رسالة الى الدكتور عبدالرحمن
من فضلك أرجو توضيح موقفى
أنا خريج تربية الفيوم شعبة تعليم أساسى قسم لغة انجليزية
ترتيبى الأول على شعبة تعليم أساسى جميع الأقسام والمركز 18 على مستوى الكلية شاملة شعبة عام وأساسى
شئون الخريجين أعدت كشف بالعشرين الأوائل لإرساله إلى الوزارة بمصر ولكن موظف فى قسم يسم الكادر الخاص قام بالاعتراض على الكشف حيث أنه طلب استبعاد شعبة التعليم الأساسى من الكشف
وعندما ذهبت إليه لأسأله قال " تعليم أساسى بتتخصص من ثالثة وانا مش ممكن أساوى واحد اتخصص من ثالثة بواحد اتخصص من ستة أولى وتعليم أساسى لا ينطبق عليها شروط المعيدين طبعا ده على أساس ان كله هيتعين معيدين وطبعا ده غير صحيح "
المهم أنا ارجو من حضرتك الرد على وتوضيح موقفى وما يجب عمله
جزاك الله خير وبارك لك فى أبناءك واسكنك الجنة إن شاء الله
منتظر رد حضرتك

بالنسبة للأخت الفاضلة رحيق
 

السلام عليكم ورحمةالله وبركاته ...

أولا أحب أبلغ الناس اللي شاركوا الرأي في الموضوع ده تحياتي وربنا يجمعنا كده دايما في الخير يارب ...

بالنسبة للأخت الفاضلة رحيق -جزاها الله خيرا- وموضوع الأخ شريف :

إحنا زي ما قلنا قبل كده إن الكلية اللي بعتت الدفعات من 2006-2010 هي المسئولة عن استكمال الحصر يعني تبعت كمالة الأعداد 2003-2005 .. طيب هتقولولي الموظف قاللي هقولك الموضوع عشان مش مسبوق ففيه بعض سوء الفهم .. وكل جامعة بترمي على غيرها دون وعي.. هي الموظفة دي لما انتقلت الكلية من فرع لجامعةأخرى مش انتقلت هي أيضا بالتبعية ؟!!
طيب خليني معاكي .. من 2003-2005 كانت جامعة طنطا تضم كلية التجارة بطنطا وأيضا كلية التجارة فرع كفر الشيخ.. طيب لو هتبعت العشرين الأوائل كده جامعة طنطا هتبعت أربعين من كل دفعة .. لأن مينفعش أساسا دمج الكليتين ومقارنتهم.. عرفتي ليه أنا قولتله اتحرك علشان تلحق حقك ...

وع العموم واضح إنك أخت محترمة وذات فكر ..وانا سعيد بمشاركتك بالرأي..

مع تحياتي .. د.عبدالرحمن المنياوي

بالنسبة للأخ محمد ضباب
 

بالنسبة للأخ محمد ضباب:

يا محمد لو انت الأول على كل الكلية يبقى حقك للتعيين في الجامعة محفوظ بالقانون وعدم تعيينك تجاوز لا يسكت عنه وممكن ترفع قضية مش هتطول في المحاكم لأن اقانون في صفك .. والموضوع هيتنهي..
أما لو انك الأول على قسمك فقط فإن تعيينك كان من حق القسم في وقتها حسب العجز والأحمال التدريسية.. ومادام القسم قال لأ يبقى سقط حقك ..

طيب انا ماأخدتش منحة وحضرت الماجستير وأخدته .. وضعي إيه؟!!!

انت الآن تبع ملف تعيين الحاصلين على درجات علمية عليا وانسى بقى قصة انك كنت أول قسمك-معلش عارف انها صعبة بس انا باكلمك بواقعة شوية- لأن الموضوع ده مش حجة تقدر تستند عليها الآن وانت كده كده بتطالب بتعيينك كمدرس مساعد مش معيد ..

المهم .. انت تستلم تعيينك عاااااادي ضمن العشرون الأوائل بس انشاء الله فيه خير لأن فيه إئتلاف اسمه |إئتلاف الحاصلين على الماجستير والدكتوراة من غير المنح ودول عملوا اعتصامات وبيحاولوا يضغطوا ع الوزير لتمييزهم عند التعيين .. والامور في الوزارة لسه مش واضحة ..

أما بالنسبة لموضوع لما الكلية تبقى تحتاج فبقوووووولك إنسى ... الكليات بتتملى مش بتفضي ..

ما أهو موضوع تعيين الباحثين وطلاب المنح جه إزااااااي ؟!!!!

بعتوا لكل الجامعات من شهر وقالولهم سووا المسألة داخلياً ... يعني كل جامعة تسد احتياجاتها من المعيدين والمدرسين المساعدين من خلال الباحثين .. قامت كل كلية رفضت ياخدوا حد .. وكل قسم اجتمع وقال مفيش عجز .. فبدأت الاعتصامات فقال الوزير انا هاعمل الحصر وهأدرس العجز الحقيقي والواقعي وهأدرس الأحمال التدريسية وهأعين أكبر قدر من الباحثين لسد العجز وبيتهيألي لو فاض منهم حد بعد سد العجز هيكون مصيره في وظيفة إدارية ...

يعني الكليات بتحاول متخليش حد يتاخد علشان محدش يقاسمهم في الكعكة .. والوزارة بتحاول تفرض ناس على الكليات بس بالذوق وبشكل رسمي شوية ....

مع تحياتي .. د.عبدالرحمن المنياوي

إلى الأخ حازم
 

بسم الله الرحمن الرحيم ...

الإجابة : ....... إيه !!!

الى الأخ جمواة
 

الأخ الفاضل جمواه:

حضرتك ترتيبك الـ18 على كل أقسام وشعب كلية التربية ... مش كده؟!!

لو زي ما انا فهمت كده يبقى الموظف لا مؤاخذه بيستعبط ... والعميد بيستعبط لو موافق.. ورئيس الجامعة لو ساكت يبقى ....... بلاش نكمل ...

أولا حضرتك تتخصص من أولى من ثالثة من تاسعة هو ماله ... في النهاية فيه حاجة اسمها عشرين مركز على مستوى جميع كلية تربية طلعوا من عام من أساسي من أي مكان مش مهم .. المهم همَّ عشرين واحد ... يتخطاك وياخد واحد بعدك يبقى هيروح في ستين داهية ...

وعاوز أوضح لحضرتك موضوع.. بالنسبة للناس المعيدين اللي بيتاخدوا عندكم .. أحب أبشرك إن عميد كليتك بيستغفلكم .. لأن شعبة تعليم أساسي شعبة من تربية آه بس ليها موادها وتعتبر تخصص أصيل .. يعني لما يحبوا ياخدوا حد يسد العجز فيها يبقى ياخدوا معيدين من عندكم مش من شعبة عام.. لكن هم ربوا فيكم العرف ده على إنه قانون وده أمر غير قانوني..

والله حاجة تضحك .. قال ما أساويش بينك وبين واحد اتخصص من سنة أولى .. لما التخصص مختلف فين بقى وجه المقارنة والا هي بس عشان ياخدوا الي على مزاجهم .. لأ وكمان عاوزين يحوشوك من التعييين بتاع الأوائل !!!

طيب ما كانوا يفصلوك من الكلية ويقفلوا القسم ده أحسن مادام مالكمش لازمة عندهم كده...
حسبي الله ونعم الوكيل...

ياعم ع العموم الحصر بتاع كل الجامعات اتبعت الخميس .. روح بشكوى لرئيس الجامعة وبلغهم أنه تم تخطيك في الحصر واكتب الثلاثة اللي أقل منك واتاخدوا بدالك .. ولو ما لقيتش رد متسكتش واتوجه للوزارة بشكوى وخد حقك ...

معلش اتنرفزت شوية ...

مع تحياتي .. د.عبدالرحمن المنياوي

جزاك الله خير استاذ عبدالرحمن والله ريحت قلبى شوية لأن أنا كنت حزين لدرجة انى تركت العمل
فأنا أعمل بمدرسة ابتدائى بالمكأفأة وأن خريج 2007 مع العلم أن تقريبا جميع من تخرجوا فى دفعتى معاهم تعاقد مميز
طبعأ حضرتك بتسأل طب وانت مخدتش عقد مميز ليه
أقول لحضرتك انى كنت فى الجيش
وبعد ما خلصت اشتغلت بالمكأفأة وكانوا فى التربية والتعليم مش عاوزين يشغلونى لحد ما جبت ليهم قرار من المحافظ

عالعموم طلب أخير من حضرتك دكتور عبدالرحمن لو حضرتك تعرف أى حد تخصص تعليم أساسى واشتغل فى الجامعة معيد من أى عام مضى أرجو من حضرتك توصلنى بيه لأن أنا عاوز دليل مادى استند عليه لما أرفع قضية على الكلية
وجزاك الله خير

وعليكم السلام ورحمة الله وبركاته
سيدي الفاضل د.عبد الرحمن المنياوي لك كل الشكر والتقدير وطبعا بنستفيد من حضرتك كتييير ويارب دايما تكون في عطاء واشكرك مرة اخرى على اهتمامك وردودك المميزة

وبالنسبة لموضوع الفرع والجامعة انا قولته بعد ما سألت في الجامعة يعنى مش رأي اجتهادي وطبعا من حضرتك نستفيد

لي سؤال بقى الجامعات التى بها فرع الان مصيرها بقي ايه ؟؟؟؟؟ اللى انا فهماه انهم ارسلوا 20 على الجامعة بما فيهم الفرع فالفرع اللى انفصل واصبح جامعة ايام ما كان فرع اسماؤه ترسل مع اسماء الجامعة اللى كان تابع لها
صح كدا ولا خطأ؟؟؟؟ اختك الصغيرة

ولك مني جزيل الشكر وشكرا لحضرتك على المرور العطر

تقبل مروري

الفكرة في التعيين هي تعيين العشرين الأوائل على كل كلية .. يعني ناس اتنافست أربع سنين وهنعين أفضل عشرين فيهم .. طيب لو فيه جامعة وفرع .. يبقى عندنا كليتين كل كلية تبعت 20 أول .. واللي يحصل غير كده يبقى فهم خاطئ للقرار من إدارة الجامعة .. ماهو طبيعي لما يحبو ايعينوا الأول معيد .. هم بيقارنوا مابين الأول في الجامعة والأول في الفرع ؟!!!!

لأ طبعاً دول بيعينوا الأول على الكلية في الجامعة والأول على الكلية في الفرع كل في كليته ..وها هو نفس النظام يطبق أيضاً في حالة التعيين للعشرين الأوائل ..

بس انا بقول إن الموضوع علشان جديد فيحتمل الجدل وممكن تحصل أخطاء إدارية لو سيبناها ومسألناش عنها ممكن حق الواحد يضيع !!!!

لكن محصلش كدا في جامعة طنطا وجامعة كفر الشيخ

لأن لما سألت لقيت جامعة كفر الشيخ أرسلت الأسماء من أول 2006

وقالولي اللى قبل كدا طنطا ارسلته لأن كفر الشيخ كانت لسه فرع منها

يبقي ذنبهم ايه بقي الطلاب اللى كانوا في الفرع؟؟؟!!!!!!!

ربنا يستر وحاجات غريبة كل يوم بتحصل

هي مصر أساسا بلد القرارات والأوراق وبس

ميرسى لحضرتك بجد يادكتور عبدالرحمن والله فعلا زى مقالت الاخت العزيزه رحيق
بنستفاد بجد من حضرتك والله
ويارب يوفق الجميع

يا سيد عمر :

قانون الجامعات يعطي الحق للأول على كل الكلية كاملة - مش على القسم - في التعيين .. بس فيه كليات بتحاول تتجاهل بعض الأوائل وتستغل عدم علمهم بهذا .. وأي أول على دفعته لم يعين يرفع قضية بعشرة جنيه وهيكسبها بإذن الله ...

طيب هل الكلية ممكن تاخد الأول على قسم معين لاحتياج القسم .. نعم
طيب ممكن تتجاهل الأول بالرغم من أنه الاول على كل الكلية وتاخد واحد تاني يكون الأول على قسم آخر بس في الواقع هو الثالث مثلا على كل الكلية ... لأ

الشرف لينا يا أخ شريف في إني تعاملت مع أخوة وأخوات محترمين بجد زيك وزي الأخت رحيق ...

وأتمنى مزيد من التواصل وانى تحت أمركم .. أستفيد منكم قبل أن أفيدكم ..

ولو فيه موضوعات تانية قابله للنقاش ممكن ترشحوهالي علشان أتصفحها معاكم .. ما أنا بصرلحة عضو مستجد معاكم في المنتدى مش زيكم أصحاب بيت....

تقبلوا مروري ...