انا جايب 362 بالمستوى الرفيع بس المستوى مش انجلش وجايب فى الانجلش 42.5من 50 الحق تجاره انجلش والا لا ولو لحقت بنها لان بيقولوا ان هى بتاخد اقل حاجه ممكن احول فى تانيه اى جامعه اخرى بعد تقدير ان شاء الله والا لا ارجوكوا حد يجاوبنا احنا مرحله اولى ومرعوبين وعاوزين نعرف اكتر عشان احنا خلاص يعنى هنروح نقدم الاسبوع الجاى تقريبا وعاوز طلب اخر؟ ممكن ان كل ال عاوزين يستفسروا على تجاره انجلش بقا او فرنساوى او اى حد ممكن حد يقعد معانا فى الغرفه الصوتيه يفهمنا والا مينفعش وتبقى مواعيد محدده ينفع والا لا يا ريت الررررررررررررررررررررررررررررررررد

بعد اذنك يا فامبير انا هرد على السؤال ده
للاسف مش هينفع لانك لازم تكونى جايبة مجموع الانتظام علشان تقدرى تدخلى انجلش

الا لو التنسيق جاب تجارة انتظام على نفس المجموع

لو سمحتم ايه رأيكم فى تجارة خارجية

hi guyz.....
sup every1?
ana gayeb 365+4 A. level=369 ya3ni 90% belzabt we gayeb fel english 46.5 we ana adaby wel magmo3 el e3tebary 415.5
yenfa3 ad5ol tegara english 3in shams wala la2?
we 3ayez a3raf plzzzzz el magmo3 el e3tebary beta3 tegara english 3in shams wel qahera kan kam el sana eli fatet...
thnx alot............

لا طبعا .. لإن المجموع دا صعب جدا انه يجيب حتى تجارة انتظام القاهرة او عين شمس اصلا !

بالظبط كدا .. لإن تجارة انجليش لازم تكون تجارة انتظام

اه ممكن ليه لأ .. ماهي السنة اللي فاتت واخده 346

مش عارف صراحة .. هابقي اسألك واحد صاحبي واقولك

ياعم عادي .. كله زي بعضه وربنا .. ماهي نفس المناهج هيا هيا مش بتتغير يعني

متهيألي ممكن .. بس التحويل هايبقي عشان حكاية تقليل الاغتراب ..

وساعتها هاتبقي محول طالب انتساب كمان مش انتظام

ماعتقدش

الاولوية بتبقي للمدارس الفرنساوية طبعا .. لكن لو ثانوية عامة بياخدوا الناس اللي جايبه درجات كبيرة في الفرنساوي .. من 45 لـ 50

طريقة الحساب في المجموع الاعتباري بتبقي زي تجارة انجليش برده

مجموع الثانوي + مجموع الفرنساوي

hi guyz.....
sup every1?
ana gayeb 365+4 A. level=369 ya3ni 90% belzabt we gayeb fel english 46.5 we ana adaby wel magmo3 el e3tebary 415.5
yenfa3 ad5ol tegara english 3in shams wala la2?
we 3ayez a3raf plzzzzz el magmo3 el e3tebary beta3 tegara english 3in shams wel qahera kan kam el sana eli fatet...
thnx alot............

اه ان شاء الله ينفع .. ادعي كدا وقول ربنا يسترها

تجارة وادراة اعمال حلوان
ولا عين شمس
طالما هى هتبقى تجارة عربى لانى مش هينفع ادخل انجلش خالص مجموع الانجليزى 35
انى تجارة افضل حلوان ولا عين شمس

شكرا على ردودك ومجهودك الرائع vampire
ممكن تتكلم اكتر عن تجاره خارجيه وتجاره نظم ومعلومات
وهل تجاره القاهره وعين شمس فيها نفس اقسام تجاره حلوان ولا لأ
كلية تجاره وادارة اعمال يعنى ايه زى تجاره خارجيه يعنى قسم ادارة اعمال

vampire plz رد عليا قبل انتهاء تنسيق المرحله الاولى عشان لو هعمل تعديل
plzقول ايه هى مجال الشغل فى تجاره خارجيه ونظم ومعلومات وهل هى احسن ولا تجاره العاديه

[
we 3ayez a3raf plzzzzz el magmo3 el e3tebary beta3 tegara english 3in shams wel qahera kan kam el sana eli fatet...
thnx alot

السلام عليكم انتوا ايه رأيكم فى تجارة القاهرة ولا تجارة خارجية افيدونى بالله عليكواااا

والله العظيم يابنتي ما هاتفرق حاجة .. كدا كدا اصلا انتي هاتلاقي نفسك هاتخشي محاسبة انا عارف

بس يمكن حلوان فيها ميزة وهوا انك بتتخصصي في سنة تالته .. يعني بدري عن عين شمس وحلوان

هيا دي الميزة الوحيدة .. لكن غير كدا الجامعتين زي بعض

حلوان بتفرق عن عين شمس والقاهرة في انها فيها تخصصات اكتر .. ومتاحة لجميع الطلبة بدون تقدير

لكن القاهرة فيها تخصص اكتواري .. والتخصص فيه بيبقي من سنة تانية .. وليه امتحان كمان عشان تخشيه

غير كدا الجامعتين زي بعض .. حتى المناهج نفسها زي بعض .. بس التقديم والتأخير هوا اللي بيفرق

يعني مثلا في القاهرة انتي بتدرسي محاسبة شركات في الترم التاني سنة اولي ..

في حلوان بقي بتدرسي محاسبة الشركات في سنة تانية الترم الاول ..

بس لو بصيتي في المحصلة النهائية بعد الاربع سنين

هاتتلاقي ان هيا هيا في كل الجامعات على مستوي مصر

فعادي مش هاتفرق كتير .. كله زي بعضه

والله يا جماعة اتكلمت عليهم قبل كدا كذا مرة ..

تجارة خارجية دا عبارة عن قسم في تجارة حلوان .. والتخصص فيه بيبقي من سنة تالته

لكن نظم معلومات دي شعبة .. زيها زي تجارة انجليش كدا ..

و التخصص فيها بيبقي من سنة اولي على طول

والله والله والله ماهاتفرق كتير .. كله زي بعضه

لإنك هاتيجي اما تتخصص هاتتلاقي ناس كتيرة اوي بتخش قسم محاسبة ..

وانتا نفسك هاتخش محاسبة وابقي افتكر كلامي دا .. عشان المحاسبة هيا اللي شغلها كتير اوي ومطلوب

وبما ان تجارة القاهرة فيها محاسبة .. وحلوان فيها محاسبة ..يبقي مش فارقة

الفرق في ان التخصص في حلوان بيبقي بدري شوية .. في سنة تالته .. لكن القاهرة في سنة رابعة

دي الميزة الوحيدة اللي في حلوان .. فيما عدا ذلك كله زي بعضه

السلام عليكم لوسمحت كلمنى عن تجارة مميزة وايه شروطها وانا جايب 90.24 ممكن اخوشها ولا لا وكيفية التقدم فيها وهل ينفع اما اخش تجارة القاهرة ان شاء الله اقدم انجليزى وعربى فى نفس الوقت افيدونى جزاكم الله خيراا

لو سمحت ممكن تنصحنى ادخل اداب انجليزى ولا تجارة انجليزى وانهى كلية فرصها احسن فى الشغل ان شاء الله

vampire ميرسى على الرد الاول
وكنت عاوزه اعرف ايه احسن تجاره نظم ومغلومات احسن ولا تجاره خارجيه ولا تجاره العاديه

يا جماعة انا مجموعى يحصل تجارة انجلش وهدخلها مرتاح وكل الامور تمام بس الناس عمال تخوفنى منها ومن صعوبتها ولحد دلوقتى حتى بعد ما كتبت الرغبات الناس عمال تقولى اصرف نظر عنها بس انا حببها جدا ونفسى ادخلها وان شاء الله هذاكر مش انا لو ذكرت هبقى كويس ولا ايه
ياريت تقولولى هى صعبة ااووووووى للدرجة دى ولا لو ذكرت ربنا هيوفقنى

دي موجودة في تجارة القاهرة ..

جرى العرف في كلية التجارة ان فيه نظام ماشي اسمه نظام المجموعات ..

وهوا ان الكلية بتقسم نفسها لكذا مجموعة بناءا على الترتيب الأبجدي ..

سواءا في انجليش او عربي

بالنسبة لتجارة عربي فيها انتظام وانتساب ..

تجارة انتظام تتضمن 4 مجموعات (أ - ب - جـ - د)

تجارة انتساب تتضمن 3 مجموعات(هـ - و - ز)

اما تجارة انجليش فيها 6 مجموعات ( a-b-c-d-e-f)

المجموعة المميزة دي بقي تم انشاءها من قيمة سنتين كدا .. والسنة اللي فاتت اول مرة تتعمل لسنة اولي

ودي معمولة للناس اللي بتجيب مجاميع عالية في الثانوية العامة ..

والسنة اللي فاتت تقريبا خدت من حوالي 92 % .. على حسب الله اعلم (روح الشئون واسأل)

عشان الالتحاق فيها بيبقي اختياري مش اجباري .. يعني انتا بتقدم فيها

والدراسة فيها باللغة العربية عادي جدا .. ومصاريفها زي مصاريف انتظام بالظبط

وشرط الاستمرارية فيها انك تجيب جيد جدا كل سنة .. لو جيبت اقل من التقدير دا بتروح للمجموعات العادية

لا طبعا ماينفعش .. يا تدرس عربي يا تدرس انجليش ..

لكن انتا تقدر تحول من انجليش لعربي لو تحب يعني .. لكن العكس لأ

دا يتوقف على رؤيتك انتا لمستقبلك .. بمعني ان اختيارك لكليتك بيتحدد على ضوء حاجات معينة زي :

1- مدى قبولك وحبك للكلية اللي انتا هاتخشها

2- رؤيتك الشخصية في هل انتا هاتمشي في الكلية دي ولا لأ

3- فرصة الشغل بتاعتك هاتبقي في انهي مجال (التدريس ولا الترجمة ولا التجارة والبنوك)

بمعنى اخر ..

انتا دلوقتي عندك واسطة مثلا في بنك او شركة معينة .. يبقي خش تجارة احسنلك ..

لإنك ضامن انك تشتغل ..

حاجة تانية مثلا انتا عندك واسطة في مدرسة معينة او شايف انك بتعرف تشرح

وان التدريس معاك هايبقي كويس خش اداب ..

او ان انتا مثلا شايف نفسك في الترجمة هاتبقي جامد .. يبقي برده خش اداب ودعم دا بكورسات ترجمة

وهكذا .. انتا اللي تحدد مش انا .. ان كان على الشغل فالشغل موجود ودا اصلا رزق من عند ربنا

لكن انتا اللي تقول بنفسك ..

أكيد نظم معلومات .. لسببين رئيسيين :

1- ان القسم دا تقريباااا مش موجود الا في جامعة حلوان بس .. وبياخدوا اعداد قليلة (200 طالب بس)

2- ان الدراسة فيه بالانجليش .. يبقي انتي بتجمعي مابين تجارة انجليش ومابين نظم معلومات

3- انها شعبة زيها زي عربي وانجليش .. يعني التخصص فيه من سنة اولي على طول

قصدك ان تجارة حلوان فيها نفس تخصصات جامعة عين شمس وجامعة القاهرة مش العكس

تجارة القاهرة فيها 3 تخصصات .. ودول متاحين لكل الناس ..

محاسبة ، ادارة اعمال ، تأمين .. ودا التخصص فيه من سنة رابعة ..

غير بقي قسم تاني دا اسمه قسم اكتواري ودا التخصص فيه من سنة تانية

وليه طريقة مختلفة عشان تلتحقي بيه .. على خلاف الاقسام اللي قولهالك قبل كدا

بالنسبة بقي لتجارة عين شمس مافيهاش الا تخصصين .. محاسبة وادارة اعمال

لكن تجارة حلوان بقي فيها 5 اقسام ..

محاسبة ، ادارة اعمال ، احصاء بالاضافة لـ .. سياسة وتجارة خارجية .. والتخصص من سنة تالته

بالاضافة لشعبتين طبعا .. شعبة انجليش وشعبة نظم معلومات

السلام عليكم
انا جبت 93 وانشاء الله تجارة عربى اسكندرية
انا سمعت بقى ان فى حاجة اسمها مجموعات مميزة للى جايبين فوق التسعين
بتتكون من 50 طالب وبتبقى بنفس المصاريف فيا ريت اعرف عنها كتييير وازاى ادخلها
هل الكلام دة صح ولا لا
وكمان سمعت ان فية مكافائات مادية للى برضو جايبين مجموع عالى
صح الكلام دة ولا لا
ارجو الرد

ربنا يستر
 

شكرا يا فامبير باشا على ردك
وياريت متنساش ضرورى تسألى على تجارة انجليزى بنها قبلت من كام فى التنسيق الداخلى
علشان زى ماقولتك مجموعى الاعتبارى 194 يعنى صعب اتقبل فى القاهرة او عين شمس او حلوان
والامل الوحيد ليا انى ادخل انجلش هى بنها بس ..

وبعد اذنك سؤال كمان بخصوص تجارة شعبة نظم معلومات اللى فى حلوان
انا مش فاهم يعنى ايه شعبة زيها زى تجارة انجش كده
يعنى مثلا زى ما ادخل تجارة انجلش قسم محاسبة
ادخل تجارة نظم معلومات قسم محاسبة
ياترى انا كده فهمت صح ولا ايه؟؟؟
ولا نظم معلومات ده قسم .. يعنى هبقى تجارة حلوان قسم نظم معلومات
ياريت توضحلى اكتر ...
وياريت اعرف شروط القبول فيها واقدم فيها ازاى وهل هى ليها مصاريف تانية برده زى انجلش كده ولا لأ طالما هى من اول سنة زى ما انت قولت
ومتشكر ليك جدا جدا جدا ....

دي ياسيدي عبارة عن مجموعات بيتم اعدادها للناس المتفوقة

اللي هما جايبين مجاميع عالية في الثانوية العامة .. غالبا مابتقلش عن 90% يعني ..

دا طبعا بالنسبة لسنة اولي اللي لسه داخلين جديد .. لكن السنوات اللي بعد كدا بقي

اللي هما تانية وتالته .. ليك انك تخشها بس تكون جايب تقدير جيد جدا

وفي كلا الحالتين .. شرط الاستمرار فيها او حتى الالتحاق بيها انك تكون جايب جيد جدا

اه .. بتوع الثانوية العامة اللي جايبين فوق الـ 80% بياخدوا 86 جنيه على ما افتكر يعني

اما بالنسبة لباقي الناس اللي هما الفرق الاعلي (سنة تانية وتالته ورابعة) ..

اللي بيجيب جيد جدا أو امتياز بس هوا اللي بياخد المكافأة

جيد جدا بـ 86 جنيه تقريبا .. امتياز بـ 120

حاضر والله مش ناسي .. هاسألك

لأ كدا يبقي انا ماعرفتش اوصلك المعلومة صح

شعبة نظم معلومات دي زي تجارة انجليش في قواعد القبول فيها .. وبرده في لغة التدريس ..

بتبقي انجليش برده .. بس في نفس الوقت دول ليهم شعبة لوحدهم .. وتخصص واحد بس

يعني مالهومش اي تخصص تاني غير نظم معلومات بس ..

والتخصص من سنة اولي على طول .. يعني بتقعد 4 سنين تدرس في تخصص واحد

بالظبط كدا .. بس بتتخصص فيه من سنة اولي على طول

1- ماتكونش انتساب

2- تكون جايب على الاقل 80% من درجة الانجليش

3- بيتم القبول على اساس المجموع الاعتباري (مجموع الثانوية العامة بدون المستوى + مادة الانجليش)

بالنسبة للمصاريف انا صراحة ماعرفش .. لكن غالبا هاتبقي زيها زي مصاريف انجليش كدا .. والله اعلم

يا جماعة انا مجموعى يحصل تجارة انجلش وهدخلها مرتاح وكل الامور تمام بس الناس عمال تخوفنى منها ومن صعوبتها ولحد دلوقتى حتى بعد ما كتبت الرغبات الناس عمال تقولى اصرف نظر عنها بس انا حببها جدا ونفسى ادخلها وان شاء الله هذاكر مش انا لو ذكرت هبقى كويس ولا ايه
ياريت تقولولى هى صعبة ااووووووى للدرجة دى ولا لو ذكرت ربنا هيوفقنى

سيبك من كلام الناس يا انطون انا فى تجارة انجليزى والكلية مش صعبة خالص زيها زى غيرها محتاجة مذاكرة بسيطة لو ذكرت نص مذاكرة الثانوية العامة هتجيب تقدير

شكرا جداا لاهتمامك بس انا كنت عاوز اعرف هل هذة المجموعات فى جامعة القاهرة بس
ولا فى كمان فى اسكندرية عشان انا داخل اسكندرية انشاء الله

انا جايب ٧٧ونص هلحق تجاره عين شمس

معلش يا طوني .. انا امبارح والله رديت عليك بس جيت عشان انزل الرد مانزلش ..

سوري لو كنت اتأخرت عليك بقي

بص بقي خلينا نتكلم كلام واقعي وموزون بعيداً عن ان انا احببك في الكلية او اني اخليك تحبط منها

أي كلية خلقها ربنا على وجه الأرض .. طالما انتا حاببها وحاسس انك هاتدوس فيها ..

يبقي ماتخافش منها .. وماتخليش اي بني ادم يحبطك ويخليك ماتخشهاش

تجارة انجليش لا هاقولك انها سهلة ولا صعبة .. عايزالها مذاكرة ومتابعة للمحاضرات وهاتبقي كويس اوي وتمام

بس انتا يمكن عشان انجليش هايواجهك بعض المصاعب في الأول زي :

1- انك لسه جديد وجاي من ثانوية عامة .. ومش عارف اي حاجة في اي حاجة ..

ودا شئ طبيعي جدا وكلنا مرينا بيه .. اللي قبلك مروا بيه .. واللي بعدك برده هايمروا بيه

2- لغة الدراسة نفسها هاتخنقك شوية في الأول ..

لإن انتا لو كنت عربي هاتواجهك مشاكل في المواد النظري عشان فيها رغي

وهاتواجهك برده مشاكل في مواد الرياضة بالذات .. عشان انتاكنت درستها قبل كدا بالعربي

فهاتيجي تحاول تترجمها انجليش هاتتخنق ..

بس معا الوقت والحل الكتير هاتمشي معاك كويس ان شاء الله

3- مادة المحاسبة بالذات بيسموها (بعبع) تجارة .. لإنها عصب كلية التجارة ذات نفسها

ماعتقدش انك هاتواجهك مشاكل فيها من ناحية الانجليش .. لإنك مادرستهاش قبل كدا بالعربي

فاما تيجي تذاكرها هاتذاكرها بالانجليش وهاتفهمها برده بالانجليش

4- هاتواجهك مشكلة في الأول برده .. وهيا الـ mid term اللي غالبا هايبقي بعد الدراسة بحوالي شهر

هاتتلاقي نفسك بعد شهر مصدوم وفي وشك امتحانات على طول .. وساعتها اصلا هاتبقي مش عارف تذاكر

وهاتقول هاخلص امتي والدكتور الفلاني مش عارف ايه .. وهكذاااااا

برده خليك فاكر ان مش انتا لوحدك اللي مريت بكل الكلام دا .. ناس كتير اوي قبلك مروا بدا وعدوا منه

واظن هما مش احسن منك في حاجة .. انتا فيك ايدين وهما فيهم ايدين .. انتا فيك مخ وهما فيهم مخ

وبالتالي بدل ماتحبط من الناس اللي بتقولك الكلية صعبة .. خلي الاحباط دا يتحول لتحدي جواك

اتحداهم مابينك ومابين نفسك لمجرد بس انك تثبتلهم انك قادر تتعامل وتتأقلم معا الكلية

ماكدبش عليك .. انا ماعرفش هيا موجودة في اليكس او لأ ..

بس اللي اعرفه انها موجودة في القاهرة .. وعموما وانتا بتقدم ورقك اسأل شئون الطلبة

ممكن تلحقها انتساب .. ومرحلة تانية كمان

hii ana s2lt abl kda m3leshh..ana 3yza as2al heya tegara english 3yza droos wla a?/ana tl3a mn snwya 3ama w mesh ty2a 7aga emsha droos :S
thnx w m3lesh t3btek m3aya

انا جايبة 365 علمى رياضة
وجايبة47 فى الانجليزى
و5ز6 فى مستوى انجليزى
وثانوية تجريبى لغات
ممكن اقبل تجارة حلوان انجلش
ولا ادبس فى تجارة عربى واضيع

لا هما مش بيلتفتوا لحكاية التجريبي دي

اللي يهمهم المستوى والانجليش والمجموع

وعموما مجموعك يجيب ان شاء الله .. ادعي بس كدا وربنا هايوفقك

بس عموما حتى لو اتقبلتى في تجارة انجليش دا هايديكي اولوية على بتوع عربى

لإنك انتي تجريبي فهاتبقي مستريحة نوعا ما في مواد الرياضة والنظري

عشان انتي واخده عليهم بالانجليش .. فا دا هايديكي ميزة عن بتوع المدراس العربي

هى فيها دروس طبعا بس غالبا مش هتحتجيها غالبا بنعتمد على الملازم الى بتتباع فى المكتبات برة انا عن نفسى شايف ان الكلية مش محتاجة دروس كفاية قوى تحضرى السكاشن و تشترى الورق الى برة

ماتقدرش تقول هاتحتاج او مش هاتحتاج .. لإن دي بتبقي فروق فردية مابين الطلبة وبعضهم

فيه ناس تلاقيها ماشاء الله في الرياضة والمحاسبة .. وناس تانية تبقي لا تفقه شئ فيهم

مش عشان هما مش بيفهموا .. لأ عشان هما مش ماشيين فيها

لأي سبب بقي .. ممكن تكون انتا بتفهم من الدكتور واللي جنبيك مش بيعرف يستوعب منه

فاماتقدرش تقول مش محتاجة .. والسكاشن برده مش شرط انك تفهم منها

ممكن ربنا يرزقك بمعيد ماعندوش دم مابيعرفش يشرح ولا يفهم .. ويبقي ساعتها انتا فعلا محتاج

تاخد درس

0لو سمحت يا استاذ انا الوقتى عرفت انى جتلى تجارة القاهرة وانا جايب 90.24 وعايز اقدم فى المجموعة المميزة اعمل ايه با لضبط ممكن تقولى

وانتا بتروح تقدم .. تقول الراجل اللي قاعد على الشباك انا عايز اسحب استمارة تقديم للمجموعة المميزة

بس .. لو مجموعك جاب هايدخلوك فيها .. لو ماجابش هايقولك مجموعك لا يسمح

بس الحق سجل فيها بدري عشان دي بتبقي بالأسبقية .. وبتبقي اختياريه ..

يعني انتا مش مجبر تخشها

انا جبت 85.2 و40 فى الانجلش و عاوز اخش تجارة انجلش طمنى لو سمحت

على حسب انتا عايز تخش جامعة ايه

لو حلوان او قاهرة او عين شمس .. فرصتك ضعيفة جدا ..

لكن بنها او طنطا او اي اقاليم ماعدا بني سويف .. ان شاء الله تخشها مستريح

بجد ربنا يجزيك كل خيير

ممكن لو سمحت تقولى هى تجارة بنها انجليش الحد الادنى اللى لازم اجيبه فى الانجليزى يبقى كام؟؟؟؟؟؟؟؟؟؟؟؟؟؟؟

80% في الانجليش .. يعني اقل درجة 40 من 50