لكل الناس بقي الـ Freshmen اللي لسه على عتبة سنة اولي ..

كل سنة وانتوا طيبيبن بمناسبة بدأ الدراسة .. وحبيت انوه على بعض الحاجات كدا عشان ابقي تميت جميلي بقي

> شيك على محفظتك وشيكي على شنطتك كويس .. واتأكد ان يكون معاك ورقة وقلم على الاقل عشان لو فيه حاجة كتبها الدكتور تكون متابعة اول بأول

> كل واحد ياريت يقوم دلوقتي حالا يحط بطاقة الترشيح بتاعتة في جيبه عشان ماينساش .. عشان السنة اللي فاتت كان الدخول ببطاقة الترشيح .. لازم يكون مرفق معاها اي اثبات شخصية (بطاقة شخصية او انشالله حتى كارنيه تأمين صحي) عشان السكيوريتي بتاع الجامعة بيبقي خنيق اوي اول يوم .. فلو سيادتك نسيتها .. يبقي تسمعني سلام سواح !!

> كل واحد يراجع جدول محاضراته تاني .. ويتأكد من صحته .. خاصة في المواعيد .. عشان مايتسوحش ..

> البعض منكوا ان مكانش معظمكوا هايبقي داخل خايف وكاشش .. اول ماتخش قول باسم الله الرحمن الرحيم يارب اجعلها سنة كويسة عليا وعلى اللي زيي .. عشان الملايكة ترد عليك وتقولك ولك مثل هذا ..

> البعض منكوا هايخش هايتلاقي نفسه سايح في الجامعة ومش عارف يروح فين ولا ييجي منين .. متخافش .. اقرب حد اسأله وماتتكسفش .. احنا كلنا طلبة في الجامعة واللي عارف بيقول اللي مش عارف .. فيه ناس ممكن تسألها وتبصلك بإستحقار .. دول ناس عندهم امراض نفسية .. ماتكتأبش .. واللي بعده واسأله وهكذا لغاية ماتوصل للحتة اللي انتا عايزها ..

> بالنسبة للناس اللي في جامعة القاهرة (داخل الحرم الجامعي) "تجارة/حقوق/اداب/دار علوم" .. اول ماهتيجوا تخشوا .. هاتتلاقوا ناس نضيفة كدا لابسه لبس الكشافة لو تعرفوه (قميص ابيض وحاجة كدا زي الكرافته خضرا) .. ولاد وبنات من كلا الجنسين ..

المهم .. الناس دي تبع فريق اسمه فريق الجوالة .. الفريق دا بيختص بالرحلات والانشطة الثقافية والاجتماعية ومايتصل بذلك من مواضيع .. الناس دي دائما ما بتستلم الناس بتوع اولي ويروحوا لكل واحد ويسمعوه الاسطوانه المشروخة بتاعة مزايا الجماعة ونشاطاتها .. ومن ضمن المزايا اللي تجذبك انه هايقولك هانديك كارنية عضوية لمدة سنة في نادي البحرية اللي في الجيزة .. طبعا انتا هاتفرح اوي .. كارنية نادي بقي وكدا .. هايقولك عهشان تشترك معانا لازم تحرر استمارة .. الاستمارة دي بكام ياعم الحاج ؟ بجنيه واحد فقط .. هاتروح زي الزبون تدفع الجنيه ويقولك تعالانا بكره ومعاك صورة .. هاتيجي بكره ومعاك الصورة .. هايخدها منك ويقولك تعالانا بعد شهر بقي .. يعدي الشهر .. وتيجي تدور عليهم ماتلاقيهومش !!

هما مش نصابين عشان ماظلمش حد .. بس اللي عايز يعيش في دور الانشطة والرحلات وكدا الطريق مفتوح قدامه من خلال المجموعة دي .. ومجموعة تانية اسمها المجموعة العلمية

> بنبه كتير اوي على أهمية حضور المحاضرة الاولي .. لإنك ماتنساش انك لسه جديد .. ماشوفتش منظر المدرج حتى .. فحاول بقدر الامكان تحضر اول محاضرة عشان تكسر حاجز الرهبة الاولاني دا ..

محاضرة في التانية في التالته هاتبدأ تتعرف على ناس وتكون جروب .. ويبدأ عصر دراسة جديد معاك وهوا عصر الدراسة الجامعية

> بالنسبة لإجرائات الدفع بتاعة المصاريف والكارنيه ..

مصاريف انتساب وانتظام .. ممكن تكون اتغيرت .. عشان مابقاش بقولكوا معلومات غلط روحوا واسألو في شئون الطلبة عشان تبقي المعلومة موثوقة منها ...

ازاي تدفع المصاريف ؟ .. بتروح مكاتب شئون الطلبة للفرقة بتاعتك .. بتقول الموظف المسئول .. انا عايز اذن دفع مصاريف .. هايقولك هات بطاقة الترشيح بتاعتك .. هاتديهاله .. هايتأكد من المعلومات اللي في البطاقة ويكتب اسمك على ورقة كبيرة كدا .. هاتاخدها وتروح بيها للخزنة .. هاتدفع المصاريف هناك .. بعد ماتدفع .. تستني شوية هايديك وصل استلام (اثبات دفع المصاريف) .. ولعلمكوا الوصل دا مهم جدا .. لإنه مالوش بدل فاقد .. عشان لو ضاع انسوا !!

المهم هتاخد الوصل بتاع الخزنة دا وترجع بيه لشئون الطلبة تاني .. وتدي الموظف اللي قاعد الوصل ومعاه صورة شخصية ليك .. وياريت تنقوا صورة عدلة والنبي .. صور الثانوية العامة العار دي سيبوكوا منها !!

هاتديله صورتك وتستني مدة اسبوعين كدا .. لغاية مالكارنية بتاعك يطلع .. هاتروح بعد كدا تقوله انا عايز الكارنيه بتاعي .. هاتقوله اسمك .. هايدور عليه ويديهولك بس طبعا بعد مايتأكد من ان وشك مطابق للصورة اللي في الكارنيه ..

وطول مانتا معاكش الكارنيه .. الدخول والخروج من اي باب في حرم الجامعة لأي كلية .. ببطاقة الترشيح

> وانتا قاعد في اول محاضرة .. ياريت ورجاء تعمل الموبايل سايلنت وتبطلوا حركات المعيلة بتاعة ان واحد مزنوق في اغنية وحبك معاه يسمعها اثناء المحاضرة .. عشان بتيجي فوق دماغ الناس اللي معاك لو الدكتور سمع الموبايل .. عشان فيه دكاترة بيتلككوا من اول محاضرة .. وفيه ناس بتتطرد من اول محاضرة .. عادي يعني .. هاتقولولي ازاي واحنا ماعناش كارنيهات .. هايقولك هات البطاقة الشخصية .. معاكش ؟ .. يبقي تتشمس بره معا امن المدرج بقي !!

انا الكلام اللي قايله دا خاص بالفترة الاولي بتاعة اول اسبوع ..

هوا بالظبط بعد مرور اسبوعين .. هاتكونوا بدأتوا تتأقلموا على الجامعة وبقي الحال ماشي ميه ميه ..

وساعتها بقي ماتحتاجونيش :unsure:

كل سنة وانتوا طيبين يا جماعة .. ويارب تكون سنة سعيدة علينا وعليكوا يارب ..

الرد
 

ههههههههه.. ازيك يا فامبير الاول انا zikas ...علي فكره كلامك دا هو الصح الصح يعني مافيش كلام انت عامل زي مايكون قريت دماغي فيها ايه...وعمتا شكرا علي الاستفاده دي شكلك كده والله اعلم مجرب وخبره اووووي ...شكرا علي الرد واهتمامك وربنا يفوق بقي....واي دكتور هيقصر معايا ولا يظلمني هو عارف هيحصله ايــــــــــه.هههههههههههههه :p بجد شكرا يا فامبير:d

هتجنن
 

هتجنن هتجنن هتجنن يا فامبير وربنا :confused::(انا مكنتش بخش المنتدي دا بس بقيت اخشه علشان الناس المحترمين اللي زيك يعني كده فيه ...انا تقلت علي صحبي حسن زغلول عايز اعملي بروفيل ليا انا واشترك...بس بقالي اسبوع بحاول اشترك والموقع مش بيخليني اسجل شويه يقولي البريد متكرر مع اني عامله مليون بريد مختلفين وشويه الاسم ...خلاني احس اني اول مره اشترك في منتدي ...متشوفلي ايه الحل للمنتدي دا......:mad:
انا هستنا ردك اوك يالا سلام :rolleyes:

ربنا يكرمك ويخليك يا زيكاس يا زوق ..

والحمدلله ان ربنا جعلني سبب انك تتابع معانا .. وعلى فكرة .. انا مستمر معاكوا اثناء الدراسة ان شاء الله لو انتوا عايزين يعني مافيش مشاكل .. اي نعم انا ممكن يكون دخولي هايقل بنسبة 30 % ولا حاجة .. طبعا عشان محاضراتي ومذاكرتي ..

مانا زيي زيكوا .. ولا انتوا عايزين تنجحوا وانا اشيل الليلة بقي ؟ :blink:

عموما .. انا حكاية التسجيل على المنتدي دي اساسا ماخدتش مني 3 دقايق ..

انا مش عارف بقي انتا مش مسجل معاك ليه .. حاول تاني ..

او جرب تخش من جهاز حد تاني .. ممكن يكون عيب جهاز او الواير بتاعة النت عندك

جرب وحاول تاني .. وانضم لفريق تجارة 2009 .. واكيد هاتستفيد ان شاء الله ..

ربنا معاك ،،،

طيب معلش بس هرخم عليك شويه عندي استفسار:d

دلوقتي التقدير اللي بتقول عليه عشان الانجلش بيكون ايه؟

وبالنسبه للقسم اللي هتخصص فيه دا قسم كويس ولا اي كلام وبيعادل حاجه في اقسام تجارة عربي؟

سؤالي التالت والاخير تجارة انجلش كام قسم وايه احسنهم وايه اسوأهم؟

معلش طولت عليك وهتعبك معايا:)

شكلك يا دكتور زومبا مش متابع معانا التوبيك من الاول ..

بس هاريحك واجاوبك يا سيدي

هوا الدراسة فيه بالانجلش .. وهوا قسم تبع تجارة انجليش ..بس يحقلك انك تخشه .. ولازم تكون انتظام .. وعلمي رياضة في ثانوية عامة كمان .. يعني مش بالساهل .. اما التقدير اللي انتا بتقول عليه دا .. غالبا مابيبقي يتراوح مابين برده جيد جدا لإمتياز والله اعلم .. انا مش متأكد من المعلومة دي اوي .. بس دا اللي عندي مكن معلومات متوافرة حاليا .. اما اروح الجامعة بكره ان شاء الله هابقي اسالك واجيبلك المفيد النهائي .. بس من الاخر .. القسم دا مابيدخلش الا بامتحان .. وامتحان مش سهل ابداً ..

القسم اللي هاتتخصص فيه .. مش اي كلام خاااااااااالص .. عايزك تعرف ان دا احسن قسم في تجارة على مستوي مصر كلها .. وعلى فكرة القسم دا مش موجود في اي جامعة في مصر تاني الا في القاهرة .. الايه يو سي نفسها ماعندهاش غير 3 تخصصات (اقتصاد/ادارة اعمال/محاسبة) .. وشغلها في مصر .. في اعلي الشركات .. و90 % من الخريجين فيها بيطلعوا يشتغلوا برا مصر اصلا ، اولويتهم في الشغل بيبقي في البورصات وشركات السمسرة .. والشركات دي الساليري بتاعها اعلي من السحاب !!

> تجارة انجليش .. زي تجارة عربي بالظبط .. الفرق فيه شوية حاجات بسيطة في المناهج .. وطبعا اللغة بتاعة الدراسة ..

> نفس الاقسام بتاعة تجارة عربي هيا هيا بتاعة تجارة انجليش .. 3 اقسام

محاسبة Accounting / ادارة اعمال Business Administration / تأمين Insurance

احسنهم واسوأهم .. دا بقي انتا اللي تحدده مش انا ..

والسنة الاولي مش كافية انك تحدد انتا عايز ايه .. عشان انا سألت ناس متخرجة وقالتلي انتا بتبدأ تحدد اتجاهاتك من اول ماتخلص سنة تانية والرؤية تبدأ تظهرلك بقي ..

والله بامانه جزاك الله كل خير تعبتك معايا بس معلش اخر حاجه عشان الموضوع كان ماشي كويس لحد الحته دي:(

انت متاكد من الحته دي اصل لو كدا يبقي مفيش امل نوهائي:(

طب بانسبالى انا وكام واحدة من صحابى كلنا لما قدمنا سحبوا بطاقة الترشيح
مع التقديم وسمعنا اشاعه بتقول اننا ندخل بالوصل والبطاقة الشخصيه

عايزة رد اروح ولا خلينى فى بيتنا عقبال ميطلع الكارنية :(

اه شىء الحفاظ على ذكر الله والمذاكره

اعتقد اه ..

كدا كدا اساسا ابقي قابلني لو عديت من امتحان التقييم بتاعهم ..

يابني انا جاري في القسم دا .. في سنة رابعة وعايد السنة دي كمان ..

كان معايا بيحكيلي في مرة قبل كدا .. بيقولي امتحان طلاسم .. حاجات معقدة

اشكال طالعة واشكال نازلة .. وارقام ومتتابعات

و علاقات هندسية ورياضية وقوانين ما انزل الله بها من سلطان !!

دا غير كمان ان الامتحان دا بالانجليش مش بالعربي ..

يعني فعلا اللي بيخش القسم دا بيبقي صاروخ رياضة ..

عشان كدا الشركات بتبقي مقدرة خريج القسم دا اوي

وصل ايه وبطاقة شخصية ايه بس ؟!

صبح صبح يا واندا .. في ايه مالك ؟ ماتصلي ع النبي كدا وفوقي

انتي مش كنتي قولتي انك عملتي نسخة من بطاقة الترشيح تاني؟

عاملة ازمة ليه بقي ؟؟؟؟

عموما انا قولت على اللي انا مريت بيه خلال السنة اللي فاتت .. الله اعلم بقي السنه دي هايبقي ايه

بس انا قولتلكوا اللي حصل السنة اللي فاتت عشان يبقي الاحتياط واجب برده

بصي لو أزمت معاكي اوي اوي اوي يعني ومادخلتيش من باب مترو اللي بتيجي منه دايما دا .. امرك لله بقي ولفي الجامعة بطولها من بره .. وحاولي معا الراجل بتاع باب تجارة .. اي نعم عارف انه رخم وصعيدي .. بس حاولي معاه .. ماعرفتيش .. خشي اوعي تخشي من باب اداب لإنك عمرك ماهاتخشي منه .. عقبال عندك بيبقي واقف عليه ظباط مش حرس !!

خدي في وشك بقي طوالي .. واطلعي ع الرئيسي .. ان شاء الله هاتخشي منه .. دا لو قفلت خالص يعني

شكرا يا باشا تعبتك معايا

جزاك الله كل خير :)

على فكرة بقى يا جماعه

الدخول من باب المترو سهل اوى

انا بدخل عادى

يا دوبك اسلم ع الحرس اللى واقف

واقوله سلام عليكم

يدخلنى هوا

حتى لو ميعرفنيش

وساعات بدخل من غير ما اسلم كمان

مجرد انى ابص قدامى ومعبرش اللى واقف

بيخلينى ادخل عادى

اهم حاجة بس وانتى داخله كدا يا واندا

متبقيش تبصى للحرس خالص

وخشى واكنك بتقولى يا ارض اتهدى ما عليكى ادى

هههههههههههههههههههه

والنبي اما بيبقوا عايزين يخنقوا بيخنقوا يا علا ..

عندك مثلا الباب الرئيسي .. لو ماعكيش الكارنيه انسي تخشي منه .. الكلام دا اثناء ايام السنة العادية

اما اول يوم فابيبقوا فاتحين البووابة الكبيرة وبيدخلوا الناس .. بحس انه عامل زي فتح مكة كدا !

سيبك من كلامها يا واندا .. خدي بكلامي انا .. انا اسمي مكتوب على كل ابواب الجامعة !!

وبعدين واندا اساسا زمانها راحت تنام دلوقتي .. البنت وراها جامعة بكره ..

سيبيها تقوم تشوف مستقبلها .. عايزة تحرضيها على الفشل ؟

عيب عليكي .. دي Newcomer يعني لازم نوعيها .. مش نفشلها !!

اه بالمناسبة يا جماعة .. قبل مانسي

احب اقول للناس بتوع تجارة القاهرة ..

مبني الامتحانات بكره ان شاء الله هايكون متأفور ومقفول ..

بسبب امتحانات سنة رابعة بتوع الاعادة (دور سبتمبر) ..

وكل سنة وانتوا طيبين