منح الجامعة الامريكية و الالمانية
 

يا جماعة من فضلكم انا في 2 ثانوي و عايز اعرف معلومات عن منح الجامعات الامريكية و الالمانية و شروط دخولها و خاصة الالمانية و لازم تكون جايب كام و كده...من فضلكم لو حد عنده معلومة يتفضل و يكتبها و لكم جزيل الشكر

ايه يا جماعة فين الردود

ياريت حد يرد ويفيدنا انا كمان فى تانيه ثانوى

السلام عليكم اختى الكريمة
بصى انا لسة فى اولى ثانوى بس انا بردو بفكر فى الموضوع ده وروحت سالت فعلا و هو ده اللى انا عرفته
اولا الجامعة الامريكية
بتقبل منح من 85 فى المائة لكن بعدة شروط
1. ميكونش ليكى اخ او خت فىيه
2. تدخلى امتحانات سات 1 و سات 2 ودى بتبقى امتحانات دوليه بس بتبقى صعبة شوية و بيبقى الامتحان على مستوى العالم
لرفع مجموعك على اعتبار 85 فى المائة
3. للازم يكون ليكى نشاط قيادى فى المدرسة الثانوية لان اسم المنحة تنمية القادة
4.تدخلى امتحان الانترفيو بعد استيفاء كل الشروط

لكن دى عيبها انك لقدر الله لو سقطتى فى سنة هتضرى تدفعى مصاريف الجامعة و هى 85 الف جنية على الاقل



اما الجامعة الالمانية بتقدم 56 منحة لاوائل الثانوية العامة و 20 منحة للشهادات المعادلة طبعا منحة كاملة
اما لو جبتى اكتر من 95 فى المائة ممكن تاخدى نص منحة و بتدفعى نص المبلغ المطلوب و بيبقى على قسطين
و بتخشى اختبار الانجليزى قبل ما تخشى الجامعة نظرا ان الدراسة بالانجليزى
بصراحة الجامعتين دول من احسن الجامعات فى مصر ربنا يوفقك و تخشيهم
لكى تحياااااااااااااااااااااتى

و اى معلومات تانى انا تحت امرك

نسيت اقولك ان الجامعة الامركية بتحدد مجوموع كل سنة لهم الحق فى دخول الجامعة من غير اى شروط غير الانترفيو طبعا المجموع ده بيبقى فى حدود 97 الى 98 تقريبا

انا اسف يا حودة انا قريتها هدى سورى

لا عادي و لا يهمك..و شكرا جدا علي المعلومات ديه بس كان ليا سؤال في جزء انك لو سقطت في سنة تدفع المصاريف هل لو سقطت ولا لو نجحت بس مجموع مش اوي ؟؟؟..و معلش بردو جزء النشاط القيادي ده أعمل ايه؟؟؟

بص انا عرفت المعلومات دى من واحد صاحبى بيدرس هندسة فى الجامعة الامريكية هو كان نزل فى مادة فى الترم الاول فكان اهله قلقانين انو مينجحش فى اخر السنة بس هو الحمد لله عدى من سنة اولى صافى بس لو كان سقط فى المادة دى كان دفع مبلغ معين غالى شوية و لو هتعيد السنة هتضطر تدفع المبلع زى اى واحد بيدخلها بالفلوس
اما عن موضوع القيادة ده اظن انو بيمشى باى حاجة شهادة خدتها من المدرسة مثلا مبيركزوش اوى يعنى بس انت لو جبت مجموع كبير اوى ممكن تتجاوز كل الشروط دى بس هتخش الانترفيو ده بالنسبة للجامعة الامريكية


بس اظن الالمانية مفيهاش الشروط دى و كمان مصاريفها مش غالية اوى و فنفس الوقت مستواها التعليمى متميز

شكرا علي الإفادة و ربنا يوفقك و يوفقنا و ندخل كليات كويسة ان شاء الله

زي ما قال "الشفق القرمذي" تقريبا الشروط بتاعة الالمانية زي الامريكية و جايز أقل

انتى عايزة تعرفى ايه بظبط عن الجامعة اللمانية لأنى انا فيها فى كلية هندسة و اقدر افيدك لو عايزة تعرفى اى حاجة

لو سمحتى يا ايوية عايز اعرف ايه نظام المنح من الثانوية عامة بتاعت الجامعة الالمانية و ايه مصاريفها من غير منح و ايه اللى هيحصل لو نزلت فى مادة من المواد
معلش طولت عليكى

*الشفق القرمذى..

لو إنتي جبتي أعلى من 95% بيدوكي20% خصم يعني بتبقى حوالي 30 ألف في السنة(15 ألف في الترم) .. وطبعا كل مامجموعك يزيد كل ما نسبة الخصم بتزيد .. من غير خصم بتبقى المصاريف حوالي 36 ألف في السنة لو إنتي معدية 90%.

ولو لاقدر الله نزلتي ف مادة بيبقى في امتحان تاني زي "ملحق" أو "دور تاني" وده بيبقى ببلاش أول 3 مرات بس بعد كده بيبقى بـ 1000 جنيه ..

بالتوفيق إن شاء الله

طيب في خصم للي اقل من 90 و لو مفيش يبقي كام ?????

اولا بغد اذنك انا ولد مش بنت
ثانيا الف شكر على المعلومات المفيدة
تقبلو مرورى

* الشفق القرمذى ... لامؤاخذة يا كبير ,, ولا شكر على واجب ;)

*mr.keroo....

لأ مش بيبقى في خصم بالعكس المصاريف بتزيد بتبقى فحدود 44 ألف في السنة... ولو كنت جايب أقل من 80% بتبقى المصاريف 52 ألف في السنة ... الطريقة الوحيدة اللي ممكن تنزل المصاريف لو إنت مجموعك أقل من 90% هي إنك تعمل طلب "financial aid" وهو عبارة عن طلب بتعمله للجامعة بتقولهم فيه على ظروفك المادية و القرار بقى بيرجعلهم هما لو هيقبلو يساعدوك في المصاريف ولا لأ ,, أنا للامانة مش عارف بقى لو قبلوها هيساعدوك بكام % بظبط و التفاصيل دي لانها بتبقى بناءا على حالتك إنت ..

بالتوفيق إن شاء الله

شكرا بس لديها شروط في الدراسة

شكرا على المعلومة

لأ هما امتحانين كده بتمتحنهم قبل متخش الجامعة واحد IQ وواحد english وفي امتحان تالت ده اختياري بيبقى امتحان لغة ألمانية عشان لو عندك فكرة عن اللغة أو كنت واخدها فثانوية عامة قبل كده و ده عشان توفر على نفسك الكورسات البدائية في الألماني هناك ويخلوك تبدأ بالكورسات اللي هتناسب مستواك في اللغة.

انا اقصدي يعني لازم اجيب تقدير معين و لا عادي
و بيكون في فرق بيني و بين باقيين .

طالما تقديرك أعلى من 70% إن شاء الله بتتقبل على طول و زي ماقلتلك قبل كده تقديرك بيتحكم فمصاريف الجامعة كل لما تكون جايب أعلى كل مامصاريفك تقل

طيب لو انا دخلت عادي بمصاريف عادي بدون خصم يكون في خصم لو جبت في اول ترم تقديرة لو فيه يبقي تقدير ايع و كام الخصم

طبعا ممكن في حالة لو طلعت من أول 4 على الدفعة وبتبقى المنحة للترم اللي بعد اللي إنت طلعت فيه من الاوائل فقط .. وعشان تفضل محافظ على المنحة لازم تحفظ على إنك تكون من الاوائل و إلا هتروح منك .. وبالنسبة للمنحة نفسها بتبقى 100% من المصاريف لو إنت من أول اتنين ولو إنت التالت أو الرابع بتبقى 50% من المصاريف .. ودي الورقة الرسمية اللي بتوضح الكلام ده ..

الكلام ده يطبق على الناس اللي دخله الجامعة و هي جايبا في ثانوية اعلي من ٩٠ ولا على اي حد في الجامعة

اللي جايب أعلى من 90 اللي بيبقى "category A"

*********

نسيت أقولك معلومة , لو إنت دخلت الجامعة وإنت جايب اقل من 90% قول مثلا كنت جايب 85% فـبقيت "category B" بـتدفع 44 ألف إنت ممكن لو جبت GPA من 0.7 ل 1.5 (من +A ل -A) وحافظت عليه لمدة سنة السنة اللي وراها تبقي "category A" وهتدفع 36 ألف وتقدر بقى ساعتها لو كنت طلعت من الاوائل يشيلولك المصاريف زي مامكتوب في ال document .. ومعلش والله لسة فاكر المعلومة دي حالا :078111rg3: ;)

طيب بعد اذنك بالنسبة للدراسة انا بصراحة عايز صيدلة عايز اعرف نظام الدراسة هناك سهلة ولا صعبة بالنسبة للجامعات العامة و الدكاترة ايه نظامهم و كلية صيدلة الجامعة بتوفرلهم تدريب و هل فى نظام الكورس الصيفى عشان تاخد من مواد السنة اللى بعدها
عارف طولت عليكى
تقبلى مرورى

أنا ولد على فكرة :d

المهم .. بص يا سيدي اصحابي اللي في صيدلة بيشكورولي فيها قوي وبيقولولي المعامل من أحسن مايمكن و كده بس هي محتاجة شغل ومذاكرة زيها زي أي كلية علمية ... بالنسبة لموضوع التدريب العملي ده.. بالنسبة للي بيدرسوا هندسة لازم ياخدوا تلت شهور تدريب عملي فشركة .. بالنسبة لصيدلة أنا مش متأكد إذا كان اجباري تعمل ال internship زي هندسة ولا لأ إنما اللي أنا متأكد منه إن في ال employment fair اللي بيجلنا الجامعة كل سنة بيبقى في شركات بتطلب ناس من صيدلة زي nestle .. بالنسبة للكورس الصيفي في مواد ممكن تاخدها ومواد لأ بس هي من ناحية في كورس صيفي فـهو فيه بس زي مبقولك مش اي مادة بتاخدها بيبقى في حاجات معينة تختار منها

طب معلش انا دلوقتي في ثانوية عامة و ربنا يسهل و أجيب مجموع كبير ان شاء الله..افرض بقي مثلا جبت مجموع ٩٧% او ٩٨% هتبقي تقريبا المصاريف كام...و ايه التقدير المطلوب عشان متروحش المنحة مني..و شكرا

انا اسف بجد
طيب بقولك هو فى سكن قريب غير سكن االجامعة و فى مواصلات عامة ولا لا؟
شكراااااااااااااا

houda-mahmoud....

هتبقى المصاريف في حدود 25-20 ألف في السنة (ممكن اقل شوية أو أكتر شوية) و طول ما تقديرك في حدود 1.7 - 2.3 اللي هي B أو جيد جدا يبقى إنتي في السليم .. مش متأكد بقى هتروح منك لو إنتي تقديرك بقى يعادل +C ولا C بس لما إن شاء الله تدخلي الجامعة حاولي ماتنزليش عن ال B عشان زي مبقولك تبقي في السليم.

الشفق القرمذى....

قدام الجامعة على طول في عمارات اسكان الشباب, ممكن تسأل سمسار المنطقة عن الأسعار وكده عشان أنا معنديش فكرة عنها للأسف :)

انا متشكر جدا..بس علي فكرة انا ولد ‎:d :d‎

لامؤاخذة يا كبير أصلي قرأتها "هدى" مش "حودة" :d وتأمرني فأي وقت :)

طب سؤال أخير بقي معلش..هيا هندسة الألمانية أحسن ولا هندسة القاهرة..انا عارف ان فيه فرق بس هل تفرق معايا في الشغل ان شاء الله بعد كدة..معلش طولت معاك اعذرني

أنا مش هأقدر افتي فالقاهرة لاني مجربتهاش فـبالتالي ماقدرش اقارنلك .. بس أنا فهندسة كمبيوتر في الguc ورأيي فيها إنها محتاجة شغل ومجهود كبير .. الدكاترة هنا بيفيدوك وكله بس معظم المجهود عليك .. و عشان تبقى فاهم فحوار الشغل الفروقات بتبقى في الشخص.. هي آه الجامعة بتساعد وكل حاجة بس إنت لازم تبقى كويس ومجتهد جدا وشاطر دي مفيهاش جدال .. و لازم تفتكر إن الشركات الكبيرة بتبقى عايزة اللي يكسبها والي تستفاد منه ايا كانت الجامعة بتاعته... فـدي بقى بتبقى بـتتوقف على مهاراتك وشتارتك :d

شكرا أوي يا ypkill و ربنا يوفقك

طيب ايه شروط القبول بالنسبه للي واخدين الثانويه من السعوديه شهادات المعادله يعني هل بتكون منحه جزئيه ولا كليه

طيب انا دلوقتى جايبه95 وعاوزه ادخل الجامعه الالمانيه صيدله يبقى ايه الشروط واروح فين عشان اقدم الورق والمصاريف بتبقى ازاى والمنحه بتبقى كليه ولاجزئيه بليز فهمنيى لانى محتاره ومش عارفه اتصرف

اناروحت وسالت بس معرفتش اوصل لنسبه المنحه لان كان زحمه اوى طب انتى هتقدمى ولاهتعملى ايه

شكرا جزيلا لكم على هذه المعلومات
ولكن ماهي المصاريف الاخرى مثل ( التامين والمكتبة والملف والخ...) بخلاف المصاريف الرئيسية وهل تدفع كل سنة ام بعضها في الاول والبعض الاخر كل سنه ؟
يعني عازين فكرة واضحة يابرنس.

شكرا جزيلا لكم على هذه المعلومات
ولكن ماهي المصاريف الاخرى مثل ( رسوم الاختبار والتامين والمكتبة والملف والخ...) بخلاف المصاريف الرئيسية وهل تدفع كل سنة ام بعضها في الاول والبعض الاخر كل سنه ؟
يعني عازين فكرة واضحة .

معلش يا جماعه كنت عايزه اسال انا كنت جايبه 98.5 في 3 ثانوي و ناو داخله 3 جامعه بس كنت عايزه اعرف هل ممكن ادخل الجامعه الألمانيه او الأمريكيه او ال miu ياريت تفيدوني ولو موضوع المنحه ده يطبق عليا وهل مو دخلتها بكمل عادي 4 و 5 و عدد الساعات بس هو النظام اللي هيطبق عليا؟

ايه اقصي خصم بيعمله application (( financial aid )))

الرر بسرعة لو سمحت

ممكن اعرف المصاريف بالنسبالى حتبقى فى حدود كام انا جايب فوق ال95
و عايز اعرف تكلفة الاقامة فى سكن الجامعة

السلام عليكم..
انا السنادس فتانية ثانوي و جبت 99.3 % و نفسي اخد full-scholarship من الGUC و ادخل هندسة كمبوتر زي حضرتك كده و انا الحمدلله بحب الموضوع ده اوي

بس كنت عايزة اسال حضرتك علي المصاريف العادية كام ولو تعرف مثلا انا لو جبت GPA اقل من 3.0 ايه اللي بيحصل ساعتها؟؟
و معلش هتعبك معايا لو برضه ممكن تقولي ايه المواد اللي بتدرسوها او بتتكلم عن ايه اكتر؟؟
و شكرا جزيلا علي معلوماتك المفيدة بجد :d

ياريت تفيدوني بجد
معلش يا جماعه كنت عايزه اسال انا كنت جايبه 98.5 في 3 ثانوي و ناو داخله 3 جامعه بس كنت عايزه اعرف هل ممكن ادخل الجامعه الألمانيه او الأمريكيه او ال miu ياريت تفيدوني ولو موضوع المنحه ده يطبق عليا وهل مو دخلتها بكمل عادي3و 4 و 5 ولا ايه النظام؟

يا جماعه انا جايب 96.5 بالمستوي و 99.5 من غير المستوي عايز اعرف المصاريف هتكون في حدود كااام ؟