انا كنت عايز اسال فامبير سؤال انا كنت وما زلت ان شاءؤ الله هحول السنه اللى جاية القاهرة انجليزى بس انا قدمت انجليزى بنها ويعنى انشاء الله انا ضامن اخش 100% تجارة انجليزى بنها بس وانا بقدم الملف لقيت ورقه غريبة اللى هى لاقرار عدم تحويل من الكليه الى كلية مناظرة اخرى انجليزى يعنى انا لو دخلت انجليزى مش هينفع احول القاهرة السنه اللى جاية وهدنى فى بنها ال 4 سنين وانا مش عايز كده خالص بس نفسى ادخل تجارة انجليزى
السؤال هو
تجارة انجليزى بنها احسن ولا تجارة عربى القاهرة
الرجاء من اللى يرد يرد صح ويكون فاهم بليز

اولا

انا موجودة يا بندق

بس مش برد مكتفيه بالقراءة

ثانيا

انا معرفش انت قصدك ايه ف حكاية التحويل دى

بس اللى اعرفه عموما

ان مستقبل تجارة e احسن من عربى

واحسنلك تدخل e

ثالثا

من ناحية اللبس انا لبسى زى ما واندا قالت كدا

وانا شايفه انه مش لبس صايع يعنى

وبرده الاحترام بيبقى م التعامل مش باللبس

خلاص يا جماعة استهدوا بالله كدة ،، مش هنتخانق عشان اللبس :)
كل واحد وحسب مقدرته واستطاعته
وبخصوص حسب اللى فى السوق
فيه بنات ما بتصدق ان دا الموجود اصلا وبيتخذوا دا حجة !
بس فيه بنات بيحاولوا ينقوا ع اد ما يقدروا اكتر حاجة محتشمة يلاقوها وتليق ليهم
خلوا بالكم من تليق ليهم
كل واحدة بيليق لها حاجة غير اللى تليق للتانية ،، فيه الرفيعة والتخينة والقصيرة والطويلة
مش كلنا شبه بعض عشان كلنا نلبس لبعض ،
----------------------
موضوع جميل كنصايح
وفامباير بيوصل لكم نظرة الشباب للبنات بصفته شاب ومختلط طبعا بالشباب وعارف دا بيفكر ازاى ودا بيفكر فى ايه

وكفاية شد مع بعض :d
طالما كل واحد مقتنع بلبسه خلااص ،،
غير يعنى نشيل من دماغنا ان الجامعة مكان لعرض الازياء
عشان فيه ناس داخلة تلاقيها بتتفرج ع لبس دى ودى ودى وبس ،
الجامعة اولا واخيرا مكان لتلقى العلم ، والاستفادة ، والتخصص فى مجال معين
وياريت نفضل فاكرين دا كويس اوى :)
هتقولى لى امشى يا معقدة وكلام من دا
عاوزين يبقى لينا اصحاب بردو
ماشى اللى عاوز يخرج مع اصحابه وخلافه يبقى برة الجامعة بقى ،، مش نربط دا بالجامعة ، زى ما كان ليك اصحاب قبل كدة
هى بس يمكن الجامعة مكان مفتوح اكتر فبيتيح لك انك تتعرف ع ناس اكتر من المدرسة
--------------------------------
واحب افكركم بشوية حاجات من ديننا لازم نتذكرها دايما بما اننا مقبلين ع دراسة جديدة ،،

قال تعالى :{ يرفع الله الذين آمنوا منكم والذين أوتوا العلم درجات}

(المجادلة:11)

قال تعالى: {قل هل يستوي الذين يعلمون والذين لا يعلمون} [الزمر: 9]

قال رسول اللَّه -صلى الله عليه وسلم-(: (إن مثل العلماء في الأرض كمثل النجوم يهتدي بها في ظلمات البر والبحر، فإذا انطمست النجوم أوشك أن تضل الهداة) [أحمد].

وقد كانت أولى آيات القرآن الكريم دعوة للقراءة والمعرفة قال تعالى: (اقْرَأْ بِاسْمِ رَبِّكَ الَّذِي خَلَقَõ خَلَقَ الأِنْسَانَ مِنْ عَلَقٍ õاقْرَأْ وَرَبُّكَ الْأَكْرَمُ)



،،،،،،،،،،
تقبلوا مرورى ،، وفائق احترامى للجميع

ياااااا جماعة .. بكل بساطة وهدوء الموضوع مش مستاهل ..

الموضوع محسوم قضية وموضوعا وشكلا ومضمونا ..

القرآن قال .. (ولا يبدين زينتهن) .. النون اللي بالازرق دي نون النسوة ..

يعني الكلام موجه ليكوا .. لجنس النساء ...

معني انك تلبسي اي حاجة .. شوفي .. اي حاجة تلفت نظر الشاب او الراجل اللي يحللك ..

دي في حد ذاتها .. سيئة ليه .. وسيئة عليكي بالضعف .. لإنك انتي اللي سمحتي لنفسك بكدا ..

واحنا دلوقيت في زمن مايعلم بيه الا ربنا ..

زميلتي اللي في كلية تجارة العريقة .. واندا .. قالت كام تعليق كدا ..

مافيش طرف اول بيسئ لطرف تاني الا اذا كان الطرف التاني عمل حاجة استفزت الطرف الاول ..

مش كل الولاد قلالاة الادب وبيعاكسوا .. ومش كل البنات محترمين برده ..

مراعاة المظهر العام للبنت في ظل اللي احنا عايشين فيه دلوقتي .. شئ واجب النظر ليه ..

واظن ان وسيلتك الوحيدة في انك تمنعي اي حد ينطق بنص كلمة عليكي .. هوا انك تقطعي الحبل اللي يخليهم يرموا كلمة عليكي من الاول .. انا مش بعيب فيكي .. بس بوضح وجة النظر العامة اللي انا بتكلم عليها ..

>> الموضوع دا اختلف فيه ناس كتييييييييره جدا .. وانا شخصيا حصلت بسبب موضوع النقاب دا مشاكل كتيره بس طبعا مش هاينفع اعلنها على الملأ كدا ..

>> يانتي بتشوفي كل حاجة حلوة بالنسبة للبنات .. يانا اعمى !!

تعليقاً على سؤالك يا طمطومة ياللي شكلك دحيحة !! .. في سنة اولي انتظام المصاريف 145 .. وانتساب كانت 438 على مافتكر ..

سنة تانية لغاية ماتتخرجي بقي وعليكي خير كدا .. بتدفعي 120 انتظام .. و 415 انتساب

والله اعلم .. ممكن تكون غليت .. ماهو مش بعيد يغلوها هيا كمان !!

زميلتي العنيدة .. اللي حبيت انكشها واقول عليها عنيدة .. علا .. قالت تعليق من ضمن التعليقات اللي في النص

انا موافقك في الرأي جداااااا .. بس اظن انا قولت قبل كدا .. الشاب مننا مش هايستني اما يشوف واحده لابسه لبس استغفر الله العظيم .. ويقول اتعامل وبعد كدا احكم !! .. ماهو الاشكال تعبر عن مكنونات السرائر .. ولا ايه ؟!! ..

طبعا فيه حالات شاذة .. ومر عليا منها ناس برده .. بس كنت دايما بقول لنفسي طب طالما انتي محترمة كدا في تعاملك .. طب ماتحترمي منظرك قدام الناس بالمرة عشان الصورة تكمل .. تبقي من جوا ومن بره كويسه ..

المشرفة حابي قالت تعليق برده .. كلام موزون وميه ميه .. وبأيدك تماما في اللي اانتي قولتيه ..

لو كل واحد فينا حط في دماغه انه جاي يتعلم وبس .. اعتقد انه هايجيب تقديرات ماشاء الله يعني ..

صاحب ماشي .. اتعرف ماشي .. تعامل ماشي .. بس حط في اولويتك اني جاي اتعلم ..

انا مش معقد .. بس فعلا الجامعة زي ماقالت حابي مكان واسع .. لتلقي العلم .. عشان كدا بيبقي فيه فرصة لانك تتلاقي معا الناس وتصاحبهم وتتعرف عليهم ..

حبيت اشارككم التعليق .. وتقبلوا ارائي .. ولكن بدون زعل ..

انا مش عنصري .. لا بتحيز للولاد .. ولا بتحيز للبنات .. انا بحاول اوصل فكرة مش اكتر ..

بص يا بندق باشا ..

تجارة انجليش ماحدش يختلف عليها ..

مطلوبة في سوق العمل جدا .. ودا لإن الانجليش اللي انتوا بتدرسوا بيه دا .. هوا اللي بيخلوا كعبكوا اعلي من الناس اللي بتدرس في تجارة عربي ..

كونك انك تخش تجارة انجليش وتقول انا نفسي .. هوا مش بالنفس ..

لو انتا مالكش في الانجليش وميييييح فيه .. انصحك تخش عربي لإنك هاتتعب جامد ..

لكن لو انتا شغال فيه كويس .. هاتمشي فيه وهاتبقي بيس يعني ..

انا واحد من الناس اهو في تجارة عربي .. والحمدلله .. الحمدلله .. بيرفيكت في الانجليش .. وكنت جايب 48 في الانجليش في الثانوية العامة .. بس مادخلتش تجارة انجليش بسبب المجموع ..

تجارة انجليش .. مش هاقولك عليها بقي انها جامدة .. وابقي ناقص ارسملك جنينة و شوية فراشات واعيشك في دور فضل شاكر ويارا !! ..

زي ماقولتك . تجارة انجليش كعبها اعلي .. لسببين رئيسيين :

- عددكوا اقل من اعداد تجارة قسم عربي .. بالتالي المتخرجين منكوا بيبقالهم فرص عمل كويسه .. لو لاقيتوا يعني ..

- اللغة اللي بيتم بيها الدراسة مطلوبة جدا في سوق العمل .. خاصة في المجال الاستثماري ومجال البنوك وما الى ذلك ..

بس طبعا مش هاوصيك .. تجارة لوحدها سواء انجليش او عربي .. او انشالله حتى لاتيني !!

ماتنفعش لوحدها كدا .. يعني شهادتك اللي انتا بتاخدها دي في الاخر .. سوري .. تروح تلعب بيها كورة ..

عشان تلاقي شغل محترم وصح .. على الاقل يبقي معاك كام دبلومة .. على حسب تخصصك بقي .. غير دبلومة ال hr الاساسية .. غير شهادة ال icdl اللي هيا اساسية برده .. على كام كورس انجليش لو كنت واقع فيه .. طبعا هاتقولي كورس ازاي وانا طالع عيني اربع سنين في الانجليش .. هاقولك غيرك كتيييييير متخرجين ومابيعرفوش يكونوا جملة انجليش صح .. كل اللي هاتحتاجه انك تخش كورسات في الكونفرسيشن .. عشان تزود مهاراتك اللغوية في التحدث ..

نصيحة برده لوجه الله .. ماتضيعش اجازة الدراسة بتاعتك كدا هباءاً ..

روح اتدرب في اي حتة .. مكتب محاسبة .. شركة .. مصنع .. وات ايفر ..

المهم التدريب .. بحيث انك تكون عامل لنفسك بديل .. اول ماتتخرج تتلاقي مكان انتا معروف فيه .. وتروح تشتغل فيه .. على بال ماتجيلك فرصة احسن بمرتب احسن في مكان احسن ..

وربنا معاك .. :)

وطلب اخير بقى ياريت لما جدول اولى تجارة ينزل تبقى تجيبهولنا .. وياريت كمان اما تطلع نتيجة المعادلات فى تجارة تبقى تعرفنا بردو

وثانكس على الموضوع

شكرا علي مساعدتك و علي النصيحه يا مان و علي العموم انت راجل فير و نضيف .

هو في حد هنا دخل تجاره الزقازيق انا حابب اتعرف عليه.

حاضر عنيا .. بس انتي ماقولتيش نتيجة معادلات تجارة ايه بالظبط ؟ .. جامعة ايه يعني .. ابقي وضحي ..

ومشكور على مرورك ..

تجارة القاهرة طبعا

ااااه القاهرة ؟ ..

هوا الله اعلم .. النتيجة بتنزل على النت ولا كشوفات في الجامعة .. مش عارف ..

بس لو نزلت على النت ان شاء الله هاجيبها ..

اما لو كشوفات .. ماوعدكيش !!

ربا يبارك فيكم كلكم وخصوصا صاحب الموضوع

ربنا يخليكي يا بسملة ..

شوفتك كتير على فكرة في جرس الفسحة .. وماكنتش اتوقع خالص انك تيجي هنا !

ومشكور مرة تانية لمرورك ..

hiiiiiiiiiiiii

انا زهقت يوووووووووووة
كل شويه حد يقولى الجدول صح وشويه الجدول غلط
ايه الصح فهمونى هتجنن واضيع منكوا:p

الجداول لغاية دلوقتي غلط ..

عشان جدول سنة تانية (د ، جـ) .. غلط .. بالتالي لازم نشك في باقي الجداول ..

استني على اخر الاسبوع واحنا نعرف الخبر اليقين ..

بس شخصيا .. انا مش معترف بيه لغاية اللحظة دي ..

طيب الجدول بيكون ازاى غالبا ادينا مثال يافامبير

اديك مثال ازاي يعني يا احمد ؟!

جدول زي اي جدول عادي يعني

الكلية بتحط جدول لكل ترم .. بيتحطلك فيه توزيع المواد ..

بحيث ان كل مادة .. بتاخد فيها محاضرتين في الاسبوع ..

> المحاضرة الواحده بتبقي مدتها ساعة في رمضان .. اما غير رمضان بتبقي ساعة ونص ..

> لكل مادة دكتور بيدرس ..

> عدد المواد كل ترم 5 مواد ..

> لكل مجموعة من مجموعات تجارة .. جدول محدد ..

> عندك يومين اجازة اسبوعياً .. غير يوم الجمعة ..

يعني بمعني اصح عندك 4 ايام دراسة في الاسبوع ..

> المواعيد : الجامعة بتبقي شغاله في رمضان من 8 الصبح ل 4 العصر ..

اما غير رمضان .. فابتبقي شغاله من 8 الصبح .. ل 8 بالليل ..

محاضراتك بقي بتتحط في الرينج دا .. على حسب توزيع جدولك بقي ..

السلام عليكم ورحمة الله وبركاته

ازيكم ياجماعة
انتوا هتنزلوا فى رمضان ولا هتطنشوا بس صراحة انا نفسى انزل لانى حاسة انهم هيشرحوا من اول محاضرة
وسؤال تانى بس ده بعيد شوية ايه افضل المحاسبة ولا ادارة الاعمال
انا باحب الادارة ونفسى تكون تخصصى بس لاقيه هجوم فظيع حد يفيدنى

انا عن نفسى اشكرك على الكلام الجميل والمفيد بس انا كان سؤالى اللى مفيش حد فهمه ان انا بقول ان كليه تجارة بنها مش معترف بيها بين جامعات مصر (من الاخر مش لها لازمه )فانا مش عارف وبعدين بعيده عنى اوووى ولو دخلت لازم ادنى فيها الاربع سنين كلهم وانا مش هستحمل انا ليه القاهرة وعين شمس بس المجموع
المهم انا عارف ان تجارة انجليزى حلوووة بس سألت ناس وبيقولوا ان تجارة القاهرة احسن من تجارة انجليزى بنها انت عارف فى كام مادة فى السنه فى بنها وبلا فخر (9 مواد فى السنه )شوفت الهبل
انا بصراحة رايك حيرنى لانى عارف ان تجارة انجليزى حلووة مفيش اختلاف على كده بس انا بفضل تجارة القاهرة انجليزى وكنت عايز احول السنه اللى جاية بس مش بينفع فى اى شعبةتحول الى كليه تانيه انت على فكرة مش قريت الموضوع اللى فات كويس ركز ياعم فامبير الله يخلك انت وعلالالالا

انا هاولك حاجة حلوة كان اسم الموضوع اسال مجرب انا ليه اتنين واحد خلص تجارة وواحد فى رابعه والاتنين واخدين محاسبه ليه لانى على حسب كلامهم ان محاسبه هتشتغلى كل حاجة فى اى حاجة وبعدين طبعا انتى هتكونوا مخلصة ادارة اعمال وهتشتغلى على طول ده مستحيل انا ليه اخ شغال فى شركه غاز طبيعى وكان نفسه يشتغل فى الادارةبس دى عايزه وسطه جامده انا كنت ام اجى اقوله انا هدخل تجارة وادارة اعمال حلوان عشان انا بحب الادارة احسن من المحاسبه الغلسه على حسب كلامه يقول ليه هههههههه انت بتحلم بقول له ليه ياعم يقول كان غيرك اشطر المكان كان بيقى فاضى واقدم طلب علشان يشتغل فى محاسب فى الادارة كانوا يسيبوا المكان فاضى لحد ام يكونوا عنده واسطه جامده
يعنى مش لها لازمه الادارة بدون واسطه جامده اووووووى
يعنى المحاسبه برده علشان تشغل عايزه واسطه برده هههههه

انا عارف ان الدنيا كلها ماشيه بالوسطه
وبلاش تعقيد اكتر من كده وسبينى فى الهم بتاعى

وبعدين الادارة صعبة وعايزة تقدير جامد يعنى لو هتذكرى مذاكرة طب ادخلى ادارة اعمال واقدرى فيها مش تدبلرى سورى يعنى مهى دى الترو
سورى ان كنت غتت عليكى

بقولك يا بندق

انا اول مرة اسمع ان بنها مش معترف بيها

عموما هى معترف بيها دى جامعه حكومية

وقسم محاسبة هو احسن قسم ف تجارة

وليه شغل حلو اوى

وتعرف تشتغل ف اى بنك كدا

او حتى مكتب محاسبة

مع انها رخمه وبكرهها ومعرفش انا بنجح فيها ازاى اصلا

بس انا ناوية ان شاء الله انى ادخل قسم محاسبة عشان الشغل

وبالنسبة لبنها ادخلها وخلاص

ادام مجموعك جايبها

وابقى حاول تحول للقاهرة

اعتقد انه ينفع يعنى

وان منفعش انت مش خسران حاجة

تجارة e جامدة اوى برده واحسن من عربى

وكلها 4 سنين وتطلع منها ابقى استحمل المشوار بقى

عشان المستقبل

سؤال بس محيرنى

مش التنسيق خلاص ظهر

والمفروض ان جاتلك كليه خلاص؟؟؟؟؟؟؟؟

انت جالك ايه ف التنسيق؟؟؟؟؟؟؟

شكرا لصاحب الموضوع على النصايح الحلوة دى
وان كنت مش فى تجارة ولا احس بالحياة الجامعية
لظروف كليتى وعدد دفعتنا اللى هو 34 طالب و طالبة و اللى لما شوفتهم
لقيتهم الحمد لله ناس طبيعية
اما بالنسبة لbondok fady وان كان مش ليا حق ادخل
والاستاذ فامبير يفيدك اكتر
لكن بشوف ان موضوع قاهرة بنها او حتى حلايب و شلاتين مش بتفرق
ما دام عندك واسطة هتشتغل
و لو معاك كورسات و دورات يبقى هاتشتغل شغل احسن ( بس طبعا مع الواسطة برده )
دا طبعا باذن الله لو ربنا كاتبلك كده

موضوع جميل
صحيح انا مش تجارة لكن
دخلت كده حب استطلاع
على العموم ربنا يوفقكوا
ويهدينا جميعا للى فيه الخير

ادعوا يارب ادخل تجاره انجليزي لسه نتيجتي مظهرتش

ان شاء اللة تدخلى يا ymymym بس انتى جامعة اية على فكرة انا زميلك فى تجارة انجلش القاهرة

ايه ياعلالالالالالا امال انا بكلم فى ايه من الصبح

بصى ياستى انا جاتلى تجارة انتظام بنها وكنت مسافر السعودية ولما التحويل بتاع التغريب بدا انا مش كنت عارف انه بدا...... المهم رضيت بنصيبى وقلت اقضى سنه اولى تجارة انجليزى بنها وبعدين احول القاهرة او عين شمس او حتى حلوان اى حته المهم اقرب من بيتى ........المهم روحت اقدم انجليزى وانا بكتب وبملى الدوسيه لقيت ورقه اسمها (اقرار) !!!!! عدم تحويلى لمده ال4 سنين بتوع تجارة انجليزى الى اى كليه تانيه ودى كانت الطامه الكبرى!!!!...؟؟؟المهم قدمت ملف الشعبة وبعدين عرفت او بابا عرف ان انا قبلت فى تجارة انجليزى وانا كنت بدعى ان انا مش ادخلها لانى عايز احول القاهرة وبابا عامل يرزل عليه علشان ادخل وانا مش راضى لانى خايف لانى مرتحش للكليه دى ودنى اندم الاربع سنين وغير كده وكده انا عايز ابقه خريج القاهرة مش عارف ليه بس انا عايز كده علشان كده هقرر ان انا نش دافع المصاريف بتاعة الشعبة هتروح الكليه سحب الملف بتاعى من الشعبة وبكده اكون ارتحت شويه مع انى كنت بحلم ان ادخل الكيه دى بس مفيش حل غير كده !!!!

والله فهمت خلاص

بس نصيحه يعنى تدخل تجارة e

مستقبلها جامد اوى

ومش فارقة بقى جامعه ايه

لو مشيت فيها اول سنه كمل بنها عادى

ولو لا قدر الله ممشتش فيها ابقى حول اى جامعه تانية تجارة عربى

وهات الذنب على باباك وانت اللى صممت انى اخش e

بما انك ياعلا تقريبا فى تانية تجارةفياريت تفيدينى فى الموضوع دا

انا سمعت ان فى تجارة مجموعة للمتميزين للى جايبين مجاميع عالية عايزة اعرف اية نظام المجموعة دى

وانا صاحبتى جايبة 92,7 فهل هى هتبقى فى المجموعة دى ولا لاء ولو هتبقى فيها ياريت تقوليلى كل حاجة عنها

معلش ياجميل هتعبك معايا

ولا تعب ولا حاجة يا قمر

بس المجموعه دى بيخشها اللى جايبين مجاميع عاليه

وصاحبتك دى يا تلحقها يا متلحقهاش

بس هما بياخدوا منهج غير بتاعنا تقريبا

وحاجات اصعب وزياده عن بتاعتنا كمان

والدراسه فيها بالانجليزى

وهى مستقبلها احسن برده م العادية

انتى ادعيلها تلحقها بقى

وهما بياخدوا بالمجاميع العاليه ويبتدوا ينزلوا بيها

لحد ما يستكفوا بالعدد

يعنى تقريبا بياخدوا من كام وهى جايبة 92,7 يعنى تلحق ولا لاء

انا كنت هانزل ردي عليكي من ضمن ردود على ناس تانية ..

بس اتلاقيت سؤالك محتاجله رد لوحده ..

بصي .. انتي دفعتي .. يعني عارفه تاريخ الكلية زيك زيي ..

فا انا مش هاتفزلك ومش هاعمل فيها اني خبير تجاري في الشئون الجامعية !!

بالنسبة لإنك قولتي مممم .. ماعتقدش .. دائما المحاضرة الأولى بتبقي محاضرة تعريف عام بالمادة ..

بس انا كدا كدا نازل اول يوم برده زيك .. مش عشان محاضرات ..

بس تقدري تقولي جو الجامعة وحشني .. عايز اقعد معا صحابي زي قعدات زمان كدا !

اما عن سؤالك التاني بقي لكل قسم خصائصه .. والخصائص دي بترجع ليكي انتي .. لمقومات تفكيرك ..

قسم المحاسبة .. عايزة واحد/واحده يكون دماغه حلوة في الرياضة ..

مش مسطول .. مصحصح .. فاهم .. اخر حاجة يلجأ ليها الحفظ ..

واللي اهم من دا كله .. مايكونش احول في نقل الارقام واظن انتي تلاقيكي مجربة دا في امتحان من الامتحانات !! .. خاصة اني شوفت امتحان السنة اللي فاتت (الشركات) بتاعكوا في مجموعة هـ .. كان سهل .. بس طويل شويتين .. بس سمعت ان اللي كان حاطط الامتحان كان اول مرة يحط امتحان اصلا !!

اما قسم الادارة .. فدا عايزله واحد يكون دماغة استراتيجية .. بيفكر صح ..

او لو نفع نصيغها بالعربية الفصحي .. راجل .. (مفكار!) .. بمعني انه بيفكر كتير ..

يكون جامد في الحفظ .. واللي اهم من دا برده كله ..

يكون عنده طموح عالي .. لإن من المتعارف عليه ان اللي بيشتغل شغل اداري .. بيوصل ..

بالنسبة بقي لمستقبل القسمين دول ..

المحاسبة .. لو كانلك واسطة تقيله اوي .. تشتغلي في بنك او شركة بترول ..

لو على قد حالك وهتاتاخديها سلمة سلمة .. يبقي مكتب محاسبة ..

لو مافيش خااااااالص .. يبقي اعتقد انك هاتشتغلي في مجال غير دراستك اصلا !! ودا اللي غالبا بيحصل !

الادارة .. عايزالها واسطة تقيله برده .. دا في مجالين .. مجال البنوك .. والمؤسسات الاستثمارية ..

زي موبينيل .. فودافون .. اتصالات .. بن لادن .. طلعت مصطفي ..

يعني اسماء مشهور زي دي .. بتجازي موظفينها ماليا حلو اوي .. بس طبعا بعد مابيطلع عينه ..

بس عموما .. شغل المحاسبة .. بيعتمد على التدريب ..

يعني مثلا .. لو روحتي لمكتب محاسبة وانتي تقديرك على قده .. بيبصوا للتدريب .. لو اتدربتي ولاقوا شغلك كويس .. بياخدوكي ..

اما الادارة .. فا لو روحتي شمال او يمين .. هاتتلاقيهم بياخدوا التقديرات العالية ..

بمعني ان تقديرك لا يقل عن جيد جدا ..

من الاخر .. نقدر نصيغ مستقبل تجارة في معادلتين ظراف اوي ..

خريج محاسبة + (تقدير/تدريب) + كورسات انجليش مكثفة + دبلومة محاسبة اذا امكن = شغل كويس ..

خريج ادارة + (تقدير) + واسطة تقيله + دبلومة hr + حسن المظهر والتعامل = شغل تمام ..

جيتي انتي بقي بعد دا كله وقولتي وانا والله العظيم زيك بالظبط .. بس لغاية دلوقتي برده مش قادر احدد بالظبط ..

اللي هايحدد ان شاء الله فعلا .. السنة دي .. لو جيبت جيد جدا ان شاء الله السنه دي ..

اعتقد اني هابدأ افكر في قسم الادارة .. خاصة اني الحمدلله اتدربت الصيف دا ..

وكان تدريبي في قسم اداري .. مش محاسبي .. واتلاقيت ان شغلهم حلو وعجبني ..

ودا اللي خلاني اني ابدأ افكر في الادارة واميزها عن المحاسبة .. ;)

عموما اللي يجيبه ربنا خير ..

ما هو السنة الى فاتت خدوا من 92 او 93

مش فاكرة اوى

بس تنسيق السنة اللى فاتت غير تنسيق السنادى خالص يعنى

التنسيق نزل اوى

وهى ممكن تلحقها عشان كدا

وزى ما قلتلك على حسب المتقدمين

هيفضلوا ياخدوا بالمجاميع العاليه بعد كدا ينزلوا

وهى ممكن تلحقها ان شاء الله

عشان المجاميع اصلا قليلة

ميرسى ياعلا تعبتك معايا

بالنسبة ليك انتا بقي يا بندق .. هااااااااا

عشان كلامي موجهلك مش موجه لحد تاني ..

بالنسبة ليك .. احساسي بيقولي انك اتعقدت من الكلية من قبل ماتخشها !

هاقولك لأ .. استهدي بالله كدا وشغل الجمجمة ..

انتا لو استحملت اربع سنين اثناء مانتا بتدرس .. يعني بتاخد مصروفك .. مش شايل هم جواز ولا شغل ولا مصاريف ولا بيت ولا اي حاجة من دول .. احسن من اما تستحمل بعد ماتتخرج .. في انك تقعد تلف وتدور على شغل ..

واما ييجي يسألوك انتا بتشتغل ايه تقولهم من كتر مانا بدور على شغل مش فاضي اشتغل !!

المستقبل زي ماقولتلك قبل كدا مش وردي ..

يعني سواء اتخرجت من تجارة عربي او تجارة انجليش .. او تجارة ارميني !! ..

لازم برده هايطلع عينك في انك تلاقي شغل .. دا لو مكانلكش واسطة ..

لكن لو ليك .. يبقي تبوس ايدك وش وضهر وتحمد ربنا ...

عايزك تحط في دماغك ان من جامعة القاهرة بيتخرج بس 18 الف واحد سنويا من كلية تجارة عربي ..

و حوالي 1500 بس من تجارة انجليش ..

لو حسبت النسبة مابين تجارة عربي وتجارة انجليش .. هاتلاقي النسبة تقريبا 12 : 1

يعني كل واحد من خريج انجليش .. قصادة 12 واحد من خريج عربي ..

طب بالله عليك .. يفضلوا مين ؟ ..

انا مش هاجاوب .. هاسيبلك الاجابة ..

بس اللي اقدر اقولهولك .. انك ماتبقاش محبط ..

وماتسيبش حد يحبطك .. لإن الاحباط نفسه مقوم من مقومات الفشل ..

وعلى فكرة انتا اما تخش الجامعة هاتتلاقي من عينات المحبطين دي كتير اوي ..

دا حتى بقي فيه احباط من نوع تاني جديد ظهر ..

بس مش موضوعنا دلوقتي ..

انتا نصيبك كدا .. نصيبك انك في بنها ..

استحمل دلوقتي .. وانتا ان شاء الله بعد كدا ربنا يكرمك ..

ولا تعب ولا حاجة يا قمر

انا معاك برده ف رأيك ده يا فامباير

طب كويس ..

اهو ياعم بندق .. علا رأيها من رأيها ..

اخواتك على عنينا وعلى راسنا ..

بس فيه اختراع اسمه طموح ..

اوعي تيأس .. حتى لو الدنيا كلها في وشك .. خليك على طريقك .. طالما انتا بتطلب حاجة مشروعة ..

وبعدين انا وعلا في تانية ..

يعني عارفين الكلام اللي بنقولهولك كويس ..

ومش هاننصحك من فراغ ..

تجارة انجليش فعلا بياخدوا مناهج ازيد من تجارة عربي ..

وهاتلاحظ دا في مواد الـ F.A الترم التاني

و الـ Economy في بعض الابواب ..

و الـ Business و الـ Management

اتكل على الله وسيبك من الكلام المحبط دا ..

يا جماعه كنت عايزه اعرف ايه مجموعه المتميزين ديه وهل انا بقدم فيها ولا هما بياخدوالمجمايع العاليه من

الكشوفات وانا جايبه 90.7 % فهل كده هبقى فيها ولا ايه ؟

بصى هو المفروض دى بتقدملها

بس هى ممكن متجلكيش

السنة اللى فاتت خدت من 92 او 93 تقريبا
يعنى يا تلحقيها يا متلحقهاش بقى

انتى وحظك

بس قدملها احتياطى

انا عاوزة اعرف كل حاجة عن المجموعة المميزة في تجارة ؟
وايه هي شروطها ؟
وهي ليها تنسيق داخلي ولا لأ؟
وبتاخد من كام تقريبا؟
وهي ليها تقديم ولا الكلية بترشحها علي حسب المجموع ؟
وهل دراستها بالانجليش؟
وايه مستقبلها؟
وهل هي زى تجارة عربي ولا افضل؟





انا جايبة 90% ادبي و45 درجة الانجليش
وقدمت تجارة انجليش القاهرة وفرقت معايا علي درجة فهل ممكن انضم للمجموعة دى

اهو .. قعدتي ترغي يا علا في المجموعة المميزة ؟!

اهو البشر كلها هاتقعد تسأل عليها بقي ..

عموما .. المجموعة المميزة دي حاجة كدا اسبيشال غير اي مجموعة تانية ..

بتاخد اعلي مجاميع اتقدمت للكلية .. بمعني اصح ..

بتاخد اعلي ناس في المرحلة الاولي بتاع التنسيق ..

عددهم كام ؟ .. مش فاكر والله ..

بس هيا اه .. ليها تقديم .. سواء للناس اللي لسه داخلين اولي ..

او اللي عايزين يحولولها في تانية او تالته ..

تقدميلها ازاي ؟ .. تروحي شئون الطلبة وتقوللهم عايزة استمارة المجموعة المتميزة ..

تمليها وتديهاله .. بس شرط الاستمرارية في المجموعة دي .. انك تجيبي جيد جدا على الاقل ..

او على حسب ماتحدد الكلية .. ممكن ياخدوا الاوائل .. وينزلوا بالمجاميع واحده واحده لغاية مايستكفوا ..

اما بالنسبة للغة الدراسة .. فهيا اللغة العربية .. بس محاضراتهم بتبقي في مبني انجليش ..

اما مستقبلها .. فزي الفل ..

يدوبك تخلصي البكالريوس بتاعك .. وتتخطفي ..خاصة انها بتبقي مكتوبة على شهادة التخرج مجموعة مميزة ..

تتخطفي دي مش مبالغة .. دا فعلا ..

في مرة د/عادل زايد العميد السابق للكلية .. دخل في محاضرة .. وقال ان في مرة واحد جاله طلب منه انه يختارله 20 واحد عشان ياخدهم يشتغلوا في البورصة .. خضعوا لكورسات تدريبة مكثفة مجانية .. وبيقولك مرتب الواحد فيهم لا يقل عن 15 الف دلوقتي في الشهر .. وبيقولك على الاساس دا عملوا المجموعة المميزة .. عشان مايبقاش فيه تواطؤ او واسطة ..

هيا هيا تجارة عربي .. بس الفرق ان اللي بيدرسلهم دكاترة من الناس الجامدة يعني امثال د/البشبيشي ..

وفرق تاني .. انهم اثناء الاجازات هما اول ناس بترشحهم الكلية انهم يروحوا ياخدوا دورات تدريية ..

يعني بالبلدي كدا .. بيبقوا في الوش دايما .. ليهم الاولوية يعني ..

مممممممم .. الله اعلم .. روحي استفسري في شئون الطلبة وهما يقولولك المفيد

بس معلومة بقي مني زيادة كدا ..

فيه قسم من اقسام تجارة القاهرة .. غير معروف لبعض الطلبة ..

وهوا قسم اسمه .. " القسم الاكتواري " ..

القسم الاكتواري دا .. احسن من اي قسم تاني موجود في اي كلية من كليات تجارة في مصر ..

لإن القسم دا معتمد اعتماد كلي .. على الرياضة .. جميع المواد اللي فيها رياضة ..

مميزات القسم دا .. ان عددهم كلهم على بعض لا يزيد على 20 واحد ..

اذن فمجال العمل فيه هايبقي واسع جدا جدا جدا .. ودا اول مابيتخرج بيتخطف خطف ..

غير ان الدراسة فيه كلها انجليش ..

>> عشان تخشه .. لازم تكون في الثانوية العامة انتظام .. وعلمي رياضة ..

بتخش امتحان تحديد مستوي فيه .. لو نجحت بتتاخد .. مانجحتش يبقي تشوف رزقك بقي !!

فيه طريقة تانية .. بس لبتوع تجارة انجليش فقط ..

تخش سنة اولي تخلصها .. وتقدم على امتحان تحديد المستوي فيه ..

نجحت خير وبركة .. مانجحتش .. كمل في انجليش عادي جدا ..

بس بجد خريج القسم الاكتواري دا .. ماشاء الله عليه ..

شغله مش في مصر اساسا .. دا يطلع يشتغل بره ..

يعني من الاخر .. خريج اكتواري تجارة (في الشغل) .. زي خريج هندسة طيران من الهندسة ..

انا انتساب علمى رياضه وجايب 45 انجليزى ماينفعش ادخله؟؟؟؟؟؟؟؟

مانا قولتلك الشروط ..

انتظام - علمي رياضة ..

لإنك بعد كدا بتخش امتحان تحديد مستوي .. ودا بيبقي شامل ..

انجليش ورياضة في نفس الوقت ..

عشان كدا اللي بيعديه بيبقي يستحق انه يخش القسم دا ..

مابياخدوش غير النوابغ في الرياضة ..

اوك

شكراا

انا جيت اقولكوا عايزين حاجة
واسلم عليكوا معليش مبقتش بدخل كتير علشان
مش فاضية اليومين دول
انتوا وصلتوا لحد التخصص كما
ام هند:d
هو فى قسم من تانيه لعلمى رياضه وبس ؟؟؟
ولو فية ايه اللى هيدرس فيه
ولو ممكن يعنى تنزلولى مواد اولى تجارة انتساب وكل مادة من كام

والمجموع الكلى كمان من كام لو فيها رخامة يعنى

هو ايه نظام جدول انتساب السنه اللى فاتت
كان كلةمحاضرات لحد المغرب ولا فية الصبح وعلى المغرب
يوم كده وويوم كده يعنى هشوف الرد بكرة بقى يلا سلام :p

فامبير ده هو اللى العمود الفقرى لمنتدى كلية تجاره

عارف كل حاجه

انا متهيألى لو واحد تانى متخرج من كلية التجاره مش هيعرف ربع المعلومات اللى عارفها

لا وبكره ليه ؟! .. انتي معاكي احسن خدمة عملا في النت !!

الرد فوري على طول !

بصي ياستي .. اول سؤال مش فاهمة بتاع تانية وقسم رياضة دا ..

تاني سؤال بتاع مواد اولي انتساب ..

الترم الاول : محاسبة مالية ، موارد اقتصادية ، تنظيم وادارة ، رياضة بحتة ، سلوك انساني ..

الترم التاني : محاسبة مالية e ، ادارة e ، قانون تجاري ، مبادئ اقتصاد ، محاسبة شركات اشخاص ..

كل مادة بقي من دول .. من 20 درجة ..

التقديرات .. من 6 ل 8 ضعيف جدا .. ومالوش رأفة ، من 8 ل 10 ضعيف .. وليه رأفة لو أزمت معاكي اوي ..

من 10 ل 12 مقبول .. من 13 ل 15 جيد .. من 16 ل 17 جيد جدا .. من 18 ل 20 امتياز ..

المجموع الكلي .. اللي بيتحط في شهادة التخرج 800 ..

كل ترم ب 100 درجة .. يعني السنة كلها ب 200 درجة ..

التقديرات .. من 100 ل 128 .. مقبول .. من 130 ل 158 جيد .. من 160 ل 188 جيد جدا ..

من 180 ل 200 امتياز .. يرزقنا ويرزقك بيه ربنا !!

بالنسبة للجداول عامة .. مابتثبتش على حالها ..

اللي محطوطلك هوا اللي بتتعودي عليه طول الترم ..

في الجداول بالذات .. اعملي بقول .. ارض بما قسمه الله لك !!

بس عامة .. في تجارة .. محترمين الناس في حاجة واحده ..

وهوا ان المحاضرات اللي بتبقي في يوم معين .. بتبقي ورا بعض .. وفي مدرج واحد ..

ربنا يخليك يا sidof .. دا من زوقك والله .. :rolleyes:

طب التقدير اللى بيتخد فى التحويل من انتظام لانتساب
التقدير العامل ولا لازم كل المواد جيد:d

وسؤالى سمعت ان فى قسم فى تانيه لعلمى رياضة وبس
هل فعلا موجود والدراسه فيها ايه الفرق بينها وبين اللى من علمى رياضه:D