علوم اصعب من طب وصيدله
 

علوم اصعب من طب وصيدله ..>> مقوله بيقولوهالى ناس وتيجى ناس تانيه تنفيها وتقول (ايه الهبل ده لا طبعا احنا ارحم منهم ) ..بجد انا اتشتت خالص ..

ماهو بصراحه بقى لو كانت المقوله صح مينفعش نذاكر ويطلع عينا اكتر من بتوع الطب والصيدله وفى الاخر اما تيجى تشتغل معاهم ..تتعامل على انك اقل منهم (تحت الدكتور ) حاااااااااااجه صعبه جدااا ..وحتى لو اخدت كيميا حيويه وبقيت دكتور تحاليل >> ..هتلاقى بعض الناس المستفزة اللى تقولك .{ انا مش معترف بيك انك دكتور اصلاااا } ..


وبساااااااااطه كده بتوع طب وصيدله اوقات دراستهم فى الجامعه ..اما بيجوا يتعبوا ويزهئوا من المذاكرة ..يفتكروا مستقبلهم هيبقى عامل ازاى والناس هتعاملهم ازاى ..فبيكون مستقبلهم حافز ليهم وهما لسه فى الدراسه ..

لكن اما اكون فى علوم وازهق من المذاكرة واجى افتكر مستقبلى انى هابقى اقل من الدكاتر اللى انا اصلا بذاكر اكتر منهم ...يبقى عمر ما الواحد يفكر يدخل كليه زى دى ابدااااااااااااا


.... قولوا لى رأيكوا فى الكلام ده ...
ويبقى السؤال ..(هل علوم اصعب من طب وصيدله ) ....:bosyht9::bosyht9:

السلام عليكم ........ وكل سنة وانت طيب ....... اولا : كل واحد بياخد نصيبه وربنا مخصص لكل واحد فينا عمله وبتاع علوم عمره ما كان اقل من بتاع طب او هندسة لأن المجالات والتخصصات مختلفة والشطارة بقى انك ازاى تقدر تبدع ف مجالك
ثانيا : اللى بيقولولك ان بتاع علوم اقل من بتاع طب ماتسمعش ليهم دول بيهبطوا معنويات بس ومش فاهمين حاجة لأن احنا كلنا بنخدم بعض يعنى انا مقدرش اعيش من غير دكتور تحاليل مثلا وانت متقدرش تعيش من غير دكتور فكلنا بنكمل بعض ومفيش افضلية وبالعكس عمل الدكتور البشرى مش هايتم الا بوجود دكتور التحاليل
وانت ممكن ربنا يوفقك ولما تجتهد يكون مكانتك ورزقك احسن مليون مرة من الدكتور البشرى فالكلام ده مش مقياس
فكر ف الامور بعقل وتدبر كده وهاتلاقى كل حاجة موزونة وربنا يوفقك ويعينك
ومن ناحية المذاكرة كتير اخلص النية لله وحط ف دماغك انك كل ما هاتذاكر اكتر كل ما ربنا يكرمك اكتر ويعلى شأنك ومكانتك بين الناس
ولو ع كلام الناس : الناس مفيش حاجة بتعجبها والدليل ع التخلف اللى احنا فيه ان بعض الناس بتحترم الغنى أكتر من العالم
اتمنى اكون افدتك وسعيد بسؤالك ويارب اكون وفقت ف الرد وشكرررررررررا

شكرا يا عمر على رأيك وعلى فكرة( انا بنت مش ولد) بس مش ده الموضوع

انا شايفه ان كلامك صح بس اللى قالتلى موضوع انك فى الشغل مش هاتتعملى زى الدكتور هى اصلا

خريجه علوم وبقت دكتورة تحاليل و قبل ما تفتح معملها كانت بتشتغل مع دكاترة وفى معامل ..واول

حاجه عرفتها انها اقل من الدكاترة (المرتب ) ..وكتير مش بيقولولها يا دكتورة ..وانا واثقه فيها وهى مش

من النوع اللى بيحبط ..وده اللى خلانى استغرب اكتر (اومال لو كانت من الناس اللى بتحبط كانت قالتلى ايه ؟!) :( ..
بس برضه حضرتك مريحتش قلبى وجاوبتنى علوم اصعب من طب وصيدله ؟:bosyht9:

معلش آسف بحسبك ولد ........ بصى يا ستى من ناحية المرتب ع رأى المثل دى ارزاق ومقسمها الخلاق ومش قاعده ان بتاع علوم بيبقى اقل ف المرتب من بتاع طب دى حاجة بتاعة ربنا
ومن ناحية ان الناس مش بتقولها يا دكتورة اعتقد ان الموضوع ده بيفرق مع ناس وناس ممكن هى تكون بتزعل وممكن انا مثلا مش بتفرق معايا واهم حاجة اعمل شغلى وخلاص واحنا مش هانقدر نتحكم ف معاملة الناس فأنا من رأيى انها تكبر دماغها
وحكاية صعوبة الكلية دى طبعا مقدرش احكم فيها عشان انا مجربتش صيدلة ولا علوم بس بسمع الناس اللى اكبر منى ان الطب صعوبته ف طول السنين وكتر المناهج وان المادة العلمية ف صيدلة وعلوم اصعب من طب ده الكلام اللى بسمعه واعتقد ان مش هايفرق معاكى كتير حكاية الصعوبة دى عشان انا رأيى تركزى ف كليتك وسيبك من الكليات التانية عشان كل كلية لها مجالها ونظامها وماينفعش المقارنة بينهم

وربنا معاكى ويوفقك ونشوفك دكتورة كبيرة كده ان شاء الله
ع فكرة انتى دكتورة واللى يقول غير كدع يبقى مابيفهمش (نرفع معنوياتك شويه) :d:d:d:d

والله عمر قال كل حاجه ومعاه حق انتى ركزى فى دراستك وفى ايدى تحققى نجاح اللى فى طب وصيدله مقدرش يحققه اما الشغل والمرتبات فدى ارزاق
توكلى على الله والله الموفق

ربنا يكرمك ياحبيبتى ويكرمنا جميعا

الموضوع حلو قوى بس انا عندى رأى

انا اعرف صحابى كلهم منهم فى طب وهندسة وعلوم وصيدلة بس كلهم اجمعوا على ان علوم اصعب كلية فى المجموعة الطبية والهندسية وبالنسبة لموضوع لقب دكتوره بلدنا ديه دايما متعترفش ببعض الكليات والالقاب برده فانتى خليكى فى مستقبلك وملكيش دعوه بالمسمى الوظيفى عشان بلدنا مش متقدمه فى العلم عشان تعرف الفرق بين دكتور تحاليل ودكتور عادى وكمان انتى ممكن تخشى اى قسم تانى وممكن تشتغلى فى شركات ادوية ده كمان هما بيفضلوا خريج علوم عن صيدلة واسمك زيهم كيميائىة او احسن منهم كمان

من اخرها انا ان شاء الله علاج طبيعى وعلوم دراستها صعبة جدا اكتر من طب و علاج طبيعى وصيدلة واسنان وبيطرى احنا هنا الى مبنقدرش قيمة العلم والعلماء الكلية دى هى الوحيدة الى ممكن طلابها ينهضوا بمصر بعلمهم طب صعبة فى طول الدراسة وعلاج طبيعى صعبة ومرهقة جدا لانها عملى اوى وعلطول فى مستشفيات من سنة تانية وبتحسى انك دكتورة قبل متتخرجى صيدلة مفيهاش صعوبة راحة الراحة وملهاش اى التصاق بلمرضى واسنان سهلة ولذيذة جدا اما علوم فصعبة جدا جدا جدا ولازم الاجتهاد فيها وبعدين من غير التحاليل مفيش دكتور هيشخص تشخيص صحيح هو اهم حاجة طبعا يا دكتورة انتى دخلتى كلية العلماء والدكاترة بلتوفيق

السلام عليكم ورحمة الله وبركاتة أنا بقي من وجهة نظري أنا ان الحكمة مش الناس بيقولو أية او أية هي المرتبة عند الناس ممكن دكتور خريج طب وفاشل علشلن مش حاببها وباردة كيميائي نفس الكلام وكمان أنا لية نفسي أنا وانا شايفة نفسي هل أنا واثقة من نفسي لدرجة اني اقول للعالم اني احترم نفسي واقدر أفيد المجتمع وعاملة نفسي هدف اني اتفوق في الحاجة اللي دخلتها حتي لو كانت حقوق ومش معني كدة اني بقلل من الكلية ماشاء الله بيخرجو منها مستشارين مش هي دية القصة أنا عارفة بس الشاهد ان أنا اكون حاجة كويسة أفيد الاسلام والمسلمين والوطن اللي أنا فئة وبس واحب العمل دة حتي لو مظلومة مفيش حاجة بتيجي بساهل اتوكل علي ربنا واعمل اللي عالية وان الله لا يضيع اجر من أحسن عملا صح ولا أية يا جماعة وعلي فكرة أنا في كلية علوم سنة اولي ان شاء الله والكلام دة والله بتكملة لنفسي لان الكلام دة اتقالي لدرجة اني كنت حاسة اني داخلة علي جهنم وأرجو ان وجه نظر وضحت وربنا يوفق الجميع ان شاء الله .

انا عارفه انى الارزاق طبعا على ربنا بس برضه خلينا نتكلم فى الواقع اللى بيقول: ان ناس كتير خريجى علوم ومفيش شغل او اللى بيشتغل بمرتب قليل او اللى بقى مدرس! ..
يعنى مثلا عمرك سمعتى عن واحد خريج صيدله مش لاقى شغل ..لا طبعا لان كمان عندهم تكليف يعنى كل الكليات اللى فوق علوم ماعدا (طب بيطرى) ضامنين شغل ..وخريج صيدله ده بيفتح صيدليه ويقعد فى البيت ومرتبه يجيله لحد عنده كمااان ..فهو ده الواقع اللى انا شايفاه :(

بصى يا حيبتى انا راى فى كلية العلوم ان الكلية دية ام كليات العلوم كلها وصيدلة وهندسة وغيرة دة اختصاصات متفرعة من كلية علوم وخاريجنها مطلوبين وبذات بتوع الكيمياء يعنى مثلا بابا عايز واحد كيميائى لسة خاريج جديد من علوم يتدرب على ايد واحد ويسافر برة يكون مندوب لمصر هناك اوكى شوفى الرتب وكمان تجارة فى الكيماويات يعنى بيعلا كل شوية ماشى ديه علوم
ونصحتى ليكى بقى ياجميل
انتى مش بتحبى الاحياء ادخلى علوم بيولوجى عارفة هاتقوليلى انك عايزة تبقى دكتورة واحدة واحدة بس عالية
ادخلى علوم وابقى معيدة وبعدين دبلومة وماجستير وبعدين اسمك دكتورة فى عين اى حد يقدر يتكلم
وكمان احسن مايتقال دكتورة بس دكتورة فااااااشلة صح ويقولو لا اوعى حد يروح عندها دية فاشلة ومابتحبش ماجالها صح
ادخلى حاجة بتحبيها وحبيها وتفوقى فيها
هاتقوليلى مشوار طويل وانتى وراكى دة حلمك واشتغلى عالية اوكى
فكرى فى اللى قولتوهلك وقوليلى رايك
انا عن نفسى بصراحة ماكنتش عايزة علوم علشان اكون واضحة ولو عرفتى كنت عايزة ادخل هاتضحكى عالية كنت عايزة فنون تطبيقية او جميلة بس المجموع حاجة مالهاش دعوة بالعلوم بس انا كنت بحب الرسم والجرافيك والكلام دة
بس انا كنت فى ثانوى عايزاها بشدة بس كنت بقول لنفسى هو انا ممكن اعرف افيد الاسلام والمسلمين منها مممممممممممم فكرت قولت اكيد انت شاء الله ولما ربنا قدرلى الكلية دية قولت اكيد فيها الخير اكيد ربنا تدبيرة فينا عجيب وقولت لنفسى باردو اكيد الكلية دية هاقدر افيد بيها الاسلام والمسلمين والوطن اللى انا عايشة فية بس هى دية حكايتى مع الكلية ونظرتى اتغيرت من ناحيتها بعد ماكنت باكرها ودلوقتى حابيتها بس مافيش حاجة معينة انا عايزاها دلوقتى بس قولت ساعتها هابقى استخير وربنا باردو اللى يقدرو لية هو دة الخير
فانت خلاص استسلمى للربنا قدرهولى وقلبى المحنة منحة ليكى واكيد صدقينى هاتبقى حاجة ماكنتيش تتخيلى انك هتكونية ماشى حبيبتى دة وجهة نظرى عن الكلية
وماتنسيييييش ان الدكتووووووووور العااااااالم احمد زويل خاريج منها هاااااااااااا اوعى تنسى دية وتخيلى بقى مين احمد زويل وغيرة من العلماء خاريجين من الكلية دية فتفائلى بالخير تجدية

بصي يا سالا
- اقلعي بس معلش النظاره السودا اللي انتي لبساها دي وخلينا نتكلم بالراحه
- الكليه مش معضله أوي كده والدليل على ده اني أعرف عدد مش قليل في دفعتي جايبين امتياز والتقديرات عامه عاليه بالنسبه لسنه اولى
بس الي هيفرق معاكي ويميزك عن غيرك في الكليه دي درجه حماسك و استعدادك للمذاكره وعدم سخطك الداخلي على الكليه ورضاك عن نفسك وعن مستقبلك .. صدقيني لو طوعتي الحاجات دي ليكي وتفرق معاكي جدا
عشان كده لازم تكوني مقتنعه بينك وبين نفسك انك كل ما تذاكري وكل ما تتعبي هتلاقي المقابل
وان امتياز مش حاجه مستحيله طول ما انتي مش بتحطي العقبات بنفسك قدام طريقك
لو استصعبتي حاجه لازم هتلاقيها صعبه
اهم حاجه في أي كليه تعرفي هتذاكري ايه ومنين وتفهمي شخصيه الدكتور وتروحيله مكتبه وبسأليه في اللي انتي مش فهماه وتقربي من المعيدين والطلبه اللي اكبر منك في الكليه تعرفي كانوا بيذاكروا ازاي يتاخدي الايجابي منهم مش شرط تذاكري بنفس طريقتهم بالظبط لان الاسلوب بيختلف من شخص للتاني .. بس الأكيد انك هتتعلمي منهم ومش بعيد تبقي زميلتهم في الجامعه وتتعيني معيده وده مش حلم ولا حاجه

تاني حاجه انتي لازم تدرسي الحاجه اللي انتي بتحبيها.. ولو انتي بتحبي فعلا الاحياء اوي كده .. ودخلتي قسم ( بيولوجي --> حيوان ) وتفوقتي واتعينتي معيده انتي ممكن بعد كده تدرسي لطلبه صيدله وتبقي دكتوره واحسن منهم .. ولو حتى ما اتعينتيش انتي لو حضرتي ماجستير ودكتوراه تبقي من أعضاء هيئة التدريس في الجامعه .. ولو لا قدر الله لا ده ولا ده قدامك تشتغلي في معامل للأجنه وهتبقي متميزه في تخصصك لأن مفيش كليه تانيه تقدر تنافسك وتبقى بنفس كفاءتك .. وهتبقي درستي الحاجه الي انتي بتحبيها وخدتي اللقب اللي انتي عايزاه واشتغلتي شغل يليق بدراستك العلميه
- الفكره انك لما تدخلي علوم او اي كليه لازم تحبيها بمعنى الكلمه .. بس علوم مجالات الشغل واسعه فيها جدا ولو دخلتيها هيبقى عندك أمل تحققي حلمك لكن لو دخلتي ألسن هتبتدي تدوري على حلم جديد ومش هيبقى عندك دافع

بس بجد اهم نصيحه خدتها من الأكبر مني وطلع معاهم حق فيها جدا .. ان مصدر مذاكرتك الي هو غالبا ورق المحاضرات تكوني بتجهزيه طول الترم .. المهم ان ليله الامتحان يكون معاكي مصدر كامل واثقه فيه بتذاكري حتى وان استعنتي بورق كورس جنبه او حد تاني كاتب المحاضرات عشان لو في سهو في حاجه او في حاجه مش مفهومه
وانك طبيعي هتبقي حاسه انك محتاسه أول ترم بس ده طبيعي جدا وبيحصل في أي كليه بس اهم حاجه ماتتسرعيش وتحكمي على الكليه انها صعبه ومعقده من خلال ده

انا حاولت اديكي الصوره اللي عندي من الكليه من خلال تجربه سنه فيها .. مش شرط أكون عملت كل اللي انا بقولك عليه ده .. بس على الأقل عايزه طلبة سنه أولى يعملوه من أول سنه بدل ما أنا بعمله من تاني سنه

وعلى فكره حتى ألسن محتاجه مذاكره كتير خاصه لو خدتي لغه جديده عليكي.ومحتاجه حب أوي للغه عشان تقدري تذاكريها لإنك هتدرسي تاريخهم وآدابهم

انا بقولك ده لان واحده صاحبتي كانت واخده صيني وماحبتهوش فامقدرتش تنجح فيه وهتبتدي السنة الجايه لغه تانيه
انا مش بقولك المثل ده عشان أقولك ان ألسن وحشه وصاحبتي ما نجحتش فيها،لأ.أنا بقوله عشان أقول ان أي حاجه محتاجه (جهد وحب)

جنه انتى حفزتينى اوووى للكليه وانا استفدت من حاجه مهمه اوووى قلتيها على موضوع مصدر المذاكرة ..

انا فعلا كنت باقول بتوع الجامعه دول هيذاكروا منين ولا منين (من المحاضرة ولا من الملازم ولا من الكتب!! )

وانا فعلا لو دخلت السن هيضيع حلمى ..وهابقى ماشيه فى سكه تانيه جديده خالص ..بس انا عايزة بجد اتعرف عليكى ..انتى شخصيه محترمه خالص..:)

هو انتى فى جامعه ايه وتخصص ايه ؟