هاى يا جماعة ازيكوا
النتيجة اخيرا ظهرت وانا الحمد لله نجحت
اللى يدخل يطمنا عمل ايه
سلام

يا سلااااااام؟
كل واحد حيدخل يقول النتيجة ظهرت و انا نجحت
محدش حيطمنا
ماشى

النتيجة ظهرت و انا نجحت :d

طيب هو ليه مش مكتوب التقدير العام ؟؟ عشان نطمن اكتر و نعرف هنروح اي قسم
انا حسبت المعدل بتاعي بس عايزة اتأكد ...

هاى علوم اليكس
مبروك ع النجاح
ممكن تقوليلى حسبتى المعدل بتاعك ازاى عشان انا كمان عايزة احسب المعد بتاعى ؟
و مبرووووووووووك لينا كلنا

مبروك على النجاح وعقبالنا ان شاء الله
هو يا جماعة جيولوجيا هى بس اللى ظهرت ولا بيولوجى كمان ظهرت

الحمد لله النتيجة ظهرت و انا نجحت....ههههههههههههه
و ما طلعتش بحاجة. اهو انا طمنتكوا ....انتو ايه الكلام بقى؟
انا ما روحتش الكلية الا بعد لما هنود كتبت انها عرفت النتيجة..روحت عالساعة 6 كده.
مبرووك نهى و هنود و لافلي جيرل و و علوم اليكس و وان واي مش عايز انسى حد.
لافلي جيرل المعدل طريقة حسابة موجودة في الدليل بس انا هقولهالك ببساطة.
كل رمز من رموز التقدير معناه عدد معين من النقاط يعني مثلا a يعني 4 و d يعني 1 و هتلاقي نقاط كل رمز في الدليل و لو مش عندك قولي و انا اكتبهملك.
طريقة الحساب بقى.
تضربي عدد الساعات المعتمدة للمادة ×نقاط التقدير+نفس الكلام للمادة اللي بعدها +اللي بعدها.
و تقسمي المجموع ده كله ÷ مجموع الساعات المعتمدة.
مثال بسيط كده هنفترض طالب جايب امتياز في كل مواد الترم الاول(اللهم احفظنا) و امتياز يعني 4 نقاط.
يبقى معدله الميكانيكا ساعتين و تقديرها امتياز يعني 2×4 و البحتة 3 ساعات و تقديرها امتياز يعني 3×4 و الكيمياء النظرية 3 ساعات و تقدير برضه امتياز يبقى 3×4 و الفيزياء 3 ساعات يبقى 3×4 و الكيمياء العملية ساعة واحدة ×4 و اللغة الانجليزية ساعتين×4
نحسب المعدل = [(2×4)+(3×4)+(3×4)+(3×4)+(1×4)+(2×4)]÷(2+3+3+3+1+4)
طبعا في الحالة دي هيطلع اربعة لأن واحد جايب امتياز في كله يبقى المحصلة امتياز.
طبقي ده على معدلك في الترم الاول عشان تتأكدي انك صح.
لكن لما تيجي تحسبي المعدل الجديد بتدخلي مواد الترم الاول من جديد يعني سيبك من المعدل الاولاني .. احسبي مواد الترمين بنفس الطريقة دي.
طبعا شرح زبالة .. بس الموضوع اصلا مش صعب خصوصا لو معاكي الدليل ..
يلا كل واحد يحسب و يقولنا كام.
انا لغاية دلوقتي محسبتش.

مبروووك ليكوا كلوا عالنجاح ... بس انا بالنسبالي للاسف شاليه مواد ...الميكانيكا و برمجة السي !!
مش مصدومة اوي بصراحه من البرمجه لاني كنت عارفه اني ماحلتش كويس فيها في العملي و الميد تيرم و الفاينال كمان ... بجد يارتني ما اخترتها .. بس الحمد لله على كل حال.. الميكانيكا بقه هي اللي حرمتني بجد من فرحتي بالنتيجه ..مع اني ذاكرتها كويس و كنت باخد فيها كورس كمان !! مش قادرة اتخيل اني هرجع اخد المنهج الخنيق ده في الصيف ..

طريقه حساب المعدل التراكمي فوكس شرحها كويس .. ببساطه يا لافلي جيرل تضربي نقاط التقدير في عدد الساعات المعتمده ..كل ماده لوحدها ..و بعدين تجمعيهم .. و تقسمي على العدد الكلي للساعات المعتمده .. بس ده هيكون المعدل بتاع التيرم التاني بس .. يعني مش المعدل التراكمي بتاع السنه كلها ..

لو عايزة تحسبي التراكمي ضيفي عليهم مواد التيرم الاول بنفس الطريقه ..

انا معدلي قل في التيرم التاني .. وبكده بقيت جيد ( مش مرتفع ) مش عارفه اذا كان ده كويس ان يدخلني قسم الكيمياء ..

سلام

مبروك يا فوكس ع النجاح و الحمد لله انك عديت
و مبروك ليكى يا علوم اليكس و معلش بالنسبة للميكانيكا و تعوضيها ان شاء الله
مبرووووووووووك لكل الناس عشان منساش حد
ميرسى يا فوكس و يا علوم اليكس على شرحكم و انا حاحسب معدلى و اقولكم
و انتو كمان ابقوا قولوا معدلكوا كام
سلام

الف مبروك ليكوا كلكوا :)
ادعولنا بقي علشان احنا مرعوبين جدااااااااا

الله يبارك فيكي
وربنا يوفقكوا ياااااارب ويبشركم بالخير

هو لا زم احسب المعدل مع معدل الترم الاول بالتفصيييييل ولا اخد رقم المعدل عالطول واجمعه مع معدل الترم التاني وخلاص
يارب يكون حد فهم حاجه:d

علوم اليكس .. هاردلك .. انا اكتر واحد عارف شعور ان الواحد يطلع بمادة ... الحمد لله على كل شيء و انصحك ما تخديش السي تاني لأنها ببساطة مش لازماكي مدام عايزة كيمياء ... و على فكرة انا حسبت معدلي لقيت اني زيك برضه جيد مش مرتفع يعني c+.
و الله انا برضه مش عارف ده يدخلنا كيمياء ولا ايه.... يا رب...نشتغل دعاء على طول.
لافلي جيرل الله يبارك فيكي متشكر و العفو... يارب تكوني عرفتي تحسبيه و قوليلنا كام بقى.
هنود مينفعش تجمعي المعدل الاولاني زي ماهو لازم تاخدي المواد من الاول .. يعني مثلا لما نوصل تالتة لو جمعنا المعدلات هتبقى اكتر من اربعة يبقى معنى كده ان الطريقة دي غلط.
هنقعد لغاية سنة رابعة نحسب من اول ترم في الكلية.
في ملاحظة بس ان اللي سقط في مادة و بعدين اخدها تاني و نجح فيها لما يجي يجمع عدد الساعات المعتمدة ميجمعش المادة دي مرتين هي مرة واحدة بس و دي من الحاجات الحلوة في النظام الجديد يعني كأنه بينسى انك سقطت في المادة دي بالنسبة للمعدل .. لكن في حاجة شبه صحيفة الحالة الجنائية كده هيتكتب فيها كل حاجة.مش هينسى حاجة.

انا مكنتش وخدة مدخل قانون اصلا الترم ده بس لقيتها نزلة فى مواد السامر كورس فحخدها ان شاء الله اخلص منها بس سمعت ان دكتورها مش كويس اوى
بس
حخدها اهى اقعد اصمها و خلاص رغم انى مش بحب القانون بس لازم
انا كنت عيزة احسن رياضة الترم الاول اللى كنت مقبول فيها و منزلوهاش اصلا فجدول المواد للصيف ده فحدخل مدخل قانون ارفع تقديرى

انا كدة معدل السنة كلها جيد مرتفع

مبرووووووك للكل و الحمد لله

علوم ****
انا اى نعم بيولوجى بس اصحابى اللى فعلوم طبيعية الحمد لله كلهم طالعين بالمادة دى و سألوا مدير الكنترول و د. سيد منصور و قالولهم نفس اللى قاله محمد فوكس

مبروك يا محمد فوكس و الحمد لله
ربنا يوفق الجميع
و الف الف الف مبووووووووووووك طبعا لهنوووووود حبيبتى
مبروووووك علوم ****
مبرووووك لافلى جيرل

ايوة عرفت احسبه يا فوكس و طلع 2.78 للسنة كلها ... هو كده المفروض تقديرى يكون ايه ؟؟؟
مع العلم ان الترم الاول معدلى كان 2.76 و حسبته اتاكدت منه لاقيته كده بس كان كان تقديرى b يعنى جيد جدا و المكتوب ف دليل الطالب ان 2.76 مش جيد جدا مش عارفة دى بقا غلطة مطبعية ولا ايه
لو حد فهم حاجة يا ريت يقولى رأيه ايه و يدعيلى تجيلى كيمياء (مش مهم اسم التقدير ايه )
سلام

مبروك للجميع و ان شاء الله كل واحد يدخل القسم اللي عايزه و هو تقريبا واحد الكيمياء.