khattab1000
22-12-2011, 11:47 PM
أنا عندى مشكله فى معادلات الكيمياء و حفظها و بقالى إسبوعين بحاول أحفظها و لكن بردوا لسه فيها مشكله
و ممكن أقرر التحويل لأدبى فعايز أسأل سؤال بسيط
ايه اقل مادة من حيث المنهج الفلسلفه و لا علم النفس و لا التاريخ؟
عشان لو حولت مش هيبقى قدامى وقت طويل أقدر أخلص فيها اى ماده طويله من دول
+
اسف لو كان الموضوع مش فى مكانه عشان ده او موضوع ليا و معرفش ايه الأقسام اللى هنا و دورها
كله إلا التاريخ ..... دى أطول ماده
ممكن علم نفس أو فلسفه
أنا مش أخدت فلسفه .... بس أخدت علم نفس وكان كويس خالص وسهل
بس عاوز حفظ كتير
وإنت تقريبا مشكلتك الحفظ
فمواد أدبى كلها بالنسبه لك هتبقى مشكلة
حاول لو فيه حل فى الكيمياء
يعنى تزاكر بطريقه تانيه ... مصدر جديد .... مدرس تانى
وربنا يوفقك
بالنسبه للموضوع المفروض مكانه اجتماعيات طالب
ممكن تدخل القسم ده فيه مواضيع هتفيدك
وأى مشكلة ممكن تكتبها فى اجتماعيات طالب
ahmed khalid yehya
23-12-2011, 12:47 AM
معادلات الكيمياء لا تحفظ احسن اختيار مدرسك
TheMobiler
23-12-2011, 01:09 AM
لا لا أنسى موضوع التحويل دة نهائياً دلوقتى ..
أنا كنت كيمياء فى تانية السنة اللى فاتت كنت معتقد كدة بس والله أكتشفت إن أهيف حاجة كانت المعادلات !!
روح صلى صلاة إستخارة .. صدقنى هتريحك جداً :)
وسيبك من فكرة التحويل دى .. مفيش أسهل من الكيمياء .
تقريباً انتوا فى الباب الرابع أو الخامس متهيألى .. كمل بس مع الناس لحد الاخر وكل دة هيتلم بأذن الله فى الاخر, بس أهم حاجة لو عندك أمتحان لازم تذاكر وتروح الأمتحان وأوعى تكسل ومرة مع مرة المعادلات هتتحفر فى دماغك إن شاء الله :)
ayman.hassan94
23-12-2011, 01:31 AM
يا معلم انتا معادلات الكيميا مدوخاك عشان المستر بيحفظهالك لا انتا افهمها جرب مدرس تانى وتالت
نسمة الدنيا
23-12-2011, 06:04 PM
معادلات الكيمياء في بداية ما تاخدها اول مرة بتبقي صعبة...بس هقولك حاجة المعادلات فهم مش حفظ ..انا في تانية ثانوي وكنت زيك في البداية مكنتش عارفة اذاكر معادلات بس الحمدلله بقيت اسهل شئ الن عندي المعادلات ..انت لازم الاول تحفظ الرموز والتكافؤات في الاول بتاعة رموز الكميا ككل مش المعادلة اللي عاوز تحفظها بس وكده المشكلة تكون اتحلت لان مش فاضل غير انك تعرف ايه اللي داخل في التفاعل وايه اللي خارج وطبقه في رموز وبعدين توزن المعادلة ودي مش صعبة لانك هتساوي اللي دخل واللي طلع من التفاعل واتمني اني اكون افدتك
مرام احمد
23-12-2011, 06:30 PM
الكيمياء اسهل كتير من التاريخ والمواد الادبية المعادلات الكيميائية حلها في التدريب الكتير وهي اي مادة كدة لازم الواحد يحس نفسه مش شاطر في الاول وده طبيعي بس لما تجيب 50 هتعرف ان الكيمياء سهلة انا في تالتة والحمد لله جبت 50 في الكيمياء وكنت زي كدة بردو خاصة معادلات الكيمياء العضوية
صدى الدمعة
24-12-2011, 07:45 PM
والله الكيمياء دي سهلة جداً
ومعادلاتها كمان اسهل
وجرب تفهم معادلاتها مش تحفظها عشان لو عملت كده في الاول هيساعدك بعد كده في العضوية
والموضوع هيبانلك سهل
,,,,,وربنا يوفقك ,,,,,
صفــاء الروح
26-12-2011, 11:41 PM
وفى فى طريقة حلوة أوى لحفظ أى حاجة ايا كانت..هى أنك أول ما تصحى تمسكى الحاجة اللى دايما بتنسيها وتذاكريها..وقبل ما تنامى..أعملى كدا لمدة أسبوع مثلا وشوفى النتيجة..دا مع أى حاجة محتاجة حفظ
معادلات الكميا بقى مش محتاجة حفظ كتير إذا كنتى فاهماها حاولى تلاحظى حاجة مشتركة وعدد معين من المعادلات مع بعضها دا هيسهل عليكي الموضوع..وربنا معاكى
mostafa sayed10
03-01-2012, 02:21 PM
انا في تانية ثانوي وعلمي وبالنسبة ليه المعادلات موضوع تافه لكن الاستاذ الي باخد معاه كان معانا طالب عنده نفس مشكلتك ونصحه بانه يحفظ المعادلات بالعربي الاول وبقي كويس هديلك مثال: معادلة تحضير غاز النشادر مثلا من تسخين كلوريد الامونيوم مع الجير المطفا وكده والله الموفق والمستعان