المشاركة الأصلية كتبت بواسطة د.عبدالرحمن المنياوي (المشاركة 3669692)

يا جماعة احنا قلنا من الأول ومحدش يتبع اي كلام تاني .. المعلم المساعد اللي اجتاز الكادر يعين على معلم
والمعلم المساعد اللي لم يجتاز الكادر يعين على معلم مساعد
ومعلم الحصة او العقد الشامل اللي اتم 3 سنين يعين معلم مساعد
ومعلم الحصة اللي لم يتم 3 سنين يتعمل له عقد شامل حتى اكمال شرط الثلاث سنوات ..

كل ده هيتم من 16/7/2011 وعلى الله حد يسالني ويقولي ايه الموقف ؟!!!!!!!!!!!!!!!

المشاركة الأصلية كتبت بواسطة د.عبدالرحمن المنياوي (المشاركة 3672948)

بصو يا جماعة بالنسبة للحد الأدنى للأجور أنا ليه وجهة نظر :

هم قالوا حافز الإثابة يزيد ليصبح 200% يعني كل واحد يرفع حافز الإثابة في مرتبه من 25% إلى 200%

مثلا مرتب المعلم المساعد أساسيه 183.6 بياخد حوافز 45 جنيه يعني هنزود على مرتبه كمان 175% بواقع 315 جنيه

يعني مرتبه هيصبح 680 جنيه وده الصافي مش الشامل .. وكل واحد بقى يزود حوافزه 175% من الأساسي ويحسب مرتبه ..


نقول تاني .. يبقى أنا أعتقد كده ان المعلم المساعد مرتبه الصافي اللي هيقبضه هيكون

360 + 315 = 675 جنيه

والمعلم حديث التعيين

465 + 315 = 780 جنيه

وده الصافي يعني الاجمالي أكتر من كده وبكده أعتقد إنهم وفوا الحد الأدنى ..

اشمعنى نضيف 315 جنيه .. لأن احنا بنقبض حوافز 25% = 45 جنيه لما نحولها إلى 200% نزود 315 جنيه

وده لو الكلام مظبوط ولو إني أعتقد كده فعلا لأن تصريح وزير المالية قال كده ..

المشاركة الأصلية كتبت بواسطة د.عبدالرحمن المنياوي (المشاركة 3562647)

المروتين مسكوا في بعض ..

يا جماعة المسألة مش مستاهلة وبالراحة خالص ..

أنا مش عاوز الناس تبتدي تفهم غلط .. أنا كلامي واضح يا جماعة ومش محتاج ترجمة ..

أول كلامي قلت بلاش نخلط القرارات .. قرار تثبيت من مر عليهم 3 سنوات يعني نقل الناس اللي تعمل في التربية والتعليم على درجة مالية وتبقى ثابتة تمضي في دفتر الحضور والانصراف بتاع المدرسين وتسري عليهم قواعد العمل الدائم .. يارب نفهم ..

طيب هو المعلم المساعد يتم تثبيته الآن على درجته اللي هي الثالثة .. مظبوط ؟!! آه مظبوط .. هتيجي مروة دلوقت زعلانة وتقوللي لأ المفروض يتثبت معلم مش معلم مساعد .. أقولها الدرجة الثالثة والثانية والأولى اسمها درجات مالية مالهاش دعوة بالمسمى الوظيفي .. أما حكاية معلم ومعلم مساعد دي درجات وظيفية يحددها قانون اسمه القانون 155 لسنة 2007 وهو المسمى بقانون تنظيم الدرجات الوظيفية لكادر المعلمين .. القانون ده هو اللي بيقول تبقي معلم مساعد والا معلم .. لكن الاثنين يا أختي درجة مالية ثالثة تخصصية ..

طيب الوزير قال إيه ؟!! قال اللي موجود في القانون / اللي امتحن الكادر هينتقل من معلم مساعد إلى معلم (ده من ناحية الدرجة الوظيفية ) لكن ماليا الاثنين على الثالثة التخصصية يا مروة ..

طيب اللي امتحن ورسب أو اللي لسه لم يمتحن يسكن على الدرجة المالية الثالثة التخصصية كما قال الوزير ولكن مسماه الوظيفي لن ينتقل لمعلم إلا بعد اجتيازه للكادر ..

قصة هتساوى ببتاع الحصة إزاي .. حضرتك لما اتعينتي في 2009 كان فيه ناس متعينة من 2008 و 2007 كمعلمين مساعدين ومعرفوش ينتقلوا لمعلم وقتها .. وساعتها قالوا نفس كلامك هنتساوى بالجداد اللي كانوا بالحصة ؟؟!!! وهم ربنا كرمهم وانتقلوا لمعلم وانت اهو هاتحصليهم ..

مسألة المساواة بقى مش هتبقى كاملة يعني انت هتقبضي أكتر منهم لأنك أقدم تعيينا في معلم مساعد .. ولما ربنا يتممهالك على خير كده وتنجحي في الكادر هتصرفي المرحلة الثانية من فلوس الكادر والمسماه ببدل الاعتماد .. وبالمناسبة مفيش حاجة اسمها عقد مميز دلوقت يامروة ..

يارب تكون الرسالة وصلت يا مروة ..

ومعلش ليا ملاحظة أخيرة يا أخت مروة ..

حضرتك تقوليلي دكتور عبدالرحمن ماشي .. أستاذ عبدالرحمن ماشي .. عبدالرحمن بس ماشي .. لكن (يادكتور ولا ياستاذ عبد الرحمن) متهيألي انك كنت متنرفزة وبتتريقي عليا ..

لو انا فهمت صح يبقى انت مدينة لي باعتذار ..

المشاركة الأصلية كتبت بواسطة د.عبدالرحمن المنياوي (المشاركة 3680356)

هتاخد كل حقوقك

المشاركة الأصلية كتبت بواسطة عصام الفنان (المشاركة 3680819)

أنا من مركز المنيا قرية تلة تعاقد 11/7/2009 بالعقد المميز معلم مساعد يعنى لم اكمل شرط ال3 سنين يا ترى لينا تثبيت على الدرجة الثالثة ولا لأ و يا ترى لينا فى الحد الأدنى .. ولكم جزيل الشكر يا د / عبد الرحمن