نصائح للجدد+موقع المناهج+آلة كاسيو..هديه!!
 

متميز والى الأمام

منتظرينك

طب دلوقتي أنا لم آجي أذاكر

أذاكر منين بالضبط

بص يابشمهندس....مصادر المذاكره ممكن تقسمها كالتالى:

1-مصادر أساسيه:

وهى المصادر التى لابد وحتما تذاكر منها لأن الامتحان مش هيخرج منها وهى :

*كتاب الماده+
*المحاضرات اللى انت كاتبها+
*السكاشن اللى هتاخدها+
*ورق الكورسات اللى هتصوره من زملاتك اللى بياخدوا كورسات.

ومادام أنا قلتلك انها أـساسيه....يبقى لو فيه محاضره أو سكشن فاتك....لازم تصوره أو تنقله من واحد زميلك....بجد متستهترش بالحاجات الصغيره دى...والله بتفرق...صدقنى.

_______________________________

2-مصادر اضافيه:

وهى المصادر اللى ممكن متحتجلهاش قوى...بس لو بتطمح للجيد جدا أو الامتياز...يبقى لازم تستخدمها وهى:

*المراجع الخارجيه (استشير الدكتور عن أفضل مرجع خارجى لمادته)+
*الانترنت(هشرح ان شاء الله بعض المواقع اللى ملكش غنى عنها فى وقت لاحق)

ومن هنا يجب تغير نظرتك للانترنت....النت مش وسيله للداون لود للجيمز و الأغانى....النت كنز غنى بالمعلومات الشيقه...وصدقنى....فيه بعض المواد فهمتها بالكامل أو بعض النظريات اللى درسناها عن طريق مواقع وكتب نزلتها وقريتها .
_______________________________

فى انتظار تساؤلاتكم يا شباب المهندسين....مع تحياتى:078111rg3:

شكرراااااااا على المجهود العظيم ده ياراجل

هوانت هندسة اية

موضوع جميل جدا ... قولنا يا بشمهندس عن الأنترنت وازاي كنت بتستخدمه وفي ايه وايه رأيك لو الواحد اخد كورس انجليزي !!
وجزاك الله كل خير

الزقازيق

بالنسبة لموضوع كورس الانجليزى ده

*فلو انت هتخده عشان فاكر ان الدراسه بالنجليزى صعبه ومعقده ومحتاجه جهابذه فى اللغه...فمتحملش هم....الانجليزى فى الدراسه هو انجليزى مصطلحات وليس جملا تحتوى زمن مضارع وتام ومبنى للمجهول وكلام من ده....الموضوع كله محتاج شهر بس فى الكليه وهتلاقى نفسك (لبلب)...متقلقش;)

*أما إذا كنت محتاج اثراء معرفتك اللغويه الانجليزيه...فمفيش مشاكل....إيدى على كتفك....واتوكل على الله...أكيد هتستفيد....بس لو الكورس هيطول...بلاش منه عشان ميشغلكش عن الدراسه لأن دلوقتى بقى عندك أولويات.

بالنسبة للنت:

معلش اصبر عليا شويا...تابع بس الموضوع ...وان شاء الله هكتب عنه قريب

___________
بالتوفيق ياشباب....مع تحيات الأمير الرقمى

جوووووود
..........

ممتاز ............

شكرا يابرنس علي الكلام الحلو ده وارجو منك اثرائنا بموضوعاتك الجميله

انته شكلك فاهم يا نصه
طب بم انك من هندسة الزقازيك وانا كمان من هندسة الزقازيق يعنى احنا مع بعض بس الفرق انا لسه هادخل اعدادى ومعرفش حاجة خالص فيريت تكون موجود معانا دايما وتفيدنا وفى موضوع جديد انا لسه عامله ياريت تبقى معايا فيه عنوانه هندسة الزقازيق http://www.thanwya.com/vb/showthread.php?t=149751

وياريت تقول عن المواقع اللى هتفدنى وتفيد الجميع وجعله الله فى ميزان حسناتكم

موضوع الكتب العربى حلو اوى

جزاك الله خيرا يا باشمهندس و ياريت نشوفك معانا على طول و تشد من عزيمتنا بما انك خبرة

طب بم انك عندك الخبراة اللى انا بسم الله ماشاء الله ملااحظها انا بحب الفيزياء يبقى ادخل قسم ايه والقسم ده لما بتخرج ممكن اشتغل ايه ويارب تفضل معانا مش تسيبنا بم انك خلصت فبطلب منك تفيدنا بخبرتك

انت بجد فعلا اكتر من رائع وجيتلنا فى الوقت المناسب
انا بقى طبعا بطبعى الرغاى احب اسألك كام سؤال كده هما مش كتير ممكن تقول كتير اوى فنقسمهم على مراحل
اولا:
1-ايه اكتر قسم ليه مجال عمل؟
2-ازاى اقدر اتعامل مع الدكاترة والمعيدين بحيث انى استفاد منهم على اكبر قدر؟
3-ازاى اقدر اجيب الامتياز بالرغم انى فى الاكثر تعقيدا ( عين شمس) وهل هى فعلا معقده ولا صعبه (تفرق صح؟)؟
4-يا ترى فى اولويه لجامعه عن جامعه تانيه فالشغل يعنى مثلا يفرق حريج القاهرة عن عين شمس؟
5-هو فى فعلا خير اللهم اجعله خير مهندسن بيقبضوا بالدولار غير بتوع بترول ولو فى فعلا ايه الكورسات اللى بياخدوها او ايه مؤهلاتهم لكده؟
6-ازاى انظم يومى بالظبط بين الجامعه والمذاكرة وانا اسمع انهم بيخلصوا متاخر جدا فهل هيبقى فى وقت وهندر ننظم نفسنا فى المذاكرة؟
7-يا ريت بقى اللينكات اللى فيها الكورسات ويا ريت اهم البرامج الهندسيه اللى لازم تبقى عندى ايه؟

ونيجى لاخر المرحله دى....... سورى بجد انى صدعتك بس تقول ايه بقى نصيبك يا بنى
المهم فعلا انا محتاجه ردك وخصوصا انك صاحب خبره عن اى حد ممكن اساله ويا ريت تفيدنا بخبرتك دى
وميييييييييييييرسى ليك ورمضان كرييييييييييييييم

أهلاً يا أمير
موضوع رائع جدًا بس أحب التعديل فى الأسعار

آلة كاسيو 570 كانت السنة اللى فاتت ب 100 جنيه بس
يمكن تلاقوها دلوقت ب حاجة و 80 لو نزل أجدد منها و هى امكانيتها حلوة

و بالنسبة للمناهج فى الرياضة معروف إن مناهج الخليج فى الرياضة أحلى مننا بمراحل فظيعة
و لو بتدور على النت هتلاقى كل الدول بتشارك فى منتديات رياضة سعودية و اماراتية بس بيبقى لينا أقسام برده
و عن نفسى درست السنة ده
رياضة 2 + إحصاء + مستوى رفيع
و مش محصل منهجهم برده ^___^
على رأى سعد زغلول مفيش فايدة
على فكرة لو بيفكروا يطوروا المنهج صحيح هيخلو الميكانيكا مع الفيزياء و يزودوا الدروس الناقصة لرياضة 2
زى ما معظم البشر عاملين


منتظرين جديدك و ردك على أسئلة م / ديرو

و رمضان كريم يا بطل

1000مبروك على تثبيت الموضوع وأتنمنى أن يكون هذا حافز قوي لك

ايوه انا كنت هسئل نفس الاسئله ده وخصوصا
-ازاى اقدر اجيب الامتياز بالرغم انى فى الاكثر تعقيدا ( عين شمس) وهل هى فعلا معقده ولا صعبه (تفرق صح؟)؟

لان اي حد تقوله عين شمس يقولك اصعب كليه معقده لحد ماتعقدنا من قبل ماندخلها

شكرا ليك ياغالى...وآسف على تأخرى فى الرد.....وفعلا أنا نفسى الشباب يحبوا المجال اللى هما فيه...شدوا العزيمه ياشباب!


كويس أنا كنت ناوى أتكلم فى الموضوع ده....

أنا عندى ردين...أحدهما مثالى والآخر واقعى على سؤال واحد

السؤال:أدخل قسم إيه؟...أو...طب أنا بحب القسم (الفلانى)...أدخل فيه؟

الرد المثالى:
طبعا لازم تدخل القسم اللى بتحبه....لأنك هتقدر تدى فيه جهد أكتر (وبحب) .... ولو طموحاتك أعلى يبقى لازم تكمل دراسه أكاديميه وتبقى معيد وتحضر الماجستير وبعديها الدكتوراه...(أنا بدأت المشوار ده)......أصل زويل مش أحسن من أى حد فينا إلا بعزيمته...لأنه مش مولود بالعلم جاهز....هوه برضه بدأ حياته العلميه زيك....وبدأ يتراكم لديه معارف زى اللى هتتراكم عندك مع نهاية الدراسه....بس هوه عرف يوظفها واستغلها صح....عموما...نهاية مشواره....كانت نوبل

واحد هيقوللى: يا سيدى الكلام ده حلو....بس أنا عاوز أتخرج وأقبض مرتب حلو و أتجوز وشكرا
أقوله: معاك حق....فى الايام اللى احنا فيها دى أنا بعذرك لو بتفكر بالطريقه دى...عشان كده...اقرا معايا الرد الواقعى

الرد الواقعى:
عندك حد قريبك شغال فى مجال معين (كهربا-مدنى-ميكانيكا-....الخ)؟.....لو اجابتك (اه عندى)...أقولك :عندك فرصه لقطه متسبهاش....صدقنى ....كل مجالات الهندسه لها شغل سواء فى مصر أو بره.....عشان كده ممكن تعصر على نفسك لمونه وادخل القسم اللى انت حاسس انك ممكن تلاقى له فرصة عمل ولو كنت مش حابه بنسبة 100%....ومع الأيام هتلاقى نفسك حبيت المجال ده....وده حصل معايا....أنا بعشق الكمبيوتر وكان نفسى أدخل قسم حاسب.....بس حسبتها....لقيت عندى فرصة عمل فى الكهربا بعد ما اتخرج (أحد أقاربى فى الكهربا) وممكن يسهلى الأمور....اتوكلت على الله ودخلت الكهربا (اللى كنت معتقد انى مبحبهاش)....والحمد لله دلوقتى بقيت مهندس فى أحد محطات المحولات بعد وقت قصير من التخرج...وفى نفس الوقت....باستغل الكمبيوتر فى شغلى...(جمعت بين اللى بحبه(كمبيوتر)-واللى هينفعنى(الكهربا))




ااجابة السؤال1 : أعتقد أنا جاوبت فى الاجابه اللى فاتت

اجابة س2:اكسب احترامهم باجاباتك فى أول امتحان ميدتيرم....هتلاقيهم هما اللى بيدوروا على صاحب الورقه اللى صاحبها مجاوب تمام.....هيهتموا بيك لو رحت ليهم المكتب بتاعهم لأى سبب...(مهو اللى قدم السبت هيلاقى الحد)

عذرا سأجاوب باقى الأسئلة فى وقت لاحق لأنى مشغول (بس ابقى فكرنى عشان منساش)

الحمد لله...ده كان بسبب التوفيق وبسبب تفاعلكم

تحياتى....الأمير الرقمى
______________________________
______________________________
موقع البحث المعرفى الأمثل فى وجهة نظرى

ربنا يباركلك يا بشمهندس ويكثر من امثالك
مبروك التثبيت ومتنساش تحكلنا عن النت وازاي نستخدمه وكمان باقي الأسئله بتاعت eng_dero علشان بجد اسئله في الجون

ياريت تجبلنا كتاب فيزياء بالعربى كده نبدء نقرى فيه علشان نفهم شوية شوية كده

الف شكر عالموضوع بس انا عندى سؤال مفيش مواقع للطلاب الى زينا كده عشان نعرف و بدل الكورسات و البهدلة و هنستخدم الكمبيوتر فى ايه فالكلية و ياريت اسم مواقع نستفيد بيها فى الدراسة و شكرا

أنا قصدى لوقريبك ده هيقدر (إن شاء الله) يشغلك معاه...وفى مكان كويس....يبقى اتوكل على الله و متترددش...لكن مش هضحك عليك....موضوع الفيزيا ده أعتقد إن مجاله أكاديمى أكتر منه عملى فى السوق....

أنا عندى حل لك....

اتوكل على الله وخش مدنى....وبعد ماتتخرج ان شاء الله...تقدر تقدم على ماجيستير فى (الرياضيات والفيزياء) ...وبكده تضرب عصفورين بحجر......(الشغل بقسم مدنى+دراسات فى مجال الفيزياء)

--> بالنسبه لموضوع انت خريج جامعة إيه...وهل ده بيفرق معاك فى الشغل....فده...كلام فاضى.ومتصدقش اللى بيحاولوا يقنعوك بغير كده.....أهم حاجه المقابله اللى بتعملها للشغل و جدارتك بالشغلانه اللى انت متقدم لها حتى لو انت خريج جامعة موزمبيق


مازلت متذكر المهندس eng_dero وأسئلته ..... ولكن عذرا فالوقت يسرقنى.....سأكمل اجابتى عنها فى أقرب وقت ان شاء االه و تحياتى للجميع

الأمير الرقمى
_________________
موقع شباب باور الناشئ....يستحق الزياره والدعم......أدعوكم لمخاطبة القائمين عليه لتطويره...فهو بذرة جيده
_________________
عذرا ان لم أرد على الأسئلة فى وقتها.....لكنى معكم دوما

اخى الكريم شكرا على المجهود الرائع انا لسه داخل اعدادى هندسه واسمع انه اصعب سنة وخصوصا حاجةاسمها الرسم الهندسى او مش عارف اسمه ايه فممكن تقولى ايه حكاية المادة دى على فكره انا برضه هندسة الزقازيق

أولا : ألف مبروك يابشمهندس المستقبل....واحمد ربنا انك دخلت المجال ده....فيه آلاف بيحلموا يكونوا مكانك...وكمل شكر النعمه اللى جت لغاية عندك بإنك تكون جدير بلقب المهندس... 1000 مبروك مره تانيه.

ثانيا: بالفعل .... اعدادى هندسه تقدر تقول عليها (رخمه شويه) .... لكن كلمة (صعبه) مش فى محلها....الموضوع بيبقى بس تغيير نظام التعليم المألوف اللى انت اتعودت عليه فى الثانوى....يعنى مفيش حاجه اسمها واجب ولا حاجه اسمها امتحانات شهر...وغيره كتير......عشان كده الناس (معتقده) إن اعدادى صعبه.

الدليل: إن الماده العلميه اللى هتدرسها ف أولى هتكون أتقل شويه من اعدادى ... إلا انك هتحس ان أولى سهله

ثالثا: الرسم الهندسى ده متعه فى حد ذاته....اللى بيقلك انه صعب شكله مكنش لاقى وقت فاضى من كتر خروجاته وتضييعه للوقت انه يرسم.....الرسم سهل جدا ومفيهوش مشاكل.....دا هوه الحاجه الوحيده اللى تميزك عن غيرك....انت مش ناوى تشيل المسطره ولا إيه؟:d

_____________
تحياتى للجميع....الأمير الرقمى
_____________
أروع موقع لاستعراض المصحف كالواقع تماما

يا ريت بس تقولنا على المواقع المهمة لاعدادى و هل لازم تبيض المحاضرات انا المسافة بين الكلية و البيت ساعتين فمعتقدش انى هلاقى وقت و شكرا على اهتمامك

بالنسبة لموضوع المواقع وأهمية النت فى حياة طالب هندسه....هعمله مشاركه متكامله ان شاء االه بس قدام شويه عشان هيحتاج منى وقت...

أما بالنسبة لتبييض المحاضرات فلابد وحتما ومن الواجب و أكيد و must be و should انك تبيض المحاضرات...لإن فيه تركات كتير فى الامتحانات بتيجى من المحاضرات.....وثانيا تبييض المحاضرات بيحسسك انك فاهم كويس....دا غير انك لو كنت مش فاهم الا 30% بس فى المحاضره...هتكتشف انك بقيت فاهم نسبة 75% أو أكتر لما تبيض المحاضره بإيدك...مش مجرد انك تقراها وبس


ولو انت شايف ان المسافه اللى مدتها ساعتين بينك وبين الكليه دى مشكله.....هقولك إن معايا زميل (اتخرج دلوقتى) كان شغال بعد الكليه (ليلا) طوال فترة الدراسه (5 سنين ) عشان يصرف على نفسه وتقديره النهائى جيد مرتفع.....احكم بنفسك

________
تحياتى

معلش استفهام صغير
انت اشتغلت ؟

طب بعد اذنك كنت عايز اسأل حضرتك سؤال .... انا حيران ما بين قسم ميكاترونكس و الكترونيات و اتصالات و انا مقرر انى مش هدخل حاجة غير الاتنين دول... حضرتك شايف مين احسن و مين مجاله احلى؟؟؟؟؟؟؟؟ ياريت تفيدنى

انا كمان كنت هاموت علشان اخش قسم المايكترونكس
بس قالولى ان مالوش شغل قى مصر كله بره

الحمد لله...فى محطة محولات....المرتب معقول....بس طبعا مش زى القطاع الخاص.....لكن مميزات الحكومه على المدى الطويل أفضل (وجهة نظر كثيرون يختلفون معى فيها)

ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس ميكاترونكس......ولحد بكره ميكا ترونكس.

هى الحياه إيه غير الميكا ترونكس.

لولم أكن ميكاترونكسيا لوددت أن أكون ميكاتروكسيا

ومتفتكرش إنى خريج القسم ده....أنا خريج باور.....بس بصراحه قسم الميكاترونكس هو مستقبل أى مهندس عاوز يوصل لهدفه بسرعه....بمعنى.... الميكاترونكس هو لب أى مصنع ....يعنى أى مصنع فى الدنيا محتاج مهندسين ميكانيكا ومهندسين باور.....طب هو يغلب نفسه ليه؟......فبيجيب واحد ميكاترونيكس يجمع مابين الاتنين....لو الزمان رجع بيا لورا...كنت دخلت الميكاترونيكس.....

وعلى فكره ياريت شباب الزقازيق يدخلوه لأنه لسه فاتح جديد فى الكليه...وأكيد هيحتاجو معيدين فيه بعد الدفعات متتخرج منه ....فرصه للى حاسبها صح وبيفكر لبعيد!!!

[quote=الأمير الرقمى;1559503]الحمد لله...فى محطة محولات....المرتب معقول....بس طبعا مش زى القطاع الخاص.....لكن مميزات الحكومه على المدى الطويل أفضل (وجهة نظر كثيرون يختلفون معى فيها)


اكيد فى شركة توليد كهربا أو توزيع
و المميزات دى جميلة جدا
لو انت قصدك على مميزات النقابة

طب بالنسبة لموضوع المحاضرات دا؟ انا هقعد اكتب من غير ما افهم؟ ولا هفهم ومااكتبش؟
ولا هعمل ايه بالظبط؟

فسم جامع ما بين الميكانيكا والإلكترونيات
وهو بالتأكيد قسم صعب جداً
شغله حلو أوى بس مش موجود كتير فى مصر (حسب ما الكل بيقول )
بس ممكن تشتغل مكان بتاع ميكانيكا أو مكان بتاع إلكترونيات

[quote=محمد بكر;1559726]لا...محطات المحولات بتبقى تبع الشركة المصرية لنقل الكهرباء وليس النقل أو التوزيع....وبالنسبة للمميزات...فأنا أقصد الاستقرار إلى حد ما....بمعنى أن القطاع الخاص ممكن فى أى وقت يقوللك "مع السلامه" وده وارد....أما القطاع الحكومى فده مستبعد إلى حد كبير...بالاضافه إلى مستحقاتك الماليه تكون مصانه .... ووجود المعاش (بعد عمر طويل إن شاء الله) .... يعنى....تقدر تقول حاجات تكمن شويه...عكس القطاع الخاص اللى على كف عفريت

لازم تكتب ورا الدكتور...حتى لو منتاش فاهم اللى بيقوله....ولما تيجى تبيض المحاضره وتلاقى أجزاء مش فاهمها....تسأل عنها واحد زميلك تانى يوم...ولما تروح....تسجل الجزء اللى مكنتش فاهمه ....وبكده تضمن ان محاضراتك تكون كامله (كتابة و فهما).......

دائما أنا معترض على جملة (صعب جدا).....بناء على إيه هو صعب؟....انت درست عشان تحكم؟....متخليش غيرك (من المحبطين ومثبطى الهمم ) يأثروا على فكرك....القسم ده هايل...وأنا أشرت إليه فى مشاركه سابقه.
وشغله موجود فى مصر ف كل حته (أنا لفيت مصانع وشفت وضع الميكاترونكس مميز إزاى)

والله أنا آسف إنى لسه مجهزتش مشاركه قويه عن استخدامات الانترنت الهندسيه...بس وعد منى ف أقرب وقت إن شاء الله...بس انتوا تابعونا

طبعا المجال النووى ده أيامه...خاصة موضوع المحطه النوويه الجديده اللى هتبقى فى الضبعه ان شاء الله...و أكيد هيحتاجوا استاف كبير من المهندسين .... فاتوكلى على الله وادخليه .... بس مش هضحك عليكى....معرفش كتير عن مجالات الطاقة النوويه فى مصر وشغلها أخباره إيه.....
أعتقد مجالات الكيمياء أكتر فى الشغل....لكن المستقبل فى الطاقة النوويه....القرار قرارك
_________
تحياتى للجميع....ونلتقى بعد الفاصل :-)

Merci جدا يا امير على اهتمام حضرتك بس كنت عايزة اعرف رايك بالنسبة لقسم بترول للبنات و عموما فى مجال الشغل و برضه فى قسم حاسبات و يا ريت معلومات اكتر عن القسمين

شكرا ليك yasasa حقيقي نورت المحكمة انا اصلا دى كانت اول مرة اسمع فيها عن القسم ده رغم انه من الواضح انه معروف اوى

انا داخل هندسة الزقازيق
وانته كده هتلخبطنى انته قولتلى ادخل مدنى زى قريبى
وبتقول فرصة ان الواحد يدخل قسم الميكاترونكس لانه فاتح جديد فهل ادخل مدنى ولا ادخل القسم ده اى واحد افضل ليا

بالنسبة للبنات ... فأنا وجهة نظرى ان الحاسبات أفضل بكتير لإن اللى أعرفه إن دور المهندسات فى البترول ينتهى على البر...يعنى مش بيروحوا للمواقع إللى فى البحر مثلا....غير إن طبيعة الشغل تتنافى مع طبيعة المرأه...واستقرارها مستقبلا لتكوين أسره.....أما شغل الحاسبات فهو يعتمد أولا وأخيرا على القدرات الفكريه و التحليليه و المنطقيه للمهندس....نصيحه:خشى حاسبات

الموضوع مفيهوش لخبطه ولا حاجه....أنا قلت ان الموضوع يختلف من شخص لآخر طبقا لظروفه....انت قلت ان ليك قريب شغال ويقدر يشغلك معاه لو دخلت مدنى....خلاص....يبقى انت قدامك فرصه....حبيت تستغلها..كان بها...محبتش وكان ليك خط واضح م الأول انك تدخل القم اللى انت حابه....يبقى برضه مفيش مشكله.....
فيه ناس تحيب تستغل الفرص اللى أمامها وتتغير عشان الفرص دى تناسبها....
وفيه ناس محدده خط سيرها م الأول ومستعده لتطويع الظروف لمصلحتها.....

انت سيد قرارك

أًصل ده القسم الى أنا نفسى ادخله فى حلوان

مع انه مجموعه قليل بياخد من جيد بس تقريباً

طيب اوك انا من اكتر الناس اللى بيستغلوا الفرص دى بس انا عايزه اعرف انهى احسن للبنات الميكاترونكس ده ولا مدنى مع العلم ان دول اكتر اتنين انا مقراراهم بس عايزه اعرف ايه الاحسن واكتر شغل لينا ...؟
وكمان انا لما قدمت فى عين شمس لقيت قسم مميز اسمه هندسه كنديه مصريه هو بمصاريف اه بس الدفعه المتخرجه بتسافر كلها بره فياريت لو تعرف اى حاجه عنه وياترى بتبقى احسن فى الشغل فعلا ولا ...؟

الكفه ترجح لصالح المدنى بالنسبة للمهندسات
 

الفرص متساويه للقسمين....هنا ....لازم ميولك الشخصيه تلعب دور....

فلو الكهربا والآلات الكهربيه وطرق التحكم فيها بتستهواكى وكذلك شغل المصانع ( مع إنى أعتقد ان شغل المصانع...أو الوجود فى صالة العمل بجوار الآلات والماكينات لايلقى قبولا كبيرا بالنسبة للمهندسات-وقد يكون هذا أيضا رأى أصحاب المصانع)....يبقى الميكاترونكس هو الاختيار الأنسب

أما إذا كانت الميول أكثر للرسم والتخطيط الهندسى...فالمدنى هو الأصلح خاصة إذا كان العمل فى مكتب للتصميمات الهندسيه وتكون المتابعة فى الموقع ليست جزءا أساسيا من العمل اليومى للمهندسه....فعملها الأهم هو التصميم بالمواصفات المطلوبه للمشروع المطلوب انجازه...دون الاحتكاك اليومى بأرض الموقع

طب بالنسبة لمستقبل هندسة الاتصالات و الالكترونيات؟ كويس ولا شغلهم قليل؟؟؟ وهل فعلا الاتصالات
دى المفروض الواحد يقعد ياخد كورسات فيها من بعد ما يتخرج لحد ما يموت؟؟؟؟؟؟؟؟

باور أفضل....نسبيا
 

نصيحة منى...لو بتحب كهربا عموما....بس متردد فى قسم إيه.....يبقى خش قسم كهربا باور.....مش لإن الاتصالات وحش....ولكن لو فيه وظيفه فى أى مكان ومحتاجه مهندس كهربا....واتقدم واحد من باور وواحد من اتصالات ....هياخدوا بتاع الباور أكيد (حسب طبيعة العمل)......

وياريت محدش يفهم كلامى غلط.....دا رأييى الشخصى....لكن كل قسم وله شغله....بس فعلا....بتاع اتصالات محتاج مجموعة كورسات(بس مش أكيد لحد مايموت :-)) عشان يلاقى وظيفه كويسه....بس ده ميمنعش ان خريج أى قسم ممكن يطور من نفسه بمجموعة كورسات (فى الأجازه أو بعد التخرج)....لانها بتسنده برضه شويه فى cv اللى بيقدمها للعمل