|
إنسان صلاحيتك مُنتهيه ندمان على ناس راحوا فـ داهيه كان أولى تكون دلوقتى سعيد مبسوط علشان ربنا نجاك و إن حاسس انك لسه وحيد... أطمن ربك لسه معاك |
الطب إتقدم مع ذلك .. جرحك موجود زى ما هو ده لإن مفيش دكتور فـ الكون يا عبيط هيعالجك من جوا عشمان فـ حاجات مش بقيالك... عايش تتحسر على حالك .. كل الأيام اللى فـ بالك .. أيام من ماضى مهوش راجع فـ طبيعى يكون جرحك مهما بتعالج فيه بيفضل واجع .. إنسان صلاحيتك مُنتهيه ندمان على ناس راحوا فـ داهيه كان أولى تكون دلوقتى سعيد مبسوط علشان ربنا نجاك و إن حاسس انك لسه وحيد أطمن ربك لسه معاك |
أول دقيقه .. جواكى خوف جوايا شك ..... جوانا حُزن ودربكه .. إتنين بيتقاسموا البُكا على كتف بعض .. إتنين بيتعالجوا بدوا من فوبيا بُعد خايفين لـ بكره يشدّهم يتفرّقوا .. فـ بيدّوا وعد مليون بحبك فإنطقى .. و إدينى حلم أمسك إديه و أمسك إيدكى معاه أوى علشان أعيش ! إدينى بيت .. مش شرط يبقى أربع حيطان يكفينى جدا ضّمه فيها وعد منك متغبيش تانى دقيقه .. جواكى حيره بدون سبب .. جوايا زحمة أسئله .. انا و انتى ايه ؟! جوانا شئ مـ الصعب جدا نفهمه تصنيفنا ايه ضمن اللى غاويين يحلموا .. بنحب بعض ؟! إتنين صحاب ؟! شايفك أمل ؟! شايفك سراب ؟! معرفش فعلا أى شئ كل اللى عارفه انى لامح جوا تفاصيلك طريق .. حابب بكايا ما دام إديكى هتمسحه و بحب فرحى ما دام فـ قربك هفرحه .. حابّك تشاركينى الوجع .. لو حتى أزيد مـ اللزوم .. حابب أكونلك كل شئ حابّك تكونى فـ كل يوم .. حابّك تكونى اللخبطه .. فإتلخبطى .. حبينى و إوعى تخططى .. هنعيش فـ بعض اليوم بيومه بدون ما نسأل ربنا .. عن أى حاجه فـ علم غيب .. ربك رزقنا ببعضنا .. سيبى عليه القسمه و نصيب ! و سيبنا نمشى مع الزمن .. ونتوه و نرجع نلتقى .. يا حبيبتى يا حلمى الوحيد .. مديلى إيد و إتحققى ! |
انا عايز حد أحسه انا أو حد يحس إن انا هوّا حد يكون شبهى و أكون شبهه و نشوف بعضنا أوى من جواّ من غير ما نعاير بعض بـ عيب ..... من غير ما نغيب .. من غير ما نقول " لازم نبعد " مش عايز حد يكملنى انا عايز حد يكون عايز من غير أسباب يتحمّلنى انا عايز حد يكون عايز يفضل و يايا بدون أسباب دورت فـ كشف اللى أعرفهم فـ لقيتنى أخدت الكل غياب ! |
وضحك البنت مش معناه بإن البنت ناسيه الحزن و ناسيه الخوف من الأيام و عارفه تعيش و عارفه تنام لإن البنت يا ساده ..... هتفضل برضه كالعاده سؤال و علامة إستفهام ؟! |
|
الوقت : بين العصر و المغرب كده .. وش السما بيضحك و الأرض متنكّده... فى حد طالع و السما فاتحه صفين ملايكه بيختموا القرآن .. و الشيخ عماد بيرتل الفاتحه جيكا بيسأل دى جنازة مين قام رد مينا و قاله حد جديد .. فـ الأرض لسه القاضى مدّاش حكم أما السما بتقول بإنه شهيد بيقولوا بنت و إسمها شيماء .. بيقولو ام لطفل ست سنين ! عيّل بيتهجى الحياه إتيتّم إزاى هيقبل مننا قوانين ؟! بكره هيكبر مش هيسأل مصر ايه ؟! ..لكن هيسأل مين *** أمه ؟! كام حد شايل روحه على كفه كام حد سايل فـ الميدان دمه .. بنشيل رئيس ونجيب رئيس و مفيش جديد قطع الحوار خالد سعيد "إزى مصر و أهلها دلوقت ؟! مش برضه كان الحل فـ التحرير ؟! مش برضه بعد الثوره فيه تغيير ؟! و ان قولتوا آه طب فهمونى إزاى فيه دم لسه و شهدا غيرنا كتير الوضع من سيئ لأسوء ليه ؟! ورد الجنانين فى بلدنا عجاف .. الكل سد ودانه غمّى عنيه الكل أصبح مـ الرصاص بيخاف و بنمشى جنب الحيط على إستحياء قطعت كلامهم وقتها أسماء .. _بنت الملايكه فـ وشها ساكنين _ _ انا مت مش عارفه الرصاصه منين _ كل اللى عارفاه انى كنت هناك .. بهتف و أداوى الجرحى و المصابين كان نفسى أعرف بس قبل ما أموت مين ضد مين فينا و مين مع مين ؟! #سندس بتمسح دمع عين أسماء .. و تاخدها حضن طويل بدون أسباب ثوره ؟! .. إنقلاب .. ثوره .. إنقلاب _ انقلاب _ ! مجموعه بس بتعترف بينا .. و الباقى شايف اننا إرهاب الليله تشبه أى ليلة قدر .. شيماء بتظهر فجأه جوا الكادر .. وقفت حداد على نفسها و مقالتش أى كلام كان موتها واضح زى وش الشمس " كان فعل فاضح فـ الطريق العام " ! التهمه : حب البلد .. و الحكم كان إعدام .. و الثوره كان يا مكان و الديه كات تعويض ! حكم السما بيقول : ان الشهيد من دول .. لو يوم يموت مقتول نكتبله عمر جديد .. |
عن بنت عاشت طول حياتها لحد غيرها تدى بس .. عن بنت تانيه حابّه واحد عمره بيها فـ يوم ما حس... عن بنت تالته عايشه تعشق حد عاشق واحده غيرها .. عن بنت غيرهم فاكره واحد هو عمره ما كان فاكرها كل واحده و فيها جرح واجعها لكن بتداريه .. كل واحده راسمه صوره لشخص بتدور عليه شخص يستوعب وجعها لو تقول تلاقيه سامعها حد تبكى ما بين إديه حد يرمى حياته فيها و أما تحتاجه تلاقيه حد يعرف هى مالها بدون ما يسأل " ساكته ليه " ؟! حد يشاركها فـ طموحها .. ميلغيهاش أو يلغى دورها حد يسكن كل روحها ويداويها من كسورها حد يعرف يحتوى .. أو يكون طيب أوى .. يبقى وقت الخوف ساندها .. و إيد بتحضن برد إيدها حد مـ الأحزان ياخدها وهى تاخده من اللى فيه حد تتبناه و تبقى .. أمه لو يحتاج أمان .. حد يتبناها هوّ ويشاركها فـ الجنان يجروا تحت المطره جايز يهربوا فـ بعض بـ بساطه حد شايف فيها عمره _ مش علاقه يومين تلاته _ هى مش عايزه اللى ييجى يمشى بعدين من سكات .. كلهم رغم إختلافهم فـ الملامح و الصفات .. قلبهم فـ الأصل صافى .. نفسهم لو حضن دافى ده ساعتها هيبقى كافى وهو ده حلم البنات |
كانت مشكلتى الأولى .. ان انا مش بعرف أسامح .. وبحب امبارح جداا .. لمجرد انه إمبارح .. وبحب الوقت يفوتنى .. وانا ساند كل اللى فـ بالى .. على كتف إزاز شباك الباص .. إكلينيكيا أنا عايش .. مع ان انا مت خلاص ! |
سانده براسها عـ اللى ضاع من عمرها .. ولا عمرها مـ الماضى قامت .. الجو أهدى مـ الموسيقى التصويريه لـ فيلم صامت .. الفراشه .. الباليه .. ألف ليله وألف ليه ؟! .. مسرح بيشبه للسحاب .. كات ماشيه حافيه على الغيوم .. طلعت وربطت قلبها فـ إيد القمر .. بصت لفوق .. وعيونها بتعيط _ نجوم _ .. كانت ضلوعها مضلمه .. وانا كنت ناى مليان شجن .. ودعتها زى اللى بيودع وطن .. ومشيت وانا زى اللى تايهين فـ الزحام .. كات غربتى غربة _ يهود برلين _ .. وكنت أدبل من سنابل قمح يوسف فـ المنام .. زى اللى أول مره يتفارق.. زى اللى بيفارق براح لـ ضريح رخام |
رسمتك صوره مكسوره .. وروح عايشه بـ وش إزاز .. لقيتك غنوه غنيتك .. وصوتى صريخ وخوف ونشاز .. يا عايشه فـ كل شيئ فيا عشان انا أموت .. يا سايبه فـ قلبى ميت درويش يلفّوا عيونك الملكوت .. يا كلمه بقولها وانا ساكت .. بشيئ مـ الخوف .. يا حلوه فـ كل عين بتشوف .. جمال صورتك مهوش لايق .. عليا عشان أكون برواز ! |
انا وإنتى دايما فـ خلف الخلاف .. بنبعد فـ نتعب .. نقرب نخاف .. فلا منى جيتلك .. ولا منّى غبت .. ولا منى حاضنك ولا منى سبت .. لا حصلت يوسف ولا كُنتى مريم ولا كُنتى ورده فـ سنينى العجاف .. ويندهنى أول بعادى الحنين .. أجيلك تصدى .. أصدك تجيلى .. ندور دايره فيها الأنا والأنين أميل لو تملّى .. أملّك .. تميلى .. ولا عرفت أسيبك ولا عرفت أحبك ولا عرفنا حتى نحكّم قدرنا .. ولا حتى ذنبى ولا حتى ذنبك .. خبطنا فـ بعضينا فجأه إنكسرنا |
خدنى الكلام مع بنت نِفسى تحبنى .. و فـ فضفضت رغم الإكتئاب .. وسرحت فـ عنيها اللى كانوا بألف باب .. ريحة المكان قهوه .. طعم المكان كان حضن .. يا خوف عنيا من اللى جى يا ست حزن ! .. وقصرها عالى .. وانا عينى غاويه تبص برضه لـ فوق .. جتلك مكان مـ الحب كافر باللقا .. جيتلك فـ قهوه هناك فـ باب اللوق .. انا وانتى نفس البُرج ليه ؟! .. والفرق بينا بس يوم .. حتى السنه نفس السنه .. انتى مش شبهى وبس .. انتى انا ! .. ما تجربى تحبينى يمكن نتلضم ونلم كل اللى إتجرح فينا .. ونقول كلام أصلا أوانه مجاش .. ونحب بعيد عن البراويز ! .. مش شرط تبقى نهاية الحب العظيم البيت .. اللى هنبقى فيه سوا عواجيز .. حلو النهايه ومرها .. ان إحنا منشوفهاش ! |
الصبح بدرى المُرتبط .. بأغانى فيروز أو نجاة .. ضيقتك وتوهتك فـ اللى فات .. الفيس وناس معمولها مـ الضخك _ بان _ .. عمرو سليمان .. قلبت مين فـ الشاى شربت ؟! .. ومنين وفين وإزاى هربت .. انا كنت فاكر نفسى سبت .. وطلعت متساب من زمان ! |
حبسة عنيك الصُبح فـ الطله مـ الشباك .. ساعتك وولاعتك .. همُا اللى فضلو معاك .. وعنيك فـ عين دخان بيبصلك دايما .. الـ LM أتقل .. بكتير من الـ Rosmans وعشان جدا غيّرت .. والحاله لما تضيق يا بميل عليك يا صديق .. يا بجيب سجاير فرط .. ولعت كام مره وإنت بتشرب شاى .. القهوه برده ساعات .. تخلص فـ نص كلام قولته مع سيجاره .. كل اللى بينّا إنتهى مفضلش غير إسمها .. مفضلش غير ساره .. |
كتر التفكير خسّرني كتير والجرح كبير بس بداري.. أنا عايش محبوس من فترة في سيناريو ومشهد تكراري «إزيك؟! عامل إيه؟ قولّي..... بتصلي؟» «بقيت أيوه بصلي» «نفسياً؟!» «عادي انا كله تمام» أنا نفسي بجد ألاقي كلام.. ميكونش اتقال وجديد لسه أنا نفسي بجد فـ وقت ما انام ميكونش عشان عايز أنسى |
بحل مشاكلي بمشاكل وبهرب مـ الضغوط بضغوط.. وطول الوقت مش زعلان وطول الوقت مش مبسوط |
ارتاحوا يا خلق ده كله نصيب مكتوب مين فينا هيبقى لمين مكتوب مين باقي ومين هيسيب الرضا بيخلي الحُزن يهون.. ربنا لو عايز شيء هيكون... |
يا رب كل الزعلانين من غير سبب.. والمؤمنين إن الدُعا هيحل أزمة حزنهم يا رب كل العشمانين فيك بالقوي يا رب كل المذنبين وانا منّهم علمني احبك حب متحبش لحد... علمني لما أصلي أتكلم بجد.. أنا قصدي يعني أحس باللي اتقال واوهب لي صبر كتير وراحة بال دي الدنيا لو شدت إيديا هتوه وانت اللي قربك فيه صلاح الحال |
أجمل سكوت فـ الدنيا نظرة عين .. و الحُضن أهدى مكان تعيط فيه ! |
محدش فينا قلبه سليم !
ومش شايل كلام جواه ! و بيفكر فى جرح قديم ! ومش عارف ف يوم ينساه ! محدش فينا مش تعبان... ومش زعلان ومش مخنوق ! محدش فينا متمناش .. يعيش لو بس يوم ف هدوء ينام من غير ما يتقلب فى آخر الليل على سريره ويقدر لو مفارق حد يعيش الدنيا من غيره ! |
بلاش تستهلكوا الإحساس فـ ناس ملهومش فيكم حق نصيبكم جيّ مهما يغيب وبكره قلوبكوا تشبع دق |
حتى لو مش فـ النهارده .. بُكره حتى ولاّ بعده ربنا صادق فـ وعده انه راح يديك فترضى ! |
|
اقتباس:
|
|
| جميع الأوقات بتوقيت GMT +2. الساعة الآن 10:55 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.