|
جميع موضوعات شرح التاريخ بأسلوب اقرأ وكأنك معى للاستاذ الكبير / مروان حسن
الموضوع مجدد تابعه كل فترة بسم الله الرحمن الرحيم أعزائي الطلبة اليوم نبدأ معا لأول مرة شرح بطريقة أقرأ وكأنك معي وهي ببساطة محاولة تبسيط الشرح لأقصى درجة باستخدام الكلمات المساعدة حتى لا يتحول الشرح إلى شيء نمطي فما تجده في الكتب تجده في الموقع للعلم لا أدري مدى نجاح الفكرة من فشلها فالقرار لكم ولنا فقط دائما شرف المحاولة والابتكار فمثلما ولله الحمد كنا أصحاب أول فكرة موقع متخصص في شرح ماده (التاريخ) اتمنى من الله التوفيق في أقرأ وكأنك معي سوف نبدأ بجزء صغير لنرى رد الفعل ومدى الاستعابة أول درس من الفصل التاسع :: بسم الله نبتغي مرضاة الله وضع مصر الاقتصادي أيام الاحتلال الإنجليزي الموضوع النهاردة في منتهى البساطة كل المطلوب مننا عشان نفهمه ونحفظة كمان اننا نحفظ كلمتين ايوة نحفظ كلمتين بس الكلمتين هما (( أهتم وأهمل )) أو ممكن نحفظ (( أهمل وأهتم )) طبعا متفرقش حاجة أهمل وأهتم أهمل وأهتم ها ....... اتحفظوا كويس ............ هنخلي الكلمتين جملة ونقول (( أهتم الاحتلال بالزراعة وأهمل الصناعة )) وضحت الجملة كده وهنطلع من الجملة 6 أسئلة س1 ليه الاحتلال أهتم بالزراعة س2 ليه الاحتلال أهمل الصناعة س3 ازاي الاحتلال أهتم بالزراعة س4 أزاي الاحتلال أهمل الصناعة س5 نتائج اهتمام الاحتلال بالزراعة س6 نتائج اهمال الاحتلال للصناعة شوفنا ازاي جملة واحده خرجنا منها 6 اسئلة بس لاحظ انا باستخدم اللغة العامية يعني في الامتحان بدل كلمة ليه هتبقى فسر وبدل كلمة ازاي هتبقى كيف أو أيد المهم الاحتلال اهتم بالزراعة عشان يوفر المواد الخام خاصة القطن واهمل الصناعة لتظل مصر سوقا لمنتجات انجلترا كده جاوبنا على سؤالين نكمل كيف اهتم الاحتلال بالزراعة بسيطة جدا حسن من طرق الري والصرف (بصوا اي حد بيهتم بالزراعة لازم يحسن من طرق الري والصرف محمد على..... اسماعيل ..اي حد ) حسن من طرق الري والصرف ازاي أنشأ خزان أسوان أنشأ قناطر أسنا وأسيوط طيب لما اهتم الاحتلال بالزراعة حصل ايه يعني النتائج شيء طبيعي زادت مساحة ألأرض الزراعية وانتاجها ولكن الاحتلال اهتم بالقطن على حساب المحاصيل الأخري خاصة القمح يعني مصر اتعرضت لنقص في المحاصيل الغذائية أصبح المسثمرين يستثمروا في الزراعة وليس الصناعة ج5 كيف اهمل الصناعة الاحتلال مش عايز صناعة في مصر خاصة اهم صناعة وهي صناعة المنسوجات ففرض ضريبة على صناعة المنسوجات 8% فثمنها ارتفع جعل السكر المصري بسعر السكر الأجنبي طبعا الناس هتشتري الأجنبي(عقدة الخواجة) فرض ضريبة 1.25 % على الصادرات يعني لا هنبيع بره ولا جوه رفع الجمارك على الالات والمواد الخام (محدش هيعمل مصانع جديدة) أهمل التعليم الصناعي لدرجة ان كرومر افتخر ان منسوجات اوربا تباع في مصر بلد المنسوجات طبعا الكلام ده هيترتب عليه ان الحكومة هتقفل المصانع وتعتمد على الاستيراد (احسن برده) وزي ما قولنا ماحدش هيشغل فلوسه في الصناعة الزراعة احسن اما الصناعة اليدوية مش هتقدر تنافس الانتاج الأجنبي ووف تدهور حتى اتلغى نظام الطوائف 1891 و................. كفاية كده ................... نشوف الأراء فهمنا اكثر ولا الاسلوب المعتاد في الشرح أفضل على حسب الردود والأراء هنشوف نكمل ولا نعتبرها فكره وراااااااااااااحت |
الجزء الثاني من اقرأ وكأنك معي
الفصل العاشر تاريخ البلاد العربية من الاحتلال وحتى الاستقلال1- الخليج العربي فاكرين لما فرنسا احتلت مصر كان من اسباب الاحتلال ان فرنسا تقطع اتصال انجلترا بأهم مستعمراتها وهي الهند طبعا انجلترا مش هتسكت لازم تتصدى لفرنسا زي ما شوفنا تصدت للحملة الفرنسية في مصر ودمرت الاسطول الفرنسي (فاكر اسم الموقعة ايه) المهم مش كده وبس جريت انجلترا واحتلت جزيرة اسمها بريم عند مدخل باب المندب عشان لو فرنسا فكرت تخرج من البحر الأحمر إلى الهند عن طريق مضيق باب المندب تلاقي انجلترا مستنياها في جزيرة بريم بس طبعا احنا عرفنا ان الحملة الفرنسية فشلت وخرجت فرنسا من مصر كده تبقى انجلترا مش خايفه من حاجة ومش محتاجه جزيرة بريم راحت خرجت منها وعملت اتفاق مع سلطان لحج وعدن (اليمن) ببقاء حامية عسكرية بريطانية (يعني جيش صغير) في اليمن عشان تأمن طريقها للهند لو طلعلها نابليون تاني أو أي خطر جديد للهند ........... ها وصلت نكمل يعني ....... اوك يالا نكمل محمد علي (عفريت انجلترا) سيطر محمد علي بعد الحروب الوهابية على أجزاء من الجزيرة العربية وقرب من الخليج العربي هنا انجلترا خافت ان محمد علي يسيطر على الخليج العربي وهو اساسا مسيطر على البحر الأحمر كده يبقى مسيطر على طريقين مهمين للتجارة وعشان كده أسرعت انجلترا تخطط عشان تسيطر هي على الخليج العربي أول حاجة استغلتها ان أكبر قبيلة عربية على الخليج العربي (اسمها قبيلة القواسم) بتشتغل في القرصنة (سرقة السفن) راحت انجلترا موجه ضربه عسكريه للقواسم بحجة منعها من القرصنة وبعدين راحت فرضه اتفاقية باسم (معاهدة الصلح العامة) 1820 على كل قبائل الخليج الاتفاقية ديه بقت عبارة عن حماية بريطانية من تحت لتحت على الخليج طبعا انجلترا ما ارتحتش إلا لما خرجت محمد علي من الجزيرة العربية بعد معاهدة لندن سنة 1840 ايه الاخبار فاهمين ولا نمنا طبعا انا باختار الاجزاء الرخمة على الطالب في الفهم والحفظ وعشان الموضوع محتاج مجهود في الكتابة ياريت كل طالب في جزء مش فاهمه يذكره وانا اشرحة بطريقة أقرأ وكأنك معي في حفظ الله |
الجزء الثالث من إقرأ وكأنك معي من الفصل الثالث عشر
بسم الله الرحمن الرحيم موضوع درس اليوم الفصل الثالث عشر :: تطور القومية العربية :: مقدمات انشاء جامعة الدول العربية المعوقات التي وضعها الاستعمار ضد القومية في البداية لازم نتفق على حاجة أن معنى القومية العربية ببساطة الوحدة العربية يبقى لما نقول تطور فكرة القومية العربية تعني التطور نحو اتحاد العرب سويا ليكونوا قومية واحدة وترابط واحد اتفقنا طيب كلنا عارفين أن معظم البلاد العربية كانت مستعمرة وطبعا الاستعمار مش هيوافق أن الدول العربية تعمل اتحاد أو تعمل قومية عربية ليه ؟ ببساطة عشان في اتحاد العرب قوة ممكن تقضي على الاستعمار اللي عايز يستغل خيرات الدول العربية من هنا نقدر نفهم ليه الاستعمار هيتصدى وهيقف ضد أن العرب يتحدوا مع بعض وأي شخص بيحب يقف ضد حد بيحط اقدامه الحواجز والمعوقات .......... وبكده وصلنا مع بعض لأول سؤال في الفصل الثالث عشر وهو :: ما هي الحواجز والمعوقات التي وضعها الاستعمار أمام القومية العربية ؟ معلش ممكن السؤال بطريقة تانية عشان نحفظه حاضر طلباتكم أوامر ...... السؤال بالبلدي أقصدي بالعامية :: دول اوربا (الاستعمار) اللي احتلت الدول العربية هتعمل أيه عشان تمنع العرب من الاتحاد سويا؟ 1- امسك ورقه في ايدك ايه رأيك فيها طبعا اجزاء الورقة فيها اتحاد وده سر قوة تحمل الورقة طيب لو قسمت الورقة ديه إلى أربع أجزاء (يالا قسمها) ها ........ هل هتبقى قويه زي ما كانت ولا هتضعف طبعا طالما اتقسمت تبقى هتضعف من هنا نقدر نقول ان الاستعمار عشان يضعف الوحدة العربية كان لازم يقسمها لأجزاء منفصله طيب هيفصل بين أجزاء الدول العربية أزاي ؟ بوضع الجمارك بين الدول وبكده يقضي على حرية التنقل والاتصال بين العرب وطالما ما فيش اتصال او انتقال يبقى ما فيش وحدة ........ نطلع من الكلام ده بجملة بتقول (( قسم الاستعمار الوطن العربي لأجزاء منفصلة وأقام بينهم الحواجز الجمركية فقضى على حرية الاتصال والانتقال ))) سيادتك هتفهم اللي في البداية وهتحفظ ما بين القوسين 2- الاستعمار حاسس ان العرب بتجمعهم جنسية واحدة وهي العروبة وده ممكن يخليهم يتحدوا ..... قعد الاستعمار يفكر عايزين ننسي العرب عروبتهم نعمل ايه ؟ أه صح .... (( خلق جنسيات متعددة من الجنسية العربية )) وبكده كل واحد ينشغل بجنسيته الجديدة أو القديمة وينسى موضوع العروبة ...........عايزين مثال عشان المعلومة تثبت ؟ ....... وماله نقول مثال ........ :: انجلترا لما احتلت منطقة الخليج كان معروف ان كل اللي عايشين على الخليج العربي هما قبائل عربية ............ انجلترا عملت ايه قسمت العرب اللي في الخليج إلى ( قطر – الأمارات – البحرين -) يعني اصبح فيه اسماء جديدة للعرب غير انهم عرب 3- الاستعمار حب أنه يبعد بعض العرب عن عروبته (( مثل فرنسة الجزائر أي اعتبار الجزائر جزء من فرنسا ومندمجة مع فرنسا وابعادها عن اصلها العربي 4- تخيلوا أن أب وأم ليهم ثلاث أبناء وكل ابن فيهم عاش في دولة مختلفة من ساعة ما كان صغير يعني واحد في الولايات المتحدة وواحد في فرنسا والثالث عاش في اليابان ...... الأب والأم بعد عشرين سنه جمعوا الأولاد الثلاثة وحبوا يوحدوا بينهم بس ما نفعش ليه لأن كل أبن ليه ثقافة مختلفة وعادات مختلفة ولغة مختلفة يبقى هيتحدوا أزاي بل هيختلفوا وهيتصارعوا كمان وده الاحتلال فكر فيه ونشر في كل دولة ثقافة مختلفة ولغة مختلفة في مصر مثلا لغة ثقافة إنجليزية في الجزائر والمغرب وتونس نشر الاحتلال لغة وثقافة فرنسية وهكذا (( نحفظ ديه في النهاية (( لإضعاف الثقافة العربية ونشر اللغة والثقافة الأوربية )) 5- الاستعمار عمل في كل دولة عربية نظام سياسي مختلف عشان يعقدها خالص في مصر والعراق نظام ملكي وفي سوريا ولبنان نظام جمهوري (( عمل على تعدد النظم السياسية )) 6- طبعا أحلى ناس تتخانق مع بعض هما العرب اللي دايما متفقين انهم يختلفوا والاحتلال استغل الموضوع ده (( أدخل الحكام العرب في صراع وهمي على عروش وهمية )) 7- مش مهم العرب إحنا فراعنة ومش مهم العرب إحنا فينيقين وكمان مش مهم العرب لأننا قرطاجين هو ده اللي نجح في الاستهمار أنه أثار النعرات المحلية يعني خلى كل شعب يحب نفسه أكثر ما يحب عروبته ((( أثار الاستعمار النعرات المحلية مثل النزعة الفرعونية في مصر والفينيقية في لبنان)) 8- كل شعب انشغل بصراعه مع الاستعمار يبقى مش هيفكر في العروبة والوحدة العربية 9- زي ما شوفنا الاستعمار فرق ما بين الدول العربية وما اكتفاش بكده ده عايز يفرق بين شعب كل دوله من الداخل بحيث يبقى كل شعب مفكك من الداخل وبكده يفكر الشعب انه يتحد مع نفسه الأول وبعدين يبقى انه يتحد مع الدول العربية الأخرى وده عن طريق (( أثار الاستعمار روح العداء الطائفي بين المذاهب والأديان التفريق بين المسلمين والمسيحين في مصر التفريق بين السنه والشيعة في العراق التفريق بين الزيدية والسنة في اليمن التفريق بين الموارنة والدروز في لبنان شكرا ليكم وانتظروا قريبا باقي الفصل لكم دعائي بالتفوق |
الجزءالرابع من أسلوب ((إقرأ وكأنك معي)
مؤرخ الغد الجزءالرابع من أسلوب ((إقرأ وكأنك معي) الفصل الثالث عشر تابع تطور حركة القومية العربية من مؤرخ الغد :: أول موقع متخصص في شرح ومراجعة التاريخ لا خوف على القومية العربية هل لو :: وضعناالحواجز أمام مياه البحر ممكن نمنعها من إنها توصل للساحل طبعا مستحيل !! ومهما وضع الاستعمار حواجز أمام القومية العربية ومهما وضع المعوقات أمام الوحدة العربية مش هيقدر يقضي على القومية العربية أذا ثم إذا مرة تانية لا خوف على القومية العربية ؟ بسبب وجود اللغة والثقافة العربية والتاريخ الذي يجمع بين عواطف ووجدان العرب سؤال تاني وصحصح معايا :: ممكن الواحد من غير ما يقصد يلاقي الظروف اللي تساعدة على النجاح ظروف مالوش يد فيها ده اللي ممكن نسميه الحتمية التاريخية :: يعني العرب رغم محاولة الاستعمار اضعاف وحدتهم إلا أن الحتمية التاريخية ساعدتهم على الاتحاد ............. يبقى معنى الحتمية التاريخية هي الظروف اللي حصلت في التاريخ وساعدت العرب على الوحدة ........... السؤال :: وضح الحتمية التاريخية التي ساعدت على إحياء القويمة العربية في القرن العشرين ؟ تقدم وسائل المواصلات (مثل الطائرات) تقدم وسائل الاتصال(اذاعة – صحافة ) تقدم مناهج التعليم وانتشارة في كافة الدول العربية (التعليم هيزود الوعي بأهمية الاتحاد العربي) اشتراك العرب في كارثة واحدة وهي الاستعمار ساعدهم على الاتحاد لأن هدفهم واحد فاكر احنا اتكلمنا في أيه لحد دلوقتي عشان تربط الأحداث مع بعض :: معوقات الاستعمار ضد القومية العربية لا خوف على القومية العربية الحتمية التاريخية التي أحييت القومية العربية السؤال الأن ::::::: دلوقتي يه هو الدليل التاريخي ان العرب مهما بعدهم الاستعمار برده بيقربوا من بعض سؤلنا وضح أشكال التقارب بين العرب ترة ما بين الحربين (1918-1939 ) 1- في عام 1934 عقدت معاهدة الطائف بين السعودية واليمن لتصفية الخلافات بينهم 2- في عام 1936 عقدت معاهدة بين السعودية والعراق لتصفية الخلاف بين الأسرة السعودية والأسرة الهاشمية (فيصل بن الحسين اول ملك عربي على العراق) . ثم انضمت اليمن إلي المعاهدة 3- في عام 1936 عقدت معاهدة بين السعودية ومصر لتصفية الخلافات بين البلدين منذ الحرب بين محمد علي والوهابيين . 4- في عام 1937 عقد المؤتمر العربي الفلسطيني في بلودان بسوريا للصتدي للصهيونية 5- في عام 1939 عقد مؤتمر المائدة المستديرة في لندن لبحث مشكلة فلسطين 6- انعقد مؤتمر الأطباء العرب– مؤتمرالمحامين العرب– مؤتمر المهندسين العرب انتظرونا مع الدرس القادم :: سبحان مُغير الأحوال ........... مؤرخ الغد نحلق بك في سماء التفوق http://marwan2368.jeeran.com [/COLOR][/FONT] |
الجزء الخامس من أقرأ وكأنك معي (تابع الفصل 13)
كل عام وانتم بخير
|
إقرأ وكأنك معي الجزء السادس
ازيكم يا شباب هذا الجزء الجديد من اسلوب
إقرأ وكأنك معي اتمنى لكم التوفيق وانشاء الله اوافي كل الطلبات تباعا وياريت محدش يزعل انا مش ناسي حد وانشاء الله كل الأساتذه الفاضل معاكم من هنا http://www.thanwya.com/vb/showthread...d=1#post395398 |
الجزء السادس من إقرأ وكأك معي (من الفصل الأول)
1 مرفق
أهلا بكم
هذا هو الجزء السادس من موضوع إقرأ وكأنك معي اتمنى أن يساهم معكم في فهم المنهج وهو جزء صغير ولكن أوعدكم بجزء أكبر قريبا انشاء الله goda2نتمنى ان الكثير والكثير ولكن لا ارى لحضرتك اى مشاركة خلاص كل المشاركات ديه ومش شايفين اي مشاركة ؟ لا تعليق حمل الملف وبالتوفيق للجميع |
إقرأ وكأنك معي (( الجزء السادس))
|
الجزء السابع شرح الفصل الأول
1 مرفق
هذا شرح لفصل الأول بطريقة وكأنك معي
اتمنى ان تحوز اعجابكم الشرح في ملف قم بتحميله أو إقرأ الموضوع بلا تحميل من هنا http://marwan2368.jeeran.com/وكأنك-معي-إقرأ.html |
اقرأ وكأنك معي الجزء السابع جديد
تفضوا الجزء الجديد من اسلوب إقرأ وكأنك معي
تفضلوا من هنا http://www.thanwya.com/vb/showthread...d=1#post415908 |
الجزء الثامن من وكانك معي (وعد بلفور)
أهلا بكم
عودا جديدا مع الشرح بأسلوب وكأنك معي وبناء على طلبكم هذا الجزء من الفصل ال13 وعد بلفور (بداية الصهيونية) اليهودية ديانة شيء بديهي بس اليهود حبوا يجعلوا من اليهودية ديانة وجنسية في وقت واحد وعشان يعملوا من اليهودية جنسية لازم يكون في وطن يجمع هؤلاء اليهود طيب اليهود موجودين في كل مكان في العالم أوربا – أفريقيا – أسيا مشتتين في كل الدول وفي كل دوله تلاقيهم عايشين مع نفسهم عايشين في عزلة مش بيحبوا يختلطوا مع أهل تلك الدول عشان اليهود حاسيين أنهم أحسن شعوب الأرض حاطيين في دماغهم أنهم شعب الله المختار وبكده ما ينفعش يختلطوا بشعوب أقل منهم وعشان كده عاشوا في ( جيتو) يعني عزلة وعشان عند اليهود مهارة في التجارة كونوا ثورات طائلة المهم اجتمع رؤساء طوائف اليهود في مؤتمر اليهودي الأول 1897 وقرروا انشاء وطن قومي لهم .......... وعملوا مؤتمر ثاني 1905 واختاروا فلسطين مقر لهذا الوطن على اعتبار ان فلسطين هي أرض الميعاد التي وعد بها الله شعبه المحتار بس نلاحظ اليهود معاهم فلوس ايوه معاهم فلوس بس الفلوس ما تنفعش لوحدها تعملهم وطن لأن عشان يعملوا وطن يجمعهم لازم يسرقوا الوطن ده من شعب غيرهم وهما قرروا يسرقوا وطن العرب في فلسطين بس لازم حد يساعدهم زي الطفل الصغير ممكن يكون بيعرف يمشي بس مايعرفش يعدي الشارع لوحده لازم حد كبير يمسك ايده ويعديه الشارع واليهود في الفترة ديه زي الطفل وعايزين يسرقوا فلسطين يا ترى مين اللي هيساعدهم ويعديهم الشارع اقصدي هيخليهم يسرقوا فلسطين عمو بلفور وزير خارجية بريطانيا صحي من النوم خير اللهم اجعله خير لقى نفسه قلبه بيرتعش وعينه بتعيط وقال ايه صعبان عليه اليهود يا حبة عيني ولازم انجلترا تقف جنب اليهود وتساعدهم راح ما كدبش خبر ......... ارسل خطاب (جواب) إلى روتشيلد (رئيس الطائفة اليهودية في انجلترا) قاله ان انجلترا متعاطفة مع فكرة انشاء وطن قومي لليهود في فلسطين وسوف تساعدهم على ذلك دون أن يؤثر ذلك على حقوق الطوائف غير اليهودية هنا (يقصد العرب)) ده يا شباب اللي بيسموه وعد بلفور أو تصريح بلفور نوفمبر 1917 طبعا حاول نركز شوية الوعد من انجلترا لليهود انهم يساعدوهم يعملوا وطن ليهم في فلسطين الوعد صدر أثناء الحرب العالمية الأولى 1914- 1918 تعالوا نحلل الوعد يعني نقطعه وندخل ما بين السطور عشان نفهمه نص على إنشاء وطن قومي لليهود في فلسطين وليست كل فلسطين وطن قومي لهم (يعني بلاش افترى وطمع) تجاهل عرب فلسطين إلا عندما ذكرهم بقول (طوائف غير يهودية) رغم أن العرب كانوا يمثلون 92 % من السكان(644 ألف) واليهود 8 % (56 ألف) من سكان المدينة أعطت من لا تملك (بريطانيا) وعدا لمن لا يستحق (اليهود) انتظروا جزء جديد أ/ مروان حسن مؤرخ الغد |
الجزء التاسع من إقرأ وكأنك معي ( سياسة الانتداب البريطاني في فلسطين)
الأن جزء جديد من الشرح بطريقة إقرأ وكأنك معي
دعائي لكم بالتفوق من هنا http://www.thanwya.com/vb/showthread...d=1#post438607 |
شكرا لكم جميعا
قريبا انشاء الله سأجيب طلباتكم بخصوص اللجنة الإنجليزية وجامعة الدول اما بالنسبة للفصل الثاني عشر يرجى تحديد اكثر جزئية بها صعوبة لأنني اوضحت سابقا عدم وجود وقت كاف هذه الايام لكتابة شرح فصل كامل بطريقة أقرأ وكأنك معي
فيرجى تحديد اكثر جزء صعب في الفصل حتى يكون ميسر لي من الوقت كتابته لأن أقوم بكتابة هذا الموضوع للمنتدى بصفة خاصة بخصوص الباسورد الجزء الخامس فقط وهو من له باسورد ومن اجل مشاركتكم وتفاعلكم لم يعد هناك داعي له لذلك الباسورد هو Marwan2008 وشكرا لكم جميعا وجزاكم الله خيرا ودعائي لكم بالتفوق أذكروني بدعاء بسيط قد يفيدني في يوما لاباقي به سوى أعمالنا |
الجزء التاسع بالطريقة السحرية إقرأ وكأنك معي
الجزء التاسع من الفصل ال13
إقرأ وكأنك معي مؤرخ الغد سياسة الانتداب البريطاني في فلسطين وقفنا أخر مرة عند وعد بلفور لليهود إن انجلترا هتساعدهم عشان يعملوا وطن قومي ليهم في فلسطين النهاردة هنكمل ونشوف تطور الأحداث الحرب العالمية الأولى خلصت وقررت الدول الكبرى عقد مؤتمر الصلح وإنشاء عصبة الأمم اللي هدفها حل المشاكل بين الدول بالطرق السلمية طبعا العرب قالوا نبعت طلباتنا لمؤتمر الصلح وبالفعل أرسل فيصل بن الحسين مذكرة للمؤتمر عايز فيها إعلان استقلال البلاد العربية بما فيها فلسطين ومن جهه تانية أرسل اليهود مذكرة عايزين فيها فرض الانتداب البريطاني على فلسطين عشان انجلترا تنفذ وعد بلفور وكمان إنشاء مجلس تمثيلي لليهود (يعني مجلس يعبر عن اليهود في فلسطين) وهنا جه دور فرنسا وعصبة الأمم يحددوا هينفذوا كلام مين تتوقعوا مين يا حلوين طبعا هينفذوا كلام اليهود وهيسمحوا بالانتداب البريطاني على فلسطين من خلال قرارات مؤتمر سان ريمو 1920 وإلزام انجلترا بتنفيذ وعد بلفور شوف أزاي قال يعني انجلترا محتاج حد يجبرها وبكده خلص الجزء ألأول من الحدوته وتخلت عصبة الأمم عن أهم أهدافها من الأول بدل ما تقف جنب الشعوب الضعيفة وقفت ضدهم قررت القضاء على عروبة فلسطين وتهويدها (حلوه تهويدها ديه) طيب نكمل ولا ............ نكمل انشاء الله وبالفعل بدأ الانتداب البريطاني على فلسطين من خلال قرارات مؤتمر سان ريمو 1920 طيب السؤال هنا انجلترا هتعمل ايه في فلسطين عشان تحول وعد بلفور إلى حقيقة يعني سياسة انجلترا في فلسطين ايه هتعين هربرت صموئيل مندوب سامي بريطاني على فلسطين وهو ذو أصل يهودي وطبعا الأخ صموئيل هيشكل ادارة ليها طابع يهودي عشان ينفذ الوعد وهتصدر انجلترا الكتاب ألأبيض ألأول اللي بتوضح فيه ازاي هتبقى سياستها في فلسطين الكتاب الأبيض الأول 1922 :: ï أن حكومة بريطانيا لا تتصور أن فلسطين كلها ستصبح يهودية مثلما انجلترا إنجليزية (كان هذا من باب التمويه ) ï تصريح بلفور غير قابل للتغير وأن وطنا قوميا سيقام لليهود في فلسطين 0 ï زيادة عدد المهاجرين اليهود إلى فلسطين 0 ï الارتقاء بفلسطين حتى تصبح مؤهله كمركز للشعب اليهودي زي ما شفنا الكتاب لصالح اليهود ميه في الميه وعشان كده رفضه العرب انجلترا هتعمل ايه عشان تنفذ اللي في الكتاب ألأبيض 1922 ؟ فتح باب الهجرة أمام اليهود لفلسطين , العمل على انتقال الأراضي من العرب لليهود حتى ولو بقوانين نزع الملكية وفرض الضرائب الباهظة ليجبر العربي على بيع أرضه Å إلحاق الشباب اليهودي للعمل بالأراضي الزراعية حوادث حائط المبكى ( البراق ) 1929 :: من المصادمات الأولى بين العرب واليهود ما حدث 1929 عندما تعدى اليهود على حق العرب في حائط البراق وهو حائط ملتصق بالمسجد الأقصى Ã أما اليهود يعتبرونه مقدسا ويسمونه حائط المبكى (جزء منه) ودارت أحداث دموية بين العرب واليهود حتى تدخلت القوات البريطانية ولكن كانت في صالح اليهود , ترتب على حوادث1929(المبكى)أن أصدرت بريطانيا الكتاب الأبيض1930رغبة في تهدئة العرب وده كتاب هنتكلم عنه قريب قولوا يارب دعائي لمرضى وضعفاء المسلمين والشهداء في فلسطين والعراق وأفغانستان وكل أرض الله اللهم صبر ذويهم وارزقهم جنتنك واجعلنا في زمرتهم |
خبر هام
أهلا أعزائي
بالنسبة لطلب شرح اللجنة الإنجليزية الإمريكية تم وضعه مؤقتا على موقع مؤرخ الغد وسأنقله قريبا هنا لمن يريد الإطلاع عليه الأن ادخل على موقع مؤرخ الغد قسم وكأنك معي ابتكار جديد من هنا http://marwan2368.jeeran.com شكرا لكم |
اللجنة الانجليزية الامريكية
1 مرفق
اهلا بكم
الجزء الجديد من اقرأ وكأنك معي اللجنة الانجليزية الامريكية دعائي لكم بالتفوق حمل الملف |
البناء السياسي من الفصل السابع والثامن
1 مرفق
بسم الله الرحمن الرحيم
أهلا بكم والسلام عليكم بناء على طلب أحد الطلاب شرح البناء السياسي ونظام الحكم أيام الحملة الفرنسية ومحمد علي الشرح مبسط لأقصى درجة لأنه جزء صعب على كثير من الطلاب دعائي لكم بالتفوق ودعائي لشهداء المسلمين |
البناء السياسي شرح رائع بطريقة وكأنك معي
شرح جزء هام من المنهج لو فهمته هيفهمك أجزاء كثيرة جدا
البناء السياسي من هنا http://www.thanwya.com/vb/showthread...103#post445103 |
شكرا لكم جميعا
وبالنسبه للباسورد هقول الموضوع ده للمره الثالثه او الرابعه يا شباب الباسورد marwan2008 والجزء الخامس فقط هو اللي بيحتاج باسورد باقي الملفات لا تحتاج ذلك شكرا جميعا |
وكأنك معي ::::: الفصل الثاني
1 مرفق
أهلا بكم
بناء على طلب أحد الأعضاء شرح الفصل الثاني بطريقة وكأنك معي دعائي لكم بالتفوق وقريبا حرب أكتوبر إلى لقاء جديد لمشاهدة الموضوع كاملا شاهدة على موقع مؤرخ الغد http://marwan2368.jeeran.com |
حرب أكتوبر ( وكأنك معي)
1 مرفق
حرب اكتوبر
بأسلوب وكأنك معي حمل الملف المرفق دعائي لكم بالتفوق |
تابعوا معنا
الموضوع كاملا من هنا
لمن يريد متابعة كل موضوعات إقرأ وكانك معي من هنا http://marwan2368.jeeran.com/وكأنك-معي-إقرأ.html |
الحمد لله
الحمد لله الحمد لله لم أكن متوقعا حين طرأت في ذهني فكرة الموضوع لم أكن متوقعا بالمرة أن تنال هذا النجاح والتأييد نجاح صادق ليس به والحمد لله شبه مجاملة كلمات الطلاب كانت تاج فوق راسي كلماتهم كانت الدافع لي لكي أتغاضى عن أرهاق الكتابة لأسجل شرح التاريخ بطريقته المبكرة إقرأ وكأنك معي تلك الطريقة التي ولدت في هذا المنتدى لتمتد لغيرة من المنتديات الحمد لله وما توفيق إلا من عند الله ستظل كلماتكم الجميله صوب عيني ودافعي ليكون هذا الموضوع شامل لكل أجزاء المنهج وأعد من لم يدرس تاريخ وسينضم لنا العام القادم أن يكون المنهج كاملا مرتبا بطريقة إفرأ وكأنك معي الحمد الحمد لله والشكر لطلاب ومدرسي وإدارة الموقع وقسم التاريخ |
الفصل التاسع بطريقة إقرأ وكأنك معي 2009
بسم الله الرحمن الرحيم أقرأ وكأنك معي الفصل التاسع التدخل الأجنبي في شئون مصر إنسان مديون يبقى إنسان مذلول واللي بينطبق على الناس يطبق على الدول وبما أن مصر استلفت فلوس كثير أصبحت مديونة للدول الأوربية وطبعا الدول ديه وبحجة ديونها هتتدخل في شئون مصر وهتعمل اللي هي عايزاه لأن مصر مديونة طيب وايه اللي يخلي مصر تستلف من الدول ديه محتاجين نحكي الموضوع من الأول ...... كان يا ما كان .... كان في حاكم على مصر اسمه سعيد ... الحاج سعيد ده اتزنق في قرشين وبصفته حاكم مصر استلف قرض من انجلترا طبعا باسم مصر والقرض ده بفائده 7 % والكلام ده كان عام 1862 وديه كانت البداية واللعبة عجبت سعيد وفضل يستلف ويستلف وبنهاية فترة حكمة 1863 وصلت الديون ل11 مليون جنية يا واد يا واد من القصة ديه نفهم ان سعيد هو اول حاكم على مصر يبدأ موضوع القروض وأول دوله استلف منها كانت انجلترا المهم .............. مسك الحكم بعد كده اسماعيل وراح مكمل موضوع الاستلاف والقروض ده بنجاح ساحق لدرجة ان الديون على مصر وصلت اواخر عهد اسماعيل إلى 99 مليون جنية (98748930) جنيه يخرب بيتك يا اسماعيل زي ما خربت بيت البلد استلفت الفلوس ديه كلها ليه ............... الخديوي اسماعيل استلف عشان .... هو اساسا مسرف جدا وعشان يصرف على مشروع قناة السويس وحفل افتتاحها وكمان استلف عشان يطور مصر (كباري- قصور- متاحف – شوارع) واستلف عشان يدفع للسلطان عشان يديله بعض الفرمانات زي 1867 اللي من خلاله خد من السلطان لقب خديوي (ياحلاوتك يا جمالك) من كل الكلام ده نتوصل لحاجتين ........... اولا ان مصر وقعت في ازمة مالية بسبب الديون بسبب سعيد واسماعيل ونرجع لكلامنا في البداية المديون ماله ......... المديون مذلول ............. والدولة المديونة .... دولة مذلولة ها يا شباب لسه الارسال واصل ......... ولا فصلنا ........... عرفنا ان اسماعيل كان واخد قروض من دول كثيرة وابتدى الدائنين (اللي مستلف منهم اسماعيل ) يطالبوا اسماعيل بالسداد والباشا مش معاه يسدد فراحوا اشتكوا للحكومات بتاعتهم يعني الفرنسيين اللي مسلفين اسماعيل اشتكوا لحكومة فرنسا والانجليز اللي مسلفين اسماعيل اشتكوا لحكومة انجلترا والألمان اللي مسلفين ...... وهكذا بيطلعي سؤال هنا .... اسرع دول تطالب اسماعيل بسداد الديون هي انجلترا ....... اشمعنى ..... لأن انجلترا استغلت موضوع الديون كحجة للتدخل في شئون مصر لتحقق حلمها القديم في السيطره على مصر من ايام حملة فريز .... فاكرينها ........... معنى ده ... ان الديون والأزمة المالية .... مش السبب الحقيقي للتدخل الاجنبي في شئون مصر.. طبعا ... مش السبب الحقيقي ... السبب الحقيقي ... رغبت الاجانب في السيطره على مصر ليسيطروا على قناة السويس .... وتوسعات اسماعيل في شرق افريقيا...... ولكن الديون كانت سبب ظاهري طيب ايه الدليل ... ان مصر مديونه من 1862 من ايام سعيد .... والاجانب طالبوا باموالهم 1875 طيب اشمعنى .... لو هي مشكلة الفلوس ايه اللي مسكتهم عليها 13 سنه ... من هنا نفهم انها مش مشكلة ديون ولكن لأن في عام 1875 بدأت توسعات اسماعيل في شرق افريقيا وهي نفس السنة اللي بدأ فيها التدخل ..... اظن وضحت .... العلاقة .... نقدر من خلال الجزء السابق نجاوب على .... متى بدأت الأزمة المالية ؟ اسباب الأزمة المالية ؟ اسباب التدخل الأجنبي ؟ لماذا انجلترا اسرع الدول مطالبة بأموال الدائنين ؟ ها يا شباب متابعين ولا ....................... |
الجزء الثاني من الفصل التاسع
ثانيا :: ... مراحل ومظاهر التدخل الأجنبي في شئون مصر ؟ 1- بعثة كيف 1875 :: طلب اسماعيل من انجلترا ارسال من يساعده في حل الأزمة المالية (اشمعنى انجلترا ؟) فأرسلت له بعثة من خبراء اقتصاد برئاسة مستر كيف ..... فرنسا خافت ان انجلترا تنفرد بأمر مصر فأرسلت خبيرها الاقتصادي .... مسيو فييه ........(لاحظوا معايا ... وجود خبراء اجانب في الاقتصاد يعتبر نوع من التدخل الاجنبي المفروض ما نسمحش بيه بس عشان اسماعيل مديون مقدرش يعترض .... لأن المديون ماله ....... 2- صندوق الدين :: ده اقتراح من فرنسا :: المفروض ان الديون بتسدد على اقساط ترسل سنويا للدول الأوربية ....راحت فرنسا مقترحة انشاء صندوق الدين وهو عبارة عن خزنة يوضع بها اقساط الديون ويشرف عليها موظفين اوربيين يعينهم الخديوي رسميا يعني التدخل هياخد شكل رسمي وبكده بنعتبر ان صندوق الدين اول هيئة رسمية للتدخل في شئون مصر 3- المجلس الأعلى للمالية : عباره عن عشر اعضاء نصفهم اجانب 4- المراقبة الثنائية :: التدخل زاد جدا واسماعيل مش عارف يوقفه لدرجة ان انجلترا وفرنسا اجبروا اسماعيل على تعين واحد انجليزي يراقب الايرادات المصرية وواحد فرنسي يراقب المصروفات يعني الاجانب هيراقبوا اقتصاد مصر عامله كده زي لما يكون واحد عنده شركة ومديون للبنك يقوم البنك معين شخص تبعه يفضل قاعد في الشركة ويراقب كل حاجة تعتبروا ده تدخل ولا لأ 5- لجنة التحقيق الأوربية :: هل بعد كل مظاهر التدخل الاجنبي في شئون مصر احوال اقتصادنا اتحسنت ولا الهوا بل الاوضاع باظت اكثر لاننا نبقى هبل لو صدقنا ان الاجانب كان في نيتهم يحسنوا من احوالنا الاقتصادية دول عايزين اقتصادنا يتدهور اكثر عشان منقدرش نسدد الديون ابدا لان لو سددنا هنرفض التدخل وبالتالي الازمة المالية زادت جدا والكارثة ان المراقب الانجليزي والفرنسي اتهموا اسماعيل انه سبب الازمة المالية لأنه مسرف واقترحوا ارسال لجنة اوربية للتحقيق في اسباب الازمة المالية وطبعا اسماعيل مجبر انه يوافق شوفنا اخر الديون اهو اسماعيل اتبهدل وهيتحقق معاه كمان ياعيني على التدخل............... 6- الوزارة الاوربية :: ويستمر مسلسل التدخل الاجنبي ويزداد ..... اسماعيل عين وزارة جديدة راحت انجلترا وفرنسا اجبروه ان يكون في الوزارة ديه وزير انجليزي ووزير فرنسي ......هيبقى اسمها وزارة نوبار باشا (اسم رئيس الوزارة) ديه احلوت على الأخر .... الحكومة المصرية هيبقى فيها وزراء اجانب .... هنا الشعب المصري اتخنق وقال لأسماعيل كفاية مهانة لحد كده ازاي نوافق على الوزارة ديه اللي فيها وزراء اجانب وطبعا اسماعيل ماكنش راضي عن الموضوع بس مضطر فلما لقى الشعب مش موافق استقوى بالشعب واستغل رفض الشعب عشان يقوم بعزل وزارة نوبار وعين وزارة جديدة برئاسة (شريف باشا) وده راجل وطني كان عايز يحل مشكلة الأزمة المالية ويعمل دستور وعشان كده ألغى المراقبة الثنائية ليقف ضد التدخل الأجنبي وده اللي أغضب انجلترا وفرنسا وحرضت السلطان على عزل اسماعيل عقابا ليه انه جاب شريف باشا وتعين ابنه توفيق.... وبكده تم عزل اسماعيل وتعين ابنه توفيق 1879 هنا فيه سؤالين .. ليه تم تعين توفيق ابن اسماعيل ولم يتم تعين احد من اخوه اسماعيل رغم ان فيهم اكبر سنا من توفيق .. سؤال تاني :: ليه توفيق طوال فترة حكمة هيبقى خاضع لأنجلترا وفرنسا وينفذ أوامرهم بالحرف الواحد ويبى ضد الشعب والوطنين المصريين ... وسؤال ثالث ... انتم لسه صاحين ولا نمتم اقولكم نكمل بعدين ............... |
أي واحد في الدنيا كان ممكن يتوقع إن فرنسا بعد احتلال الجزائر هتفكر تحتل تونس وكمان المغرب عشان تكون لنفسها إمبراطورية استعمارية في شمال افريقيا ............. مش كدة وبس ............. ده في حاجات كتير شجعت فرنسا عشان تحتل تونس أول حاجة ضعف حكام تونس ..... ثاني حاجة ....... ان الدولة العثمانية اللي كانت بتحكم الجزائر وتونس وليبيا لم تعترض على احتلال الجزائر ومن هنا اعتقدت فرنسا انها برده مش هتعرض على احتلال تونس .............. ثالث حاجة .......... ان الأسرة القرمنلية اللي كانت بتحكم ليبيا .... ضعيفة ...... هتقولي .... والأسرة اللي بتحكم ليبيا ايه علاقتها بتونس ..... اقول لسيادتك .... على مدار التاريخ لما يكون ...... حكام ليبيا أقويه .... يسيطروا على تونس وبالتالي ... حضرتك ... لما تكون الأسرة القرمنلية اللي بتحكم ليبيا ضعيفة يبقى مش هيعترضوا لما فرنسا تحتل تونس ... وصلت ..... عارفين يا شباب .................. من الجزء اللي فات ده نقدر نجاوب على السؤال ده ............... العوامل التي شجعت فرنسا على احتلال تونس .....؟ ولكن ........ ركز في لكن ديه ............. لما بدأت فرنسا تتحرك عشان تحتل تونس ....... هنا ...... هنا ..... ظهرت الدولة العثمانية لتعترض .... يا سلام ... يا سلام المارد صحصح من النوم .........ولسان حال الدولة العثمانية بيقول .... انا سبت فرنسا تحتل الجزائر وسكت ... تقوم تطمع كمان في تونس ومش بعيد تطمع كمان في ليبيا ........... وبدأت الدولة العثمانية تتحرك ................ لتعيد سيطرتها المباشرة على كل من ليبيا ....... وتونس وفعلا ...... نجحت الدولة العثمانية في القضاء على الأسرة القرمنلية في ليبيا وإعادة سيطرتها على ليبيا واتجهت ايضا للسيطرة على تونس ولكن ............ فرنسا منعتها بحجة أن تونس لها كيان مستقل يعني مستقلة ........ وطبعا الدولة العثمانية خافت من فرنسا وابتعدت عن تونس ..... ................................ كده فرنسا لو اتجهت لاحتلال تونس مش هتلاقي حد يعارضها .... اقولك لأ .... وألف لأ ..... لأن فرنسا لقت انجلترا وايطاليا هما كمان طمعانين في تونس ...... دي العملية أحلوت خالص فرنسا ... ايطاليا .... انجلترا ..... كلهم عايزين تونس .... ايه الجمال ده ..... ................................... طيب والحل ........ نعمل قرعة ..... أقولك ... واحسب الجمايل ..... الحل ان الدول الثلاثة هيلعبوا مع تونس لعبة التسليف ... ايه لعبة التسليف ديه ... ركز معايا .... كانت الدول الكبرى المتحضرة الغنية زي انجلترا وفرنسا وغيره .... تروح للدول الصغيرة الفقيرة .... زي تونس .. المغرب ..... مصر .... وتعرض عليهم بالتطوير وادخال مظاهر الحضارة .... انهم يعملوا مشاريع .... للبنوك ... مدارس .. طرق ... موانئ ... السكك الحديدية .... دستور .... .... ... كويس وايه المشكلة .... المشكلة .... ان الدول الفقيرة ... مش معاها فلوس ... فالدول الكبرى تقولهم .... ولايهمكم نسلفكم ... على النوتة ... يعني بعدين ... ادفعوا ثمن الحاجات ديه ..... وبكده الدول الفقيرة هتبقى مديونة زي اللي حصل في مصر ... فاكرين .... وبعدين بحجة الديون يتدخلوا في شئون الدولة لحد ما ... يحتلوها .... وهكذا ..... ايه رأيكم في لعبة التسليف ديه ....... هنا يطلع سؤال للطالب الذكي اللي بيربط الأحداث ...... هل تونس هتقع في ازمة مالية مثلما ما حدث في مصر ....؟ أيوه سيادتك .... وعشان المعلومة تبقى كاملة هنقول دلوقتي دليل على ان مظاهر الحضارة دخلت تونس كمدخل للديون .... حاكم تونس يلقب ( باي ) الباي راح والباي قرر .... الباي محمد :: أصدر (( عهد الأمان ) ) حاجة شبة الدستور بس اسمه عهد الأمان وده بيساوي بين المواطنين أمام القانون ..... الباي محمد الصادق :: أصدر دستور 1861 وأقام مشاريع للسكك الحديدة والبرق والموانئ على يد شركات أجنبية , مما أدى لإفلاس تونس بعد إتباعها سياسة الاقتراض ووقوعها في أزمة مالية مثلما حدث في مصر ... ... هنوقف المشهد في الفيلم ده هنا ونروح نشوف مشهد من فيلم تاني خالص بيحصل في أوربا وبعدين هنلاقي ألأحداث في الفيلمين ربطت مع بعض .... ولكن هنكمل ... بعد الفاصل .... إلى لقاء ........... |
تجميع لما كتب من الفصل الثالث عشر وحرب اكتوبر
2 مرفق
تجميع لما كتب من الفصل الثالث عشر وحرب اكتوبر الطالبتين الرائعتين هاجر وزينب التوأم الجميل جزاكم الله خيرا على هذا التجميع وهذا الجهد وبالتوفيق الدائم |
3 مرفق
اقتباس:
للأسف الأستاذ مروان مش عمل من الفصول الأولى غير الأول والثاني وهي موجوده في المرفقات دمت في حب الله :) |
إقرأ وكأنك معي جزء جديد 2010 من الفصل التاسع
بسم الله الرحمن الرحيم كنا قد تناولنا الجزء الاول من الفصل التاسع وموجود في الموضوع المثبت اليوم نتناول جزء جديد من حيث توقفنا فيما سبق كلنا عارفين الموقف البايخ اللي إسماعيل حط نفسه فيه عام 1879 واللي مش فاكر نفكره ....... كان يا مكان كان فيه خديوي بيحكم مصر اسمه إسماعيل وكان مديون بفلوس كتير للأجانب ومش عارف يسدد ..... والأجانب استغلوا الديون كحجة – أكرر – كحجة للتدخل الأجنبي في شئون مصر لأن الديون كانت سبب مزيف للتدخل أما السبب الحقيقي :: توسعات إسماعيل في شرق أفريقيا ورغبتهم في السيطرة على قناة السويس .... المهم ... الأجانب ... قعدوا يشتروا ويبيعوا في إسماعيل ....... مرة بعثة كيف ومرة صندوق الدين ومرة مراقبة ثنائية ومرة يجبروا إسماعيل على تعين وزارة بها وزير إنجليزي ووزير فرنسي وإسماعيل لا بيصد ولا يرد ....... هنا يظهر الشعب المصري ويعترض على التدخل الأجنبي المستفز في شئون مصر ويستغل إسماعيل الشعب عشان يرجع شوية من كرامته ويرفض التدخل ....... يعني استقوى بالشعب ويقرر إسماعيل عزل وزارة عمو نوبار ويعين وزارة مصرية خالصة برئاسة الحاج شريف باشا ..... والحاج شريف ما ضيعش وقت وأول قرار ليه إلغاء المراقبة الثنائية الإنجليزية الفرنسية وبدأ يجهز لوضع دستور مصري يحسن من أحوالنا الاقتصادية هنا ................. هنا ......... غضبت انجلترا وفرنسا وحرضوا السلطان على عزل إسماعيل وتعين ابنه توفيق 1879 ها افتكرنا ....................... حط نفسك مكان توفيق .......... واحد أبوه أتعزل من الحكم لما اعترض على انجلترا وفرنسا ..... هل تتوقع........... انه يعترض هو كمان ولا يسمع الكلام ويبقى مطيع وأليف ........... طبعا هيبقى مطيع وهيقول حاضر ونعم على كل طلبات انجلترا وفرنسا ومش هيحتاج توفيق وقت كتير عشان يثبت انه خادم مطيع للأجانب وهيرفض الدستور اللي هيقدمة شريف باشا بتحريض من الاجانب وده طبعا هيزعل شريف ويقدم استقالته .......... وهيمسك توفيق الوزارة بنفسه لحد ما يجي صاحبة الأنتيم رياض من اوربا ليتولى الوزارة ..... وطبعا طالما رياض صاحب توفيق هيبقى زيه خاضع وذليل للأجانب وكاره للمصريين وأول قرار للرياض ....... يرجع المراقبة الثنائية .... مرة ثانية أقوى مما كان فأصبح من حق المراقبان .. حضور اجتماعات مجلس الوزراء والإطلاع على المصروفات والإيرادات ..... وده أكيد خرب اقتصاد مصر لأنك يا حبيب قلبي أوعى تفتكر أن الأجانب عايزين يحسنوا من احوال مصر الاقتصادية دول عايزينها تتدهور أكثر وأكثر عشان نفضل ع الطول مديونين ..... طيب خد نفسك ..... وتوقع معي لما قانون المراقبة الثنائية ها يرجع تاني ... أحوالنا الاقتصادية سوف تتدهور..... 1- باعت مصر نصيبها من أرباح قناة السويس (15%) لاتحاد الماليين في باريس 2- إلغاء قانون المقابلة 1880 ليجمع أكبر قدر من الأموال بحجة سداد الديون رغم أنه ساعد على تقدم الزراعة 3- تكونت لجنة دولية من (فرنسا - إنجلترا- روسيا- ألمانيا- إيطاليا ) لتبحث أحوال مصر المالية :: وأصدرت قانون التصفية 1880 وينص على ::: يخصص أكثر من نصف إيرادات مصر لسداد الديون وضع أملاك الخديوي (الدائرة السنية) وأملاك أسرته (الدوميين) تحت إدارة دولية وظلت مصر تعيش بنصف إيراداتها فقط حتى 1904 ونكمل وقت تاني لو حبيتم كل موضوعات إقرأ وكأنك معي في الموضوع المثبت بنفس العنوان وبالتوفيق للجميع مؤرخ الغد أ/ مروان حسن |
شكر و تقدير
السلام عليكم ورحمة الله وبركاته
أبحرت في بحر الكلامِ لأقتفـــي **** أحلى كُليماتٍ وأحلى الأحــرفِ لكنما الأمواج أردت قاربــــــــي **** فتحطمت خجلا جميع مجادفـــي لو أنني أنشدت ألف قصــــــــيدة **** لوجدتها في حقكم لا لن تفــي جزاكــــــ الله الفردوس الأعلى . |
اسلوب رائع بارك الله فيك ورفع من شانك
|
استاذ مروان شكرا جزيلا من الان وحتي بعد انتهاء العام القادم وبعد كده كمان لانك ان كنت ستستمر بهذه الطريقه في الشرح سوف نكون من الاوائل ولي طلب وهو شرح التاريخ كامل بهذه الطريقه قبل انتهاء العام الدراسي
|
بارك الله فيكجزاكم الله خيرا وأسأل الله ان يجعل هذا العمل فى ميزان حسناتكم
|
أنآ بحب ألطرٍيقه دى أوٍى أوٍى بٍجد َلذيذُه
أستآ’ذ العرٍبى بيستخدمهآ’إ معآ’نآ أحيآ’نآ فى بعض مذكرآته بآرٍك الله فيكـ تقبٍل مرٍوٍرٍى |
والله العظيم انتا باشا
|
شكرااااااااااااااااااا
|
الشرح جامد جدا جدا واستمر يا استاذ وانا طالب منك رجاء انك تزود الشرح اكتر من كدة علشان احنا عايزين نستفاد اكتر
|
اها والله ياريت يامستر
|
شكراً ليك جداً يا أ / مروان
شرح جميل و مبسط و ممتاز انا كنت عايز الباسورد عشان أقدر أحمل الدروس و معلش كان ليا طلب صغير و بسيط يل ريت لو أمكن تجميع كل الدروس الى حضرتك عملتها فى ملف واحد و لك منى جزيل الشكر و التحية:078111rg3: |
استااااااااااااذنا انا عاوز حضرتك بنفس الشرح ده تشرح التارررررررررررريح من اوله لاخره مش هنسى اي حاجه بالشكل ده بس مشكلتى انى بنسى ايه الىحصل حتى لو مذاكر ده غير انى مش بقيت اذاكر التارررررررريح :( وبقيت ألف فى اى امتحان
|
على فكرررررررررررررررررة انته شرحك جميل جدااااااااااااا والله
|
شكرااااااااا
ياريت الحملات الصلبية لو سمحت |
ربنا يباركلك
|
جيد جدااااااااااااااااا
|
بارك الله فيك وعليك وحوليك شكرا
|
السلام عليكم استاذى الفاضل استاذ مروان العبقرى بجد مش عارفة اقول ايه لحضرتك على المجهود الرائع ده بس بجد حضرتك سهلت علينا حاجات كتير اوى وبجد مرسيه اوى لحضرتك ومطلوب الباسورد لى ولك كل الشكر
|
والله استاذ انا حاسس اني حضرتك بتشرح قدامي الف الف شكر وبالانجليزي thanek وبالفرنساوي merse
|
بجد والله ربنا يبارك فيك
وان هذا الاسلوب اكثر من رائع وان احيانا الصمت يفوق الكلام فانا الان لا اجد كلام لمى اشكر به حضرتك |
|
بجد شكرا ليك يامستر اوى على تعبك معانا وبجد طريقتك فى شرح التاريخ مبسطة وسهلة جدا بس انا عندى طلب ياريت تشرح الفصول من8 :13 كلهاياريت وبجدتبقى عملت معايا جميله مش هنسهالك:blush::blush::blush::022yb4::022yb4::022yb 4::av4056bb7jp3::av4056bb7jp3::av4056bb7jp3: |
| جميع الأوقات بتوقيت GMT +2. الساعة الآن 10:32 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.