|
اقتباس:
عموما انتى شوفى ايه الاحسنلك و ولو قدرتى تتاقلمى على الموضوع و تنظمى وقتك كان بها ماقدرتيش خلااااص متقاوحيش و روحى لمدرس تانى |
اقتباس:
يعنى انا فاكرة مثلا سؤال كان بيقول " فردان تناول كل منهما وجبة غنية بمادة غذائية معينة تختلف عن الاخري وبعد فترة تم اخذ عينة دم من كل منها فوجد ان بلازما احدهما رائقة والاخري عكرة . حدد نوع المادة الغذائية في كل منهما مع السبب " السؤال ده علميا اساسا غلط لان مفيش حاجة اسمها بلازما عكرة و بلازما نقية .. ثانيا البلازما حالتها ما بتتغيرش بنوع المواد اللى بتتاكل هى دى الاسئلة اللى بكلمك عليها .. يحاول يعمل سؤال فقاقة و ذكاء يقوم حاطط سؤال غلط اصلا بس عموما على راحتك لو حابة تجيبيه هاتيه و الكتاب التانى لا معروف جدا و اسمه كدة اه " الاول 2500 سؤال " كتاب كله اسئله على المنهج بس مفيهوش شرح و لا حاجة بيساعد شوية فى المراجعه .. فى اسئلة غلط بس تمام تعدى يعنى :) |
اقتباس:
اقتباس:
تمام ان شاء الله أجيبه |
دكتورة ازاى نقفل في كل المواد ومش ننقص نص درجة بالذات في الفيزيا والانجليزى ؟؟
|
اقتباس:
الثانوية العامة هى بنسبة 40% نصييييييب و بنسبة 50% توفيق ربنا ليكى و ال 10% الباقيين شغلك انتى و اجتهادك هتعرفي بجد ساعه ما تشوفى النتيجة بالذات ان فعلا دة شغلك و ان ربنا اداكى على اد تعبك اللى تعبتيه الحاجة بس اللى بتعمل قلق هى ان الطالب يحس انه ذاكررررر اووووﻻ و اجتهد اوووى و مجابش درجات و يقولك بعد كدة اتظلمت اه فى عك ف التصحيح و انا نفسي عانيت منه ف سنة تانية لما عملت تظلم ف العربي .. لكن لازم تحطى ف دماغك ان الدرجة اللى جاتلك دى هى تقييم ربنا لمجهودك و تعبك .. المصحح ما هو الا اداة .. بمعنى انك لو اتظلمتى من مصحح اعرفي ان ربنا شاف مجهودك اد الدرجة اللى انتى اخدتيها دى و سخر المصحح بقى عشان يحقق دة الخلاصه ان كل واحد ف ثانوية بالذات بياخد على اد تعبه و اللى بيتعب اوووى باخلاص ربنا بيكرمه و بيعامله بفضله لا بعدله .. ثانيا بقى الثانويه العامة دى محتاجة انك تتعاملى معاها بسياسة النفس الطويل . زى سبق الجري بالظبط .. اللى نفسه اطول هو اللى بيحقق اعلى نسبة نجاح فيها .. و كل ما نفسك يكون اقصر كل ما نسبة نجاحك تقل اما بقى بالنسبة لسؤالك .. شوفى يا ستى .. النص درجة دة هو النقص الشاااائع ف الثانوية بالذات .. بمعنى ان انتى ممكن يكون اجابتك صح بس مش كاملة او مش نموذجية بمعنى اصح فيقوم المصحح ساعتها يعمل ايه .. يطير النص المتين .. و ياما ناس بتنقص بال3 و 4 درجات عبارة عن انصاص مش اكتر .. الانصاص دى بقى حلها الوحيد كتاب المدرسة .. و ان انتى تلتزمى بكل كلمة مكتوية فيه فى المذاكرة .. ماتعديش حاجة و و انتى بتراجعى برضه تلتزمى بكتاب المدرسة ف المراجعه .. عشان تضمنى ان انتى اسلوبك ف الكتابة ف الاجابة هو هو اسلوب كتاب المدرسة .. لان نموذج الاجابة بيتحط فيه قدام كل اجابة رقم صفحة كتاب المدرسة اللى الاجابة منقولة منه .. ف بالتالى عليكى بكتاب المدرسة اولا و اخيرا .. حتى لو حابة ان انتى تذاكري من مذكرة او كتاب خارجى عشان يكون منظم اكتر راجعى الاول كلام المذكرة بكلام كتاب المدرسة .. اى معلومة تلاقيها ناقصه زوديها ف المذكرة بحيث ان المذكرة دى تبقي عبارة عن كتاب المدرسة بالنص بش منظم اكتر ..كدة تخلصي من موضوع الانصاص .. مش ف الفيزيا بس دة ف كل المواد اما بالنسبة للانجليزى بقى بصي .. الانجليزى منه 22 درجه ع الاقل من ال 25 معتمدة على اللغه اللى عندك .. و دى عشان نظبطها محتاجة تحفظى كلمات كتييييير طوووول السنة و تحلى كتييييير اوووى .. الانجليزى دة كان المادة الوحيدة اللى بحل فيها من 4 كتب اثناء الشرح .. و حوالى 4 كتب كمان مراجعه .. يعنى 8 كتب على مدار السنة .. امشي على نظام محدد و هو انك تحفظى كل يوم 10 كلمات جداد على الاقل غير كلمات منهجك .. يعنى مثلا حفظتى النهاردة 10 كلمات بكرة احفظى 10 كمان و سمعى ال20 سوا .. بعده تسمعى ال 30 سوا و هكذا .. طب الكلمات دى تجيبهم منين .. شوفى يا ستى اقعدى كدة امسكى كل يونيت ف الاول خاااالص اقري ال 2passage ,, translation اللى فيهم واحدة واحدة كدة و طلعى كل الكلمات اللى انتى مش عارفاها او الجديدة عليكى يعنى و جمعيها كلها فى كراسة واحدة و اعملى كده ف كل يونيت من ال18 يونيت اللى عندك شوفى هتطلعى كام كلمة .. و لو عندك اكتر من اكتاب هتجمعى اد ايه لو افتكرت حاجة تانى هبقي اقولهالك .. معلش طولت عليكى بس بحاول اديكى خلاصه تجربتى ؛) ربنا معاكو :) |
طب في ناس مبتدية من بدرى وخلصوا كمان مواد
هل ممكن اتساوى بيهم وانا ادوبك لسة بقول ياهادى انا يعنى نفسى ادخل طب يارب كل الطلبة يدخلوا اللى في نفسهم ،،،،،، ثانيا انا بصراحة اول مرة اقعد بالساعات ع الكتاب ومش منظمة في مزكرتى خالص ومش بذاكر اول باول خايفة يحصل دا السنة دى خصوصا حتى لو المدرسين اللى باخد عندهم ممتازين المجهود الاكبر عليا بس انا شوفت مواضيع كتير هنا ساعدت في التنظيم انا بحب النظام وبعمل جداول لو اتبعتها في السنين اللى فاتت كنت جبت 100 % لكن بقا عند التطبيق مفيش وكل سنة بقول هعمل كذا وكذا هل ممكن السنة دى يحصل معايا كدا واضيع انا مش عايزة اجيب مجموع في التسعنيات يعنى اجيت 96% وفى الاخر مدخلش حاجة زى واحد اعرفها انا الحمد لله في السنين الشهادة كلها متفوقة بس دى سنة العمر يعنى نفسى ادخل طب ،،،، انا كنت بعمل كدا في سنة تانية وصح كانت في اسئلة الطلبة مكنوش عرفينها بس الملازم بس عربى وكيمياء بس بعمل كدا بس انا هعمل كدا في كل المواد زى منصحتينى ،،، اخر حاجة بقا ايه 2passage ,, translation اللى في اليونتات دى |
أنا بقى هذاكر جامد و هضغط على نفسىى و هى سنه و خلاص، بس المشكله عندى إححساس دياماً إن بعد تعبى سنه كامله و أهلى صارفين عليا دروس فى الأخر هدخل الإمتحان مش هعرف أحل كلمه واحده، فا ممكن تقوليلنا الإمتحان بيجى إزاى ؟؟ يعنى المزاكر او أى حد تعب يعرف يخلصو علىطول ؟ حتى لو واحد مستواه عادى ؟ و لازم واحد متميز علشان إمتحانات الثانويه العامه كلها أسئلة ذكاء و كده ؟؟
|
اقتباس:
طيب سؤال سؤال بس :) شوفى يا ستى بالنسبة للناس اللى بدات بدري ف دول اساسا غلطو غلطة عمرهم الا ما رحم ربي .. الثانويه العامة هى اول سنة هتقابلوها ف سنين دراستكو بتدرسوا فيها لمده 9 شهور متواصله دون توقف .. قبل كدة كنتى بتدرسي 3 شهور و تمتحنى و ترمى اللى درستيه و ترتاحى اسبوعين و تدرسي تانى لمده 3 شهور حاجات جديدة .. السنة دى مش كده خااااالص السنة دى انتى هتدرسي مناهج طويله عريضه لمده زمنية طويييله .. فالمفروض ان انتى ما تطوليش المدة دى على نفسك .. بمعنى ان انتى لو هتبداى دروس من شهر 9 مثلا و هتبداى معاها المذاكرة يبقى كده هتقعدى تذاكري لمده 10 شهور متواصله .. لو بداتى من شهر 8 هتدرسي 11 شهر متواصلة .. يبقى انتى كده زودتى المدة على نفسك .. كده كده هيحصل زهق اثناء الدراسة و ملل و خنقة و زهق من المذاكرة و كل الكلام دة .. لكن احنا بنحاول ناخر مرحلة الزهق دى لاقصى حد ممكن بحيث ان قرب الامتحانات يضغطك ف مايديكيش فرصه تريحى .. انا دايما بشوف حاجة .. قضى شهر 9 و 10 بتحاولى تخرجى من جو الاجازة و تدخلى ف الدراسه و المذاكرة و تتعودى على الكلام دة .. شهر 11 و 12 و 1 هتكونى وصلتى لاقصى مرحله من النظام ف المذاكرة و دخلتى ف المود و دروسك استقرت و كله تمام .. شهر 2 و 3 هتبقى معظم المواد عندك خلصت و هتبداى مرحله جديدة اللى هى المراجعه .. بس طبعا هتبداى تحسي بالتعب و الخنقه اللى كلمتك عنهم .. شهر 4 و 5 هيبقى التعب و الزهق وصل عندك لاقصى مرحلة .. بس ضغط قرب الامتحانات عليكى مش هيخليكى تقدري تتوربي عن المذاكرة .. هتبداى تحسي ان العد التنازلى بدا و ان بتسابقي الزمن .. فدة مش هيسمحلك باى تقصير من اى نوع و هيخليكى مجبرة انك تشتغلى باعلى طاقتك من كتر الشده و الضغط اللى هتحسي بيه .. لكن لو اقترضنا انك بداتى بدري شهر مثلا و لا شهرين عن اللى انا كاتباه دة قدمى بقى كل اللى هيحصل دة .. و هتبداى تحسي بالزهق و الرخم دة بدري على شهر 2 مثلا .. هيبقى لسه قدامك وقت على الامتحانات فدة ممكن يخليكى تتخاذلي او تكسلي ف المذاكرة عشان لسه بدري و انا معايا وقت و الكلام دة .. و لو ريحتى اسبوعين تلاتة يبقى كده شكرااااا .. على ما تبداى تلمى نفسك تانى هتبقي مش عارفه تبداى منين و تروحى فين و دة وقع ناس كتيييير جدااا .. ف بكده الخلاصه البدء بدري مش شطارة و مش حاجة حلوة .. ولا اللى بيبدا الاول بيجيب درجاات اعلى الموضوع كله متوقف على الطالب نفسه .. يا يعرف يسند نفسه و يقف على رجله طووول السنة يا هياخدله كام شهر حماسة و بعدين يقع .. اما بقى بالنسبة لموضوع المذاكرة بالساعات .. ف انتى مش مطلوب منك دلوقتى اكتر من انك تذاكري اللى اخدتيه ف الدرس و تحلى عليه .. و دة ف كل مادة .. مش اكتر من كده ف المرحلة الحالية .. اللى بيميز طالب عن طالب بقى هو اسلوب المذاكرة نفسهل .. فى طالب بيذاكر صح و طالب بيذاكر غلط .. ما تموتيش نفسك مذاكرة دلوقتى او تنامى ع الكتاب .. لا الكلام ده له وقته .. اخرحى و اتفسحى و اتفرجى ع التلفزيون و خدى كفايتك ف النوم .. بس بالعقل .. ما تفتريش اووى ف اللعب على حق المذاكرة و لا تفتري اوووى ف المذاكرة على حق اللعب .. ادى لكل حاجه حقها .. بالنسبة لنقطة النظام و الجداول .. بصي انا عمرى ما كنت من اللى بيعملو جداول و يمشوا عليها و الكلام ده .. كنت زيك كده اعمل حتة جدول مايخرش المية .. و ساعه التنفيذ تلاقينى ماشيه بجدول تانى خاااالص .. ف انا مش هقدر افيدك ف الموضوع ده اووى يعنى .. بس انا كنت بعمل حاجة تانية .. بجيب ورقه و اكتب فيها انا مطلوب منى اعمل كذا و كذا و كذا و احط حاجات زياده حتى لو مش مستعجله عليها و اخلى الورقه دى قدامى ساعه ما لحى ابدا مذاكرة .. و اشوف انا دلوقتى اقدر اعمل ايه من اللى مكتوب قدامى دة .. و اعمله .. و لما اخلصه اشطب عليه و اشوف حاجه تانية .. كده يعنى .. دة كان بيساعدنى شويه و كان بيدينى دفعه امل لنا الاقي نفسى انجزت ف يوم كذا حاجة من اللى قدامى دة .. ممكن ده يفيدك .. لكن الضرووورى جدااا بالنسبة لك انك ماتبقيش مهمله ف مذاكرتك او تشتغلي على ماده اكتر من الدنيا لمجرد انك بتحبي الماده دى اكتر من دى او لان الماده دى تقيله على قلبك .. حاولى تعالجى موضوع عدم النظام دة بالتدريج بحيث انك ماتبقيش بتضغطى على نفسك اما اخر حاجة بقى .. بصي يا ستى .. لو جبتى كتاب من اللى انا قايله عليهم دول هتلاقيهم مقسمين تمارين اليونيت كدة .. تمارين على الكلمات عبارة عن اختار و فايند ذا ميستيك و ترانسليشن و تمارين على الجرامر نفس الاسئلة دى برضه .. و بعدين تمارين على اليونيت كله برضه نفس الاسئله دى .. و بعدين امتحان على اليونيت او امتحانين بنفس مواصفات الورقه الامتحانية .. الامتحان بقى من مواصفاته انه فى قطعتين بتقريهم و تحلى اسئله عليهم .. و طبعا دى قطع خارجيه مش من المنهج يعنى .. ف اكيد هتباقي فيها كلمات ماتعرفيهاش .. و كذلم ف الترانسليشن .. برضه اكيد هتلاقي كلملت جديدة .. هى دى بقى الكلمات اللى بقولك جمعيها و احفظيها اى اسئله تانى انا تحت امرك .. بالتوفيق و ربنا يحققاك اللى بتتمتيه و تدخلى طب ان شاء الله :) |
اقتباس:
حلو اوووى الحماس اللى بتتكلمى بيه ده .. و يا رب تفضلي محافظة عليه .. و على رايك هى سنة و خلاص .. احنا كنا سنتين ف الموضوع كان اصعب بالنسبة لنا شويه .. بس الوحش اوووووى بقى و اللى ممكن يضيع حماسك دة كله ف وقت اسرع ما انتى ممكن تتخيلي .. هو لمحة التشاؤم اللى ف كلامك دى و مش هحل و مش عارف ايه .. شيلي الكلام ده كله من دماغك خاااالص ف اسرع وقت .. ماتبدايش مذاكرة و انتى عندك الاحاسيس دى لانها كفيله انهل تدمر كل اللى هتحاولى تعمليه .. خلى دايما عندك امل و حلم اجري ورااااااه و ماتسيبيهوش و على قد ما هتتعبي على قد ما هيقرب منك ماتخفيش اقري كلامى مع ياسمينا هتلاقينى قلتلها الثانويه العامة دى 50% منها توفيق من ربنل و 40% نصيب و 10% شغلك انتى و اجتهادك ف المذاكرة .. صدقينى و الله هتلاقي تعبك ف الورقه و انتى بتجاوبي اخر السنة .. هتلاقي نفسك بتكتبي اجابة و تسيبي اجابه بتوفيق من ربنا انتى نفسك هتستغربيه و تقولى ايه ده انا ليه كتبت ده و سبت ده .. او ليه كتبت كل الاجابة الطويله دى .. دة بيبقى عشان ربنا عالم انك تعبانة ف المادة دى بجد ف بيديكى فيها اكتر ما انتى متوقعه .. و على العكس برضه لو ماتعبتيش ف ماده مش هتلاقى .. و حتى لو حليتى فيها كويس ف الامتحان .. انا قلت لياسمينا قبل كده .. الدرجه اللى هتجيلك اخر السنة هى دى مقدار تعبك بالظبط زى ما ربنا شافه و اطلع عليه .. لو اجتهدتى ف المادة دى 90% هتجيبي فيها 90% لو اجتهدتى 95% هتجيبي 95% فيها و هكذا .. و ربنا بقى اعدل من الكل .. بيسخر المصححين عشان يحققوا عدله ده .. ممكن مصحح يتعمى عن غلط قدامه عشان انتى ربنا شاهد و مطلع على تعبك ف الماده دى .. و ممكن مصحح تانى يشوف الصح غلط عشان نفس السبب .. المصححين ما هم الا اداه خلى ثقتك ف ربنا كبييييييرة اوووى و انتى مش عليكى اكتر من انك تتعبي و تتبهدلى و تبذلي قصاري جهدك و التوفيق من عنده هو بس .. و هتعرفي المعنى الحقيقي للتوفيق جوه اللجنة بجد .. اما بقى عن اسئلتك ف زى ما قلتلك اللى ذاكر باخلاص و ضمير مذاكره صح هيدخل يقفل الامتحان مع توفيق ربنا ليه طبعا .. و كل ما درجه اجتهادك ف المذاكرة يقل كل ما دة هتطلع نتيجته ف الامتحان .. امتحانات الثانويه العامة انتى مسيرك تشوفيها بعد ما تخلصي المناهج للطالب العاااااادى طبعا مش للطالب للفولاذى .. و ساعات بتبقي ف مستوى الطالب المعتوه .. ف ماتقلقيش من النقطة دى خااالص .. ولا للطالب المتميز ولا اى حاجة من الهبل ده .. اه بيبقى فيها مستويات طبعا ف الاسئله بس مش محتاج اكتر من واحد مذاكر و فاهم .. لان ساعات بيحيبو اسئلة يشوفوا بيها درجة الفهم عشان يميزو الفاهم من الحافظ ... فلازم تهتمى انك تفهمى و تستوعبي كويس اوووى من المدرس كل كلمة ف المتهج ربنا معاكو و يوفقكو ان شاء الله .. و اى اسئله انا ف الخدمة :) .. يا رب اكون بفيدكو بس :) |
معاكواا باذن الله
|
ف بكده الخلاصه البدء بدري مش شطارة و مش حاجة حلوة .. ولا اللى بيبدا الاول بيجيب درجاات اعلى الموضوع كله متوقف على الطالب نفسه .. يا يعرف يسند نفسه و يقف على رجله طووول السنة يا هياخدله كام شهر حماسة و بعدين يقع ..
طمنتينى كنت فاكرة نفسى هضيع ربنا يطمنك يارب ،،،،، عجبتنى هنا موضوع تنظيم تلت فترات فترة حفظ (زى العربى والانجليزى) اصل العربى والانجليزى بجزئهم على كذا يوم وفترة مذاكرة (دى بعد الدرس علطول) وفترة مراجعة ( دى تكون عدد ساعات متواصلة في اليوم اراجع فيهم تلت مواد) حلوة الحكاية دى ؟؟ ،،،،، هى دى بقى الكلمات اللى بقولك جمعيها و احفظيها اها ايوة فهمت كدا خلاص حلو اووى ،،،، والغياب كنتى بتعملى ايه ؟؟ فيدينى في الحتة دى محدش ادانى عقاد نافع كنت بتغيبى من اول السنة وكنتى بتعملى ايه ،،،،، نصايحك مفيدة جدا كل نقطة بتتكلمى فيها بحس انك علجتيها فعلا وعادى طولى براحتك بستفيد من كل كلمة ،، وخليكى معانا في الدراسة حتى لو يوم ،،،،، جزاكى الله خيرا في ميزان حسناتك ان شاء الله |
اقتباس:
ربنا يقويكو يا حبيبتى و يوفقكو ان شاء الله ;) |
اقتباس:
و على فكره أنا ولد مش بنت ^_^ أدعيلى أجيلك طب بقى |
انا معاكم انشاء الله ♂^_^
|
|
يا شباب بس انا عايزة الفت نظركو لحاجة لانى لاحظت ان فى ناس كتير بتعملها ..
انتو بتكتبو " انشاء الله " دة غلط .. المفروض تبقى " ان شاء الله " لان طريقه الكتابه هتخلى المعنى يختلف .. ف خدو بالكو من النقطة دى كويس |
اقتباس:
معلش كنت عايز سؤال أخير، أنا عايز ترشيحات لكتب خارجيه فيزيا و كيميا و أحياء بس إنجليش، علشان أنا لغات، و تقريباً معرفش أى كتاب خارجى بينزل الحاجات ديه |
|
اقتباس:
انت ممكن تنزل الفجالة و تسال و شوف ايه اسامى الكتب و انا اقلك ايه الافضل بينهم لان اكيد لو كتاب الامتحان مثلا بينزل لغات هيبقى افضل ف اكتر من مادة |
اقتباس:
|
ها يا جماعة أخباركوا إيه بدأتوا الدروس ولا لسا
انا بدات كل المواد اهو وجبت سنيور وسربرايز ف الانجليزى دول بس اللى نزلوا عندنا |
الامتحان عربى نزل والامتحان كيمياء واحياء نزل
the best < senior >المعاصر نزلوا وتوب ستيدنت هينزل يوم الخميس الجاى |
اقتباس:
بص انا برضه معنديش معلومات كتير عن الجيولوجيا غير انها كانت مادة صحابي ف ادبي بياخدوها ف تالتة .. موازية للفزيا كدة عندنا .. لانها كانت تعتبر اتقل ماده عندهم .. طبعا هتاخد فيها درس لانها بتضاف للمجموع عندكو .. و فيها رسم و فيها تفاصيل كتيييييير جدا محتاجة تركيز و فهم .. هتذذاكرها زى الاحياء بالظبط من مذكرات استاذك من كتاب خارجى من كتاب المدرسة اى حاااااجة .. المصدر اللى يريحك ف نظامه .. لكن لازم تقارنه الاول اول باول مع كتاب المدرسه .. عشان تتاكد انه فيه كل المعلومات اللى ف كتاب المدرسة و مش معدى حاجة كدة و لا كدة |
طيب ياجماعة انا عندى سؤال
انا بفكر فى موضوع انى احل اكتر من ملخص فى كل مادة علشان اتقوى اكتر فهل اشترى كل الملخصات لكل مادة ولااشترى افضل ملخص لكل مادة وفى الاخر اشترى كتاب مراجعه نهائية؟ |
اقتباس:
لو عايز تشترى اشترى بالكتير كتابين او تلاتة ف المادة الواحدة مش اكتر من كدة .. مش كل الكتب و لا حاجة .. بس لازم تحط حاجة ف دماغك انك ماينفعش تدى مادة وقت اكتر من مادة تانية .. بمعنى انك مثلا ماتقعدش 3 ايام تحل على درس فيزيا من 3 كتب مختلفة و تركن باقى المواد .. او تهتم بالكام مادة التقال و تركن الخفيف لمجرد انك بتحاول تخلص من كل الكتب .. الوقت مش دايما هيساعدك و هتحس نفسك مضغوط و بتسابق الزمن .. ف لازم تعمل حيسابب دة .. انا عن نفسي كنت جايبة ف كل مادة كتابين او تلاتة " ما عدا الانجلش كنت جايبة فيه 4 لانه محتاج حل كتير " .. الانجلش كنت بحل من كل الكتب ف نفس الوقت عشان المس كانت شغالة معايا منهم و بتصححهملى اول باول .. ف ما ادتنيش فرصه انى اركن حد منهم .. باقى المواد بقى كنت باعمل ايه .. بخلى فى كتاب دة ورا المدرس اول باول فيه .. حتى لو المدرسس مثلا ما ادنيش التمرين كله واجب كنت انا بحله كله .. و كتاب تانى احل فيه كل شهر مرة مثلا .. او لما يكون فى درس محتاج حل كتير " زى ارشميدس ف الفيزيا مثلا " اشتغل منه .. و الكتاب التالت استخدمته ف اخر السنة لما جيت اراجع من الاول فصل فصل .. كنت بحل على الفصل اللى براجعه منه على طول .. لالن كتب المراجعه النهائية ف تالتة كانت جايبة امتحانات بس .. و احنا عشان منهجنا كان كبير كنت محتا تراجع على كل الافكار اللى ف كل فصل .. و كمان ماتنساش دليل التقويم و كتاب المدرسة ربنا يقويكو :) |
lally adel شكرا جدا ليكي استفدت منك كتير كدا ومعلش كان عندي شوية اسئلة لو تقدري تساعديني فيها يعني ازاي كنتي بتذاكري قصة الايام بتاعة العربي وهل لازم في الاجابة تلتزمي بالنص زي ما في الكتاب بنفس صيغة ال مكتوب ولا ممكن تعبري باسلوبك عادي وعموما العربي كله كنتي بتذاكريه ازاي ؟ وقصة الانجليزي بردو كنتي بتزاكريها ازاي ؟ وكمان انا مبعرفش ازاكر غير بالكتابة فباخد وقت كتير في الحفظ والحل لو عندك طريقة تانية ممكن تنصحيني وشكرا جدااا |
انا موافق جدا :d :d
|
اقتباس:
اولا العفو طبعا .. ما تشكرنيش دة واجبى و انا اختكو الكبيرة و لازم اساعدكو :) ثانيا شوفى بقى يا ستى .. قصة الايام دى على اد ما هى سهللله اووووى فى احداثها على اد ما هى مملة جدااا فى تفاصيلها و طولها .. انتى عارفة انها 33 فصل .. بس انا مش عايزاكو تتخضو من الرقم ده .. لان فى فصول هتلاقوها نص صفحة و فصول صفحة واحدة بس او صفحتين .. و فى برضه فصول تانية بال10 و ال12 صفحة ..هى الازمة فيها بس انها هايفة اووووى فى احداثها و مملة ف دراستها و اسلوب طه حسين رخم شويه ف الكتابة .. انا كنت بذاكرها ازاى .. انا المستر كان بيدينى مثلا 5 فصول مع بعض ف الحصة بحيث انهم يبقو ماسكين احداث واحدة عشان اقدر اربط الدنيا ببعضها .. لان زى ما قولتلك فى فصول صغيرة اووى .. كنت بمسك فصل فصل ف المذاكرة اقراه من الكتاب نفسه .. مش تلخيص يعنى و لا حاجة .. و امسك فقرة فقرة كدة اشوف ينفع احط عليها سؤال ايه.. بمعنى انى كنت بسال نفسي لو حب يسالنى ف الحتة دى يصيغ السؤال ازاى .. ساعات كان فى اسئلة بتطلع هبله بس مش مشكلة .. انتى شغلتك مش صياغه اسئلة على ادما هى انك تعرفى تجاوبي ازاى .. و اكتب السؤال دة ف النوتة اللى بذاكر فيها و اقرا الفرة دى و احاول اكتبها لوحدى او انشالله حتى انقلها من الكتاب مش مشكلة .. المهم انى اكتبها بايدي .. و على كدة بقى لحد ما اخلص الفصل كله و بعدين احفظ المعانى بتاعته و الجمعو المفرد و المضاد و الكلام دة و اسمعهملنفسي بالكتابة برضه .. و بعدين احل الاسئلة اللى على الفصل و بكدة ابقى خلصته .. جيت بقى ف اخر السنة كنت نسيت طبعا الجزء الاول من القصه و الجزء التانى فاكراه بالشبه و التالت مكنتش ظابطة نفسي فيه اوووى لانى كنت مضغوطة ساعه ماخدته مع المدرس ف كروته ف المذاكرة ..و بقت القصة هى اكبر ازمة عندى ف العربي ..و لانى اتقرصت ف سنة تانية من العربي لانهم نقصونى فيه درجتين و نص و لما عملت تظلم اخدت منهم درجة و نص بس اللى لاحظته بقى لما شفت الورقة انه منقصنى على ايه .. اول حاجة المعانى دى كان منقصنى عليها لانى مكنتش كاتباه زى نموذج الاجابة كنت كاتباها بنفس المعنى بالرغم من انه كاتب ف النموذجتقبل من الطالب اى اجابة اخرى تؤدى المعنى المطلوب .. و كمان نقصنى ف سؤال ف القراءة علشان اجابتى كانت هى هى اجابة النموذج بس باسلوبى .. و دة اللى قاله لبابا المستشار اللى اعاد تصحيح الورقه " بنتك كاتبة الاجابة باسلوبها .. بابا ساله قاله هى كاتبه اجابة غلط ؟؟ .. قاله لا صح .. بس مش مطابقه للنموذج " .. حاولت بقى ف تالتة ف العربي بالذات انى اتلاشي النقطة دى و ابذل كل جهدى ف انى احفظ كتاب المدرسة زى ما هو .. بحيث انى ببقى بكتب كدة لا ارادى بنفس طريقة كتاب المدرسة .. كنت بعمل ايه بقى ف القصة و القراءة و الادب .. اعمل حوار السؤال و الجواب دة بس مابعديش سطر ف القصه الا لما اعمل عليه اى سؤال و امسك سؤال سؤال احفظه .. زى شغل الكتاتيب كدة و بعدين اقعد احل ع الدرس دة من كتاب الامتحان لانه كان بيبقى جايب اسئلة كتييير اووى .. و ف النصوص كنت لو النص حفظ اراجع على حفظه و بعدين اراجع على المعانى كلها تانى و بعدين امسك التعليق بتاع كتاب المدرسة اللى ورا كل نص و اعمله على هيئة سؤال و جواب و احفظهم برضه .. طبعا على ما خلصت المنهج كانت طلعت رووووحى و كنت نسيت اللى حفظته ف الاول .. بس كنت بمجرد ما اقرا السؤال باجابته تانى الاقينى افتكرت الاجابه لوحدى كلها و دة فادنى جدااااا ف انه ادانى راحة نفسية و طمنى الى حد ما .. عيوب الموضوع ده بقى انه كان بيستهلك كمية وقت فظيييييييييييعه و مجهود بشع .. انا كنت ساعات على ما اخلص فصل القصه ولا درس القراءة صوتى يبقى رايح لانى بحفظ بصوت عالى .. و كنت بعمل كدة من اول شهر 5 لانه كنت ببقى فيه مركزة ع العربي اكتر من باقى المواد .. و من نص خمسة كدة مكنتش ببقى ماسكة حاجة غير العربي قصة الانجليزى كنت بعمل فيها نفس اللى بعمله ف قصة العربي بالظبط .. و نصيحتى ليك اهتم جدااا بنص القصة الاصلي بتاع كتاب المدرسة .. سيبك من الملخصات و الاسئلة و الاجوبة اللى بتبقى عاملاها الكتب الخارجية .. النص الاصلى مهم جدااااا عشا سؤال ال quotation و find the mistake و كمان عشان الاسئلة الاربعه العادية لو حب يتخابث فيهم او يرخم يعنى طريقة الكتابة ف المذاكرة هى احسن طريقه طبعاااااا .. لو عقلك نسي ايدك مش هتنسي الاجابة و كمان بتستخدمى اكتر من حاسة عينك و ايدك و ودانك .. فدة بيساعدك اكتر ف تثبيت المعلومة .. اما بالنسبة لنقطة الوقت ف بصى .. انا عندى مبدا .. انى اقعد اذاكر درس واحد 5 ساعات بس اقوم حافظة الدرس دة و هاضماه و فاهماه كويس اووووى .. احسن ميييييت مرة من انى اقعد ف نفس ال5 ساعات دول اذاكر 5 دروس و اقوم عايزة ااكد على دة و دة ناسياه و دة مش فاهماه و دة عايزة اعيد عليه .. لا ذاكرى باتقان بالطريقة اللى تريحك و اللى انتى متعودة عليها و ماتبصيش للوقت .. المهم بس ان ال 5 ساعات اللى انتى مقضياهم ف درس واحد دول يبقو مذاكرة ما يبقوش ساعه مذاكرة و اربعه سرحان او راحه او برد ع التليفون او باكل او اى حاجة .. لان كدة هنبقى معملناش حاجة يا رب اكون جاوبت على كل اسئلتك و افدتك :) لو احتاجتى حاجة تانى اساليني انا تحت امرك :rolleyes: |
اقتباس:
بس بخصوص النقطة بتاعت ان احنا لازم نذاكر درس فى 5 ساعهات ونفهمه احسن من اننا نذاكر 5 دروس فى نفس الوقت بس المشكلة هنا هى ضيق الوقت . يعنى انا لو قعدت فترة علشان اذاكر درس فده حيخلينى اسيب مواد تانية وومكن المستر يكون مدينى مثلا درسين فأخد فترة علشان افهم الدرس الاول والوقت يروح منى وكده معرفش اذاكرله الدرس التانى فيزعل منى فنعمل ايه فى مشكلة الوقت؟ |
ممممممممممممممم متوجعوش دماغكو بقصة الايام اوى حاولو تتخيلو الاحداث ماشية ازاى ومش لازم تقولو بالنص لو هتجيبو كلام من عندكو بس ييبقا تبع الاحداث بالظبط مفيش مشكلة هى اسئلتها بتجي سهلة عموما يعنى متضيعوش وقتكو فيها انا زاكرت اول جزئين وكنت داخلة الامتحان واقع منى حاجات كتير بردو فكنت برغي بقا ف الامتحان ^^ بس طبعا الاجابة صح
العربي كده كده هيتلم ان شاء الله متزاكرهوش من اول السنة اد كده اعملو الواجب وخلاص لأنو كده كده بيتنسا اصلا مهما تزاكرو فيه انتو افهمو النحو كويس وتابعو القصة فقط اما القراءة بقا والنصوص دول بيتلمو فى ااااااااااااخر السنة فى شهر 4 او 5 كده وعليكو خييييييييييييير وربنا يوفقكووووووووووووووووووووووووووووووووووووووووووووو وووووووووووووووووووووووووووووو ^_^ |
اقتباس:
اناااااااااااااا طول السنة مفتكرش انى كنت بجمع مادتين مزاكرة مزاكرة فى يوم واحد والله كنت بخلي لكل يوم مادة :blush: اه كنت ببذل فيها جهد بس خلاص هى المادة بقا بتتزاكر مزاكرة صححححح ولا كلمة بعد كده مش تجمعلى 4 او 5 مواد فى يوم وتبقا مفتخر بنفسك !!! :stickjo4: لازم الاتقان فى العمل والله انا اوقات كنت بضيع اياااااااااااام عشان افهم جزئية بسيطة من مادة معينة ويفضل بالى مشغول ومرتحش غير لما اعرفها :romarioxp6: لازم تهتم بالكيف وليس الكم وتتقن مزاكرتك :) :028ja7: |
والله الوقت كتيييييييييييييييييييييير وطوييييييييييييييييييييييييييل وهتملو اوووووووووووووى متشيلوش هم الوقت خااااااااااااااااااااااااااااااااالص
انا بادئة دروس فى شهر 9 ومزاكرة تقريبا من 3 او 4 كده وخلصت المناهج كلها وعاااااااااااااادى جداااااااا والله كنت مضياها طناش خالص فىى اول 3 شهور دول ^^ بس طبعا انتو هتزاكرو من اول السنة ولكن ياريت متضغطوش علا نفسكو دلوقتى عشان بجد والله السنة طويلة اوووى وهتممللو بسرعة :) ربنا يوفقكووووووو ^^ |
اقتباس:
ياجماعة اهم حاجة فى العربى من الاخر كده هو النحو لو مجاوبين النحو تمام يبقا باقي الورقة المصحح هيظبطهالك :blush: واساس اى اجابة فى العربى هو الكمممممم لازم ترغي كتير كتير وتبقا فاهم انتو بتقول ايه وخلاص بس القصة رزلة اوى وطويلة جدا يعنى لو اتبعوا طريقتك دى مش هيزاكرو غيرها يا بنتى !!!!:(:( مممممممممم اتفرجو علا مسلسل احمد زكي وانتو هتظبطوها فى دماغكو والله :p قصة ملهاش اى لازمة خالص دا حتى الاستاذ بتاعي كان بيقولى ان المدرسين كلهم اصلا قرفانين منها ولو حتى الطلب كاتب اجابة اى كلام بس ف اطار الحل بيعطلوه الدرجة كااااااااااااااملة بل فى مرة قالى انهم مابيبصوش عالاجابة اصلا فى بعض الاوقات !!! :blush: |
اقتباس:
اقتباس:
خلاص هحاول احفظ الاجابات بقدر الامكان زي الكتاب الظبط |
طيب سؤال للي في 3 السنة دي وبدأو جيولوجيا ممكن يعرفونا عنها اي حاجة ونظامها ايه عشان انا لحد دلوقتي لسه محزتش دروس فيها وشكلي مش هحجز الا في الدراسة |
اقتباس:
|
اقتباس:
وبيقولوا سهلة ربنا معانا |
اقتباس:
بس فترة الحفظ مش كل يوم 4 ايام بس هحفظ فيهم الانجليزى والعربى ومش وقت كبير والمراجعة في ايام مادتين بس مش تلاتة انا هعمل حاجة لسة هجربها لو فشلت هغير على حاجة تانى المادة هذكرها واحل عليها في يوم واراجع الجديد اللى خدته الاسبوع اللى فات في نفس اليوم والقديم من الاول جزء جزء في يوم تانى لسة تحت التنفيذ يعنى ايه رأيك ؟؟ |
|
اقتباس:
و لو جينا نحسبها .. لو ذاكرت الدرس ده ف ساعه واحده .. بس قمت لا حافظه كويس و فى نقط مش داخله دماغك اووى و محلتش عليه لسه .. هتحتاج تقعد ساعه فى يوم تانى على نفس الدرس .. و ساعه ف يوم تالت عشان الحل .. و ممكن بعد يومين تلاقي نفسم نسيته ف تعيد عليه تانى ف كمان ساعه .. لو حسبتهم هتلاقى نفسك استهلكت برضه ال5 ساعات دول ف نفس الدرس ده .. اما بقى عشان فكرة الوقت ف دى انت اللى تقدر تحددها .. اللى انا اقصده انك ما تكروتش درس عشان وراك كذا درس تانيين او عشان مايستهلكش منك وقت كتيير .. لا انا عندى انه يستهلك وقت و يثبت ف دماغى احسن من انى ما اخدش وقت ف مذاكرته بس يبقى كانى ماذاكرتوش ربنا معاكو :) |
اقتباس:
|
اقتباس:
غير كده انا قلتلهم انى عملت كده ف شهر 4 و 5 اللى هم اصلا بيبقى التركيز فيهم ع العربي اكتر من باقى الفروع .. بس انا مش معاكى ف موضوع النحو دة .. هو اه طبعاااا مهم جداااا .. لكن انا ف تانية كنت مقفله النحو و مع ذلك زى ما قلت نقصنى على معانى و اجابات قراءة و حاجات هبله كده مكنتش غلط اصلا .. بدليل انهم رجعولى درجاتها تانى .. انا ماقدرش اعتمد على المصخخ انه يتكارم معايا و يبقى راجل ابن حلال و لا يرخم عليا .. انا بحاول اخلى ورقتى الاجابات اللى فيها مطابقة لكتاب المدرسة لان نموذج الاجابة بيبقى مكتوب فيها رقم صفحة كتاب المدرسة جنب كل اجابه لكن طبعا انا موافقاكى جداااااا ف باقى كلامك عن القصة :) .. قصة عايزة الحرق اساسا :) |
اقتباس:
انتى بقى اعملى زى ما الرسول صلي الله عليه و سلم قال " اعقلها و توكل " .. و زى ما ربنا قال " فاذا عزمت فتوكل على الله ان الله يحب المتوكلين " ربنا معااااكو :) |
اقتباس:
مهما كانت سهله ماتستهونيش بيها .. مش هتبقى اسهل من الاقتصاد و الاحصا انتى هتدرسيهم بس مش هيضافو للمجموع بس هتشوفى هم اد ايه سهلين و مع ذلك كنا بناخد فيهم دروس |
اقتباس:
انا شايفه ان ف الاول تدى الاولوليه للمذاكرة و الحل .. كل ما تاخدى حاجة ف الدرس جديدة تذاكريها على طول اول باول و تحلى عليها .. ما تاخريش المذاكرة خاااااالص عشان تراجعى مثلا .. لا المراجعه ليها وقتها .. هتقعدى شهرين او 3 شهور مابتعمليش حاجة غير المراجعه بس .. بس لو قدرتى تعملى دة تمااااام جدااا ربنا يقويكى بس المهم انك تواظبي ما يبقاش يومين و خلاص اما بالنسبة لانك حاسة انك تايهة و متلغبطة ف دة طبيييييعى جداااا ف الفترة دى ماتقلقيش .. لسه معاكى وقت عشان تظبطى حالك فيهم و تتعودى على المذاكرة و الدروس و الحل و كل حاجة مع بعضها .. ربنا معاكو :) |
شكرا جدا يا دكتورة على المعلومات أقيمة وكنت عاوز اعرف ايه احسن وقت للمذاكرة اصحى الصبخ بدرى مثلا ولا اسهر ازاكر بليل لانى محتار فى الموضوع ده وبالنسبة للدروس فكل المدرسين عندنا بيشتغلو 3 ايام فى الاسبوع يعنى مش هينفع اذاكر مادة فى اليوم فأيه انسب مواد ممكن اذاكرها فى اليوم وشكرا لحضرتك
|
يا جماعة هو ممكن نقسم المواد على سنتين
ياريت حد يفهمنى |
اقتباس:
احسن وقت للمذاكرة من بعد صلاة الفجر .. انا كنت بصحى اصلى الفجر و اشرب القهوة و اقعد لحد الساعه 12 او 1 الضهر غلى حسب يعنى .. و انام ساعتين كدة لحد العصر و اصحى اكمل للساعه 11 او 12 و هكذا .. و فى ايام مكنتش بنام فيها الضهر بس كنت بخلى المذاكرة اللى هى بدايه من الساعه 6 المغرب كدة حاجات حل و حاجات بسييييطة لان طبعا بيكون تركيزى بدا يقل .. دة فعلا احسن وقت تزاكر فيه هتلاقى اليوم معاك طوووووويل .. و عندك وقت قبل الدرس و وقت بعد الدرس ف دة هيخليك تقدر تركز ف مذاكرتك اكتر .. انا جربت كل حاجة جربت السهر لحد الفجر و جربت التطبيق لحد الساعه 9 و 10 الصبح و جربت كل حااااااجة .. بس فعلا الفترة اللى كنت بصحى فيها من الفجر دى هى اكتر فترة استفدت فيها اما بالنسبة لحوار مادة ف اليوم ف د انا اصلااا مكنتش ماشية بيه .. دكتورة never come back هى اللى كانت ماشية بيه .. انا كنت لو مثلا عندى النهاردة درس عربي اقعد الفترة اللى قبل الدرس كلها بزاكر عربي بس .. و بعدين اخد الدرس و تبقى كدة انطوت صفحة العربي ف اليوم دة .. اقعد بقى فى الوقت اللى بعد كدة امسك اى مادة تانية .. و ساعات مثلا ازاكر احياء و احل انجلش .. يعنى ماتبقاش مادة واحدة بس ..حسب بقى اولويه ترتيب المواد عندى ربنا يقويكو ;) |
اقتباس:
بس حتى لو ينفع نصيحتى ليكى لو مش مضطرة لده ف بلااااش .. هى سنة واحدة و اخلصى ..بلاش تضيعي سنتين من عمرك ف سنة واحدة ربنا معاكى |
كلامك افادنى جدا والله وفى كتاب فى الاحياء حضرتك قولتى عليه الاول 2500 سؤال ده مراجعة ولا بيبقى موجود من دلوقتى ؟ وهو الافضل انى اجمع المواد كلها كل يوم ولا اخد تلات مواد مثلا فى اليوم وشكرا يا دكتورة
|
| جميع الأوقات بتوقيت GMT +2. الساعة الآن 03:26 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.