ايه ده؟..بتوقلي صاحبتك جالها اثبات؟
ازاي..هو في مجال في الامتحان للاثبات..المفروض الكلام ده يبقى في نظري العملي
يا ريت توضحي اكتر

اقصد ثوابت

يعني قصدك احفظ الثوابت؟

جالها تجربه thermochemistry and calorimetery

فيها ثابت C و m

ايوه احفظها احتياطي سهلين على فكره واضمنلك

انا مش فاهم حاجة .. يعني مثلا احفظ الحرارة النوعية لمادة الكالوري ميتر ؟؟..دي تبقى غريبة

ايوه c=4.18

الحراره النوعيه بتاعه الماء البارد

ههههههه .. خلاص مفيش مشاكل زي ما قولتي سهلة و اضمن ..
هو انتي امتحانك بكرة برضه؟

اه ان شاء الله الساعه 11

ايه ده .. ازاي؟.. ده انا برضه مع ان انا طبيعية و انتي بيولوجي

بجد
طب ازاي لانكون في نفس المعمل من زمان واحنا منعرفش ؟؟

لا اصله مش منطقي ... هو ده معاد سكشنك اصلا؟
انا ده اصلا معاد سكشني

وانا كمان ده اصلا معاد سيكشني والله كل خميس من 11 ل 2 معمل أ وكنت في معمل ب بس حولت ل أ

انا خايف حد من المشرفين يقولي انتو قلبتوها شات .. انا هروح اراجع كده عشان الوحد متحصلهوش اي مفاجأة
و ربنا يستر
و متشكر على الاجابة عن الاسئلة ..
سلام..

عايزةاعرف بعد التعب ده كله فى أى مجال سيكون عملكم ان شاء الله ولو عايزين تختاروا كيمياء سبيشيال هل من الممكن الحصول على دبلومه تحاليل والعمل بها

يا ريت حد يرد على سؤالى لان ابنى محتار يختار اى تخصص و لا يعرف ميزات او عواقب اختياره يا ريت حد من الدكاترة او المعيدين يكونوا متابعين و يردوا علينا قبل ما نملا استمارة اختيار التخصص ولو حد من اولادى يعرف يرد بسرعة

هاى فوكس ... ازيك ؟
انا الحمد لله تمام ... بالنسبة للامتحان جاتلى تجربة رخمة اوى molar mass of volatile liquid و عدتها اول مرة عشان السيكلو هكسان كان بايظ و مش بيتبخر وبعدين عملتها مرة بعد ما غيروا السيكلو هكسان الدكتور قالى لأ لازم تعمليها مرة كمان و تجيبى المتوسط بتاع المرتين و مشيت اخر واحدة من المعمل بس الحمد لله كنت طلعت النتايج صح
يا رب تجيلك تجربة سهلة (denisty) زى ما جت لصحبتى و ربنا معاك بكرة ان شاء الله
و ابقى قولى عملت ايه
سلام

اهلا بيكي
اللي انا اعرفه ان مفيش كيمياء سبيشيال في نظام الساعات المعتمده في كيمياء عامه وكيمياء حيويه بالنسبه لبيولوجي بس حكايه الدبلومه بتاعه التحاليل معرفش عنها حاجه


في لوحه كانت متعلقه في الكليه من يومين عن دبلومه تحاليل للطلبه والخريجين واستغربت اوي ان في للطلبه يعني تنفع لنا هي لمده 3 اسابيع وفي الاسبوع 4 ايام وهتبقى في شهر يوليو ب 210 للطلبه و295 للخريجين وتقريبا هي في القاهره دي كل المعلومات اللي اعرفها عنها
بس متوقعش نستفيد بيها دلوقتي ابدا

انا اظن حتكون الساعة 3 ان شاء الله
و لما اعرف حأكد عليكى ان شاء الله


بالنسبة للاستمارة فأنا عيزة حد يقولى هو مفيش قسم بيدرس علوم الوراثة و تركيبة ال DNA & RNA
انا فى الاول كنت فاكراه قسم
biochemistry
بس سألت و عرفت انه مش هو القسم
انا ممكن اخد البيوكمسترى كمينور
بس انا حتجن نفسى اخد الماجور وراثة و الجينات و الحاجات دى

لو حد يعرف انهى قسم فدول هو بتاع الوراثة يقول بالله عليكم

ايوة القسمين دول فتحوا و مكتوبين عندنا فى الورقة كمان بس مش فهمة بيدرسوا فيهم ايه للأسف


على فكرة انا قصدى متحفظوش اثباتات القوانين
اما الثوابت
فمعرفش انتوا و حظكم

بالنسبة للافلى جيرل
انتى جتلك تجربتى و كنتى نفس مشكلتى برده السايكلوهكسان بايظ و مكنش بتبخر بس مدونيش بداله

منهم لله بقى

سلام عليكم ..
الحمد لله يا جماعة جاتلي اسهل تجربة و دعائك مستجاب يا لافلي جيرل الحمد لله.
تجربة الكثافة.
و معلش التجربة بتاعتك فعلا كانت رخمة بس الحمد لله انت بتقولي عدت على خير.
ناقص بقى hanooooda تقول جاتلها تجربة ايه.

مين اللي قالك كده؟
نظام الساعات المعتمدة في كيمياء سبيشيال و كل حاجة.. يعني اللي هيختار كيمياء عامة دلوقتي ,السنة الجاية هيختار الفرعي كيميا برضه و كده ميبقاش اسمه تخصص رئيسي و فرعي هيبقى اسمها شعبة خاصة و بعد كده تبقى بكالوريوس خاصة.
التحاليل اللي اعرفه انها بتتعمل اعلانات في الكلية و انا شوفت اعلانات كده في طريق الحرية عن كذا نوع من الدبلومات منهم الكيمياء الحيوية التحليلة و هي دي بتاعت التحاليل الطبية و في كمان دبلومة بتروكيماويات و حاجات كتير تانية.

استاذ لورد اسفين و الله .. ماتأخذناش.
انا حسيت باننا قربنا من الشات فوقفنا..
و ربنا يوفقنا ان شاء الله و يا رب تطلع نضيف التيرم ده و احنا معاك .. :d
آسفين مرة تانية
سلام..

انا برضه خدت الاستمارة النهاردة.
شوفي يا نهى .. اعتقد ان احسن حد ممكن يفيدك في الحتة دي هو مرشد اكاديمي بس يكون كويس زي مثلا دكتور سيد او غيره من الدكاترة اللي تحسي انهم فاهمين و يا ريت لو يكون دكتور في مادة الحيوان,اعتقد ده اكتر واحد يفهم في الحتة دي.
انا كمان هحاول ابحث في النت و اشوف كل قسم من دول بيتكلم عن ايه بالمرة عشان هشوف كمان الاقسام اللي عندنا.(مبدئيا اعتقد الحيوان و البيولوجيا الجزيئية اقرب قسمين لعلم الوراثة).
بس و الله كويس انك مش عايزة ميجور كيمياء عشان اللي زيي فرصتهم في الدخول تزيد :)
سلام..

بالنسبة لل microbiology يعنى دراسة البكتريا والفطريات والطفيليلت اللى هو تقريبا الجزء بتاع الدكتور ايهاب الترم الاول وده بيعتبر احسن تخصص فى قسم النبات وبالنسبة للتقنية الحيوية بندرس فيها الهندسة الوراثية وال DNA ده اللى انا سمعته من واحدة صحبتى سالت اكتر من دكتور فى قسم النبات لكن بالنسبة للبيولوجية الجزيئية مش عارفة عنها اى حاجة ولو حد عرف ارجو الافادة فوراااااااااااااا

اولا اكنوا
هنود جالها التجربة بتاعت الماغنسيوم دى و عملت كويس الحمد لله (على حد قولها)

ثانيا
الحمد لله
انا بفكر كمان فى البيوكمسترى

انا سألت انهاردة دكتورة الحيوان و قالتلى انه البيولوجيا الجزيئية
بس لسا حسأل تانى
خصوصا ان القسم ده حياخد 25 طالب فقط لأنه لسا جديد و الحاجات اللى بيشتغلوا بيها غالية

انا كمان عيزة اعرف التقنية الحيوية ده ايه


عالعموم انا حكتب اول رغبة (مبدئيا كدة)
بيوكمسترى
البيولوجيا الجزيئية
كيميا
تقنية حيوية
حشرات
حيوان
ميكروبيولوجى
نبات
بيئة
بحار

الحمد لله عدى الامتحان على خير مع انه اتشطب على ورقتي بس الحمد لله عقبال الفيزياء (بس ميتشطبش على الورقه:) )

انا النهارده سألت الدكتور احمد سرور عن البيولوجيا الجزيئيه والتقنيه الحيويه قالي ان البيولوجيا الجزيئيه دراسه الوراثه والحاجات دي بالتفصيل من اولها لكن التقنيه الحيويه ابليكيشن على الوراثه يعني البيولوجيا الجزيئيه هي الاساس

انا دلوقتي احترت املا الاستماره باايه ؟؟ بس اكيد الاول كيمياء بعدها بيو كيميستري وممكن بعدها البيولوجيا الجزيئيه وبعدها الميكروبيولوجي ,التقنيه الحيويه, الحيوان ,الحشرات , النبات ,علوم بحار ,بيئه

بس محتاره بين ميكروبيولوجي والبيولوجيا الجزيئيه ياترى انهي الاحسن انا بكرهه حاجه اسمها نبات

ليه بس كده؟...اتشطب عليها ليه؟...عموما الحمد لله انك بتقولي عدى على خير.
انا برضه كنت شايف ان البيولوجيا الجزيئية اقرب حاجة للوراثة.
ترتيب الرغبات ده مش بطال..بس بيتهيألي علوم بحار احسن من حشرات.. بس هي اكيد مش هتوصل للرغبات الاخيرة.

فعلا البيولوجيا الجزيئية اقرب حاجة.. و شكله فعلا مينفعش ياخد طلبة كتير.
بس انتي تقديرك كويس يعني لازم و انتي بترتبي الرغبات تعرفي ان 90% او رغبة هي اللي هتلقف.
بس انتي ليه رامية علوم البحار في الاخر حتى بعد البيئة؟
هو مش قسم وحش..انا اللي اعرفه ان قسم البيئة اقل قسم..بيئة بقى :d

عموما ان شاء الله كل واحد يجيله القسم اللي في الخير.

بالنسبة بقى لينا علوم طبيعية..
عندنا رياضيات علوم حاسب آلي فيزياء فيزياء حيوية كيمياء علوم بحار فيزيائية.
طبعا من غير شك انا هحط الكيمياء اول حاجة..و اوف كورس الرياضيات آخر حاجة.
انا المفروض ارت حسب الاقسام اللي ليها شغل و كمان لو في قسم و يكون جديد و مفيش طلبة كتير بحيث لو شديت حيلي أتاخد معيدين زي البيوفيزيكس.
يعني تقريبا الترتيب هيبقى
الكيمياء
علوم الحاسب الآلي
الفيزياء
الفيزياء الحيوية
علوم البحار الفيزيائية
الرياضيات
بس ممكن مينفعش حاسب آلي عشان انا مخدتش برمجة اضافية..بس المرشد الاكاديمي قالي ممكن تاخدها بعد كده.(يا ترى ممكن ادخل حاسب و انا مأخدتش برمجة اضافية؟). ده غير اني ساقط في الرياضيات و دي مادة مهمة للحاسب.
الفيزياء و الفيزياء الحيوية و علوم البحار محتار ارتبهم ازاي..انا بحب الفيزياء اوي بس ملهاش شغل..الفيزياء الحيوية قسم جديد و ممكن لو تفوقت فيه ابقى معيد عشان اكيد العدد مش هيبقى كبير..لكن شغل بره الجامعة اعتقد قليل.
علوم البحار انا درستها الترم ده و قسم مش بطال بس برضه الشغل في بس مش كتير.
لافلي جيرل و علوم اليكس .. تصوركم ايه عن الترتيب بقى؟

سلام..

لأ
الحشرات احسن
القسم ده بيؤهلك انك تشتغل فى علوم الجرائم و الطب الشرعى

اصل انا مش بحب علوم البحار و لا البيئة دول خالص
انا نفسى فعلا اما ادرس الوراثة اما ادخل بيوكمسترى
يارب ان شاء الله كل واحد يدخل القسم اللى فيه الخير

هنووود
على فكرة القسمين الجداد دول تبع قسم الحيوان مش النبات
حتى يوم محاضرة العميد اللى اتكلم عن القسمين الجداد دول كان د.اسماعيل صبرى رئيس قسم الحيوان و سألت امبارح د. داليا كمان و ان شاء الله اتأكد من د. عمر
من الاخر حسأل الكلية كلها مش حسيب حد ههههههه

اما بالنسبة للنبات ان كان و لا بد فاحسن قسم فيه هو الميكروبيولوجى

مش عارف ايه دخل الحشرات في علم الجريمة .. جايز , انا مش هفتي في الموضوع ده.
بس انا كنت بشوف اعلان في طريق الحرية على دبلومات الكيمياء و منها دبلومة الكيمياء الشرعية.
و طبعا دي بتأهل للعمل في النيابة و بالذات في موضوع المخدرات.
بس برضه زي ما قولتلك الرغبات الاخيرة مش مهم اوي لانك معدلك كويس(مش حسد خالص) فأكيد هتجيلك الرغبة الاولى او التانية.
هو انتي بتدوري على قسم ليه شغل ولا القسم اللي بتحبيه ..انا اللي شايفه انك بتدوري على اللي بتحبيه لانك لو بتدوري على شغل كنتي هتختاري كيميا حيوية او ميكروبيولجي او كيمياء.
عموما دي حاجة كويسة انك تدوري على الحاجة اللي بتحبيها على الاقل بالنسبة للبنات لو ملقتش شغل مش مشكلة يعني.:d
سلام..

السلام عليكم ...ايه اخباركم ؟؟
تقريبا كله دلوقتي بيفكر في موضوع التخصص ...بالنسبه لبيولوجي عندهم تخصصات حلوة ...اولهم الكيميا الحيويه
دلوقتي انا عايزة اعرف حاجه عن تخصصات علوم طبيعيه ...مش المفروض ان احنا السنه الجايه هنتقسم لشعبتين اللي هما فيزيا و رياضه ,, و فيزياو كيميا ...بس الواضح من استمارة الرغبات ان مفيش الحكايه دي ..انا كنت حضرت محاضرة العميد بس ماقالش حاجه عن الموضوع ده ...و بعدين كده مش هيبقى فيه تخصص جينرال !! يعني لو الواحد ملحقش كيميا اسبيشال ميقدرش يروح كيميا فيزيا و لا ايه ؟!
بالنسبالك يا فوكس دلوقتي انت مختار علوم حاسب الرغبه التانيه ..يعني قبل الفيزيا الي هي المادة اللي انت بتحبها...طيب ليه ؟؟ قسم الحاسب حلو اه بس محتاج واحد بيرفكت في الرياضه ..و انت شايل البحته و الميكانيكا ..و مش واخد برمجة الــc ..و مش بتحب مادة الفورتران كمان !!!
ضروري نفكر كويس قبل ما نكتب ترتيب الرغبات ...و نذاكر برده عشان نجيب تقدير و ندخل التخصص اللي نفسنا فيه
سلام

ياجماعه انا خلاص قررت
ان شاء الله
1_كيمياء
2_البيولوجيا الجزيئيه
3-بيوكيميستري
4_التقنيه الحيويه
5_ميكروبيولوجي
6_علم الحيوان
7_علم الحشرات
8_علم النبات
9__علوم بحار
10_علوم بيئه

هو بصراحه لسه برضه في شويه حيره بس ربنا ان شاء الله هيقدم اللي فيه الخير

بدور على اللى انا حباه و حطيق اذاكره و اكيد كل قسم له شغل حتى لو مش كتير او الناس متعرفهوش فأنا شايفة انه الكل لازم يفكر فى اللى بيحبه مش اللى حيشتغله


ايه ده؟
حطة البيولوجيا الجزيئية نمرة 2
ما شاء الله
ده احنا تطورنا يا هنوووووود
انا كدة مترددة
احط اول رغبة البيولوجيا الجزيئية و اللا البيوكمسترى
انا حسة انى حبة البيولوجيا الجزيئية اكثر
و فنفس الوقت القسم مش حياخد الا 25 طالب بس
بس يمكن حيكون معلهوش اقبال السنادى بما انه لسا جديد و محدش لسا عرفه او خايفين يغامروا و يدخله حاجة جديدة غير الكيميا
المهم انا محتارة احط ايه اول رغبة و ايه تانى رغبة خصوصا ان القسمين ممكن اعمل دبلومة البيوكمسترى و اشتغل فمعمل تحاليل (د. عمر و ده دكتور الحيوان قالى كدة. علشان محدش يفتى و يقول لأ)
و قالى ان القسم ده رائع و مجالاته كتيرة جدا اكثر من البيوكمسترى كمان خصوصا انه جديد فحيكون مطلوب اوى و عدد الطلبة قليل فحتخطفوا
المهم
اشيروا على ايها القوم ههههههه

انا نفس الحكايه القسم ده عجبني لدرجه اني محتاره احطه اول رغبه بدل الكيمياء ولا لا انا بعشق حاجه اسمها كيمياء فيزيائيه بس قعدت افكر هشتغل ايه لما اتخصص فيها مدرسه ؟؟؟؟؟؟؟
البيولوجيا الجزيئيه بقى حاسه انها ممتعه وكمان بيطلبوهم في بعثات لدول تانيه خاصه اسبانيا بس متوقعش انهم هياخدوا فيها غير امتيازات (ومش هيرضوا بمقبول في النبات)
دول اللي انا محتاره بينهم


وكمان محتاره بين البيوكيميستري والتقنيه الحيويه انهي احسن الله اعلم

ربنا يوفقنا يارب ويفك الحيره اللي احنا فيها دي

السنة الجاية مش هنتقسم لفيزيا رياضة و فيزيا كيميا .. النظام الجديد زي مانتي شايفة اهو بنتختار التخصص الرئيسي و بعدين السنة الجاية نختار الفرعي.
و في تخصص جينرال .. احنا دلوقتي بنختار تخصص رئيسي الاوائل اللي هيدخلو سبيشيال يبقى مثلا لو اختار رئيسي كيميا خلاص ميختاروش فرعي و الساعات بتاعت التخصص الفرعي تبقى كيميا...الطلبة الباقيين اللي اختارو كيمياء رئيسي و مش هديخلو سبيشيال يختارو بقى معاها تخصص فرعي سواء فيزياء او اي حاجة تانية.

انا طبعا لسه مكتبتش الاستمارة .. و كلامك صح اني مضيع في الرياضة و مش طايق الفورتران و مش واخد c و انا لو رجع بيا الوقت برضه مش هاخدها لاني محتاج ارفع معدلي مش اجيب مواد تنزلني.(هو مدام مخدتهاش يبقى مينفعش ادخل حاسب؟).
بس..انا بدرو على اقسام ليها شغل..انا بحب الفيزياء..بس لو دخلت حاسب هو تاني قسم بعد الكيمياء شغله كويس.اي نعم هتعب فيها بس هنعمل ايه؟...الواحد ممكن يدخل الحاجة اللي بيحبها و لو ملهاش شغل ممكن لو شد حيله يبقى معيد خصوصا ان مثلا قسم زي الفيزياء اللي بيدخلوه مش كتير بس موضوع المعيد ده احتمال مش كبير الواحد المفروض ميبنيش مستقبله عليه.
انا في خلال يوم هملأ الاستمارة عشان اسلمها بس لغاية دلوقتي مش محدد غير ان الكيمياء في الاول و الرياضة في الاخر...و مش عارف كمان احط فيزياء الاول ولا فيزياء حيوية.
ربنا يسهل..

وجهة نظرك صح .. بس مينفعش نقول كل قسم ليه شغل .. قسم الرياضيات مثلا ملهوش غير مدرس ده اذا قدر يتعين اصلا... ولا الاحصاء مثلا.. حتى الفيزياء ليه شغل بس قليل جدا و مش محدد تحسي انه عايم كده.
حتى عندكوا قسم البيئة مثلا..
يا بختك الدكترو هيشغلك في معمله .. كويس و الله .. هحاول انا كمان اظبط مع اي دكتور او معيد يكون ليه في حوار المعامل يمكن ياخدني معاه:d..بس ادخل كيمياء بس و ان شاء الله الشغل مضمون (أنا نايم على شغلة احسن حتى من المعامل)...بس هي تيجي الكيمياء:(
بالنسبة لموضوع اشيروا عليا ايها القوم..
مدام انتي قولتي انك بتدوري على اللي بتحبيه و اللي بتطيقي تذاكريه يبقى البيوكمستري و بعديها البيولوجيا الجزيئية(من وجهه نظري!!)... و متنسيش ان في تخصص فرعي يعني لو جاتلك حاجة و في حاجة كمان بتحبيها ممكن تختاريها ماينور .. و لو دخلتي سبيشيال و ما اختارتيش ماينور يبقى خير و بركة.
و انا كمان عايزكوا تشيروا عليا ايها القوم ههههههه
الكيمياء في الاول و الرياضة في الاخر و علوم بحار غالبا قبل الرياضة..انما الفيزياء و الفيزياء الحيوية و علوم الحاسب دول في النص بس محتار ارتبهم ازاي؟!!

هو شكله فعلا قسم مشوق و حلو و لو زي مانتي بتقولي في موضوع البعثات دي غير ان اكيد ليه شغل في المعامل يبقى كويس اوي...موضوع انهم ياخدو امتيازات يبقى ده ملهوش دعوة تكتبيها الاول ولا لا .. لو انتي عايزاها اكتبيها الاول و مفيش في ايدك حاجة تانية لكن مش عشان بتاخد تقدير عالي يبقى متكتبيهاش .. افرضي خدت من تقديرك .. و انتي كنتي حاطاها مش في الاول .. كأنك بتقولي للقسم:فاضي؟..يقولك:اه..انتي تقوليله:انا بقى مش فاضية:d
عموما انا شايف البيولوجيا الجزيئية كويسة و مدام بتاخد من تقدير عالي ممكن تحطيها في الاول و بعديها كيميا و كيميا حيوية او العكس.
ساعدوني انا كمان ... احط مين قبل مين في التلاتة دول .. علوم حاسب الي فيزياء بيوفيزيكس ..(اي حد ممكن يوقلي على طول حاسب .. انا شايف كده بس متردد لاني مش كويس في الرياضة و لو دخلت هتعب فيه)
سلام..

ايه ده؟
لأ
فهمتنى غلط

اقصد ان دز عمر قالى ان القسمين ممكن منهم اشتغل فمعمل تحاليل

ارجو ان يكون قصدى وصلكم


بالنسبة لأقسام علوم طبيعية انا مش حفتى لأنى معرفش اى حاجة عنها غير انى بسمع ان قسم حاسب آلى دة رااااااااائع (حتى معرفش رائع فى ايه)

ممكن اعرف ايه الاقسام اللى ممكن من بعدها اكمل دبلومة تحاليل طبية لانى لما حضرت محاضرة العميد فى دكتورة الكيميا حيوية قالت ان الواحد لازم يكون دارسها عشان ياخد دبلومة وهو ده القسم الوحيداللى يقدر الواحد ياخد الدبلومة وقالت مفيش اى قسم تانى بس انا ملاحظة من كلامكم ان فى اقسام تانية عشان ااعرف اكتب ترتيب الرغبات صح

انا اللي فهمته انك قولتي انكهتشتغلي في معمل الدكتور.
بس شكلي فهمت غلط..سوري

هو حلو عشان بيعلم البرمجة اكتر من هندسة..بس مشكلته انه كله رياضة و عقد.
يا ريت بقى الجماعة بتوع علوم طبيعية l0vely girl و 3olom_alex
يقولو ايه نظامهم في موضوع الرغبات..انا لسه مش عارف اختار بين فيزياءو فيزياء حيوية و حاسب كتاني رغبة.
هو في معاد لتسليم الاستمارات؟؟؟

هاى يا جماعة ازيكوا ؟؟
والله يا فوكس انا زيك مش عارفة اختار ايه رغبة تانية فيزياء و لا فيزياء حيوية انا اختارت كيمياء رغية اولى بس رغبة تانية مش عارفة لسه و طبعا رياضة و كمبيوتر دول ف الاخر خالص ... انا بس عايزة اعرف هى الفيزياء الحيوية دى ايه اللى حندرسه فيها و ايه مجال شغلها بعد كده و بردوه الفيزياء ايه مجال شغلها
و بردوه مش عارفة احنا المفروض نسلمها امتى الاستمارة دى
معلش يا فوكس انا عايزة اعرف حاجة هو القسم اللى حنختاره major حندرسه من السنة الجاية يعنى التخصص من السنة الجاية مش من تالتة ولا ايه بالظبط عشان انا مش فاهمة حاجة خالص
معلش طولت عليك
سلام

انا اللى سمعته ان آخر معاد ليها الخميس (بعد بكرة)
بس د.عمر قالى اوعى تسلميها دلوقتى هما بيقولوا كدة بس علشان نسلمها
قالى سلميها عالامتحانات و انا بصراحة شكلى حديهلهم اخر يوم فى الامتحانات
هما كدة كدة مش عيزينها فحاجة دلوقتى

الحمد لله .. انتي ازيك...فينك؟
انا بقى الرغبة التانية زي ما قولت محتار بين فيزياء و فيزياء حيوية و حاسب.
هو طبعا الكيمياء الاول ..و الرياضةالاخر.. الحاسب رخم زي الرياضة بس الفرق ان رياضة رخمة و ملهاش شغل و الحاسب رخم بس شكله ليه شغل جامد.
انا قرأت عن الفيزياء الحيوية عشان اعرف العلم ده بيتكلم عن ايه بس مفهمتش حاجة (شبكات عصبونية-تشفير الاعصاب-مناعة-و ان العلم ده هو اللي عمل اطراف ميكانيكية للانسان)..مش فاهم حاجة طبعا
بس واضح انه تطبيق الفيزياء العادية على الاجسام الحية.. و اعتقد انها ممكن تدخلشوية في التحاليل.
بس متخديش كلامي ثقة انا برضه بحاول اعرف اي حاجة...بس عايز اقولك انك ان شاء الله جايلك اول رغبة لان تقدير كويس و مش ساقطة في حاجة...(محدش عنده معلومات قسم كيمياء هياخد تقريبا كام واحد او لغاية معدل كام؟ :blush::().
بالنسبة للmajor ايوة هندرسه السنة الجاية و الminor هنختاره السنة الجاية زي دلوقتي و ندرسه في سنة تالتة جنب الmajor طبعا.
بس طبعا في تانية لو جالك major كيمياء مثلا..مش هتدرسي كيمياء بس هتدرسي برضه فيزياء و رياضة.
و لعد كده لو اخترتي minor فيزياء يبقى في تالتة مش هتدرسي حاجة غير كيمياء و فيزياء بأنواعهم طبعا.
و ابدا مطولتيش ولا حاجة بالعكس انا كنت عايز اعرف برضه عملتوا ايه في الرغبات لاني معملتش حاجة.
و بالمناسبة... عملتي ايه في الفيزياء العملي جتلك ايه؟
و يا ترى الحاسب امتحنتيه ولا لسه؟..و لو امتحنتي شكل الامتحان ايه بالضبطز

السلام عليكم .....
للأسف ليس لي مشاركات كثيرة فى هذا المنتدى ولكن ارجو من زملائي المساعدة
اريد ان اعرف الأسئلة التي قالها دكتور / عمر شلبي فى محاضرته الأخيرة والأجزاء التي قام بإلغائها ومع خالص شكري مقدما لمن سوف يزودني بهذة المعلومات