لو سمحتو مهم جدا لمستقبلي حد يرد عليا
 

انا في 3 ثانوى علمى رياضه كنت جايبه في 2 ثانوى 97% :bosyht9: انا محتارة بين هندسة قسم حاسب الي وبين فنون جميلة ديكور انا كده كده ناوية جنب الدراسة اخد كورسات فوشوب وجرافيك وعمارة وديكور وكمبيوتر وانجلش عشان يكون مستوايا عالي في شغلي وانا عاوة يبقي معايا ماجستير ودكتوراه وياريت محدش يتريق ع الحاجات ديه . كل واحد بيبقي عنده طموح عاوز يحققها .... انا عاوزة اعرف انهى شغله احسن في مصر هندسه ديكور لا حاسب الي وانا عاوزة شغل في مصر وبمرتب كويس يعنى اتخرج الاقي شغل مش اقعد زي اي بنت مكملتش تعليم مش عاوزة اضيع تعبي في المذاكرة ع الفاضي وياريت الرد من غير ما اي واحد ينحاز لمجال دراسته .انا كتبت سؤالي هنا عشان لو كتبت في القسم هندسة كلهم هيتريقو ع ديكور عشان في ناس كتير معندهاش معلومات عن كليات فنون جميله وفاكرين انهم راسمين :mad: .وانا ميهمنيش ان الناس تقول ديه طالبة في هندسة انا يهمنى شغلي هيبقي كويس ولا لا ... اسفة انى طولت عليكم:)

:stickjo4: ايه بقي يا بنيأدمين محدش هيرد عليا بقي ولا ايه؟؟
يعنى اروح اسال عند بتوع هندسه يعنى؟
والنبي حد يرد عليا والنبي :unsure:

ماشاء الله ديكور احلى وفرص شغله اكتر
ومادام حابة الموضوع يبقى هتبقى فيه ناجحة ومتفوقة باذن الله
وسيبك من اللى يتريق يتريق احنا دولة فاشلة لا تقدر العلم والتعليم الصحيح :)
انا كتبت عن ديكور وبحسن الصورة فى المجتمع والحمد لله لاقيت نجاح كبير جدااااااااااااا

واسف بجد لو رد متاخر

ميرسي يا بهاء ع الرد :angry2:

بلاش ديكور هو حلو وكل حاجة بس مش مطلوب اوى وبتعدى فرصة كبيرة علشان تتشهرى هندسة افضل بكتير لو دخلتى هندسة اتصالات مثلا هتتخرجى تشتغلى علطول وبمرتبات جامدة نصيحتى ليكى بلاش اللهم ما بلغت اللهم فاشهد

للاسف انا من اسكندريه هندسه عندنا مفهاش قسم اتصالات
الاقسام كهربا وميكانيكا ومدنى وحاجات ولاد كلها مفيش غير حاسب الي وعمارة تنفع للبنات
انا بحب ديكور بصراحة اكتر والحاسب مش هعرف اتفوق فيه بس المشكله خايفه ميكنش في شغل

مش هتلاقى شغل غير كل فين وفين اخويا هندسة وزمايلة خريجين فنون جميلة وتطبيقية ومش بيشتغلوا غير كل فين وفين ومرتباتهم قليلة وعلفكرة قسم عمارة شغال وكهربا حلو لوى بلتوفيق

انا الاول كنت عاوزة عمارة بس عرفت انها اسهل حاجة في هندسه وكله بيعدي فيها وكل البنات بتدخل هندسه عمارة
بس ياريت تكونى بتجاوبي من غير انحياز لكليه هندسه عشان اخوكى فيها
لان في ناس كتير ميعرفوش معلومات عن كليه الفنون الجميله
بس استاذ بهاء قالي انه في سنة اولي واتعرض عليه 4 وظايف
كلامكم متناقض .ياريت حد يساعدنى بجد عشان مش عارفه احدد

والله العظيم مش علشان اخويا خالص انا بقولك بس من واقع زمايلة الواقع العام مش علشان واحد جالة 4 وظايف بصى ربنا يعلم انى مش منحازة صدقينى هندسة افضل وعمارة وكهربا وميكانيكا عادى البنات بتتدخلها صلى استخارة افضل شئ وربنا هيرشدك للى فية الخير

الرزق بيد الله وحده ..مش معنى انك هتروحي كلية قمة يبقى هتلاقي شغل و العكس
بس نصيحة ادخلي الكلية اللي تناسب ميولك و تحسي انك هتتفوقي فيها و خدي رأي طلاب مخلصين الكلية او حد كبير يفيدك
لانه هيكون عنده خبرة و معرفة بالكلية و دارسها مش بينصحك على اساس اللي حواليه او اللي بيسمعه من الناس .
و بالتوفيق ..

ميرسي للرد
انا ميولي لديكور بس انا اهلي مش موافقين لو دخلتها وصرفو عليا في ثانوى كتير ومصاريف كليه والكورسات وفي الاخر مشتغلتش هيبقي الموضوع مش حلو قدامهم وحرام انى ادخل كليه 5 سنين واخد كورسات وفي الاخر يبقي كلها ملهاش لزمة واقعد في البيت
او ادخل كليه عارفه ان ليها شغل بس افشل فيها عشان مش بحبها
انا محتاجة حد عارف كويس الفرق بين الكليتين وشغلهم ويرد عليا

بصى لو عايزوة ديكور ودى رغبتك خلاص بس بقى خليكى ذكية الهندسة بيبقى بعديها فنون تطبيقية ودى كلية قمة بردوا ادخليها افضل وفيها قسم تصميم داخلى واساس الى هو ديكور ودول اكيد فرص شغلهم اكبر واسم الكلية والوجهة الاجتماعية لو هتفكرى فدة اقوى بكتير ومتزعليش منى فنون جميلة من حاجة وتمنين وديكور كمان منها فى ادبى علشان كدة شغلهم صعب لكن فنون تطبيقية علمى بس وبتاخد من 93 فى المية فاكيد كلية قمة وهى بعد الهندسة اساسا دى نصيحتى بلتوفيق

لا يا قمر انتى عكستى
فنون جميله واخدة من علمى 94% ومن ادبي 92% وديه كليه قمه تحت الهندسه ع طول وقسم الديكور فيه تنسيق داخلي اعلى غير التنسيق ده
وقسم الديكور في فنون جميله بتتخرجى منه مهندسه ديكور وعمارة وتصميم دعايا واعلانات والدراسة في الكليه 5 سنين وان شاء الله هتدخل نقابة مهندسين قريب وتنسيقها كده هيعلى
هى كانت نقابة مهندسين بس جامعه الاسكندرية اخدتها من ادبي بتنسيق داخلي عشان كده بقت تشكليين بس هتدخل نقابة مهندسين قريب
لكن فنون تطبيقيه مش كليه قمه والديكور فيها 4 سنين والديكور فيها ديكورات اثاث والوان وكده بس
راجعى تنسيق السنة اللي فاتت لو عاوزة تتاكدي

لاء طبعا فنون تطبيقية كلية قمة وافضل من فنون جميلة ومحطوطة ضمن الكليات الهندسية لكن جميلة لاء وبعدين كمان اى حاجة من علمى عالية لكن من ادبى من 88 او اقل وكمان مش هتتدخل نقابة المهندسين لا يمكن دول فى كل دول العالم مصممين وبطاقتك بيكون مكتوب مصمم ديكور لكن الناس كعرف ساد بتقول مهندس بس لكن انتى حرة فى اختيارك بس ابقى تذكرى كلامى لو ندمتى