سؤال يا مصريين
للشاعر المصري / رشاد هويدي ( شاعر الوادي )
********************************
هاسأل جميع الناس
وياريت يجاوبوني
بأمانة وبإخلاص
وبلاش يغشوني
هاسأل سيادة المشير
والمجلس العسكري
واللي في ميدان تحرير
المدني والعسكري
ومرشحين الرياسة
والشعب والشورى
وكل ناس السياسة
والفن والكورة
هاسأل جميع الاحزاب
نقابات وجمعيات
هاسأل شيوخ وشباب
واسأل حريم وبنات
هاسأل دعاة الدين
سلفي وإخواني
سؤال يا مصريين
مسلم ونصراني
هاسأل شيخ الجامع
وهاسأل القسيس
وهاسأل النافع
واسأل عميل وخسيس !!
هاسأل بتوع إعلام
والشرطة والبلطجي !!
واسأل فلول النظام !!
وهاسأل الثورجي !!
هاسأل جميع طبقات
فقير وراسمالي
واسأل جميع ثقافات
شيوعي وليبرالي
واللي حرق البلد !!
واللي بيطفّي !!
سؤال وحيد بالعدد
وجوابه هيكفي !!
انتم عاوزين إيه ؟!
هيقولوا مصر تكون
وطن بنحلم ليه
يبقى فوق الكون !!
*********
مش عجيبة صحيح !!
رغم اتحاد حلمنا !!
يعيش وطنا جريح !!
ونضيعه بحبنا ؟!
وإن كان جوابنا صحيح
ومصر بتهمنا
نبدأ سوا التصحيح
نعمل عشان مصرنا
يا ننسى كل فصيح
والحب بالألسنة !!
**********
رشاد هويدي
شاعر الوادي

الله عليه الكلام لما يكون معناه
حب وإخاء وسلام يجمع ما بين ضدين
زادوا لهيب الخلاف وقسموها اتنين
وهى فى الأصل واحد
وحدتها غايتنا
لاجل الولاد السمر
أطفالنا . . نبتتها
يعيشوا فيها بسلام
ويحلفوا بينا
إن احنا كنا فى يوم
قد الدفاع عنها

فعلا كلامكوا جميل وله معني.

ياللي انت بتبحبها ياريتك تسمعنى.

دي مصر دي امنا ودموعها تجرحنا.

حافظوا عليها بقى لتعقبكوا بضياعها.

تسلم الايادى