اجازة رعاية طفل للمتعاقدات
 

السلام عليكم اود ان اسال عن الاجازات المسموح بها للمتعاقدين بالعقد المميز وهل يوجد اجازة رعاية طفل للمتعاقدات في التربية والتعليم ولكم جزيل الشكر

للاسف اللى اعرفه ان مفيش اجازه رعايه طفل للمتعاقدات فى التربيه والتعليم ومش موجوده فى الاجازات اللى فى العقد

أنا سمعت بانه يمكن للمتعاقد أخذ اجازة لمدة ستة شهور فقط

مفيش ياختي للاسف
لكن بالتوافق مع مديرك ممكن تاخدي اجازة اعتيادية
وتقريبا سمعت قبل كده انك ممكن تاخدي رصيد الاعتيادي بتاع السنين اللى
فاتت لو مكنتيش استنفذتيهم

مفيش غير 3 شهور الوضع مدفوعى الاجر اما رعايه الطفل مفيش

عقدك يااستاذه لاينص على هذه الاجازة لانك لست موظفة معترف بيها فى الدولة كباقى الموظفات المعينات اللى بتقضى عمرها الوظيفى اجازات اخرك اجازة عارضة ومرضى واعتيادى ده اللى موجود فى العقد طبعا غير اجازة الوضع اللى المجلس القومى للمرأة مشكورة ضغط على وزارة التنمية الادارية عشان تديها لنا بنفس المنطق بقى المفروض نبعت للمجلس القومى للمرأة وكمان وزارة الاسرة ونضغط عليهم جدا باميلات او من خلال الخط الساخن لان ده كمان مش حق المرأة العاملة لوحده لاء ده كمان من حقوق الطفل اللى بيتبهدل بين الحضانات والجارات عشان امه عاملة

كيف يمكن عمل هذه الاجازه 6 شهور نرجو الافاده؟؟؟؟؟؟؟؟؟؟؟؟؟

مفيش غير اجازة وضع بس

السلام عليكم ورحمه الله المعروف ان الاجازات كالتالى 3 شهور وضع&6 ايام عارضه&21 يوم اعتيادى &شهر كامل لعمره او حج فقط لاغير تحياتى للجميع

لك اجازة وضع مثلك مثل المعينين أما رعاية فلا أعرف الوضع القانونى لها أما إجازة الوضع فقانونا لأنها للطفل وليست لك

والله انا نفس مشكلتك .. لو لقيتى حل يا ريت تبلغينى .. وانا برضه لو وصلت لحاجه حعرفك ..

15 يوم اعتيادي بسسسسسسسسسس

نزل فعلا فى قرار جديد بحصول المتعاقد على اجازة رعاية طفل لمدة 3 شهور ومن رأيي روحى الادارة بتاعتك قسم التعينات وانتى تتاكدى عشان محدش يقول انى بقول كلام تهريج ماشي ويتمسح كمان
وعلى فكرة انا اول واحدة فى الادارة اخدت اجازة وضع تلت شهور كان فيه نشرة فى التعيينات نزلت ومرحتش المدارس ومكنتشي موجودة فى العقد قبل كدة وطبقت الاجازة على اساس النشرة دى مش العقد وكانت اجازة 3 شهور بمرتب والله العظيم دا حصل ولما العقود اتغيرت نزلت الاجازة بس شهر بمرتب وشهرين بدون مرتب
من الاخر روحى التعيينات واسالى لانى عرفت انه فيه نشرة نزلت باجازة 3 شهور رعاية طفل بدون مرتب مع ان العقد مفيهوش

اولا شكرا على اهتمامكم وردودكم ولكن للاسف الظاهر يبقى الحال على ماهو عليه وعلى المتضرر يفسخ العقد ويقعد في البيت لان الاطفال دول امانة ولا ينبغي التفريط فيها بهذه الصورة ومسالة الرزق ربنا سبحانه وتعالى حسمها في قوله <نحن نرزقهم واياكم>والحقيقة انا مدرس مساعد في الازهر وكنت بادور عن اي مخرج ولو في التربية والتعليم ممكن يكون وسيلة ضغط على الناس العجيبة اللي احنا بنتعامل معاها الغريبة انكم لو راجعتو نص قانون الطفل تلاقوا صراحة من حق اي موظفة بالتعاقد او التعيين حكومة اوقطاع خاص لها اجازة رعاية طفل انا بابا محامي قال لي روحي قابلي مدير الشئون القانونية في الادارة وهو هيعمل المطلوب لان ده قانون بلد ماكدبتش خبر ورحت قابلته وكان راجل في غاية من الاحترام فتح القانون ولقى كلامي مظبوط قال لي اعملي مذكرة ونصور فيهاالصفحةمن القانون ونرفعها للمشيخة وبعون الله نجيب لك ولزميلاتك اجازة ماتفهموش عفريت طلع من تحت الارض ولكم ان تتخيلو الاسلوب اللي كان بيتكلم بيه راجل تاني دخل وكانه بينقذ مصيبة كان هيعملها مديره وقعد يقول لا ياريس مالهمش اجازة العقد شريعة المتعاقدين وضرب ايده في جيبه وطلع نسخة من العقد <باين شايلها لوقت اللزوم>وقاله لا مذكرة ولا حاجة باينة مالهمش اجازات غير اللي في العقد انا بصراحة شكيت في اللي بيحصل وطلعت على موظف الاجازات رد قال بصي ياابلة انت شغالة خدامة عندي وبتاخدي اجرك تعبتي او عندك ظروف غيبي وانا هجيب حد غيرك يشتغل عندي..........اسفة طولت عليكم بس الواحد بينزل شوية من الهم اللي على قلبه وعموما لو حد عرف جديد يقولنا

ربنا يعينك ويعينا جميعا ويفرج كربنا ويحفظ اولاد المسلمين جميعا حاولى بقى تمشيها ودى بينك وبين زمايلك وشيخ المعهد وظبطى اوقاتك عشان طفلك وخدى عارضة واعتيادى بس بالله عليكى ماتقصرى فى شغلك وحاولى تشوفيه كويس وتضغطيه انا عارفة ان ده تعب عليكى بس عشان القرشين يبقو حلال وربنا يبارك فى االرزق واهو عموما نص السنة قربت وان شاء الله يكون طفلك كبرشوية ويقدر يستحمل شوية اوياكل وعموما هى دى ضريبة عمل المراة انا عارفة ان اغلبنا خصوصا المتزوجات مش بيشتغلو اثبات ذات قد ماهو احتياج حقيقى فى ظل الظروف اللى احنا فيها وتقدر تشارك فى البيت والمصاريف ربنا يتولانا برحمته هو نعم المولى ونعم النصير

شكرا اختي الغالية جارة الوادي والله مافي حاجة في الدنيا تعباني مثل موضوع الضمير واني عاوزة اشوف شغلي بامانة ولما بقول اجازة بيكون من باب اني اخد وقت علشان ما اقصر في حق طفلي او شغلي ومن كتر ما انا باقضي وقت في الفصول المدرسين القدامى المتعينين يقولو لي خدي نفسك بالراحة دول هما 300 ملطوش مايستاهلوش وانا لو حتى الفكرة دي جاتني باستعيذ بالله من الشيطان الرجيم واضغط نفسي في الشغل اكتر عشان اعرف انام بالليل واسمحي لي اخيتي ان ارحب بصداقتك التي تشرفني كثيرا

يارب علي الظالم والمفتري والقوي يارب انت اقوي منه


حسبنا الله ونعم الوكيل