يا جماعة انا عندي استفسار صغير

هو ينفع احول من صيدلة القاهرة لعين شمس قبل ما الدراسة تبدا

ولا مينفعش عشان مش اقاليم:(

لو سمحت انا ليا استقار عايز اعرف مستقبل خريج فنية عسكريه ومستقبل خريج كليع علوم غير انى اكون مدرس وكليه فنون تطبيقية وعمارة معلش تعبك معايا.

لو سمحت عندى سؤال و يا ريت الاجابه بسرغه
 

هو كليه السن افضل و لا كليه تجاره انجلش
و مين الى هنلاقى فيها فرص عمل

بص يا عم محمد ..

بالنسبة لألسن هيا من كليات القمة طبعا .. ومجموعها ليس اقل من 94 تقريباً

الالسن بتدرس فيها لغات كتيره .. بس انتا طبعا اللي يهمك فيها الانجليش .. بس مشكلتك ان انتا هايبقي مش متاحلك غير مجال اللغة وبس ومش هايبقي معاك اي دراسة تانية غيرها

عشان كدا نقدر نقول ان تجارة انجليش احلي واحسن

هاتقدر تتعامل بالانجليش فيها .. وفي نفس الوقت هاتبقي دارس تجارة وانتا عارف يعني ايه تجارة

مستقبلها حلو وواسع جدا بس لللي يقدر يتسفيد منها ..

بس سواء كدا او كدا .. القرار ليك والميول ليك برده

وربنا يوفقك

ماعتقدش انه ينفع .. لإن التنسيق مابيسمحش بالتحويل في المحافظة الواحده

الا اذا كانت بقي جامعة عين شمس دي بقت تبع محافظة تانية !!

غالبا تقدر تتصل بمكتب الشكاوي بتاع التنسيق وتسألهم .. وهما هايجاوبوك

بصى السنة دى فيه نظام تانى ان شاء الله لسكان القاهرة الكبرى
حلوان - عين شمس - القاهرة

ال3 جامعات دول تقدرى تكتبى دلوقتى اى واحدة فيهم رغبة اولى مش شرط اللى جمبك بس او توزيعك الاقليمى يوديكى ليها
طالما مجموعك جايبها خلاص

يعنى انا مثلا
مكان سكنى يودينى جامعة عين شمس
بس طالما مثلا حابة القاهرة
اقدر اكتبها رغبة اولى براحتى هى او حلوان طالما اقدر اروحها بالمجموع وكأنك ساكنة جمبهم عادى خالص


النظام دا جديد ع فكرة السنة دى تقريبا

ربنا معاكي بجد لإني انا فعلا حاسس بيكي :(

بس نقدر بكل بساطه .. نسرد الكليات اللي ممكن تخشيها بمجموعك دا

عندك علوم - آثار - تربية + الكليات الادبية المتعارف عليها زي اداب وتجارة وحقوق

وبما ان ميولك مش رايحة لعلوم .. يبقي مافيش غير الكليات الأدبية

يبقي مش عندك غير تربية واداب وتجارة وآثار

بالنسبة لآثار انا بقول بلاش لإن بنت عمتي فيها والدراسة هناك صعبة فعلا وكلها بهدلة ومش موجود منها تقريبا غير في القاهرة ..

بالنسبة لتربية دا بيعتمد على درجات مواد اللغات عندك .. يعني انتي وحظك ..

تجارة بقي هى كلية الشعب المرموق !!

لا بديل غير تجارة بيتهيألي قدام اللي زيك ..

وزي مابيقولوا كدا على رأي المثل هناك east or west Tegara is the best !!

فيه بقي مشروع تاني وهوا كلية اعلام .. بس دي مش موجود منها في مصر كلها غير جامعة القاهرة كجامعة حكومية ..

عايزة بقي جامعات خاصة فيه عندنا في الايه يو سي .. بس غالبا الكورسات قفلت خلاص

انا كل دا بتكلم على اساس الجامعات الحكومية .. لكن لو هاتتجهي للخاص بقي يبقي عندك 6 اكتوبر وجامعة مصر الدولية

طبعا خاص وانتي علمي .. يبقي شوفي بقي الطب والصيدلة هناك هاتبقي اخبارها ايه

وربنا معاكي في زنقتك دي بقي :)

طيب بالنسبة للتنسيق الالكترونى المرحلة الاولى ان ادبى 376.5 لازم يبقى الاحد ولا ممكن اقدم السبت

على حسب ميولك .. بس نصيحة ياريت تحولي ادبي

لسببين رئيسيين :

1- في الادبي هاتعرفي تجمعي مجموع اكتر .. بس تذاكري كويس .. وتركزي جامد على التاريخ ..

2- امتحانات علمي سواء علوم او رياضة .. زي الزفت .. وامتحانات الفيزاء كل سنة بتشهد بذلك .. فالبتالي امتحانات الادبي بتيجي اسهل من علمي بكتير ..

بس كل دا والقرار لسه ليكي ..

و Good Luck ...

بص يا بوب .. السنة اللي فاتت .. نظام الشرايح دا كان موجود للناس اللي كانت بتروح المعامل والاماكن اللي كانت مخصصة لعملية التنسيق على النت دي .. عشان بس مايبقاش في زحمة وكبس على المنافذ دي

لكن طالما انتا عندك نت في البيت تقدر تخش في اي وقت .. من اول ميعاد فتح المرحلة بتاعتك لغاية ميعاد انتهائها

انا بتكلم على اساس السنه اللي فاتت .. لكن السنه دي مش عارف بقي ممكن يكون اتغير

والله اعلم :rolleyes:

طيب ايه رايك فى فنيه عسكريه وشغلها ايه ياريت ترد

بص ياعم فتحي ...

كلية الفنية العسكرية دي تابعة للقوات المسلحة المصرية .. يعني بمعني اصح .. كلية عسكرية

بكل بساطه .. هاتدخلها تتخرج منها وانتا اسمك مهندس عسكري وهايبقي اسمك ضابط مهندس

بالنسبة لتخصصاتها .. فيها تخصصات كتيرة زي هندسة الكهربا والميكانيكا والكيميا والمدنيه والمعمارية

وعشان تخشها بتخضع طبعا للاختبارات زيها زي اي كلية عسكرية من خلال مكتب تنسيق الكليات العسكرية

بس بشرط ان مجموعك في الثانوية العامة مايقلش عن90 في الميه وتكون علمي رياضة

مدة الدراسة فيها زيها زي كليات الهندسة العادية 5 سنين وشغالين هناك بنظام الفصلين الدراسيين الشتوي والصيفي ( Fall & Spring )

السنة الاولي بتدرس هندسة عمومية .. زي كلية الهندسة العادية كدا .. بمعني اصح (اعدادي)

السنة اللي بعديها بقي بتبدأ تتخص على حسب مجموعك الي الاقسام اللي ذكرتها قبل كدا

من السنة التالته للسنة الخامسة بقي بتبدأ تتخص في تخصصات فرعية .. زي مثلا انتا في تانية دخلت هندسة كهربا .. بتبدأ تتخص بقي جواها سواء كهربا اتصالات او كمبيوتر .. كدا يعني ..

رأيي فيها .. هيا كلية مضمونة طبعا .. طالما انها تابعة للقوات المسلحة .. الشغل فيها مضمون والرعاية الصحية برده مضمونه (مستشفي القوات المسلحة)

بمعني عاااااااام .. اي حاجة تابعة للقوات المسلحة زي الفنية العسكرية او الكلية الجوية او الدفاع الجوي او البحرية او الحربية .. تبقي ميه ميه وسيبك من اي حد يقولك غير كدا

بس اهم حاجة عايزك تعرف ان هناك ماشيين بنظام محكم .. وهوا النظام العسكري اللي مافيهوش رحمة

لو قالك اقلع تقلع .. لو قالك بوس التراب تبوسه .. عااااااادي جدا .. دا اسمه امر عسكري ..

تاني حاجة بقي تعدي الاختبارات وهى اختبار الثقة واللياقة البدنية والكشف الطبي

لو عديت هايدوك كراسة الالتحاق .. ملحقة بنموذج بيوقعه والدك او ولي امرك ودا بيعتبر تعهد منه ..

يارب اكون وفقت في تجميع بعض المعلومات ليك .. و ربنا يوفقك

بعد اذنكم يا جماعة
كان نفسي حد يرد علي الفرق ين هندسة قسم حاسبات و كلية حاسبات و معلومات

شكرا اوى يا Vampire وربنا يوفقنا جميعا