| zx xz |
07-02-2016 04:12 AM |
السلام عليكم
ازيكم يا شباب , اعذروني مقدرتش اكمل موضوع "10 كلمات انجليزي" بسبب الدراسة
كنت عاوز اقول لكم شوية نصائح يمكن تفيدكم
*لو خلصت اي مادة ابدأ حل امتحانات على طول متقعدش تراجع كل درس لوحده , انا بدأت المراجعة كده بإني اراجع كل درس لوحده وضيعت وقت كبير , حل الامتحانات بيفكرك بالمنهج وبيثبته في دماغك أكثر ده غير إنك بتطمن لما تلاقي ان فيه اسئلة كثير بتتكرر.. بس ركز في النقطة رقم 3 اللي جاية
*بعد ما تحل كذا امتحان ممكن تلاقي ان عندك درس بتغلط فيه كثير , ده بقى ممكن ترجع تذاكره لوحده
*لما تخلص امتحانات او تكون حالل كثير ترجع تبص في "كتاب المدرسة" مش كتاب خارجي وتمسحه مسح , لو تجيب ورق او كشكول وكل يوم تفتح درس وتلقط أي معلومة بين السطور انت مش عارفها بالذات في الجزء بتاع الفيزياء الحديثة او الكيمياء , انا قلت لك فوق ركز في نقطة 3 لأن الإمتحانات هتفكرك بأغلب المنهج بس أكيد في نقط صغيرة مجاتش في الإمتحانات وممكن تيجي السنة دي
*يستحسن تبدأ تذاكر او تقرأ في مواد النجاح اللي هي الدين الإقتصاد والإحصاء والوطنية ,عشان متتزنقش في الآخر زي ما حصل معايا وتعد درجات النجاح بعد الإمتحان , لأنها هتكون فترة امتحانات وانت مش ناقص قلق ,وخلي بالك ان الإقتصاد مش صغير ومينفعش يتلم في يوم أو يومين قبل الإمتحانات
*في الأدب , هتلاقوا ملزمة في المنتدى اسمها " الأدب بين السطور " , الملزمة دي ممتازة وفيها اسئلة كثير من بين السطور ومتجاوب عليها من كتاب المدرسة وفي الإمتحان بتاعنا جه سؤال منها ,الملزمة هتساعدك جداً بس متكتفيش بيها يعني ذاكر وراجع بنفسك على الأدب من كتاب المدرسة إلى جانب الملزمة
*درب نفسك على وقت الإمتحان , النقطة دي مهمة جداً , لازم تحط وقت وتحل كذا امتحان كأنك في اللجنة بالظبط , يعني تحل السؤال حل منظم ولو فيه سؤال فيه رسمة مثلاً ارسمها (متقولش انا عارفها كويس وهبقى اعملها في الإمتحان) لازم تتدرب من دلوقتي , أكثر مادتين حسيت ان الوقت ضيق فيهم كانوا العربي والرياضة , العربي كانت غلطة مني لأني كنت بحل كل الأسئلة الإختياري ومخدتش بالي من الوقت وكنت بحل ببطء لأن مكانش معايا ساعة وكنت فاكر ان الوقت كثير ,بس الحمد لله ربنا ستر
*اوعى تروح الإمتحان من غير ساعة!!! , انا عارف ان الإمتحانات لسه فاضل عليها كثير بس عشان تفضلوا فاكرين , لازم يبقى معاك ساعة عشان تعرف فاضل قد ايه وانت حليت قد ايه , ويمكن سؤال ياخد منك وقت فتاخد بالك
بالتوفيق , إن شاء الله تنجحوا وتدخلوا الكليات اللي عايزنها
|
