استفسار ... هندسة القاهرة
 

شباب ,,
السلام عليكم ف الاول ..
مبروك نتيجة الثانوية ... و طبعا كل واحد متردد فـ اختيار الكلية او الجامعة على الاغلب الاعم ..
دلوقتى ..
انا عامل الموضوع دا علشان لو حد ععنده استفسار و ناوى على هندسة القاهرة يتفضل .. و ان شاء الله هتم الاجابة عليه ..
و ان شاء الله يوم التنسيق لو حد حب يعمله ف معمل الكلية ف كليتنا ..
او يوم التقديم .. هنكون ف انتظاركم ...
,,,,,,,,,,,,,,,,,,,,
اسماعيل ابراهيم
عضو اللجنة العلمية
اتحاد طلاب هندسة القاهرة

معلش كنت عايزة اعرف بأمانة الفرق بين كلية تخطيط عمراني وهندسة لو في معلومات يعني وعن مجالات العمل

فـكـرة رائـعـة يـا إسـمـاعـيـل , يـثـبـت ,

اتحاد طلاب هندسة القاهرة :)
 

انت لحقت يا سمعة :):) طب حيث كده بقي اسمحلي انا كمان أرد معاك ع الاسئلة و أرد جزء بسيط جدا من فضل المنتدي ده عليا ...

محمود معز
عضو اتحاد طلاب هندسة القاهرة _إعدادي و طالع أولي إن شاء الله

عايز استفسر عن قسم طيران لو سمحت

السلام عليكم
لو سمحت يا باشمهندس اسماعيل انا جايب السنه ديه 98.5 الحمد لله
مستنى التنسيق اهوه ادعيلنا :d
انا من المحله و سمعت ان فى صعوبات كتير اوى عشان ادخل هندسة القاهره انا بأذن الله ناوى على قسم طيران و سمعت ان اولا مش هتتكتب معاك هندسة القاهره و لازم تحول من مكتب التنسيق نفسه و لازم يكون ليك سكن طيب المدينة الجامعيه ايه لازمتها؟؟؟؟؟!!!!!!
كنت عاوز اعرف من حضرتك ايه المطلوب عشان اتقبل فى هندسة القاهره اعتقد انى بأذن الله جبت مجموعها
ده كل اللى عاوز اسأله و شكرا لاهتمام حضراتكوا بينا
السلام عليكم

لو سمحت انا الحمد لله جبت 98.6% و ان شاء الله ناوي علي هندسة القاهرة .. كنت عايز أعرف معلومات عن نظام الساعات المعتمدة و هل هو تمام ولا مش فارق عن النظام العادي أوي ؟؟ و شكرا

بالنسبة لقسم طيران :
القسم زيه زي أي قسم مش بيحتاج حاجات زيادة عشان تدخله و التنسيق بتاعه مش بيكون عالي يعني أقصي تقدير عشان تدخله جيد و عدد الطلبة في القسم يتراوح بي 80:100 طالب بس مشكلة القسم بتكمن في أنه محتاج مجهود كبير و انك تستحمل الضغط بتاع الدراسة لانه تقريبا أصعب أقسام الهندسة
بالنسبة لمجال العمل : بينقسم لقسمين الاول هو مجال التصميم ( يعني تصمم طيارة و محركات و هكذا ) بس ده مش موجود في مصر إلا نادر جداً و الجزء التاني و هو الصيانة و ممكن تشتغل في مصر للطيران أو الهيئة العربية للتصنيع أو الشركات الخاصة او شركة البترول للخدمات الجوية و لو سافرت برة مصر طبعاً مجال الشغل أحسن و أوسع بكتير ..

مواد القسم بتتضمن أجزاء رئيسية و هي : Control وده عشان نظام التحكم في الطيارة و هكذا
Structure و ده بتدرس فيه تصميم هيكل الطيارة ..إلخ
Aerodynamics and fluids و ده بيختص بإزاي الطيارة بتطير و العوامل الجوية المؤثرة عليها .. إلخ

و لو في استفسار عن حاجة تانية انا تحت أمرك
Follow *iMo3ez on twitter
or
http://www.facebook.com/M.Mo3ez

في رعاية الله =)

إن شاء الله تدخل هندسة القاهرة طالما مجموعك عالي و جايبها مش صعوبات ولا حاجة بس هتبقي اجراءات روتينية و لما التنسيق يفتح اكتبها في التنسيق الاول و لو مجتلكش تعمل تحويل ورقي للكلية بس للاسف معنديش تفاصيل أكتر أيه المطلوب منك بالظبط فمن الافضل انك تستني التنسيق و بعدها تروح تسأل في الكلية في شئون الطلبة و تسأل في مكتب التنسيق =)) إن شاء الله تنورنا

نظام الساعات المعتمدة بيدفع حوالي 18 ألف في السنة عندنا و بيختلف عن النظام العادي في بعض المواد اللي هما بيدرسوها زيادة عننا و هي Managment & English
و كمان الدراسة عندهم بالانجلش أول سنة (ميزة أو عيب علي حسب انتي متعودة علي ايه ) علي عكس النظام العادي لان أول سنة بتكون الدراسة بالعربي ( بس مش المواد بردو زي الكمبيوتر و Technical Language ) بس طبعا الرموز و المصطلحات في الماث و الفيزيا بتكون انجلش عادي

الاقسام المتاحة في النظام العادي مختلفة عن نظام كريديت .. يعني قسم زي قسم طيران مش موجود في كريديت و كمان عندهم أقسام مختلفة عن العادي زي قسم Mechanical Design و ده بيشبه عندنا قسم ميكانيكا انتاج .. و ده جزء من دليل الطلاب اللي انا عامله لطلاب اعدادي السنة الجاية إن شاء الله ممكن يفيدك بالنسبة للجزء بتاع كريديت و و لو في استفسار تاني قوليه لاني مش كريديت بس هسأل و أرد عليكو


نظام الساعات المعتمدة (Credit hours System)
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ


يتلخص الفرق في بين نظام الدراسة في السنة الإعدادية العادي و الساعات المعتمدة في النقاط الاتية :

- يبدأ نظام الساعات المعتمدة الدراسة باللغة الإنجليزية من السنة الإعدادية علي عكس النظام العادي حيث تدرس المواد باللغة العربية في السنة الإعدادية .
-
- يوجد مواد زيادة في نظام الساعات المعتمدة و هي : اللغة الإنجليزية و علم الإدارة .
-
- يقوم طلاب الساعات المعتمدة بعمل بعض المشاريف في بعض المواد لا يقوم بها طلاب النظام العادي .
-
- يحسب التقدير العام في نظام الساعات المعتمدة عن طريق ما يسمي (GPA)
و يقصد بها Grade Point Average و يكون المجموع الكلي من أربع نقاط .
-
اما في النظام العادي فيحسب المجموع الكلي من 1500 درجة و يتم حساب التقديرات كالتالي :
85% تعادل امتياز
-
75% تعادل جيد جداً
-
65% تعادل جيد
-
ما بين 50% إلي 65% تعادل مقبول
-
و يعد الطالب ناجح طالما تعدي مجموعه 50% .
-
- يدفع طلاب الساعات المعتمدة سنويا ما يقارب 18 ألف جنيه بينما المصاريف السنوية في النظام العادي في حدود 310 جنيهاً . 
-
- يدرس طلاب الساعات المعتمدة من مراجع علمية في بعض المواد يرشدهم إليها دكتور المادة .و عن طريق (Slides ) يستخدمها الدكتور في الشرخ مثل مادة الإدارة .
-
بينما يدرس طلاب النظام العادي من كتب الكلية التي أعدها مجموعة من أساتذة المادة .
-

U're all welcomed on this FB group if u have any inquiries
http://www.facebook.com/groups/e3dady2017/

طب معلش هل المبلغ اللي هيتدفع في النظام ده يستحق ولا مش فارق كتير عن العادي .. و بالنسبة لعدد الطلبة كتير ولا ايه ؟؟ آسف علي الإطالة

رأيي الشخصي : أنا بفضل النظام العادي .. مش هيفرق كتير عن النظام العادي و المبلغ ده تقدري تستفادي بيه بأكثر من طريقة + ان الاقسام في النظام العادي أوسع من نظام كريديت و بردو عشان تتأكدي من كل المعلومات تقدري تسألي زميلتي في اتحاد الطلبة و هي نظام كريديت =)) http://www.facebook.com/aya.ezz.739

انا متشكر جدا .. ملحوظة : انا ولد

معلش افتكرتها هدي =))