حرد عليكي واحدة واحدة
- لما أنا والكثيرين غيري يقولوا كده علي مصر نبقا عايزين نظهر العيوب بتاعتنا ونخليها واضحة للكل عشان ناخذ موقف جاد في تصحيح كل الأوضاع المقلوبة والمتسببة في انهيار البلد.
- مش مهم ان العالم كله يعرف اننا بننتقد بلدنا , الأهم اننا نصحح الأوضاع الخطأ عشان نخلي العالم كله يحترمنا غصب عنه.
- لن نستطيع تصحيح هذه الأوضاع دون اظهارها بصورة تخلي الأعمي يشوف , لكن لو فضلنا نداري فيها أو نجملها أو نقلل منها , يبقي احنا كده بنضر البلد مش بنفيدها !!
- زمان كان الأب بيضرب ابنه وربما يقسو عليه في الضرب , فهل كان هذا الأب يكره ابنه أم انه أراد تقويمه وتصحيح مساره؟!! لكن التدليل الذي نراه اليوم هو أحد الأسباب الأساسية في سلوكيات الشباب والفتيات.
- بالنسبة لنقطة احنا حندي ايه لمصر , فمصر عايزة اللي يديها يديها زي ما هي عايزة. ولما أقول مصر هنا أقصد بها المسئولين عنها !!
- أختي الصغيرة / أقصد في السن بالنسبة لي .
حينما تتخرجين من الجامعة ان شاء الله وتحتكي بالحياة العملية ستكتشفين أشياء كثيرة جداً جداً في مصر لم تكوني تفكرين بها أو تظنيها بتلك الصورة .
- أما بالنسبة لأسفك , فهذا يدل علي أدبك الجم وأخلاقك الرفيعة . وانتي بالنسبة لي أختي الصغري , وانما أردت فقط
أن تكون المناقشة بالحوار الهادف وبالدليل والحجة عشان يبقي رأي الانسان مش مجرد رأي وخلاص .
- واضح انك حساسة زيادة عن اللزوم بالنسبة لإعتبارك مصر أماً لك , وهذا حقك , لكن بلاش الحساسية الزائدة . دي نصيحة مش عتاب .

علي فكرة انا لست من مهوسين أمريكا ومش عايز أسيب البلد وأهاجر
وأمريكا فيها مشاكل كتيرة أيضاً حتي وان اختلفت عن مشاكل مصر .
وكان معروض عليا السفر لأمريكا ورفضت .
ومازال معروض عليا السفر لدول الخليج ومازلت رافض .
ولو قرأتم السؤال بتاع الموضوع حتلاقيه " ايه اللي اتعلمته من مصر؟"
وانا ببساطة جاوبت عن السؤال بشكل شخصي جداً , يعني اجابتي لم يكن بها تعميم !!

يا أخ كرمبوا 2011 / انا مصري والله ومش معني اني اقول اللي انت مش شايفه
يبقي انا مش من مصر !!!
وأنا جاوبتك عن ظنك في اني عايز اهاجر أو اسيب البلد.

كشفتك يامستر :d
بتنصحنا نتقبل الرأى الاخر
وانت لم تتقبله لماذا ؟وباين فى كلامك إنك زعلت من كلامى
وكما قلت الاختلاف فى الرأى لا يفسد للود قضية
شكرا على الروح الرياضية التى سوف تظهر من حضرتك الأن
وأنا متأكد من ذلك

فين هو ده عدم تقبلي للرأي الأخر؟؟
هو لما تقول اني مش مصري , يبقي ده رأي؟!!
وبعدين انا قلت عبر عن رأيك بس بالحجة بالدليل
مش مجرد رأي بلا أي سند !!
فيه حاجة غامضة أو غلط في كلامي ده؟!!

ولايهمك يامستر
أنا مصرى وانت مصرى
وكل مصرى يدور على حاله
وأنا هنام
بعد إذن حضرتك

أحلام سعيدة ان شاء الله
وتصبح علي خير .

انا مقتنعة جدا بكلام حضرتك
واعتقد ان الناس كلها ومن ضمنهم انا عارفين مصر عاملة ازاى وعارفن مشاكلها وحتى الجاهلين لانهم عايشين فيا
واعتقد ان المشاكل اللى فى مصر مش صغيرة لدرجة ان احنا نتكلم هنا علشان الناس تعرفها
الناس عارفة كل البلاوى دى وساكتة
انا والله كان هدفى فى الكلام مع حضرتك انى اوصلك فكرة ان احنا مانبينش صورة مصر سيئة اكتر ما هى فعلا ظاهرة للعالم كله
وانا مع حضرتك انى انا حساسة جدا فى موضوع حبى لمصر لان كل اللى بيتكلم معايا بيعرف كدة من مجرد حوار صغير بس انا كدة وحابة نفسى كدة
علشان نغير لازم نتغير
وعلشان احنا بنحب مصر اكيد هاتتغير بينا
ومرسى لحضرتك انك خلتنى زى اختك الصغيرة وده طبعا شرف ليا انى ابقى اخت حضرتك
وانا متأسفة كمان مرة وماتزعلش منى

اقتباس:

المشاركة الأصلية كتبت بواسطة aliweeka1 (المشاركة 2686706) فيه سؤال محيرني , يا ريت اللي يعرف اجابته يقولي .

دي ام القرى ودي ام الدنيا في فرق :d
اصل تسمية ام الدنيا بيرجع لإنه ام العرب كانت السيدة هاجر المصرية
ام سيدنا اسماعيل عليه السلام
ونسل العرب بيبدأ من نسل اسماعيل
غير بقى الحوار بتاع انه مصر اقدم الحضارات وبالتالي فهي اكبر دولة عمراً
ودايماً مصر كانت حصن الحصون ومعرفش ايه والكلام التاريخي ده
كان في موضوع جايب تفاصيل تفسير كلمة ام الدنيا بس مش فاكر اسمه
بس هو السبب الرئيسي هو السبب الاول ده

القري هنا مقصود بها كل البلاد وليس المقصود القري
اللي هي جمع لكلمة قرية .
وبعدين اللي أطلق علي مصر " أم الدنيا " كان المؤرخ هيرودوت
الملقب بأبو التاريخ . والكلام ده كان زمان أيام الفراعنة حينما كانت
مصر بالفعل أبرز دول العالم , أما اليوم فهل ما تزال مصر هي أم الدنيا؟!!
بالنسبة للسيدة هاجر عليها السلام فهي تعتبر أم العرب .
وهل العرب هم الدنيا كلها؟!!

سبحان الله
القرى يعنى البلاد
ولماذا لم يقسم المولى بالقرية بدلا من البلد؟
ربنا يهدينا جميعا