|
دعك من الجهلاء ...... وتعالي لنعرف معا مكانة الطبيب البيطري
انا طبعا في الاول لازم اقوللكو ان الموضوع ده منقول لنفس الشخص اللي هو دكتور احمد فتحي وانا طبعا كان نفسي اسـاذنه قبل ما انقل اي موضوع ليه بس عرفت من ملك ان هو مش بيدخل المنتدي كتير اليومين دول بس اعتقد انه مش هيمانع لو لقي ان في ناس اكتر بتستفيد من موضوعاته وده الموضوع اللي بجد بحييه عليه واسفه بجد اني اليومين دول مش بقدملكو جديد والنهارده نقلت اكتر من حاجه بس انا اليومين دول مشغوله شويتين بس ان شاء الله بعد العيد هفضالكو وده الموضوع بقلم brave heart أولا قبل الحديث برحب بيكم في كليه الطب البيطري طبعا أنا عارف إن كلنا أو معظمنا دخل الكليه مش بمزاجه لكن بمزاج عمنا التنسيق اللي هو علي عينا وراسنا ،وانه أول ما عرف إن داخل كليه الطب البيطري ،اصيب بالصدمه وصدقوني أنا أولكم في اللي حصل ده ،وحصلي حاله إكتئاب لاتوصف وفضلت اقول لنفسي بقي يا واد بعد كل التعب والمجهود في الثانوي والمجموع الكبير اللي جبته ترسي علي كليه البهايم دي يعني علي رأي المثل " نصوم نصوم ونفطر علي بيطري" بيني وبينكم الواحد برده كان عايز حاجه شياكه كدا يعني دكتور بشري دكتور اسنان دكتور صيدلي حاجه الواحد يفتخر بيها مش يخجل من اسمها المهم رضيت بالأمر الواقع وقلت الحمد لله واكيد ربنا عاوزلي الخير في المكان دة ، "وعسي أن تكرهو شيئا وهو خير لكم" بس دلوقتي وبعد بمرو سنه بالكليه ،مش قادر اقولكم أنا حبيتها أد ايه وبقي ليه إنتماء فظيع ليها ،ودلوقتي بفتخر إني في طب بيطري ولما حد يسألني انت في كليه إيه ؟ بقوله وانا مطمئن القلب وراضي أني في طب بيطري. دي كانت نبذه عن حكايتي مع الكليه . دلوقتي بقي هكلمكم عن الطب البيطري شويه : طبعا لكل مهنه مميزاتها وعيوبها وأكيد مفيش شيء كامل لأن الكمال لله وحده وانا أحب أبدأ أولا بالعيبوب.... شايفين عايز أعقدكم من أولها !! 1- من العيبوب الفظيعه اللي الناس شايفاها في الطب البيطري هو إسم المهنه لدرجه إن لما حد بيسألك انت في كليه ايه ؟ هتقوله في طب . وتسكت يعني محرج تقول بيطري لأنك في غني إن واحد جاهل يقولك "بيطري.. أه دكتور حمير يعني هههههه" ودة خطأ كبير منك ،لازم لاما حد يسألك تقوله وبصوت عالي "أنا في بيطري" ولما يبقي يقولك "يعني دكتور حميرههههه" تقوله " اه دكتور حمير علي الاقل الحمير ليها فايدة كبيرة ههههه".... بس.. ولا تضايق نفسك خالص . وصدقوني يا إخواني أد ما في ناس تجهل قيمه الطب البيطري في ناس برده بتقدر الطب البيطري . بس للأسف الطب البيطري قيمته مهضومه في بلدنا ،وهو ده دوركم دلوقتي إنكم تحسنوا من صورته في المجتمع وتعملوا علي نهضه هذا العلم وليس فقط الإكتفاء بالدراسه في الكليه وخلاص ،ونقول "يالا بقي اهي 5 سنين نقضيها بالطول والعرض ونخلص من كليه البهايم دي" . 2- تاني عيب هو صعوبه الدراسه الي حد ما ،بس يا إخواني دا الطبيعي في كل الكليات العمليه ، يعني الكليه محتاجه منك شويه مجهود . وبكدا صدقوني تكون إنتهت عيوب الطب البيطري . نيجي بقي للميزات اللي طبعا لا تحصي : 1- إذا كان الطبيب البشري هو طبيب البشريه ،فأحب اقولكم واطمنكم إن الطبيب البيطري هو طبيب الإنسانيه . أه أنا سامع حد بيقول يعني إيه طبيب الإنسانيه ؟ إنت هتهزر والا إيه!! لا يا صديقي مش بهزر طبعا ، انا هقولك يعني إيه طبيب الإنسانيه زي ما قلت عن الطبيب البشري هو طبيب البشريه بمعني إن مهمته تتوقف علي علاج الإنسان المريض والتخفيف من الأمه وهذا بالطبع ليس تقليل مني من شأن الأطباء البشريين فلهم منا كل تقدير واحترام فكلانا نعمل سوياً في تحقيق الصحه العامه للمجتمع . ولكن كما قلت أن الطبيب البيطري هو طبيب الإنسانيه بمعني أنه يعمل علي تحقيق الصحه للمجتمع بأكمله من أناس وحيوانات ،طيب... واحد يقولي إن الطبيب البيطري بيعالج الحيوانات ويحافظ علي صحتها دي عارفينها ......طب إزاي يعمل علي تحقيق صحه الإنسان؟؟؟ أنا بقي أقولك ركز معايا هسألك شويه اسإله وعاوز منك إجابه مين اللي بيراقب علي اللحوم في المجازر ويتأكد من صلاحيتها وخلوها من الأمراض اللي ممكن تإذي الإنسان؟؟؟ مين اللي بيراقب علي الأغذيه في المصانع من زيوت ومعلبات وعصير وغيرها ويتأكد من مطابقتها للمواصفات الصحيه؟؟؟؟؟ ميني اللي بيعمل في الحجر الصحي ويواجه الأوبئه اللي بتنتقل من بلد لأخر وقد تصيب الإنسان وتؤدي الي موته؟؟؟؟ مين اللي بيواجه الأمراض القوميه اللي بتصيب البلد كالطاعون وأنفلونزا الطيور؟؟؟ قولي بقي مين اللي بيعمل كل ده .....ها سكت ليه ؟ عرفت بقي يعني ايه طبيب الإنسانيه.....وعرفت قيمه الطبيب البيطري . 2- تاني ميزة إن مجالات عمله كتير اوي مقارنه بأي مهنه أخري وهكلمكم عنها بعد شويه . 3- الثواب العظيم الذي ستناله ،فتذكر دائما أنك تعالج حيوان وهو غير قادر علي الكلام وبيدك أنت ستخفف من تلك الألآم . فتخيل انت قدر هذا الثواب . وغيرها المزيد والمزيد من المميزات ولكني ذكرت لكم الأهم. ثم نأتي الي مجالات عمل الطبيب البيطري : 1- العمل في مستشفي حكومي او خاص أو عيادات بيطريه 2- العمل في المزارع بأنواعها ( خيول – دواجن – أرانب – ماشيه ) 3-العمل في المجازر للرقابه علي اللحوم 4- الرقابه علي الأغذيه في المصانع والشركات 5-العمل في الحجر الصحي 6- فتح عياده حيوانات صغيرة (قطط – كلاب) 7- فتح مشروع خاص (تربيه دواجن – أرانب) 8-العمل في مجال التحاليل الطبيه (بعد الحصول علي دبلومه تحليل) 9- السفر للخارج والعمل في اي دوله عربيه او العمل قي شركات الأدويه كمندوب وإن كنت أري أن البعض يتخذها مرحله إنتقاليه ،ثم يعمل بعد ذلك في المجال البيطري. وبالطبع هناك المزيد من مجالات العمل فهي لا تتوق عند ذلك ولكن هذا ما أذكرة الأن.....اعذروني يا جماعه الزهيمر بقي . في النهايه يا إخواني أقدر اقولكم إن الطبيب البيطري هو الماسه المجهوله وعليكم أن تظهروا هذه الماسه الي النور وهي مهمه ليست بالسهله ولكنها تبدأ أوالا بحب المهنه . وأخيرا أتمني أن أكون قد وفقت - ولو بالقليل - في توضيح الصورة أمام أعينكم ورسم الصورة الطيبه للطب البيطري . وأنا - وبصدق- أتمني لكم التوفيق في حياتكم المقبله . |
والله يا دكتور الواحد بعد ما قرأ الموضوع ده ارتاح كتير
|
اقتباس:
عشان كده جبته ربنا يجازيه خير ان شاء الله شكرا علي الرد يادوك |
كلام جميل اوى وسلس
ويطفى النار اللى شعللها التنسيق لكن بعد ما تجرب: هتقول لو لم اكن بيطريا لوددت ان اكون بيطريا |
ربنا يجازيكى عنا خيرا ياسندريلا انتي والدكتور اللي كتب الموضوع والله كلا مقنع والله ربنا مابيعملش حاجة وحشه
|
اش اش
ايه الموضوع الجامد ده كتر خيرك يابنت عمى الطب البيطرى ده الناس اللى بتقدره فعلا هناك فى استراليا لان دخل الطبيب البيطرى فى الساعه 200$ دولار وهو اعلى من دخل الطبيب البشرى وهى المهنه الاولى هناك لكثرة المزارع والاهتمام بالحيوان لانه يعتبروا الحيوان من المقومات الاساسيه للعيش لانه مصدر اللحوم والالبان وطبعا معظم الماكولات والمشروبات لحوم والبان |
ماشاء الله موضوع جميل جميل جميل شكرا ليكى يا سندريلا وطبعا باشكر الدكتور اللى كتب الموضوع اسلوبه حلو اووووووووووى اكتر حاجه عجبتنى فى الموضوع هو حكايه الماسه المجهوله دى:d |
اقتباس:
ده اللي انا بقوله دلوقتي لو لم اكن بيطريا لوددت ان اكون بيطريا :022yb4: |
اقتباس:
وربنا يجازيكي مثله ياجميله |
اقتباس:
اها كان في دكتور عندنا بيقوللنا اقل دكتور بيطري في امريكا بيبقي عنده قصر وطياره خاصه ;) وفعلا الطبيب البيطري في مصر مهضوم حقه :redface: |
اقتباس:
نورتي التوبيك ياحبي |
بجد الدكتور احمد شخص محترم ويستحق كل تقدير
ووربنا يجازيه علي عمله هذا خير الجزاء ويجازيكي خيررا سندريللا لاهتمامك بافادة الغير |
اقتباس:
ويجازيكي مثله يا حبيبتي علي فكره انا كتبت في الموضوع استأذنت منه لما يدخل يبقي يشوف الرد بقي وجزاه الله عنكم كل خير |
هههههههههه - انا ما اقتنعتش لأن مفيش ولا شغلانة مناسبة في اللي ذكرتهم حضرتك -- بس اعتقد ان البيطري هيكون له شأن عظيم في الاونة الاخيرة وخاصة بعد ظهور انفلونزا الخناذير وغيرها من الامراض الفتاكة
|
بس اعتقد ان البيطري مجال عمله بيكون افضل في الارياف
|
ممكن أسألك سؤال طالما انت مش مقتنع بمهن الطبيب البيطرى دخلت الكلية ليه
|
التنسيق هواللي عمل كده...... وبعدين هي مش وحشة بالدرجة هي كلية جميلة ومجالات عملها كتيرة بس مش متوفرة طاب قولي حضرتك لما تتخرج ايه الوظيفة اللي تناسبك من الوظائف المذكورة
|
حاجات كتيرة زى شركات الأدوية أوفتح عيادة بيطرية أو فتح مشروع تربية عجول أو اشراف فى مزارع تربية الحيوانات وده كله متوافر جدا أو فى الحجر الصحى وده صعب شوى
|
معتقدش ان فتح عيادة بيطرية أو فتح مشروع تربية عجول أو اشراف فى مزارع تربية الحيوانات وده كله هيمشي ممكن العيادة البيطرية تكون كويسة في الارياف بس الباقي مش كويس بتوهم نفسك علي الفاضي - بس انا اعتقد ان وظيفة مندوب في شركة الادوية هي الافضل بس اعتقد انها غير مربحة
|
علي العموم الواحد يفكر في كليته الاول ما نخلص نبقوا ندوروا علي اي شغلانة - ربنا يسهل
|
أنا عمرى ما وهمت نفسى أنا بحسب كل حاجة صح . وبعدين ربنا يسهل ونخلص ومش مشكلة مش هنختلف دا احنا زمايل مهنة واحدة
|
صحيح ومش عاوزين نعقد بعضنا ربنا يسهل وبعدين انا لسه رايح اولي يعني مفكرش في وظائف خالص الوقت ده بعدين ربنا يسهل
|
اقتباس:
ادخل التوبيك ده وشوف ردود اخر صفحه تقريبا هتلاقيها ليا ولهمسه ورغه ودول كمان داخلين زيك اولي بيطري ولو ماقتنعتش وحسيت ان الكليه مش هتشغلك حول كليه تانيه افضللك بالنسبه لوظيفة شركة الادويه اللي مش مربحه مع العلم اني مش هفكر اشتغل فيها لانها متعبه وبتبعدني عن المجال انت بتاخد مرتب كويس جدا ومش هقول كام لاني سمعت ارقام كتير اوي بس كلها ارقام كويسه جدا وبتاخد عربيه بعد 3 شهور يدفعولك المقدم ويخصمو قسطها من مرتبك وبرده المرتب بيفضل كويس يعني شقه وعربيه في خلال سنتين عايز ايه تاني فيللا ولا طياره دول لسه قدام شويه :022yb4: بس بجد مينفعش تدخل الكليه بنظرتك دي لان انت كده مع اول فترة امتحانات هتجيلك هتلاقي الكليه رخمه ومستحمل صعوبتها وبتذاكر عشان تنجح وفي الاخر كمان مش هشتغل هتلاقي نفسك اكتئبت وعايز تحول من الكليه بجد حاول تتأقلم لو مقدرتش شوف حل تاني غير انك تكمل في الكليه love it or leave it |
لالالا الكلية دي عجباني ولا يمكن احول بس انا كنت بطلع اللي في قلبي علشان اسمع ردودكم عشان اطمن اكتر - وربنا يسهل ويكرمنا جميعا
|
اقتباس:
ربنا يوفقك ان شاء الله وتلاقي نفسك في الكليه دي :) |
ربنا يوفقنا جميعا
|
بســــــــــــــــــــــــــــــــــــــــــــــــ ــــــــــــــــــــــــــــــــــــم الله
الشكر لله اولا واحب ان اوجه الشكر للدكتور احمد جزاه الله كل خير عن الكلام الجميل ده بجد انا حبيت الكللية قبل ما ادخلها وان اصلا حابة مجال البيطرى جدا عشان انا اعشق الحيوانات جداااااااااااااااااااااااااااااااااااااااااااااا فوق ما تتخيلوا وان شاء الله ربنا يكرمنا جميعا فى الكلية الجميييييلة دى وبجد انا فرحانة جدا بالموضوع ده وشكرا جدا لسندريلا جزاك الله كل خير وياريت اللى عنده مواقف للكلية تشجع على الدراسة يكتبها عشان انا خاااااايفة جدا انا لسة سنة اولى السنة دى لو فى دراسة السنة دى اصلا ههههههههههه اوصيكم واياى بالاستغفار |
اقتباس:
جزانا واياكم ان شاء الله وان شاء الله يبقي في دراسه وكل حاجه تمشي تمام |
اقتباس:
|
منورة يا دكتورة نور والله
|
:040vk0:بقى يا سندريلا تقولى اسماء التوبيك لبنى وانتى ورغدة وتنسينى
طب ماشى استنى عليا |
بص يا دكتور عبدلة انا اعرف داكترة بيطرين كتير اصبحوا اغنية بالملاين فى ظرف 3 سنين او اقل
وحاول عشان خاطركم اعمل موضوع عن نموذجين منهم لو انتو عاوين طبعا |
يا دكتور محمد
انت فى اولة بيطرى القاهرة عشان لو فى اولة القاهرة هتبسط انى لقيتك واتعرفت عليك انما لو هتكون فيها ومتشائم كده والله هزعل اوى انا حابب الكلية جدا |
متزعلش يادكتور حمادة الكلية جميلة وربنا يكرمنا جميعا والمفروض نكون داخليين وحاطين في دماغنا اننا نكون معيدين وربنا هيكرمنا ان شاء الله ولا ايه رايك؟ اما حكاية الشغل نسيبها علي ربنا
|
يعنى يا دكتور محمد انت فى بيطرى القاهرة
|
اقتباس:
انا مش في كفر الشيخ للأسف انا القاهره ياجميل بس برده لو احتجتي حاجه انا تحت امرك |
اقتباس:
مش فاهمه والله بتتكلم عن ايه بالظبط بس لو زي ما بتقول يبقي همسه مكانتش في الحسبه كمان :p |
لا يا دكتور حمادة انا في بيطري الاسكندرية (في ادفينا)
|
اقتباس:
|
اقتباس:
|
اقتباس:
بس قعلا والله انا بعزكو كلكو ماقدرش اقول حد وانسي التاني بس انت فهمني عشان اعرف ارد احسن تقريبا مديه مخي اجازه او حاجه :d |
اقتباس:
|
اقتباس:
كانت رغده ردت الاول وهمسه وبعدين انا دخلت رديت وردودهم حسستني فعلا هما اد ايه مقتنعين بالكليه لكن انا اديته المثال ده علي سبيل المثال لا الحصر وسوري يا محمد والله مقصدتش حاجه وزي ماقلتلك كلكو بجد طلبه محترمين جدا وشرف لبيطري القاهره انكو تنضمو ليها :av4056bb7jp3: لكن انا كنت فاكره احط اللينك بتاع التوبيك بس نسيت شفت بقي ظلمتني ازاي :d |
الحمــــــــــــــــــــــــد لله
"وعسي ان تكرهوا شيئا وهو خيرا لكم " |
مشكوره يا سندريالا على الموضوع الجميل انا لسه داخل اولى كليه وفعلا محتاااااااااااااااااج حد يقنعنى بكليه الطب البيطرى
|
شكرررررررا على الكلام ده والله انا ارتحت خالص وربنا يوفق كل من كان
|
موضوع جميــــــــل
فعلا كل الوظائف مهمة من اكبر وظيفة لأصغرها و كلها ليها دور فى خدمة البلد جزاِكِ الله خــــــــــيـــــــراً |
لو سمحتم ممكن اعرف تنسيق الطب البيطرى عامة بيكون كام
|
محدش رد عليا لية ارجو الرد:frown:
|
على حسب يا حبيبتى التنسيق كل سنه بيختلف
|
| جميع الأوقات بتوقيت GMT +2. الساعة الآن 11:59 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.