إخواني الأعزاء
أنا طارق دياب محمد عضو مكتب الدعم الفني وضمان الجودة بإدارة دار السلام التعليمية محافظة سوهاج
وأود أن أعرض عليكم خواطري الشعرية
أمي العزيزة
شعر / طارق دياب محمد
من قلب مليان بأشواك الأحزان
أبعتلك سلامي وأنا ندمان
إزاي يا أمه تحملت طعنات سكاكيني
في قلبك اللي بيمد الدم لشراييني
إزاي تحملت جحودي وعصياني
وإنتي صابرة وراضية وبالهداية داعيالي
إزاي ماندمشي ولا تابشي شيطاني
وأنا شايف الدموع في عنيك ليالي
وتقوليلي يا ضي عيوني خد عيوني
قناديل منورة بزيت عمري وأحلامي
وأنا قاسي وناسي وعاميني جنوني
بخنق نور حياتي بظلمي وظلامي
********************
وفي ليلة انطفت فيها الشموع
وغاب القمر واتملت السما بالدموع
ودخلت من وسط الجموع
لقيت شبح الموت الفظيع
غارس ضوافره في وشك الوديع
وسافرتِ في بحر الموت من غير رجوع
********************
ياه يا أمه...........
دانا من بعدك ميت قبل الأوان بأوان
طير مدبوح بيطلع في الروح بيبكي وينوح
على الأغصان
عصفور وجناحه مكسور وبطارده النسور
وما قدرشي على الطيران
********************
محتاجلك يا امه............
محتاج لدعاكِ النبع الصافي لوحي وإلهامي
محتاج لحضنك البلسم الشافي لكل آلامي
محتاج لابتسامتك النسمة الطرية في هجير أيامي
محتاج لنصايحك الإيد القوية اللي بتلم حطامي
*********************
سامحيني يا أمه ............
دا الندم نيران كوياني وزلزال بيهد كياني
أنا عارف إنك سامعاني وفي كل خطوة متابعاني
ما هو قلب الأم الأخضراني
اللي جواه أسمى المعاني
عمره مايموت
حتى لو كان الجسد فاني
قلب الأم
عمره ما يموت حتى لو كان الجسد فاني