يجب محاكمة كل من شارك في جريمة
الخصخصة
للشاعر المصري / رشاد هويدي ( شاعر الوادي )
******************************************
انتو يا أهل الخصخصة
سيبكم بقى م اللغوصة !!
اتهد حيلنا من الشقى
لفيتوا حبل المشنقة
حوالين رقاب أهل البلد !!
ومات كمان حلم الولد !!
أحد أحد !!
نصير جميع المظلومين
والمنهوبين
والمتباعين من غير تمن !!
وأقل حتى من العفن !!
أو الكلاب الميتة !!
أو حتى ورقة ملكفتة !!
فوق كوم زبالة مزفتة !!
باعوا البلد في الكروتة !!
ساكنين في بيتنا بالإيجار !!
وعيشتنا أحلاها مرار !!
واسود لون كل الخضار !!
خضروات متسرطنة
وأي أمراض ممكنة !!
واللحمة فين ؟!
والقمح ولا الأسبرين ؟!
نفسي ناكل طقتين
من غير ما يبقى علينا دين !!
نفسي نشعر بالأمان
وإننا أصحاب مكان
مش حاجات جوه البيوت
حلمنا فعلا نموت !!
عشان يا عالم نترحم !!
م الفقر والجوع والسكوت !!
نرتاح من الأه والألم !!
والذل والعار والضغوط
نرتاح كمان م المهزلة !!
واللعب من بره الخطوط !!
من عيشة هم وبالبلا
بنحلم نموت !!
فقرا ولا عريانيين !!
متكفنين ..
ولا حتى بدون كفن
يتساوى كله في العفن !!
اللي وياه الفلوس !!
أو فوقه تاج السلطنة !!
واللي كان زي الناموس !!
أو هدومه معفنة !!
واللي رافعين الرؤوس !!
واللي ساق في الفرعنة !!
والمسروقين ويا اللصوص !!
وخدنا إيه م الخصخصة ؟!
لا حد فينا خد جنيه !!
ولا بان عليه !!
واحنا اللي دايما مطحونين !!
لحساب عصابة البياعين !!
والمليارات متكدسة !!
وبنوك سويسرا بتشتغل !!
على حسنا !!
لحساب أجانب مش لنا !!
ونعاني احنا من الفشل !!
فشل كبد وفشل كلى !!
والشعب حالته مبهدلة !!
وصحته متنيلة !!
وكمان ظروفه مقندلة !!
وشغالين في الخصخصة !!
يا ناس عيشتنا منغصة !!
واحنا اللي بيصيبنا الضرر
واحنا اللي بنموت م الخطر
واحنا اللي بيتباع باسمنا !!
واحنا اللي بيتباع جسمنا !!
واحنا اللي بيتنا بيتهدم
واحنا اللي بكرانا اتعدم !!
وبقنا مقفول !!
جواه لسان مغلول !!
وإيدنا فوق بقنا !!
تحلف عليه ما يقول !!
نبلع لسانا وننكتم !!
وحتى لما نقول !!
أبكم بيحكي لأصم !!
ولو الكلام تخفيف !!
لو هو حيلة الضعيف !!
لو الكلام تفجير !!
عمر الكلام وحده
ما بيعمل التغيير !!
ونفضل نهاتي سنين
والخصخصة بتسير !!
************
في 15/8/2010

كــــان هذا قبل سقوط عصابة البياعين
أما الآن فيجب أن تعود مصر للمصريين
رشاد هويدي
شاعر الوادي