|
خايف يوم أصحي.. وأفتح الشباك.. مالاقيش مصر ( على سلامه
يمكن كتير ميعرفوش مين على سلامة!!!!!!!!!
ميهمش اتولد امتى عاش فين درس ايه..... المهم انه شاعر انسان هتعرفوه لما تقرأوله ..... لو بتحب بيرم التونسى لو بتعشق صلاح جاهين لو بتموت فى الابنودى ما تترددش!!!! فانا _بإذن الله _ححط اشعار ليه كل فتره كده و انا متاكده انه ان شاء الله حيعجبكو نبدأ بقى مع : 1-خايف أصحى مالاقيش مصر -------------------------- ---- ساعات بقلق بالليل يعني بالليل شوية كده قبل الفجر حسب الظروف كده بعد العصر خايف يوم أصحي.. وأفتح الشباك.. مالاقيش مصر ألاقيها لمت هدومها ومشيت لمت هدومها علي نيلها علي هرمها وطفشت وحلفت ميت يمين ماهي قاعدلنا ماهي زهقت.. تعبت.. إتخنقت أصلنا زودناها.. أكننا استعمرناها.. ورثناها مصر البنوتةالحلوة اللي زي القمر بقت عجوزة وشايبة وبان عليها الكبر خايف يوم أصحي.. وأفتح الشباك.. مالاقيش مصر |
كدا حتطيها من ورايا:mad:
بس بردو رديت اول واحدة:p بجد جميييلة كتييير يا قمر و ميرسى بجد ع التوبيك و بدام متابعاه اوى كدا ممكن تجمعيله اشعاره كلها فى مكان واحد و تبأى تهديهمله:D يلا عايزة اشوف اللى قلتيهملى ع الميل كلهم هنا لانهم بجد جمال كتير ربنا يوفقك:) |
طويب يلا نكمل و سيبكم من (بريشيوس )دى خالص
مصر و الكاميرن بقول لهم مين الي بيعيط بحرقه ده؟؟ قالو لي مواطن اتصور وهو بيضرب!! قلت لهم ومين الامور الي بيضحك ده؟؟ قالو لي ده واحد عمل شوية كوارث وهرب!! قلت لهم والدنيا عتمة هناك كده ليه؟؟؟ قالو لي دي حتة جديدة بتتخرب!! قلت لهم ومين الحاوي الي بيتكلم ده؟؟ قالو لي ده الوضــــع بيتقـــلب !! قلت لهم وايه الهيصة دي الي في الساحل الشمالي؟؟ قالو لي دي البقــــــــرة بتتحــلب قلت لهم وانتو قــــلقانين كده ليه؟؟ قالو لي اصل بنلاعب الكاميرون وخايفين نتغـــــــــلب ناقص حته ناقص حتة وكل ماوزن القي لسه ناقص لي حته احط حته تقل حته واجيب قميص تضيع جاكيته واعيش لي ساعة تفوتني ستة وكل ما اوزن القي ناقص اقول بناقص لو هي حته اتاري لسه ولسه تأخد سنتين وحته وحاجات تسبني وحاجات تاخدني وحاجات تخبط في كل حته واقول فايوم هانفرح فايوم هانفرح ويوم مانفرح يفضل حته عيرة الشعر عيرة والكحل عيرة والورد فوق الخد ولحد الضفيرة عيرة الصبر عيرة والضحك عيرة والفرح والأحزان كمان وحاجات كتيرة حتى الحنان جوه البيوت حتى الكلام...حتي السكوت حتى الهتاف جوه المسيرة برضه عيرة حيرني حيرة بقينا ليه حبة حاجات قمصان بدل على بالونات ما بقيتش شايف إيه اللي جاي وإيه اللي فات ما بقيتش افرق ده أزرق ده ولا أحمر رمادي ودي كارثة ولا ده وضع عادي وده طفل ولا راجل عجوز وده إيه ده راخر جايز يجوز نعسان ده ولا ساكت وساير بردان ده ولا ده دور وداير وده إحنا ولا الكل حاير |
مِيدان الجيزة ضَيعّت شوية سنين كدة ... بَحب من بعيد لبعيد... والحكاية مقّضيّانى ... ومبسوط وراضى وسعيد ... أفرح بأى حَاجة ... واستنى هدُوم العيد ... وبَعدين ضَيعّت شوية سنين ... نفسى أبقى أشطر واحد فى الكيميا ... مع أنى مش فاهم ميدان الجيزة ... والحياة رغم قسوتها ... شايفها لذيذة ... وضيعت شوية سنين بقى ... نفسى أعدَّى اختبارات الكورة ... فى النادى الأهلى ... واشتغل فى وكالة ناسا ... وابقى واحد من العلماء المهمين ... وبعدين ضيعّت شوية سنين ... منتهى أملى كرسى فاضى ... فى أُتُوبيس تلات خَمسات ... عين الصيرة أم المصريين ... وضيعّت شوية سنين ... عايز أفهم الفرق ... بين النّكسة والهزيمة ... والاحترام وقلة القيمة ... وأبقى نجم سيما ... م المشهورين ... وبعدين ضيعت شوية سنين ... واقف عند نظرية المؤامرة ... لـا عارف اعيش ف الزمالك ... ولا راضى أعيش فى غمرة ... ومش عارف لية الحشيش ممنوع ... مدام مصرحين بالخمرة ... وياترى بقى أتجوز ... واحدة بيضة ولا سمرة ... ولا اسأل فيها ... رجال الفتوى والدين ... وضيّعت شوية سنين ... مركز ف السّيراميك ... والبيبان والشبابيك ... وألوان الحيطان ... وده بيج وده سن فيل ... والموضة الأصفر ... وقشر الموزة ... وضيعّت شوية سنين ... لا انا بحر ولا نيل ... حاجة كدة بعيد عنك ... ملهاش عُوزة ... ولمّا بقيت كام وخمسين ... لقيتنى لسّه ... بَحَب من بعيد لبعيد ... وبرضُه مش فاهم ... مِيدان الجيزة ... بص .. حا أقولك ... بص .. حا أقولك ... م الأخر ... أنا عندي عربيه ... مركبتهاش … ومعايا فلوس ... مكسبتهاش …. وجوزوني بنت حلوة ... محبتهاش …. وإشتريت بدلة جديدة ... ملبستهاش …. كسرت الحمام وغيرتة محستش بأي إنتعاش .. خدت بعضي علي جنب ... وكان يوم حر ... رطوبة ... وقولت لروحي .... إيه ياعم ... إنت طوبة ..... قاللي لأ .... يا صحبي دي حسبة ... ومحسوبة … أنا أصلي زمان ..... لمست قلبي .. غنوة حب جميلة ... جميلة لكن يا خسارة ... محضنتهاش |
رائع يا اسدات
بجد تحفه اوي وان شاء الله هنستني منك كل جديد هتابع الموضوع اوعي تقلشيه هاه:D ولا احسن تعتزلي زي ما بتقولي :rolleyes: مستنيين منك كل جديد حبيبة قلبي:) بس جامده اوي بتاعت ميدان الجيزه دي شكله كان شارب حاجه وهو بيكتبها:D |
الحمد لله اتنين شجعونى
و الحمد لله الاتنين اصحابى المهم نكمل مطلوب عروسة مطلوب عروسـة طيبـة ومتعلمة ومؤدبة ومؤمنة بالقضـاء والقـدر سـنها من سـني أصغـر أو أكـبر مـنى مـش ها نختلـف المهم ما بتعر فش تطـبـخ عشـان مش ها قدر أجيـب أي حاجة تنفـع للطبيــخ وتكون بتحـب القـراءة وتـهـــوى الرحـــلات وتـعشـق السـفر مش عضـو في أي حـزب وطبعاً عارفـة إن الكـذب حرام بتحـب الكــوره مهمـومة بالـدوري العـام وملفـوفة القـــوام حلـوة وزى القمـــــر شـعرها ناعــم حـــرير ملهاش أي مصلحـة ف شـارع القصر العيـني أو مجمـع التحـــــريـر وفاهمة كويس ميدان الجـيزة مش متابعة جلسات مجلس الشعب ولا بتسمع البيـان الخـتــامي لأي مؤتمــر وتكون من عيـلة بـتـشــتري راجـل لا عايــزة شـبكة ولا مهـر وأنا بقي خبـرة ف المرمطـة وجميـع أشـكال القـهــر مواطـن من إنتـاج مناهـج وزارة التربية والتعليم ثانوية عامـة النظـام القـديم أيام الأرنب الغضـبــان و الخـس والجرجـــير وزى النسـمة والله يعني تعتبرني من دلوقتي مش موجود لا .. حـس .. ولا ... خـــــبر بـس مخي نضـيف وعـاقـل ورزيـــن وعنـدي شـوية نظــر . رغـم إني يـامـا إتزحـلقت لكن لسـه بفـرح بالمطــر على فكــرة . أنا حاجـز شـقة بحـري أربعــين مــتر أخـر طريق الواحــات بس لسـه مـا حـطــوش الأسـاس عشـان تقريبـا مش لاقيين الحجر.. مــــــــــــــــــرايا قلت أبص ف المرايا .. يمكن أكون إحلويت .. فضلت داير أبص .. مخلتش ولا مرايا ف البيت .. في الحمام ف الأودة ف دولاب .. أو متعلقة ع الحيط .. شوفت .. سكت شويه .. وبعدين إتخضيت .. معقول أنا قضيت العمر ده كله .. وزي ما روحت زي ما جيت .. معقول أنا عمري مافكرت ولا إتغيرت ولا حبيت .. وإزاي ساكت علي روحي ده كله .. وليه إستنيت ... ! يا ريتني ما كان عندي مرايا .. وياريتني ما بصيت .. |
الواد ابنى ابو لسان طويل الواد ابنى ابو لسان طويل قالى يعنى سافرت يا بابا واتغربت مشوار طويل وف الاخر راجع.. ف شارع متفرع من شارع وشقه فى الدور الرابع.. ودولار نزل طالع... وشويا حاجات.. دكان مستنى التراخيص.. ومكنسه على خلاط وكمبيوتر مش نافع... من الاخر معرفتش تتصرف.. مقدرتش تقول لاء مش مسافر... ..... منين الكحه دى يا بابا... دى عمر..!! ولابرد... ولا سجاير..! ..... انت عارف يا بابا انا بقالى اد ايه بستناك؟؟ ايه يا بابا انت هاتعيط .... ده انا كنت بهزر معاك... كنت بهزر معاك بَوّابةْ تَفتِيشْ... بَوّابْة تَفتيش عَلَى بَابَكْ.... كُل ما احَاولْ أعَدَّى تَزَمَّرْ... وبْتْشَرَّطْ... وَبتْتْأمَّرْ... أرَجَع أدَوَّرْ تَانى وأدُوَر... وكُل ما عَدَّي بَرْضُهْ تزمَّرْ... طَب آدى السَّاعَةْ... وآدى حَزَامي... وآدى بطاقتي... والنَضَّارَةْ... وآدى عنواني... وكُل حَكَايَتي... وآدى أَمَارهْ... حَتَّى الفكَهَّ البَاقْيةْ ف جيبي... والأشعار... والَمْحفَظةْ مَفيْهَاشْ غِيرْ صُوْرتَكْ... ليلْ ونْهَارْ... كُلْ هَدُوْمي... زَى مَّا نَازَلْ منْ بَطْن أمي... من غيرْ حَتَّى وَرَقةْ تُوَتْ... وكُل مَافُوتْ... الَبوابَّةْ بَرَضَكْ بِتزَمَرْ... ولما لَمَحنْى... واحد طَيبْ م الُحراَس... وقَاللي اسْمَعني يا ابْن اَلَناسْ... إرْمي الحتَّة الحلوةْ ف قَلَبكْ... وعَدى... والبَوابَة عُمْرهَا... مَا تْزمَّرْ... |
سلك عريان... أقولك حكاية... يمِكن مَتصدقهاش... النور قاطع ف شارعنا... من سنين ولسّه مجاش... عارف ليه... آه والعيش والملح... زى ما بقولك كده... ودوَّرنا كتير مخلَّيناش... وملقيناش... غير سلك عريان مكشوف... واقف ف العتمة مكسوف... ساكت آه... لكنَّه مبينساش... لمَّا الماسورة اتخرمت... وربطناها بحتة قماش... ولكل جرح بينزف... شوية بن... ولو البن غالى بلاش... إيه ياعم... إحنا كل ده ف ميدان التحرير... لسَّه متحركناش.... آه والعيش والملح... |
بجد موضوع جامد يا asdat
انا كنت سمعتله كام حاجه وكان عاجبنى اسلوبه اوى وانتى هنا جمعتى اكتر من عمل جديد عليا انا متابعك لو عندك جديد ياريت تنزليه تسلمى يا asdat |
نفس اسلوب نجم وجاهين
جميل جدا كملى واحنا متابعين |
اقتباس:
و الحمد لله عندى حاجات كتير ليه و ان شاء الله يكون منها الجديد عليك اقتباس:
انا بحس ان الشاعر المنفرد دة 80 مليون بيتكلموا ..بيتكلم بلسان الشعب المصرى كله.. قدرته غريبة... و انا ان شاء الله حنزل دلوقتى حاجات تانيه و الحمد لله ان شخصيه زى حضرتك متابعه معايا يلا فى رعايه الله |
بِيوُتنا... بِيُوتنا واسْعَةْ وِضقْةْ... عصَافير كِتير... ولا يُوم صَحيت م الزَقْزقَةْ... بحلَمْ بعِيشَةَ محنْدقةْ... وسْط البَرَاح... لو كان صَحيح... الحُزن رَاح... طَب ليه الجراَحْ... لسّه فَ عيونَا مخَنْدقَهْ... بيَوتْنا أسَْمنَت... وزَلط وِحِيطَانْ.... وبَس...زِى الآسِى.... متَرصَّصة.. مِرصُوصَة رَصْ... دَار النَهار... من داَرلدارْ... طَبل وزَمر... قال ْ وسار... ولا حد حَسْ... سَلَطَةْ أحْلامْنا سَلَطَةْ... وكَلامْنا سَلَطَةْ... والعشق وَرطَةْ... غِلط غلْطَةْ... كأَنَى ماشى من غيرْ دِماغى كأْنى أقف أدَّن فَ مالَطةْ... سَلَطَة... وتَملىِ خَسْ وجَزَرْ... ناديتُه لَكن راح واعتذَرْ... أَلاقيش مَعاك سنةْ أمل... ألاقيش مَعاك حَبةْ نْظر... اليُوم وفاتْ... وبُكرَه فَاتْ... مَفْضلِشْ غير... حَبةَ سُكاتْ... وتقُولِلى هاتْ... أحَلامْنا ليهْ... سَلَطَةْ... |
حَظّك اليوم... تيجى نحسبها نلاقيها... إحنا فيها... لفّ واتفرج معايا... ع اللى نايم... واللى صاحى... واللى طافى النور وصاحى... واللى بتسليه جراحى... واللى قال فات الكتير... واللى طاير... بس مكسور الضمير... ع اللى مشغول بالدولار... واللى ضيّع نص عمره... فى كام بهيمة وكام حمار... واللى قال الأرض باقية واللى طُور مربوط فى ساقية... واللى لسه قميُصه ناقص زُرار... وفى ثوانى... مات كيلانى... كل واحد فينا قام يحسبها تانى... اللى نايم واللى صاحى... واللى بيفكر ينام... كله قام... أد إيه ف العمر باقى... يسوى كام... أما شاعر بايخ... جىّ ليه تشعللها نار... يلّلا نهرب من قساوة الجَدَّ... ونضيع ف الهزار... ف العصير والفطير... واللى لسه قميصُه... ناقص فيه زُرار... مش أنا امبارح مش أنا امبارح رحت من بيتنا في السيدة للشغل في حلون في سبع دقايق لا شوفت حد زعلان ولا حد متضايق والورد إنسان والنخل متعايق والناس جميلة مؤدبة والجو رايق والدنيا ماشية لوحدها ولا حد سايق ومش انا امبارح برضه رجعت من الشغل في حلوان لبيتنا في السيدة في خمس دقايق لا حاسس بغربة ولا شايف غريب وقلبي ابيض حليب عندليب كروان فرحان شايل ف قلبي وف جيوبي الفرح أشكال وألوان وزعت ع الشوارع والبيوت والجيران وطلعت البيت ضربت الجرس فتحت مراتي وبالأحضان والعيال كمان فرحانين ناجحين وجايبين الدرجات النهائية من غير دروس خصوصية قمنا رقصنا وغنينا واحتفلنا واتغدينا فضلة خيرك سمك واستاكوزا وجمبري م الكبير وحلينا ب مهلبية وشربنا الشاي كمان وفجأة لقيتني بردان بردان بصيت لقيت الشباك مفتوح ومفيش بطانية ومراتي جنبي وزي ما هيه لسة بتعاني من آلام المفاصل وده اللي حاصل والحمد لله على كل شيء |
زَغْزَغْنِى... يمْكن أضَحَكْ... يمْكن أفْرَح... يمْكَن أطلَع... مِ الَلى أنا فيِهْ... زَغْزغْنىِ... يمْكِن أحْلَم... يمْكَن أقَول اِللى مخَبيهْ... مِش جَايزْ... لِسَّهْ الدُنيا جَميلَة بِجَد... ولسَّه النَاسْ... فِى الصيِفْ والبَرْدْ... مِشْ يِمكنْ... يطْلَعْ فيَّا العيِبْ مِشْ فِيه... زَغْزَغْنِىِ... |
أشعار جميلة و بيرم كان فنان بجد
ميرسى على الموضوع الجميل يا asdat |
بجد بجد تحف ثمينة
صحيح أنا مكملتهاش كلها بس ان شاء الله أرجع وأكملها شكرا جزيلا يا asdat |
انا عجبتنى اوى السلطة يا سلام لو كان معاها شوية طحينة
شكرا جزيلا يا asdat |
اقتباس:
بس مش عارفه بحس على سلامه بياثر فيا اكتر المهم فعلا الاتنين اساتذه اقتباس:
و ياريت ترجعى تكمليهم بسرعه عشان ححط حاجات جديده اقتباس:
و الحمدلله ان الحاجات عجبت حضرتك فى رعايه الله |
انا فعلا كنت متبعاه من ساعه ما كان بيكتب فى جريده الدستور
واستضفته منى الشاذلى بجد هو شخصيه جميله ومقالاته اجمل شكراااا ليكى |
دى بأة تحفة ملهاش حل بجد....
بعشقها فظيعة .. انتوا بتقرولى انا!!!!!!!!!!!!!! بصوا تحت عالجمال.. بـــراءة بمنتهى البراءة سألتنى الصغنتوته نور فى اربع خمس امور قالتلى بابا يا بابا مش انت يا بابا بتكتب اغانى وتقول اشعار انا سمعت الشيخ يا بابا بيقول انك يا بابا هتروح النار زى الناس الوحشين الحراميين الكفار قوللى يا بابا يعنى ايه استعمار يعنى ايه نيل يعنى ايه هرم ومين اللى حط النسر ده فوق العلم يعنى ايه يا بابا استفتاء ويعنى ايه انتخاب ويعنى ايه حر ويعنى ايه نصاب وايه هو ال****** ويعنى ايه اختلاس ويعنى ايه هجاص ويعنى ايه خصخصة وايه هو الدستور يعنى ايه معارضه ويعنى ايه مظاهرة وليه النهارده خدنا اجازة من المدرسة قوللى يا بابا يعنى ايه قهر وفين بيقع خط الفقر ويعنى ايه حظ ويعنى ايه زهر يعنى ايه يا بابا حريه يعنى ايه انسان وايه هو السرطان يعنى ايه يا بابا خربوها ومين دول يا بابا ولاد القطقوطه اللى خربوها وكنت فين يا بابا لما خربوها ومين دى سماره يابابا وازاى يا بابا ضاعت من قلبك يا بابا بابا انت معايا فيه يا بابا ناس بتقول كفايه وفيه عساكر ماسكين عصايه وبنات متعورين وتانيين ماشيين بيضحكوا يابابا .. هما دول اسرائيليين قولتلها نور ممكن اسألك سؤال قالتلى اتفضل يا بابا قلتلها هيه قناة سبيس تون رقمها كام واخدتها....علشان تنام |
akeeed gaaaamela moooooooot
|
اقتباس:
اقتباس:
وهو فعلا شاعر و انسان مميز جدا و افضلى متابعه ان شاء الله حتلاقى جديد فى رعابه الله |
جميله جدا جدا جدا
انا كنت سمعتها منه لما استضافوه فى برنامج شبابيك بس بجد حانجة شكرا ليكى يا asdat |
بحب البرد بحب البرد ..ويا سلام ..لو حد هرب م الدوشه ..وراح وجابلى ورد وأموت م الفرحه والدهشه .. لو كتبت قصيده وقولتلى حلوه ..قولها تانى اتنطط زى العيال الصغيره .. ..وأقولك احلف ..والله العظيم ..بتتكلم بجد ..يمكن علشان ايام الفرح قليله ..سهل تتعد ..عارف .. رغم ان المخازن .. كل يوم بتتحرق ومفيش حساب ولا جرد .. ورغم وجود السيرك .. والاراجوز والتلات ورقات وجوز وفرد عمرى ما اتمنيت أكون امير .. أو ولى عهد ...لكنى بحلم بوطن مفيهوش ولا حاره سد وطن بيفرح بحاجه غير وصول الاهلى لليابان ... وحزنه انبل ...م الدموع البلاستيك ..وعمليات التجميل .. والشفط والشد ..عارف ..رغم انها .. بتقع بتغرق ... بتتنيل بستين نيله لكن جميله .. عمرها ما ها تنهد ..عشان كده ..انا لسه بحب حاجه .. ولسه فى قلبى حد قول كمان معاك ومعايا مش فارقة لا الشعر أصفر ولا حتي العيون زرقة وبنهاتي وبنطاطي ولا لسانه عارف ينطق خواجاتي وإحباطك .. وإحباطي مدام جينا وعلي كتفنا تلال الهم والأحزان نقول كمان يا طالع الشجرة هاتلي معاك إنسان هاتلي معاك إسم تاريخ ميلاد عنوان هاتلي معاك وطن حر ومواطن مش جبان وبعدين نبقي ندور ع اللي ضايع من زمان |
الْكيِلُوْ تسعينْ يكُونْ ف عِلْمَكْ... أنا مُتواضَعْ جِداً.... وِمشْ طالبْ كتيرْ.... يَعنى شَقَة صُغيِرةْ... ف الكيِِِِِِِِِِِِِِِلُو تِسعينْ... مَا هى الحَياة مَشَاوِيرْ.... مِشِ شرْط بَقى بتطلْ... عَلَى جَناين وهَوا وعَصافيرْ... وبنت حَلالْ ومِش شَرطْ.... زَى اللى ف الكلَيب الأخيِر... وحِتة مدرسةَ صُغيّرةَ... أهَى أِلعيال تُفكْ الخَطْ.... ومِش شَرْط لُغات وحرَكاتْ... وجَغرافيا وتعبيِرْ... وأدْخلْ القسْم... أطَلَعْ زِى ماَ دَخَلْتْ... مُحتْرَم وكبيِرْ.... |
gaaaaaaaaaaaaamden gdn bgd
we ana mtb3aaaaaaaaky |
لو موصوفلك لو موصوفلك ترجع.....جوة الهيصة وعيش لو موصوفلك ترجع....روح ويارايت متجيش لو موصوفلك تضحك......اضحك على أحزانك لو موصوفلك تعشق...حب واقف فى مكانك لو تختار فى زمانك........أحسن ماتنقيش لو موصوفلك تحلم....قضى الليل بردان واعمل روحك ترتاح....ناسى انك انسان لو موصوفلك ترتاح....نادى وقول يا جراح ما يغركش براح ساكت ما بيبكيش...... ساكت ما بيبكيش ! جاتك القرف علي حد علمي احنا و اسرائيل حبايب و فيه سلام و ما فيش حرب طب الظباط و العساكر دول بيعملوا ايه في ميدان طلعت حرب ده بنت و ولد نازلين يشوفوا بلوزة تليق ع الايشارب بيحلموا .. بيغنوا و احلي ما فـ غناهم انه طالع من القلب من امتي العشق كان بيموت من الخوف و منا امتي الحلم كان بيخاف من الضرب يا كابتن يا باشا خليك ابن بلد هوه انتا ما عندكش اخوات صبيان و لابنات يعني انتوا كل عيلتكوا ظباط يعني انتوا اصحاب اكاديمية الشرطة و اصحاب الشوارع و الميادين و المحلات و اصحاب البلد طيب طب ان هاخرم من التحرير لدار القضاء العالي هاكل كشري و اخش سيما مالك بقي و مالي معايا بطاقة و خلصت الجيش بتسمي ده أكل عيش ؟ يبقي عرفتك طب عريني بقي فتشني قطع لي هدومي و افحصني و خلصني لا انت اول و لا اخر واحد عارف انا مرة القطر عدي و داسني و ما متش عشق الحياة ماهوش ترف عرفت ايه معني الشرف جاتك القرق جاتك القرف احنا مين؟؟ مَحَدَّشْ فيِْنا قَامْ الصُبْحْ يتمطَّعْ... وقالْ نِفسىِ أطْلعْ القَمَر... ولا حَدْ فيِنْاَ بيْغيِرْ... منْ العَصَافيرْ الحُرةَّ ع الشَّجَرْ... ولا حَدْ فِينَاَ إنْدَهَشْ م السُؤالْ والخَبرْ... عايِشينْ بَسْ كدهْ... عَاَلة ع البَشَرْ... هىَّ الَمراكِبْ للْهُرُوبْ ولاَّ السَّفَرْ... لو عِشْنا نَسْتَنى المَطَرْ... هَنْمُوتْ أَكيْدْ عَطشانينْ... هوَ إحْنا مِينْ... أحب العسل ........ واموت فى الكسل ووقت الازمه اقول فى العشق حكمه ومثل وبس خلاص أهجص الاقى ميت مليون هجاص افكر...... هس.... ولا صوت ولا ناس لانى كده ثقافه وعلم يادوب فى الفيلم فى الكراس وراسى زى اكبر راس مفيش احلام مفيش احساس |
بايظه بايظة بايظة .. هي بايظة ... والنهاردة معدش حد… بيدي جايزة .. يبقي أحسن .. خللي بالك .. انسي همك .. ضغط دمك .. سيبها ماشية .. بدعوة امك .. مستحيل يقدر يضمك حضن خايف ... وأنت شايف ... ده اللي لاهي ... واللي ضايع ف الملاهي… واللي ساكت بس ساهي ... واللي حاله زي حالك .. يعني إيه .. يعني بايظة استراحه ع الصحراوى الجو نار سايق ومحدش معايا غيري انا والذكريات وحبه حاجات ازازه الميه ونظره عينيا اللي شايفها في المرايا بتبص لي من وقت للتاني بغباء كانها عارفه الحكايه او واخده بالها من الطريق مر السفر من غير صديق اول شمال احود ولف الغنوه سكتت والشريط عمال يسف وازاي تخف ياالم من غير جراحه ادي استراحه دماغي محتاجه الصراحه وقلبي محتاج الحنان ازكن هنا اشرب ياعم قهوتك ويالاا علشان نلحق مكان قبل الغروب واوعي الردار يسحب ف لحظه غنوتك معش فاضل في الطريق ولا استراحه هي بايظة ... بايظة .. بايظة |
برضه انا صامدة:mad: إشرب عَرْفاكْ.عَرْفاكْ... هاتلف تلفْ... وفِى الأخَر جاىْ... سَمْعاكْ... بتُقولِ ضُمينى سامْحِينى... لأ يا حبيبى... مَبقَاشْ... عَيَّانْ تَعَْبانْ مَديُونْ ومفلَسْ... مَا أنا مدَيتْ إيدى للى يَسْوَى... واللى ما يسْواش... لاَ عَندى بُنْ... ولا عِندى قُطنْ... ولا عِندىْ شَاشْ... ضَحكُوا عَليك... وقالُولك خَللى السَلاح صاحىْ... وهُم طول الليل والنهار نايْمين... وانت طول عُمركْ... بِتبيعْ ببِلاش... اشَْرَب... حساس أوى إيه يَعْنِى مَاسُورَة مَكْسُورة... والميه طَعْمهَا اتغَيّر حَبتّيِن... مَتِبْقاش حَسَّاسِ أوى كدة.. نحَلل ونشوف فَيْروس كَده... ولو فيه... الأعْمَار بِيدَ الله... واهى ماشَيهَ ومستورة... وبقالنا سنين بنسدد ف الدين... إن قصر البنطلون... هَنْفُكّ التنية... وإن كان ع الزَكَّة اللى ف رِجلْيِك... مَانت عَنْدَك رِجْل تانية... مَتقُولّيش عِينَك بَايظة... ماهى باينة... مَتْبقَاش حَسَّاس أوى كَده... ((تحسوا انه محبكها اوى سلامة )):D:D |
ولا محبكها ولا حاجه
الراجل مبسط الدنيا جدا موافق على تلوث مياة الشرب وكمان موافق على فك تنية البنطلون وموافق على انه اعور وبيعرج وموافق على كسر مواسير المياة والمجارى وفى الآخر نقول محبكها؟؟؟؟ ده شكلة كده من الحكومة ههههههههههههههههههههههه والله كل الموضوعات لزيزة جدا |
على فكرة الراجل ده بجد مظلوم تخيلوا بالعظمة دى وماتنشرلوش ولا ديوان لحد دلوقتى
شكرا كتير asadat بجد مواضيعك مميزة جدا |
gomaaaaal kal3da
thx leky |
جميل خالص بجد كلماته رائعه تسلمي يا اسدتي ومنتظرين المزيد ربنا يكرمك يا حبيبه قلبي |
حبيبتى .. زي القرش الأبيض في اليوم الطين " لا تسبوا الدهر:mad: " زي آخر رغيف عيش وآخر إسطوانة أوكسجين وحبة فرح من زمان باقين وحبيبتي مش عبيطة لأ .. دي عارفة ومذاكرة الخريطة من فوق لتحت وم الشمال لليمين وحبيبتي ما أتلقيتش جنب جامع يعني معاها شهادة ميلاد معروف أبوها وأمها مين وحبيبتي رقم .. إِحْنا... يَا دُوبْ رَقَمْ... والمَتش شَغَّالْ... فاوِلْ مفِيشْ... آوِتْ مفِيش... ومَفِيش ضَربِة جَزاءْ... وكل يومْ مُوضَة... وكل دقيقَةْ عرَض أزْياءْ... وكل شئ للبِيعْ... ومفِيشْ أكتر مِن الأسواق... إيهْ يعمل الأدبْ... وإيه تَعمل الأخلاق... فِى متشْ... مِن غيرحَكَمْ... البيانو جربت تتعشي علي أنغام البيانو وضوء الشموع جربت تتكلم مع قلبك ولو الكلام مش عجبك تغير الموضوع جربت تسافر لوحدك وترجع لوحدك جربت تبكي من غير دموع جربت تأجل أفراحك وسألت نفسك ليه بنعمل للميت أربعين وللمولود سبوع جربت تجري ورا الأتوبيس أو تجري م الأتوبيس جربت تقف في طابور ولما تيجي تحلم ألف حاجة تقولك ممنوع جربت الإحساس إنه ليل نهار عندك وسواس إن قميصك مكرمش وفيه زرار ملخلخ والبنطلون مقطوع جربت تقول لحد بحبك عشان بس تكسب ثواب جربت تاكل من غير نفس حتي لو كان كباب وأنت ميت م الجوع عارف حلوة أوي ضحكتك لكنها بتكشفك وتقول إنك موجوع |
تراب السفر أنا بان عليا الكبر واللا تراب السفر واللا ده شكل الخوف من غير ونس ياقمر أنا بان عليا الزمن واللا ده رخص التمن واللا دى غربة روح وسط الصحاب ياوطن أنا بان عليا الهوان واللا ده ايه ده كمان ودى دموع الفرح واللا دموع أحزان إسمه إيه ده بالصلاة ع النبى احناعندنا إسمه إيه ده أحسن واحد يحلل مباريات يحط التشكيل الأساسى والبديل ويقولك إمتى تلعب براسين حربة وإمتى تلعب من غير راس ولو ضميرك مش مرتاح وعندك إحساس بلاش تشوط ع الثلاث خشبات وعندنا إسمه إيه ده أحسن مهندس خبير بيرمش بس للبير يطلع غاز وبترول وينزل دهب م الحنفيات وعندنا إسمه إيه ده أحسن سمكرى فى الثلاثين سنة الأخيرة نخش من مجرى العيون على عين الصيرة هاتعرفه من مناخيره ومن شكل العربيات وعندنا إسمه إيه ده مجرم قانون دولى ودستور وايده خفيفة أوى فى التعديلات يشيل من هنا ويحط هنا جواهرجى ياربى ملقاط وعندنا إسمه إيه ده أحسن واحد يحط الفول ع الطعمية ويعمل سندويتشات وعندنا إسمه إيه ده أحسن دكتور مسالك وعظام وقلب وغرام من نظرة عينك يعرف كل الحاجات ولا روشتة ولا إبرة ولا تحليل ولا إشاعات وعندنا إسمه إيه ده أحسن حنوتى آثار ولا لو جاله برد أبو الهول يموت وتنتحر الأهرامات وعندنا إسمه إيه ده أحسن كاتب وأحسن مخرج رقص وأحسن جزار كوارع وعكاوى وحلويات وعندنا إسمه إيه ده ملوش حل فى الزراعة فواكه وحبوب وخضراوات يقول للأرض قمح تقوله حاضر ونخبز ونعمل بسكويت وفينو بسمسم وبقصمات وعندنا إسمه إيه ده صاحب القهوة كلنا نتيتم ونتشرد لو بعد الشر زى الناس مابتموت مات ياأخى أنا مش عارف لما احنا عندنا إسمه إيه ده وإسمه إيه ده أمال إسمها إيه دى مصر مبتتقدمش ليه وتعبت وزهقت وداخت ولفت السبع لفات |
اقتباس:
ده و انا فى البيت و بقرا بحس بالخوف يحسن الحكومه تحس بحاجه بس يلا انا لازم اجيب حاجه عنه هو بدل الكلام ده اقتباس:
المهم اهو الواحد بيحاول يجمعله حاجاته و شكرا كتير على البكش ده فى رعايه الله |
اقتباس:
و الحمد لله ان فيه حد متابع اقتباس:
استنى مين دى اه دى هيومه خلاص انا حسحبها بس لولا اسدتى دى كنت سحبتها ايوه كده يلا بس خليكى متابعه |
والله لابكش ولا حاجة انا كل ماقرالك موضوع بحس بالخجل من نفسى من كتر ماهى رائعة
|
كيس البرتقان ملقتش في الشتا ونيس غير كيس البرتقان آخد منه و أقشر و أضحك أحسن ماكشر و أصدق روحي و أفشر و أصدق إني باقدر أفرح زي زمان و لما خلص البرتقان راح م المكان الونس قربت من التليفون جايز يرن الجرس لقيتني أنا و روحي مش مرتاحين لبعض قلت مش مشكلة المرة الجاية بقي أعمل حسابي في قفص مليان بالبرتقان |
asdat
ينفع تاخد الاشعار من على الموضوع بتاعى وتغير العنوان على العموم يا مان مش مشكلة بس عايزك تدخل وتدور هتلاقى اشعار على سلامة وعلى فكرة على سلامة دة شغال فى جريدة المصرى ضيفه ضمن معلوماتك |
اقتباس:
و كمان ياريت تغير الصوره الرمزيه للاسف مخالفه فى رعايه الله |
بما انى عارفاكو متحمسين قوى و خلاص حتموتو لو مكملتش
فانا حتواضع و اتنازل و اكمل المهم خلاص انا جالى احباط بس برده حكمل حمص الشام يعني أنا مثلا أبقي قاعد في البيت بتفرج علي التمثيلية و بقزقز لب و بشرب حمص شام أو بشوف الأهلي و الزمالك في الدوري العام أو بفتكر أنا و المدام أيام الغرام أو بعمل زي الناس ما بتعمل في الحمام يدخل عليا حد من غير إحم و لا دستور و يقوللي طبقا للدستور عايزينك طب بذمتك و دينك ده اسمه كلام معلش أنا بستفسر مش أكتر علشان لما نروح نروح و نيجي قوام طب اشرب الحمص ! |
جميله جداااااااا جداااا
ومش عايزين يجيلك احباط ولا حاجه بجد الراجل ده قصايده جامده جدا وبجد مشكورة جدا على مجهودك الكبيررررررررررررررررررر . . |
اقتباس:
ايه ده حد رد جديييييييييييييييد :d:d:d:d:d:d هييييييييييييى انا لسه شايفه الرد ده حالا بالصدفة لولا كدة انا كنت عملت فرح ان لسه الموضوع ده بيتدخل :d:d:d تسلم يا أخى كدة ممكن استمر :lol::lol::lol::lol::lol: |
كنت فين يا على .. كنت فين يا علي ... أمك بتدور عليك ... كنت باحفظ ف الحروف ... غصب عني و ع الظروف ... خدوا دوري فى الصفوف ... وإنتي لسه بتسألي .. كنت فين يا علي ... كنت باحلم بالوظيفة ... والحرير تحت القطيفة .. الحياة طلعة مخيفة .... كدبة بنت آرندلي .... كنت فين يا علي ... كنت بسأل إيه اللي صار ... بره جنة .. وجوه نار ... و عرفت إيه معني إستعمار ... من غير مدفع ولا عسكري ... كنت فين يا علي .... كنت ماشي بدون بطاقة .... لا عندي شوق ولا عندي طاقة .. بسألك وبدون إساءة .. إمتي تاني تنوري .... كنت فين يا علي |
تقريبا الشعب كله على
شكرا ليكى وسعيد أنك مستمرة . . |
merci علي هذه الاشعار
|
اقتباس:
بجد التشجيع ده رفع روحى المعنويه كتير :):) و ياريت تفضل متابع بدل التانيين دول اللى فلسعوا:rolleyes: اقتباس:
شكرا لمرورك حضرتك و تابع معايا فى رعايه الله |
بجد قصايده كلها تحفه
وجمييييييييييله جداااااااا شكراااا ليكى |
هو على سلامه خلص ولا إيه ؟؟
مفيش كمان يا asdat |
| جميع الأوقات بتوقيت GMT +2. الساعة الآن 05:40 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.