الأجزاء الدقيقة في الرسمه في 3 حلول

الأول :انك تجيب استيكة قلم
الثاني : انك تجيب حاجه اسمها شبلونة رسم
الثالث : انكوا تنفضوا وتتعاملوا بالأستيكة العاديه


كمان انتو محتاجين فوطتين برتقالي
زي اللي بيتمسح بيهم العربيات


وهتحتاجو قلمين سنون هما
0.5 & 0.7
الأقلام الأصليه سعرها في حدود 20جنية للقلم
بس ممكن تجيبوا اي قلم رخيص مش شرط يكون اصلي
لكن المهم نوع السنون مش نوع القلم
السنون الأصليه على فكره مش غاليه قوي
لكن هتريحكوا في الشغل قوي


بالنسبه للوح هتجيبوها من الكليه قبل السكاشن
واللوحه بتكون ب 0.5 جنية

وكمان هتحتاجوا سلوتب لتثبيت اللوح


بالنسبه لأدوات الرسم الغير أساسيه
الأدوات اللي هقولها دي مش ضروريه لكن تقدروا تقولوا عليها للرفاهيه


مثلث أرسطو
ده بيبقى فيه خطوط مرسومه بالعرض
وده بيستخدم لزوم التلصقه



مسطرة الدواير
ودي لو هتجيبوها لازم تبقى نظيفه قوي علشان تكون مظبوطه وبتبقى في حدود 30 جنية


بصوا بقى
هما في الكليه بيطلبوا منكوا تجيبوا تربيزه للرسم
لكن مش شرط
ممكن تستخدم اي تربيزة عندك في البيت يكون حرفها مستوي ومفيهوش بروز

امتكلفوش نفسكوا

بالنسبه للكتب اللي اجباري انكم تجيبوها

كتب الرسم :ودي ممكن تصوروها بس هما في لترم التاني رفضوا تصويرها وخلوها اجباري
فأسألو الدكاتره عندكم الأول
وكتب الرسم بتاعة الترم الأول كانت ب 80 جنيه
والترم التاني ب 100جنيه


كتب معمل الديناميكا
ودي بتبقى في الترم الثاني بس


كتاب معمل الفيزيا :للترمين ب 25 جنيه
الكتب دي كانت الكتب الإجباري انكوا تشتروها


لكن في كتب تانيه مهمه برده وهتفيدكوا كتير
وهي :


كتاب الحاسبات
وده مهم جدا

كتاب المسائل المحلوله في الرياضيات
25 جنية

شيت الديناميكا
25 جنيه
################################################## ###############

طيب ومباني الكلية

فرع الكلية في الشيخ زايد بيتكون من مبنيان اساسيان هما مبني المحاضرات و مبني السكاشن

مبني المحاضرات
هتلاقوه بيبدا ب 61 و ثلاث ارقام تاني

مبني السكاشن
بيبدا ب 51 و ثلاث ارقام تاني

هتلاقواالأماكن اللي هتخدو فيها المحاضرات أو السكاشن بيتعبر عنها برقم مكون من 5 ارقام
مثلا
61011

61
ده رقم المبني

1
ال 1 اللي بعد ال 61 ده رقم الدور
يعني 0 يبقى الدور الأرضي و لو 1 يبقى الدور الأول .... وهكذا
هما عموما ثلاث ادوار 610 و 611 و612

و الدور الارضي ده اللي بيبقي فيه قاعات الرسم 610

01
ده رقم القاعه يعني مثلا قاعه واحد ---> 01
الدور الارضي ---> 0
مبنى المحاضرات ---> 61
هيبقي رقمها كله على بعضه 61001
و نفس الكلام بالظبط لمبني السكاشن
-----------------------------------------------
مبنى 51 ده اللي بتاخد فيه السكاشن ومعمل الديناميكا ومعمل الكيمياء وده اللي فيه الكافتريا

أما مبنى 61 ده اللي بتاخد فيه المحاضرات والرسم ومعمل الفيزياء
والمبنى ده نظيف قوي بقى

-----------------------------------------------
و فيه بعض المباني الاخري زي مبني الورش و ده اللي هتاخدوا فيها ورش هندسه الانتاج

و مبني المسرح و ده كان بيتاخد فيه محاضرات قبل ما مبني المحاضرات يتفتح دلوقتي المسرح مبيتفتحش


و فيه مبني تكنولوجيا النسجيات و ده مش تبعكو


فيه كافيتريا هيا مش كبيييره بس هتلاقوا فيها معظم الحاجات

غير الكافتيريا الجديدة اللى متعلم عليها فى الخريطة

و فيه مكتبة سمير و علي و فيها ان شاء الله معظم الادوات اللي هتحتاجولها و هتلاقوا فيها كشاكيل واقلام و بورده رسم من الاخر هتلاقوا فيها كل حاجه هتحتاجولها

و فيه مكتبه غير سمير و علي
مكتبه الكليه وديه للتصوير و هتلاقوا فيها لوح الرسم و بعض الشيتات و كتاب اللغه الفنيه و فيه دكاتره بينزلوا حاجات فيها و المكتبه في مبني السكاشن

فيه المسجد و ده جنب المكتبه في اخر مبني السكاشن

و فيه عياده بردو في مبني السكاشن

وشئون الطلبة ورعاية الشباب
وأوضة بنج بونج

دى هتلاقوها جنب المسرح


حاجة زى الفل يعنى

نصيحة بقى لو لقيت نفسك فاضى لف فى الدور الأرضى والدور الأول بتاع مبنى 51 عشان تبقى عارف أرقام السكاشن
عشان تعرف الترتيب بتاعهم
عشان أما يبقى عندك سيكشن متقعدش تدور كتير


ودلوقتي لو عايز تتمشي في الكلية من


واي استفسار عن أي حاجة أنا في الخدمة

thxxxxxxxxxxxxxxxxxxxxxxxxxxxxxxxxxxxxxxxxxxxxxxxx xxxxxxxxxxxxxxxxxxxxxxxxxxxxxxx

أتمني أكون أفدتك ولسة هنزل صور للجامعة

فعلا افادتنى انا كنت بحاول اعرف اى معلومات عنها ومش لاقى وعالعموم احنا مع بعض هناك اتمنى نكون اصدقاء

موضوع رائع و مميز جدا

شكر خاص فى الديناميكا للدكتور / زكريا النجار

دا انت فظيع
انت متأكد انك طالبي جامعي مش مسؤول في الادارة العامة للمرور ^_^ هههه بهزر معاك
بس بجد ربنا يكرمك انت خلصت كل اللي كنت عاوز اقوله ويا ريت يا ريس تاخد الموضوع دا وتحطه هناك في قسم المجموعة الهندسية عشان روحت هناك وسألت كتير وناس كتير بتدخل تسأل
والف شكر مرة تانية

اه أكيد بس ممكن أعرف إسمك ايه لاني مش عارف ........

شكرا جدا علي الرد الجميل إن شاء الله هنضيف معلومات جديدة

بص أنا موضوع إزاي تروح الكلية دورت عليه علي النت لاحد معرفت إزاي أروح من أي حتة تقدر تقول بقيت خبير :p
وأنا كنت ناوي أحطه هناك بس قولت إن الاقبال هنا أكتر وكل الي بيدخل علي المنتدي يا إما في قسم أخبار الثانوية أو في التنسيق فقلت أحطه هنا عشان أضمن أكبر مشاهدة بس بعد كده ممكن أنقله ولا تزعل .... ولو حد سأل تقدر تقله علي الموضوع ده .... اهوه تعملنا دعاية :078111rg3::078111rg3:
وأكيد هنشوف بعض في الكلية

طب لو سمحت يا عمر

انا ان شاء الله داخل سنة اولى اقتصاد وعلوم سياسية

فهل سنة اولى هتبقى فى الشيخ زايد برده ولا فى جامعة القاهرة نفسها

ولو فى الجامعة نفسها ... انا ساكن فى مدينة نصر

ايه اقرب مواصلة اقدر اروح بيها بسرعة ومتخدش منى وقت

وشكرااا ليك على الموضوع الجاامد ده

لا ديه إعدادي هندسة بس الي في الشيخ زايد أما إقتصاد وعلوم سياسية فهية في حرم جامعة القاهرة .....
انت ممكن تركب المكروبصات الي بتقول جيزة وكان في أتوبيس برضة بس مش عارف رقمة كام ... يعني تركب اي حاجة جيزة هتنزل قدام الجامعة

شكرااااا على ردك يا عمر

وبالنسبة للمواصلات انا اخدها مترو احسن :d

لان لو ميكروباص مش هوصل :d

السلام عليكم
 

بجد ربنا يكرمك على الموضوع الممتاز ده
بس انت فعلا خبير
هل اتعلمت ده من اول سنه؟ ولا خدت وقت؟
وشكرا جزيلا على الموضوع بجد قدمت لينا خدمه رائعه
وربنا يجازيك على قد تعبك

يا رب اكرمنى و ادخلها ان شاء الله بعد لما اخلص 3 ! :d

الله على الموضوع يا عمر
بجد بجد جااااامد جداااااااا

أنا قلت أكتب الادوات عشان لو حد بيسأل عليها لكن طبعا الدكاترة بيقولوا كل الادوات في أول السنة ..... والله دكاترة القاهرة شكلهم كويسين جدا وطيبين كمان .................

اه فعلا هوه في باص بيروح المقطم بس الخط بيتعمل لو فيه عدد كبير مشترك فيه من المقطم .... والمشوار بيبقي طويل جدا :d وإشتراك الباصات بيكون 200 جنيه في الشهر هيه غالية شوية فمثلا واحد زيي هركب لميدان لبنان وبعدين مكروباص زايد يعني بتاع 5 جنيه مواصلات في اليوم يعني 150 في الشهر ....

أنا لسة داخل معاكم إعدادي ....... أنا بس دورت إزاي أروح علي النت لان الموضوع كان شاغلني أيام تقديم التنسيق عشان أعرف هيها هتبقي بعيدة ولا ايه

تسلم يا محمد

ان شاء الله نشوف بعض واتشرف بمعرفتك ونساعد بعض (او تساعدني ) ^_^
ومرة تانية شكرا ليك

شكررااااااااااااا

اولا احب اشكرك يا م\عمر واحييك على حرصك على مساعدتنا
واحب اقولك انك نعم الصديق حتى الان ويا رب على طوووول
وحكايه الادوات دى فتحت نفس الواحد للجامعه
وان شاء الله تبقى سنه حلوه لكل طلبه هندسه فى كل ارجاء مصر
ولك جزيل الشكر مره اخرى

اسمى رامى باسم

كويس أنك جبتلنا تفاصيل الحياة في هندسة القاهرة عند البيت و أتمنى من طلاب عين شمس عمل نفس الموضوع بس عن عين شمس

http://www.unimasr.net/ums/upload/up...sr.com_610.jpg

http://www.unimasr.net/ums/upload/up...sr.com_605.jpg

http://www.unimasr.net/ums/upload/up...sr.com_608.jpg

http://www.unimasr.net/ums/upload/up...sr.com_603.jpg

http://www.unimasr.net/ums/upload/up...sr.com_607.jpg

http://www.unimasr.net/ums/upload/up...sr.com_606.jpg

http://www.unimasr.net/ums/upload/up...sr.com_609.jpg

http://www.unimasr.net/ums/upload/up...sr.com_604.jpg

لا أصلها معمولة علي مساحة كبيرة يعني مفيش مباني حواليها ........ والكلية فعلا شكلها جامد خصوصا مبني المحاضرات مبني 61

بجد صور الجامعة شكلها يفتح النفس :]:] يا رب نولهالي يا رب..... ممكن طلب ممكن تقولنا خطوط اتوبيس الجامعة ؟؟؟

فعلا بشمهندس
 

شكراا جدا على المعلومات الجامدة دى
انا إن شاء الله جامعة القاهرة السنة دى

يا سيدي والله أنا معملتش حاجة جامدة يعني ديه حاجة بسيطة .... وبالنسبة للبانوراما دي عملها طلاب في كلية الهندسة

بالتوفيق للشباب اللي داخلين اعدادي

الراجل داا للأسف اتوفي السنادي للأسف .. و كان راجل اسطورة بصراحة .. الله يرحمو
و كانت محاضراتو زي العسل بجد :frown:

الكلية بتعمل حفل إستقبال للطلبة الجدد وبشرح فيه كل حاجة عن الباصات والجداول والذي منه ... وده بيبقي قبل الدراسة بحوالي إسبوعين أو إسبوع

على فكرة روحنا التهاردة وسالنا على التقديمقالوا التقديم بعد عشرة ايام

شكرااااااااااااااااااااااااااا

ana mozbahel :D
woooooooooooooow

السلام عليكم ورحمه الله
انا من المنوفيه وجاتلى هندسه الكترونيات منوف
وكانت امنيتى ادخل هندسه طبيه القاهره لكن للاسف جبت 95.5 وفرقت ع 1%
فكنت عاوزه اعرف ازاى احول وهل ينفع ولا لا؟؟ وده هيكون كويس ليا؟؟؟؟

والله مش متأكد لانك من المنوفية وديه الاقرب ليكي عموما لما يفتحوا التحويل جربي وشوفي هيحصل ايه

شكرا على هذه المعلومات القيمة لكن لو تفضلت اريد ان اعرف مكان التقديم للكلية فى مبنى هندسة القاهرة نفسها ولا فى الشيخ زايد؟

أعتقد بنسبة كبيرة في هندسة القاهرة نفسها في الجيزة

منورين يا بشمهندسين ..

أنا أحمد سعيد هندسة المنيا وإن شاء الله معاكوا السنة الجاية في هندسة القاهرة

روعه بجد تسلم ايدك انا نفسى بجد لو حد يتكلم على هندسه اسكندريه بالشكل ده تبقى اروع واروع
جزاك الله خيرا