جزانا واياكم ❤

النصائح الذهبية لبتوع الثانوية العامة ۩ علشان تجيب مجموع


أولاً : الدروس الخصوصية

*طبعاً الكل عارف إن الدروس سلاح ذو حدين .... بمعنى ..... قد توديك في داهية و في نفس الوقت مش هتجيب مجموع من غيرها :

طيب و العمل :

* الدروس كلها تبقى في يومين ــ نأخذ الرياضة كمثال علشان كله بياخدها ــ درس الرياضة بيبقى يومين في الأسوع و لنفترض السبت و الثلاثاء
* يبقى باقي دروسك كلها يتوزعوا على السبت و الثلاثاء
* و متقوليش مش هفهم حاجة و ههيس لأ هتفهم و مش هتهيس ... شيل الفكرة المتخلفة دي من دماغك
* يبقى يوم السبت و الثلاثاء مش هتروح المدرسة .... و تاخد شنطتك على ظهرك و تحط فيها الملازم و الكتب الخاصة بالدروس اللي عليك في اليوم ده سواء السبت أو الثلاثاء و أكنك في المدرسة بتاخد حصص
*هتتطلع من درس كذا على كذا و تراعي إن يبقى في فرق توقيت بين الإتنين علشان و أنت في الطريق تضربلك طبق كشري ولا كباية قصب و تروح بدري
* مفيش حاجة إسمها مش هعرف أوفق دروسي كلها في يومين ... لأ هتعرف .... مدرسين الثانوية اللي بيدوا في سنتر شغالين 24 ساعة و لو مدرس هيجيلك البيت مثلاً أو عند صاحبك في بيته تتفقوا معاه
* إوعى تبوظ مواعيدك و هنعرف ليه في الملاحظات الهامة في نهاية الموضوع.

* اليومين اللي فيهم الدروس متذاكرش فيهم حاجة علشان هتبقى بتضحك على نفسك ... ما ينفعش 3 دروس مثلاً في اليوم و تروح تذاكر كمان ..


ثانياً : نظام المذاكرة

* هتجيب فرخ جلاد من اللي كان الخطاط بيعمل عليه لوح الفصل
* هتقسمه أربع أرباع
* كل ربع تقسمه سبع أجزاء

* بمعنى ... الشهر في أربعة أسابيع كل ربع يساوي أسبوع
* و كل أسبوع فيه سبعة أيام اللي هما السبع أجزاء اللي حوا كل ربع


* طيب ... قلنا إن الدروس كلها في يومين ( السبت و الثلاثاء ) .... يبقى يوم السبت و الثلاثاء في الجدول تكتب فيهم ( دروس )
* باقي الأيام بقى ــ ناخد الأحد كمثال ــ تكتب في خانة يوم الأحد مثلاً ( واجب العربي + إمتحان إنجليزي + نصف واجب الرياضة + أي حاجة على حسب دماغك ).... و إوعى تنام قبل ما تخلص اللي عليك في اليوم
* مش شرط تكتب من الساعة كذا للساعة كذا هذاكر عربي و من الساعة كذا للساعة كذا هذاكر إنجليزي ..... لأ ده نظام فاشل .... أنت عيش براحتك بس أهم حاجة قبل ما تنام تكون مخلص اللي عليك في اليوم ده.


ثالثاً : الترفيه

*طبعاً مش معقول مش هنرفه عن نفسنا .... مستحيل

* إبتعد كل البعد عن ألعاب الكمبيوتر و السايبر ..... خراب ديار ياباااا
* و بالنسبة لسيلك رود متقوليش بوت و مش بوت .... اللعبة في دماغك برضه و شغلاك
* عاوز تستمتع بجد إنزل إلعب حاجة بدنية .... يعني كورة .. إضرب أخوك و غلس عليه .. كده يعني
* لو متابع حاجة في التلفزيون زي برنامج مثلاً أو مسلسل على الـ MBC Action مفيش مانع بس متكملش بعديها و تقول إيه ده ده الفيلم الفلاني جاي النهاردة :shuriken:


رابعاً : ملاحظات هامة

* إوعى تفرش دروسك على مدار الأسبوع علشان لو عندك درس فرنساوي مثلاً يبقى مش هتذاكر حاجة قبليه غير الفرنساوي و ده طبيعي و غير كده أنت بعد الدرس فيها ساعة وقت ضايع عقبال ما تروح أو توصل صاحبك مثلاً و هتروح البيت منهك و هتاخد وقت علشان تعرف تفوق و تبدأ تكمل مذاكرة

* إحنا فرضنا إن الدروس هتبقى السبت و الثلاثاء .... يبقى أنت تيجي يوم الجمعة و الإثنين تراجع علشان لو عندك تسنيع كلمات أو إمتحان حصة

* لو مدرس قالك عاوزين نغير ميعاد الدرس نخليه يوم خميس مثلاً ( و أنت الخميس عندك فاضي مفهوش دروس تانية ) قولوا لأ و إوعى توافق ... و إذا أصر متروحش و روح حصة تانية .... صدقني لو وافقته هتخسر أكتر ما هتكسب

* الكت من الدروس .... إحذر إحذر إحذر إحذر إحذر ....ليه 5 إحذر؟؟ ... علشان لو كتيت حصة و قلت هعوضها بعدين هيحصل كالآتي
- هتتسحب تاني و هتكت مرة و إتنين و تلاتة بعد كده .... هو الموضوع واقف على مرة و صدقوني في دي بالذات أنا إختبرتها
- هتضطر تنزل في يوم مخصوص علشان تعوض الحصة اللي فاتتك فبالتالي هتبوظ يوم من الجدول علشان دلع سعادتك
- هييجي واحد يقولك ده كان يوم جامد و فلان و فلان و فلان جايين معانا يابني تعالى معانا دي حصة ملهاش لزمة
أهو ده بقى كده لو سمعت كلامه هتبقى ــ على رأي هاني رمزي ــ لبست خاذوق كبيييييييير و مغري
هيبقى كسرلك حاجز البداية و هتكت بعدها تاني و تالت و عيش

* إحذر إحذر إحذر برضه العادة السرية .... دي بقى أُس كل المصايب .... علشان دي بتعمل إحساس شديد بالملل و ده هيخليك تكت من الدروس علشان تفرفش و برضه هتروح كاتت بعديها تاني و تفتح معاك

* ما تفكرش نفسك سوبرمان .... بمعنى متجيش تقول أنا النهاردة تعبان و تبوط يوم في الجدول و تقول هدوس على نفسي و أعوضه مع اليوم اللي بعده .... مش هتعرف

* مش علشان مدرس قالك إن أنت ذكي و دماغك نضيفة تفتكر برضه نفسك سوبرمان .... هع هع هع كان ملايين غيرك أشطر .... برضه متفوتش يوم في الجدول ..... أو تعمل العادة السرية و تقول لأ مش هتأئر بيها و هذاكر بعدها .... لأ هتتأثر و مش هتذاكر


* صلي و إدعي .... الصلاة بتفصل البني آدم و تهديه نفسيأً و تعمل حاجز بينه و بين المشتتات ( العادة السرية ) و بتخش تاني على المذاكرة تلاقي نفسك مفتوحة



http://silkroad4arab.com/vb/archive/.../t-260952.html

http://www.mediafire.com/file/8zuemv...D8%A9+2016.pdf

نصايح جميلة جدا يا استاذ محمود كانت فين دي من اول السنة قبل ما الدنيا تبوظ معايا بس الحمد لله بحاول المها بس اكبر غلطه غلطها لما سمعت كلام صحبي وروحت معاه لمدرس عربي مش بتاع ثانويه عامة غير ان المجموعة مش شغالة فهو كمان مش شغال فانا مش عارف اسيبه ولا اكمل معاه وامري لله وابدأ مراجعه مع مدرس معاه وابدأ امتى الدرس التاني ودلوقتي باخد درسين فالكيميا هل ده صح ولا غلط
وشكرا لصاحب الموضوع واصحاب الردود

الدنيا لسه بدرى اهى وهتمشى تمام باذن الله متقلقش نفسك الا فى انك تشد ...انتا هتاخد قرار انك تشد خليك قده ومترجعش فى كلمتك بقا
اما حكاية درسين دول شوف بس المواد اللى محتاجة مدرسين كويسين يحلوا كويس وخود فيها بس مش كله طبعا الضرورى بس
ومدرس العربى دا لو عايز تغيره بس شوف اللى هتروحله ماشى معاه ولا لا علشان ميفوتكش حاجة ولو ماشى معاه سيبه وروحله من دلوقتى احسن اما لو مش ماشى معاه خليك وخود معاه مراجعة وبرده المدرس لوحده ميعملكش حاجة لازم تشد معاه الدور الاكبر ليك برده جانبه طبعا
وربنا يوفقكم وزاكروا بضمير كدا ودايما ادعوا ربنا يرزقكم وقت للبركة فى الوقت واللى بتزاكروه
وبالتوفيق

كل عام وانتم بخير:022yb4:

اناا في مشكله بذاكر الدرس اول ما باخده في الدرس بروح اذكره في نفس اليوم واحضر الدرس الجديد في كل المواد انا ادبي وارجاع الدرس قبل مااروح الدرس وبكده بيخلص يومي و يتكرر الاسبوع ومش عارف اراجع علي المنهج القديم مش عارف اللم المنهج عارف المنهج بنسبه 30% ولسه محلتش ولا خلصت اي ماده ولازم ادرب علي فروع مش بعرف احلها زي الترجمه في الانجليش والسبيكر وحاجات كتير لو حد عامل جدول ممكن يساعدني انا حاولت كتير لكن بلا فايده وضغت علي نفسي لكن برضوا مش عارف اخلص ولا فرع

بالنسبة انك بتذاكر الدرس في نفس يومه وبتراجع قبل ما تروح الدرس دي حاجه كويسة جدا
اما بالنسبة لانك تحضر الدرس الجديد ..انت ممكن تستغنى عن النقطة دي او تستبدلها بانك تراجع درس من الدروس القديمة ولو قراية بس ..
موضوع انك بتنسى الحاجات القديمه وفاكرها بنسبه 30٪ بس دا طبيعي جدا جدا ودا اللي المفروض يحصل اصلا ..قدرت تفضي يوم في الاسبوع تراجع فيه القديم ، او تفضي ساعة في اخر اليوم مثلا ،كان بها..
لو مقدرتش يبقا استنى لفترة المراجعه المدرسين هيخلوك تراجع القديم مرة واتنين وتلاته متقلقش ابدااا

اما بالنسبة للاجزاء اللي انت مش بتعرف تحل عليها زي الترجمة والسبيكر ..دي لاززم تبدا تدرب نفسك عليها
الترجمة حلها انك تخصص 5كلمات تحفظهم كل يوم وتحل قطعتين من انجليزي لعربي وقطعتين من عربي لانجلش وتوريهم للمستر في نهاية الاسبوع
حاول يبقا معاك مذكرة ترجمة فيها كلمات وفيها قطع
والاسبيكر كذلك
احفظ اماكن ومتحدثين كتيير وحل بردو ووريهم للمستر

السلام عليكم ورحمة الله وبركاته

ممكن حد يفيدنى ازاى اذاكر فيزياء حديثة احنا خلصنا الفصل الخامس ومش عارفة اذاكره

احفظيها ، بعد الفهم ، لو مدرسك منفضلها غيره عشان تركيز واضع الامتحان اتجه اليها

هو احنا المفروض هنراجع كام مرة وهنبطل امتى من الدروس

انا عندي سؤال لو سمحتو..
هوا النصوص النثر (الفقر-العقاد-الكنيسة) لازم يتحفظو كإنهم دروس قراءة ؟؟
يعني ممكن السؤال ييجي من برا القطعة الي ف راس السوال ؟

حسب مدرسينك لو هتكملي
أغلب المدرسين بيكملو للآخر لحد قبل أسبوع العربي
حسب ما تشوفي بقى لو حابة توقفي لما يخلصو المنهج وتكملي لوحدك كان بها وانا شايف دا أحسن زي ما دكتور عبد الرحمن نصحنا في موضوع دفعة 2017
عايزة تكملي مع المدرسين ونظامهم زي ما انتي عايزة بردو
في رأيي المراجعة جُلّها حـــل امـــتــــحـــانــــات


لا احفظ المقرر حفظه بس + التعليق
غير كدا مابيسألش براهم
والله أعلم :d

شباب السنين اللى فاتت ، كنتوا بتعملوا إيه بالظبط ف الفتره اللطيفه دى ؟ *لسه شهر ٣ مخلصش،ومعظم المدرسين هيبدأوا مراجعه ف ٤*
وايه اللى بينفع أكتر نبتدى حل امتحانات ولا نراجع درس درس ونحل تانى ؟ ولا ينفع الاتنين ؟
والأفضل نحضر المراجعات ولا نستغل وقتها ونذاكر ف البيت ؟
_________________
حاجه كمان : كنت شايفه دفعه السنه اللى فاتت هنا بيتفقوا وينزلوا امتحانات وأسئلة ويحلوا ، ليه مفيش الكلام دا 😂😂 ؟ :rolleyes:

أولاً كدا المواضيع دي كلها نسبية وبتختلف من شخص للتاني
ثانياً بقى أنا مش فاكر كنت عامل ازاي في الوقت دا .. بس لما رجعت لموضوع السنة اللي فاتت لقيت 28-3 كنت كاتب الرد دا
" أنا بخش اتفرج على المشاركات الجدبدة بس الواحد مزنوق في اللي وراه وملوش نفس يكتب حاجة يعني " :022yb4::022yb4:

الموضوع عادي يعني والدنيا سايحة على بعض
بس أفتكر أنا كنت مخلص درس العربي وقعدت منه وفيه آخر فصل قصة ماخدتوش والجزء التاني كان سايح خالص -- والعربي كله كان طبعاً مش 100% متظبط ،،
الرياضة كنت بادوب مخلص وماشي شوية في كل فرع
فيزياء لسا ماخلصتش الدرس ولا المنهج وكنت بحل أسئلة الامتحانات على كل اللي خدته من بدري
الكيميا كنت قاعد من الدرس وماخدتش آخر حصة(الأسترات) وكنت مستني الاقيلها معاد كويس أحضر فيه : في حين النص الأخير من العضوية بايظ والأولاني متظبط شوية ،، والباب الرابع ماكنتش كويس أوي فيه
الخلاصة : الدنيا كانت سايحة وبايظة بردو دا عادي :d

في رأيي الشخصي حل الامتحانات بيجيب أسرع وأحسن ويفيد أكتر
دا جزء من مشاركة د.عبد الرحمن السنة اللي فاتت في وقت زي دا من السنة
"""
ملحوظه اخيره ، يوم ما حد يغلب خالص يروح يمسك الامتحانات الشامله ويبدأ يمسك السؤال ويحفظ الاجابه بعته لو عمل كده فى ٣٠ او ٢٠ امتحان ، صدقونى هيقفل الامتحان ، بكرر الى هيغلب خالص يجيب ويحل من ٢٠ ل ٣٠ الامتحان ويحفظ اجابتهم والله هيقفل بنسبة ٩٨٪ ، بس يريت مش فى الفيزياء الكلام ده او العربي

* ملحوظهه تانيه ، بيستغلوا نقطة ضعفكم فى نهايات الدروس لأن همتكم بتبقى خلاص خلصت ومش بتدوها حقها ، وده الى حصل فى امتحان العربى سنة ٢٠١٣ كان معظمه كان اجابة السؤال فى اخر سطر فى الدرس ، شفتوا اخر سطر . فخلوا بالكم

اخر حاجه ، متقلقوش بيكرروا امتحانات السنوات السابقه بيكرروا ، بيكرروا علشان الناس الى بتقول مش مهمه .
احنا امتحان الفيزياء بتاعنا كان صعب لكن كان كله امتحانات سابقه ، ايه يعنى صعب بس انت حليت الفكرة دى قبل كده .
"""
http://thanwya.com/vb/showpost.php?p...postcount=1966

فدي وجهة نظري في حل الامتحانات يعني .. منها بتتعود على شكل الامتحان وبتاخد ثقة واطمئنان ومابتتخضش -- بتاخد خبرة لما تلاقي سؤال مش مباشر -- بتحفظ الأسئلة :d -- بتبدأ مع كتر الامتحانات بيجيلك إحساس الممتحن بيحط الاامتحان ازاي أو أهمية كل جزء في المنهج قد ايه والحتت اللي الممتحن بيحبها وموضع امتحان دايماً -- بتشوف اخر كام امتحان سنة أو سنتين مع نماذج السنة دي وامتحان السودان بتلاقي في شكل للامتحان واتجاه ناحية أجزاء معينة كدا ممكن يبقى مختلف عن الامتحانات القديمة شوية (فيزياء مثلاً أو عربي بيبقى باين فيهم الموضوع دا)

كل لما بتبدأ تحل امتحانات بدري(بدري عن دلوقتي كمان) على ما بتوصل وقت الامتحانات بتبقى مرتاح أكتر + انها منها في نفسها مراجعة بردو انها بتبين لك انت ايه اللي مش مذاكره وايه كروتته ووو..... غير لما ترجع تراجع جزء جزء واللي كروتّه قبل كدا تكروته تاني بردو أو ما شابه وتتأخر على ما تبدأ تحل امتحانات وتلاحظ المشاكل دي

بس في الآخر بردو دي حاجة بتختلف من شخص للتاني ورأيي ورأي د.عبد الرحمن غير مُلزِم لحد :d بس أنا الرأي دا عاجبني جداً ومقتنع بيه .. وشفت (تقريباً) كان بيفرق معايا قبل كدا ،، كان في 2 ث عندنا 2 مدرسين رياضة
واحد منهم حصتة ساعة أو ساعة ونصف والتاني ساعتين وممكن يزيد ربع ساعة كمان ، الأولاني كان بيخلص في الحصة أكتر من التاني بنسبة كبيرة ، الأولاني كان بيخلص المنهج مثلاً(منهج ترم) في شهر 11 ويكمل لحد الامتحانات بيحل امتحانات لما نزهق والتاني كان بيخلص يادوب قبل الامتحانات بحاجة بسيطة ويادوب حصة مراجعة أو حصتين
أنا كنت باخد مع الأول ومتعود عليه والأمور ماشية مظبوط دايماً وببقى مرتاح بموضوع حل الامتحانات دا كان بيظبط لي أي حاجة واقعة في أثناء شرح الدروس نفسه -- رحت في ترم للمدرس التاني والشهادة لله بيشرح كتير ويحل كتير ويدي كل درس حقه وكل حاجة وببقى فاهم أكتر ومتابع الموضوع .. بس في آخر الترم ليلة الامتحان جيت بمسك كل ما أجي أحل امتحان ألاقي الدنيا سايحة ولو الامتحان من 8 مثلاً بجيب 6 من 8 وحاجات كدا (2 ثانوي) بس ضغطت على نفسي وربنا كرم لحد ما الموضوع اتظبط شوية ودخلت الامتحان وكان كويس
الخلاصة :: رغم إن المدرس التاني كان شرحه أحسن وخد وقته في الشرح وكل درس خد حقه والحصص أطول وووو.. والتاني كان بيكروت والحصة صغيرة ويخلص بدري ، بس التاني بموضوع حل الامتحانات الكتير دا كان بيظبط معانا جداً

أخيراً : بردو خدت برأي د.عبد الرحمن وقعدت من أغلب الدروس وقلت أستفيد أنا بالوقت دا
مجملأً الدرس اللي تحسيه تضييع للوقت وانك ممكن تعملي نفس اللي بيحصل في الدرس دا في البيت في نفس الوقت أو أقل أو إن الدرس مش بيضيف جديد اقعدي منه .. لو غير كدا والدرس مفيد والمدرس بيستخدم الوقت كويس وبتستفيدي بيه وشايفة تكملي أحسن فكملي
أنا كملت في انجليزي عشان كانت المراجعات حلوة جداً وكنا بنحل كتييير جداً والمستر كان بيوضح حاجات كتييرة ورياضة نفس الكلام