اتمنى اني اطلع مهندس اعمل ايه
 

بسم الله الرحمن الرحيم انا اتمنى اني اكون مهندس
وانا دلوقتي في اولى قانوي فياريت النصائح
وعلى وفكرة انا عديت خطوة كبيرة جدا في مشواري ده يعني الحمد لله انا قدرت اني اكون مهند لسه بقى حرف السين ده هو المشكلة

ياعم هي ميايه ترشي بيها اي حد في السجلات المدنيه ويزودلك حرف السين :d

بص
الشاعر بيقولك
وما نيل المطالب بالتمني ولكن تؤخذ الدنيا غلابا
فانت لازم تتعب وتشد حيلك وتعمل اللي عليك
وان شاء الله ربنا هيوفقك
والموضوع مش صعب علي فكره بس محتاج انك تعمل اللي عليك
وربنا معاك ونشوفك معانا في القسم كمان سنتين ولا حاجه ان شاء الله

ادعي انت بس وربنا يسهل

لأ فعلاً قطعت مشوار كبير :d

بس حط في اعتبارك انه الهندسة مش اسم
واوعى تفكر تدخلها عشان تعمل اسم بس

وكل النصايح اللى انت محتاجها دلوقتي إنك تجيب مجموع وتهتم اكتر بالفيزيا والرياضة وبس :d

الف شكر يا رجاله عالتشجيع
والف شكر يا بانزر عالنصايح

ربنا يوفقك
ومادام انت لسه فى اولى ثانوى يبقى لسه قدامك ردح من الزمان :D
شد حيلك بس فى تانيه وتالته ثانوى
(بينى وبينك العب فى اولى ) :d
بس ركز فى الرياضه طبعا ;)

العب ازاي بس يا كيمو
الوزير ابن التيييت ده
مش مدينا فرصة خالص

ياعم هتصدق الوزير ولا هتصدقنى ؟ :d

انا فى تانيه ثانوى وكان نفسى اطلع مهندسه بترول بس قالولى دى للولاد بس فمصممه دلوقتى اكون دكتوره ادعولى بالتوفيق

فعلا يابسمه احساس الفشل ده وحش اوى

اصدقك نت طبعا يا كيمو منتا مهندس بقا
ايه ده مهو كمان مهندس !!
االمشكلة يا كيمو اني مش بذاكر بس نفسي اغيب ومش عارف لدرجة اني ماغبتش الا 11 يوم
بس كان ليا سؤال وجيه بالنسبه لمهندس البترول
هو مهندس البترول لازم يكون بيعرف يعوم ؟؟!
سؤال تاني
الشغل في هندسنة البترول بيبقى محتاج واسطة او حاجة من الحاجات دي
سؤال تالت
مستقبل الشغل في الكليه دي كويس بره مصر ؟؟

معلش تقلت عليكم

اسمحلي اجاوبك لاني الي حد ما كنت بسال نفس اسالتك وانا في ثانوي وكنت بدخل هنا برده بحثا عن معلومات
سبحان الله اكنه امبارح .. ماع علينا

بالنسبه لمهندس بترول فانت لازم تبقي اكتر من انك بتعرف تعوم انك تبقي سريع
لان ساعات بتحصل انفجارات بتدمر دايره نص قطرها خمسه كيلو ولا حاجه
فلازم تقدر تجري اسرع من خمسه كيلو في الثانيه :d
لاء طبعا بهزر
هو اينعم ده بيحصل بس نادر يعني
وبعدين كل شغلانه وليها مخاطرها

بالنسبه للواسطه والمستقبل
فانا سمعت ان مهندسين البترول مؤخرا مبقوش يشتغلوا ولا يسافروا بره خااالص تقريبا

فاكيد هيبقي محتاج واسطه
وده علي حسب اللي اتقالي من سنتين والله اعلم

طيب ايه احسن قسم في الهندسة
من حيث الشغل

وما نيل المطالب بالتمني ولكن تؤخذ الدنيا غلابا

الموضوع مش بالسهوله ديه
لو كان فيه قسم هو احلي شغل
كانت الاقسام الباقيه هتقفل
كل قسم وليه شغل وانت شطارتك
وديه كلها حاجات نسبيه علي حسب كورساتك وتعاملاتك ومظهرك
وطبعا واسطتك :d

هههههههه بتعوم ايه يا استاذ ؟ :d
انت كمهندس بتشتغل بدماغك مش بجسمك
هو فعلا فيه مواقع للبترول بتبقى
on-shore
يعنى فى البحر بس بتبقى انت قاعد فى كابينه التحكم مش فى البحر بتنزل تجيب البترول بايدك :D :d :d
و التركيبات عموما مش بيعملها المهندس لكن الفنين و العمال

أما بالنسبه ﻷنك فى اولى ثانوى فذاكر طبعا
ﻷن أولى ثانوى بيتبنى عليها مواويل بعد كده - انت مفروض حتفضل تلعب لحد اولى ثانوى و متوقع انك بعد كده حتقدر تذاكر و تطلع من الاوائل !!!

أنا حاليا اتخرجت من الكليه و مازالت باذاكر يمكن عشان شغلى اكاديمى و حافضل اذاكر لحد اخر نفس ان شاء الله

اما عن انك سمعت ان مهندسين بترول مش بيشتغلوا و مش بيسافروا فانت سمعت منين و من مين !!؟
لسه الكلام ده بدرى عليه و بعدين سوق العمل بقت بتتغير كل سنه يعنى السؤال ده منطقى تسئله بعد اعدادى هندسة
و فى النهاية الشغل بايد ربنا

بالنسبه لموضوع الانفجارات هو فعلا بيحصل
بس ساعتها انت مش لازم تجرى بالعربيه او بالكابينه
ﻷ - فاكر فى الافلام العرىب لما كان خبير التفجير بيطفى القنبله قبل انفجارها بلحظات
هو ده اللى بيبقى مطلوب منك ساعتها ان تسد البير بحيث ان الانفجارات متطلعهش لسطح الارض و تسحب الحفار و تحاول تخرج باقل الخسائر الممكنه ( كل مكون من المكونات اللى بتشتغل عليها اسعارها بيوصل عشرات الملايين )

الدقاق لوحده بعشره مليون ( الدقاق ده هو مكون بيتركب فى راس الحفار و بيكون من الماس او ماده مينفعهش تصدى او تبوظ )