بص يا كنج انت بتروح الشؤن وبتقدم طلب هناك ولو مجموعك جبها بتدخلها بس هو ميعاد التقديم انتهى بس


اسأل بردوا فى الشؤن

يا منيرفا خلاص .. ميعاد التقديم انتهي .. والعدد استكفوا بيه

عوضك على ربنا بقي .. :(

شد حيلك السنة دي وحاول تجيب جيد جدا صافي عشان تحول للمميزة دي

مانا قولتله ان ميعاد التقديم انتهى يا فامبير بس يمكن يكون فى جديد بردو يسأل فى الشؤن برده

علشان نبقى عملنا اللى علينا

خلاص هوا حر .. احنا مالنا ..

بس اصلا هايروح الشئون مش هايلاقي حاجة .. هايعاملوه معاملة خدامين !!

هههههههههههههههههههههه زي ماعملوا معايا !!

شكرا على رضدكوا وانا هروح الشئون واسال

لأ يا كوين

النظام ده كمان ف القاهرة

يعنى انتى لازم تحضرى مع مجموعتك

عشان الامتحان مختلف

والمقرر مختلف

والملغى بيختلف

وعلى فكرة

ممكن يكون الدكتور بتاعك بيدى مجموعه تانية

بس مش معنى كدا

انك تحضرى مع المجموعه التانية

لأن برده ممكن يلغى حاجة عندك وميلغيهاش هناك

والعكس برده

يا سلام

ولا حتى سكاشن لانتظام

مع نفس الدكتور اللى بيدينى

انا سمعت غير كده اه المقرر بيختلف من مجموعة لمجموعه

بس طالما الدكتور واحد يبقى خلاص عادى ممكن احضر

يعنى مثلا تقريبا عندنا دكتور ناشد بيدى المجموعة المميزة

ممكن انا احضر معاهم سكاشن

ولا كلامى غلط حد يوضح ؟؟؟

لا طبعاً .. السكاشن ممكن تتقفشي فيها !!

لكن المحاضرات لأ ..

بس المميزة صعب يتهيألي ان حد يحضر فيها .. لإنهم معدودين على الصوابع يعني

يعني لو حد غريب دخل فيهم .. ممكن يتعرف .. ويتفضح !

عموما .. زي ما علا قالت ..

دلوقتي دكتور ناشد الكلبوظة بتاعكوا دا .. بيدي في مجموعتين اولي (ز ، المميزة)

المجموعة (ز) ممكن يقرر مثلا .. الفصل الاول والتاني والتالت .. ويحذف الرابع

في المميزة بقي .. ممكن يحذف الاول.. ويقرر الباقي ..

دا مجرد بس تصوير نموذجي .. انما واقعيا دا مابيحصلش في مادة زي الرياضة

الرياضة اصلا صعب اي دكتور يلغي فيها شابتر كامل .. هوا ممكن يلغي جزئيات صغيرة جدا

يعني مثلا شابتر زي بتاع الاستنتاج الرياضي دا .. المفروض الشابتر دا بييجي فيه طريقتين لحل المسالة

المنطق الاستقرائي و المنطق القياسي .. واحد زي ناشد دا ممكن يلغي واحده فيهم .. معا انه استحالة

بس ممكن يلغي .. لو عايز يلغي هايلغي .. وممكن يلغي الاتنين معا بعض

شابتر تاني زي بتاع المصفوفات .. دا ليه طريقتين .. التخفيض المحوري والمحددات ..

ممكن يطبق الطريقتين .. وممكن يلغي واحده فيهم

عموما .. انتي يمكن ماتعرفيش الحاجات دي .. بس قدام هاتعرفيها كويس وهاتتمرني عليها

شئ طبيعي جدا انك متفهمش حاجة في الاول ..

ايش حال ان بتوع تجارة عربي لسه لا يفقهوا شئ لغاية دلوقتي .. بتوع انجليش هما اللي هايفهموا يعني ؟!

انتا هاتتلاقي نفسك معا الوقت ومرور الايام بدأت تخش في معمعة الدراسة وعز المحاضرات وهاتتلاقي نفسك بدأت تربط خيوط المحاضرات ببعض وهاتبقي الدراسة ماشية معاك حلاوة ..

لإنك لغاية دلوقتي يعتبر اصلا ماخدتش حاجة .. كل اللي انتا خدته المفروض يعني يكون بيتكلم عن ال accounting cycle وطبعا ماننساش الف باء محاسبة .. ال accounting equation اللي طبعا انتوا مش فاهمين فيها حاجة .. ومش عارفين يعني ايه assets ويعني ايه liabilities .. وقولتوا الراجل الدكتور دا بيرغي في ايه ؟! ..

كل دا عاااادي جدا .. انتا معا الوقت زي ماقولتلك هتاخد على الجو ..

مش عارف انا ليه بفكر اليومين دول احطلكوا موضوع للمحاسبة المالية ؟

عموما خليه بعدين مش دلوقتي .. اما تبقوا تخشوا في معمعة الدراسة نبقي نحطه

ومن الاخر المحاسبة المالية دي كلها كلمتين على بعض .. كل اللي بتاخدوه في المحاضرات دا انا شايف انه رغي اونطه .. لزوم اتمام عدد الساعات المطالب بيه بس مش اكتر ..

عيش حياتك انتا بس اليومين دول .. عشان ديتها اسبوعين وهاتبدأ تخش في الخنقة بقي ..

هاي ياجماعه
صحيح يافامبير لما انت قولتلي علي الدكاترة ونظامهم في المجموعه بتاعتي مجموعه (و) فعلا انت عندك حق بس دكتور المحاسبه دة انا مش عارفه اعمله ايه الدكتور دة مش ناوي يدخلنا ابدااااااااا وبيقولوا انه بيدخل في الاخر خالص بيدي الامتحان وخلاص المشكله كلها بقي لما اطلع سنه تانيه مش عارفه ازاي يعني هافهم المحاسبه وانا اساسا مش متأسسه فيها من سنه اولي ودكتور الموارد اللي اسمه عبد المنعم دة فضيحه والله واول لما بيدخل في ناس بتخرج وناس بتنام وكل كلامه في المحاضرة محدش يكتب ورايا واشتروا الكتاب وكلمه اشتروا الكتاب دي تحتها الف خط ههههههههههههه والباقي بصراحه زي الفل

اولا .. احب اهنيكي على انك اهلاوية .. عشان انا اهلاوي انا كمان !

ثانيا .. > بالنسبة للبشبيشي .. اعرفي انه بيدي في المجموعة المميزة .. وانا علقت عليه كتير جدا في كلامي قبل كدا .. وهوا راجل محترم جدااااااا .. بس يمكن زي مانتي قولتي .. مشكلته انه شغال بنظام انجز في اخر 10 محاضرات واللي فهم فهم واللي مافهمش مافهمش .. وهاتنجح .. بس معني كدا انك مش تقضيها على اساس انك هاتنجحي وخلاص .. برده حاولي تركزي وتفهمي فيها كويس .. عشان دي مبني عليها محاسبة شركات الاشخاص في الترم التاني عندكوا بنسبة 50 % على الارجح ..

> بالنسبة لمحمد المحمدي .. زي ماقولتلك عليه قبل كدا شيخ وعايش في دور اسلمة المدرجات (يعني الولاد لوحدهم والبنات لوحدهم) .. وعايش في دور دكتور الايه يو سي اللي بيخش باللاب توب ويوصل في البروجيكتور.. وفي نهاية الامر مش هاتشوفوا حاجة ومش هاتسمعوا حاجة ومش هاتفهموا حاجة !! .. اه وبالمناسبة .. اما يشغلكوا الفيلم بتاع تشارل تشابلن و توم وجيري ابقي قوليلي ! .. وعلى فكرة مش بتريق والله .. هايعملها معاكوا غالباً .. دا ان مكانش عملها اصلا .. غير كدا بيرغي في مواضيع جانبية كتير .. وبيناقش الطلبة بأسلوب مستفز يضيع وقت المحاضرة .. وماشي بسرعة القطر المجري في شرح المنهج .. عشان كدا تابعي معاه اول بأول .. مش مهم تحضريله .. بس المهم اعرفي هوا شرح ايه عشان تبقي ماشية معاه اول بأول .. عشان المنهج بتاعه حوالي 18 فصل تقريبا على مافتكر يعني .. وبالمناسبة هوا كتابة نضيف جدا مقارنة بالكتب التانية .. بس مليان رغي وحشو كتير .. اقضيها ملازم في المادة دي .. وفي الامتحان .. امشي بمبدأ المختصر المفيد معاه عشان هوا مابيحبش الرغي ..

انا خصيت الدكتورين دول عشان الدكتورين دول هما اللي غالبا هايعملولك ازمة .. اما الباقيين فزي مانتي قولتي .. عاديين ..

ربنا معاكي ومعانا ،،،،،،

اولا انا بردة بهنيك لان الاهلاويه دول اجدع ناس
اما بقي عن الدكتور بتاع المحاسبه دة فانا سايباها علي ربنا والله وبالنسبه لدكتور المحمدي بجد هايشغلنا توم اند جيري وشارل شابلن ههههههههههههههه طيب كويس دي هاتبقي محاضرة زي الفل بس المشكله انه نبهنا كتير اوووووي من نظام الملازم والكلام دة
اه في حاجه كمان الجامعه عامله منحه كدة لدراسه الكمبيوتر واللغات انا اخدت الورقه وكتبت اسمي بس مش عارفه اروح ولا لا؟ وهي معتمدة بردة ولا لا؟
وميرسي جدااااا يافامبير علي ردك وربنا معانا كلنا ياااااااااارب