ياجماعة كل واحد دخل هندسة شبين يدخل ويكتب كل اللى يعرفوا عن الكلية والمواد اللى هندرسهاوالادوات اللى هنحتاجها وقبل كل ده يعرفنا بنفسه عشان نعرف بعض

وانا هبدأ بنفسى واجيب معلومات عن الكلية


أول يوم فى هندسة شبين الكوم

معظمكم حيبقى جاى من السفر ... من البحيرة واسكندرية وكفر الشيخ وطنطا ... والمحلة ... واسنا ...
منكم الى عامل حسابه انه جاى علشان يشوف اسمه نزل فى المدينة ولا لاء ..ومنكم الى جاى علشان ياخد جدول المحاضرات والسكاشن ... وفيه الى جاى منبهر وعايز يعيش التجربة المنوفية ....
!!!
ومنكم الى جاى علشان يحضلر المحاضرة رقم واحد ....

عموماً انت وصلت كلية الهندسة شبين الكوم ... لو أنت راكب العربية المشهورة بتاعت شبين وجاى من طريق المطبات ...طريق المشاتل ... يبقى الكلية فى أول شبين الكوم على شمالك ...وبعض العمارات السكنية على يمينك ..وعلى شمالك حتشوف البنزينة ... ثم المكتبات .. ثم شارع المؤدى لمدينة الهندسة " المدينة الجامعية " ثم كلية الهندسة شبين الكوم

طالما انت أتيت من هذا الطريق يبقى الباب الى قدامك دا هو الباب الاول .. باب الطلاب ... لو وقفت بحيث يكون ظهرك للباب حيكون على يمينك المكتبات ... فيها كل حاجه حتحتاجها بدءاً من جدول المحاضرات ... و ملابس المعامل .. وأدوات الرسم ...
على شمالك امتداد سور الكلية .. لو مشيت معاه حيقابلك الباب التانى للكلية وهو باب الاساتذه واحياناً بتدخل وتطلع منه عادى ...أما لو نظرت قدامك حتشوف بردوا مكتبات وكافتريا .. اما لو توجهت فى هذا الاتجاه حتلاقى سيبرات .. وخلف العماره حتلاقى مكتبة حورس ودى حتحتاجها كتيير فيها محاضرات ..وحلول شيتات .. وحلول امتحانات ..وكدا يعنى ...

ها هى اقدامك ... تطأ عتبة البوابه . فى حين ان رجل الأمن يطلب إثبات هويتك ... وبالنسبالك هى بطاقة الترشيح لأن مش معاك كرنية الكلية...
حتلاقى قدامك زينة ... وبوابة الجوالة ... ممكن تكون عملتها مره لما كنت فى معسكر الكشافة !!!

واعلانات ترحب بقدومك الى كليه الهندسة شبين الكوم ... وتتمنى لك عام دراسى جديد سعيد!!

بالنسبه للمبانى فأكيد هناك صور فى المنتدى كثيرة عن الكلية بإمكانك الإطلاع عليها .. أو إسأل فى الكلية كما قلت لك السؤال علم فقط إختار من تسأله جيداً ..

بالنسبة لك اخى طالب السنة الإعدادية يهمك مدرج ناصر ..ومدرج رياض .. ومبنى الضغط العالى ..
ثم يأتى مبنى كهربا ومبنى مدنى فى المرتبة الثانية من أولوياتك...

مبنى ناصر ورياض ستتلقى فيه معظم محاضراتك .. ومبنى الضغط ستتلقى فيه معظم السكاشن
بالمناسبة المحاضرة يلقيها استاذ المادة وهى 14 محاضرة فى الترم وأول محاضرة فى أول يوم دراسى تُحسب من 14 محاضرة ..
أما السكشن فهو الفصل ..يُلقيه المعيد ... ويقدم لك شرحاً ملخصاً لما كان فى المحاضرة ثم يحل معك الشيت " التمارين "..
وأغلب السكاشن فى مبنى الضغط العالى ...

أخى طالب السنة الإعدادية
أعلم جيداً أن هذه أصعب سنة ستقابلك فى كلية الهندسة .. .. ليس على مستوى المعلومات والمواد أو عددها
بل على المستوى النفسى .. ومستوى الاستعداد . والتأقلم .... أنت حتدرس مواد جديدة .. من مدرسين جدد..
بنظام جديد غير نظام الثانوى خالص !!

يعنى لوأتأقلمت .. وفهمت الدنيا مشيا إزاى ... واستمتعت ... حتعيش يا مان !! والسنة حتعدى ... بسهولة ... وبنتفوق ...

قبل ان أبدأ فى عرض المواد التى سوف تدرسها ... أحب أن انضع ملحوظه فى غاية الأهمية ... ليس هناك فرق بين طلاب الفرقة الإعدادية يعنى انت زى زميلك كلكم دخلتم كلية واحدة ... من النهردا منكم الى حيتميز وحيتفوق ... أو بمعنى أصح يصطفى الله منكم من يشاء .. والله عزيز حكيم ...حيكون فيكم اول وتانى وتالت وناجح .. وشايل مواد ودبلر !!!

مفيش حاجة بتيجى بالصدفة يعنى الأول كان ممكن يكون الى دبلر ... دى حقيقة !!
الفيصل هو الإجتهاد .. فالعقلية واحدة ... فالعبقرى حاله خاصه ولكنه مش حيتفوق لو مجتهدشى ..لو عبقرى واجتهد يبقى حتعمل ايه .. انت حققت الى انته عايزه .. لكن هو مكانه يبقى دكتور فى المستقبل ..دا طريقه وانتا مهندس اعرف طريقك!! .. أما الحالات الشاذه ..كوسه مثلاً... فالله يفصل بينكم يوم القيامه فيما كنتم فيه تختلفون ...

المواد التي سيتم دراستها بإذن الله

نبدأ بالمواد التى عندك خلفية عنها ..
الرياضيات ..الفزياء ... الكيمياء ... ميكانيكا ... لغة انجليزية

المواد الجديدة على آذانك وهى ..
الرسم الهندسى والإسقاط ..تكنولوجيا إنتاج ...الحاسبات والبرمجة ...تاريخ العلوم الهندسية ..ومقرر icdl

يجب أن تعرف الدرجة النهائية للمادة وتوزيع الدرجات .. وحاول بقدر الإمكان إعطاء المادة الأكبر درجات أولويه كبرى .. حتى إن لم تكن تحبها ...
سنعود لتلك النقطة عندما نتناول المواد مادة.. مادة.

هذه المواد ستدرسها فى النصف الأول والثانى ... أى كل ترم له درجاته ... ماعدا مادة الرسم فهى مادة متصلة ..لم تمتحن فيها فى الترم الأول .. ولكن لها امتحان نهاية العام فى نهاية الترم التانى شامل منهج الترم الاول والتانى ..
مادة الحاسب فى الترم الثانى فقط ...
مادة الميكانيكا قسمان فى الترم الأول استانيكا وليس له امتحان نهاية الترم ... والترم الثانى تدرس ديناميكا ثم تمتحن الجزءان معاً فى نهاية العام ...
مادة الكمياء وتكنولوجيا الانتاج بالتبادل .. أى تقسم الدفعة جزءان جزء يدرس كيمياء ..فى الترم الأول ويمتحنها ... وجزء يدرس انتاج ويمتحنها ... وفى الترم الثانى العكس ...نصائح حول المواد .. هو الموضوع التالى بإذن الله

للعلم الموضوع منقول وليس من عملى وستتوالى باقى الموضوعات ان شاء الله قريبا ولكن ارجو المشاركة من الاخرين لكل من سيدخل هندسة شبين

نصائح حول المواد

اعدادى هى اهم سنه لأنها أكبر مجموع من ناحية الدرجات ..وهى الى حتخدم المجموع التراكمى ...كمان لو انت جبيت جيد فى اعدادى مثلاً فاعلم انك بمجهود مماثل حتجيب جيد جداً فى سنه أولى بإّذن الله..
والصعوبة فى كونك حتعيش فى مكان الدراسة- المغتربين- ... ومع الوقت حتتعود ...ولازم تتعود وتتأقلم على الوضع الجديد .. وتحبه!!
قبل منتكلم على المواد ..لازم أضع أمام نصب عينيك نصيحة وأنت حر!!

1 - عايز انجح أولاً .. ثم عايز أفهم ثانياً .... ولو قدرت تجمع بين الاتنين ..تبقى تمام ..
واعلم انك لو اجتهت علشان الأولى حتقابلك الاسئلة الى حتوصلك للفهم ..دونها فى ورقه على جنب واسأل ..واوعى تنسى .. السؤال فى حد ذاته علم... والسؤال هو الى حيوصلك للتفوق .النجاح ..والفهم كمان.

2- ذاكر بسرعه ... واكتب بسرعه .. وبيض محاضراتك بخط مفهوم وسريع ... مضيعشى وقت فى كتابة المحاضره ... والقراءة بدون غرض ... ودايماً لازم مذكره الامتحانات قدامك اى شيت تحله ..بص فيها شوف ممكن تسأل فى ايه...

ودية تحققها.. بالتدريب وكمان ...لازم تصاحب حد اكبر منك ..على الاقل تتعرف على حد متفوق فى أولى . واسأل السؤال علم .... والصداقة دى صداقة مصلحه!!!
لو تقدر تخليها صداقة مصلحها وصداقه فى الله كويس جداً...
المهم تاخذ منه محاضراته وسكتشاته ... وحلوله .... وتوعده انك حتسلمهاله فى آخر السنه بإذن الله وتوفى بعهدك ..لانك حتحتاجه فى 2و 3و 4....

3 – أيام الاجازات .. هى الفيصل بين المتفوق .. والعادى ....استغلها..

4- علاقتك لازم تكون طيبة مع المعيد ... علشان أعمال السنة .. وفى المعمل يعنى صاحب المعيد ... احترمه ..

مادة الرسم الهندسي
المادة كما أتذكر من 300 درجة.. وتدرس فى الترم الأول والتانى .. والامتحان فى نهاية الترم التانى ..

أعمال السنه ظاهرة فى كلية الهندسة أعمل حسابك انك مفروض تدخل الامتحان وانت نا جح فى اعمال السنه ... وعموماً انت بتاخد درجات اعمال السنه لكن الرسم درجات اعمال السنه فى ايدك ...

صاحب طالب مدنى او عماره ... وخليه يشرحلك اساسيات الرسم .. واشترى سكتش رسم ليك انت .. وارسم مع نفسك .. وحل تمارين الكتاب ..واسأل دايما ً زميلك ..والدكتور ...

حتتعود ... وحتحب الرسم ..

الرسم له صاله اسبوعية ... بتجيب لوحة رسم وأدوات الرسم ... وتدخل الصالة مع سكشنك .. وتبدأ تثبت اللوحة على التربيزه ... وكل اسبوع ترسم لوحه وتعلمها بعد متخلصها ..والدكتور يقيدلك درجتك ... وهكذا كل اسبوع ..

ارسم اللوحه قبل متروح ..فى اسكتشك ..او اعرف حلها قبل متدخل .. وترسم .. علشان تضمن تاخد 9 .. و9 فوق 9 ..تضمن تقدير رسم يعنى تفوق بإذن الله .. ولما تشوف التراكمى فى آخر سنه حتدعيلى لان اعدادى حتسندك كتيييييير يا مان...

أما منهج الرسم الهندسى
فى البدايه .. حيحفزك انك تحب المادة ويعرفك انها لغة المهندس ... ويقلك أن القلم الرصاص هو قلم المهندس ..
وحتاخد تمارين لتحسين خطك وتعود ايدك على الرسم .. وطريقة تثبيت المسطرة والمثلثات على اللوحة .. وعمل الخطوط .. والعمودى ... ورسم خطوط مائلة بزاويا 30و 60و 45 وهكذا ...
ثم تدخل فى استنتاج المساقط .... لاشكال ميكانيكية .... وتدخل فى المنهج ... وحتحب الرسم إن شاء الله ..

مادة الرياضيات
منهج الرياضة حيكون بالانجليزى ..و دى مش مشكلة انت حتتعود على كدا ..يعنى ص حيسميها y و س حيسميها x وتعرف المصطلحات الاساسية زى احسب , compute عين أو حدد determine ... زائد مصطلحات هندسية سيتم معرفتها زى triangle مثلث.. منحنى curve وهكذا ..

حتدرس تفاضل وتكامل ...فى كتاب حيدرسه لك دكتور .. ومنهج الجبر حيدرسهولك دكتور أو دكتورة ... فى كتاب آخر
الامتحان من 150 درجة والورقة فيها الجزئين ... وفى نهاية الترم الأول طبعاً هناك امتحان أعمال سنة .. عليه درجات .. زائد درجات حضور السكشن ... ويمكن الدكتور ياخد غياب فى المحاضره ..
المادة دى مادة امتياز متفرطش فيها ...

منهج التفاضل
بيتكلم عن النهايات بتاعت الثانوى واضافات أخرى .. مسائل واثباتات .. واللوغريتمات...والدوال ...الاشتقاق ..وهنا حتاخد اشتقاق كلى وجزئى .. والتكامل وانواعه ..والبقية فى الترم الثانى.. الذى يبدأ بالتكامل وانواعه... وهكذا ..

نصيحتى للإمتحان فى حضور المحاضرات .. وحل الشيتات وتمارين الكتاب .. ولو الامتحانات كمان تبقى ممتاز .. المادة دى من المواد الى انت حتحبها .. لو محبتهاش يبقى راجع نفسك كويس!!

اما من ناحية الاهميه فانت ستحتاج الاشتقاق .. والتكامل كثيرأ خاصة لو قدر لك تدخل كهربا او مدنى .. او منهج اى رياضة فى اى سنه اعلم انه لخدمة السنين القادمه ..فممكن تعملك وريقات بعد كل سنه فيها ملخص القوانيين .. والتكاملات الصعبة وهكذا ...لتوفر على نفسك عناء مراجعة الكورس ..او التواكل على زمييل..

الجبر
فحسب الاهمية المصفوفات ..ونظرية ذات الحدين ..جبر المتجهات ... ونظرية حل المعادلات ...وهكذا

بالمثل انت اكيد مصور حلول ... او زى ما اتفقنا معاك اسكتشات زميل اكبر منك وشاطر ... تساعدك فى الوقت ... وفى الاسبقية فى المذاكره ..
واحذر من نظام الخلاصه معايا وقبل الامتحان اذاكر ....

بالمثل حاول تعمل وريقة فيهل ملخص قوانين المصفوفات ونظرية المعادلات وذات الحدين
بعد نهاية الترم..

أنا مش شبين الكوم لكن إسمحلي أشكرك علي المعلومات إللي جايبها، وأنا هرجع للموضوع تاني أقرا كل الكلام عن المواد بالتفصيل ان شاء الله

أولاشكرا على المشاركه ******
ممكن اعرف انت معانا داخل اعدادى هندسة شبين

alf shoker ya bashmohandes

قبلما نغوص فى مادة الفيزياء اود أن ارسم لك نصيحة ...

لو حترسم بيت يبقى انتا محتاج موهبة و لوحة وألوان .. لكن علشان تنفذ البيت انت محتاج حاجات إضافية ..مجهود عضلى .. ومحتاج عمال ...مساعدة يعنى ... فالبمثل التخطيط غير التنفيذ ...
كتيير طالب اعدادى بتقابله مشاكل ... والمشكله مش فى المشاكل .. المشكله فى يأسه ... ليه طالب يدبلر فى إعدادى .. أو يشيل مواد ... ومع أول إختبار فى أولى تلقيه حصل على جيد جداً؟!
لاء ..مش كدا وبس ..دا فيه واحد طلع الأول فى أولى كهربا ..مع إنه دبلر إعدادى!!!
إذن كان فيه مشكلة ما .. والمشكلة دى اتحلت لما نجح ودخل القسم الى حبه ..أو الى جاله!!

الطالب أخد ثقه وتحفيز ... من نجاحه فى إعدادى بعد فشل .. ولأنه معدنه طيب .. كان جعان إجتهاد ... فشله فى إعدادى كان إنهزام نفسى سبب تخطيط هو عمله بطريقة مباشره .. أو غير مباشره .. يعنى سلم لفكره ما داخله ومشى وراه من غير ميفكر يخلص نفسه .. ويشوف نتيجه طريقه دا ايه ... وهونفسياً عقب العقبة والنتيجة دى حيكون حاله إزاى !!

لو فكر إنه لو استمر على الحال الغلط .. حيشيل مواد .. أو حيسقط .. ولو دبلر .. حيتأخر سنه وحيحضر مع طلاب أصغر منه .. وحيشوف جيله بيدخل يحضر ومع بعض وهو مصاحب جيل تانى ... غير أهله ..غير أصدقاءه ... غير ثقته فى نفسه الى حتهتز !!

أكيد كان استنفر ... وقام .. واغتسل ... وصلى ... ودعا .. واستقام ... وصلح الى فات على قدر المستطاع ... ثم اشتغل .... وصدقنى مهما ضاع منك ... من وقت ..مذاكره ... على قدر قوة عودتك .. على قدر ما حتصلح وحتبنى ... دا هو الذكاء العاطفى بعينه ... أو لاتغضب الى وصى بيها النبى عليه الصلاة والسلام .

إذا أولى لك أن .. تستنفر من البداية .. ليه تستنى تقع .. فتجوع للنجاح .. أكيد حتعود بقوه زى مشفنا ..لكن حتقع تانى أول ما تهدا .. وتحقق هدفك ..

إذاً عود نفسك على التفوق ... واستعينوا على قضاء حوائجكم بالكتمان .. يعنى متوضحشى نفسك اوى للدفعة.. ضحى بالشو والاستعراض ... ولكن روح للمعيد مكتبه .. وللدكتور فى عرينه ..واسأل .. واوعى تتردد..اوعى تستحى ..اوعى تخاف .. وخليك زكى ..فى أوقات مينفعشى تسأل فيها ..أجل . وانتهز الفرصة للسؤال دايماً ...

ونصيحة فضية .. دون الأسئلة فى ورقة خارجية أو فى أجندة الماحضرات ... علشان دايماً يكون سؤالك حاضر...والسؤال علم ..يعنى اسأل فى المادة أولاً ..فى الشيت .. فى المحاضره .. فى الكتاب ...للفهم ...ثم الحجات التانيه بعد كدا ...

استفيد من اقل طالب ... واكبر طالب .. ساعد الى يجيلك ...ويسألك .. ومع ضحيش بوقتك .. انت اولاً ..ثم من قصدك فى مسألة .... ودى بتاعتك بينك وبين ربنا ... مليش فيها نصايح .

نصيحة ذهبية استعمل ذكاء المصرى ... وخبثه فى الجلوس فى المقاعد ..البنشات .. الأول ...
دى بتاعتك ... حتسمع ..حتشوف ..حتكتب .حتسأل ... مش حتنام ..

مادة الفيزياء أو الطبيعة
طبعاً فيزياء الكلية غير فيزياء الثانويه ...ابسلوتلى ... يعنى مادة امتياز ...الامتياز للجميع ..اذا أرادوا !!
المادة تدرس فى الترم الأول وعيلها امتحان نهاية الترم .. وبالمثل فى الترم التانى ..يعنى كل ترم منفصل عن التانى .
المادة عليها 125 درجة .. 50درجة كاملة لأعمال السنة والشفوى .. يعنى حتدخل الامتحان شبه ناجح ..
المادة يدرسها دكتوران ... لكل دكتور جزء ...
المادة دى مادة محاضرات .. احضر محاضراتك .. وبيضها كويس .. ولو حتسأل فى الماة يبقى اسأل فى المحاضرة ..يعنى فى الى الدكتور بيقوله ...حاجه مش واضحه ..حاجه الدكتور كتبها غلط ..كدا .. غالبا احفظ كويس ... ولكن علشان تتفوق ..حل التمارين والامتحانات .. وبردوا يكون معاك اسكتش قديم يساعدك ..لو مش معاك يبقى اجتهد فى الحل أول بأول ..علشان تسأل المعيد أول بأول .. وتكون قبل الامتحان جاهز للتشييك .... والجديد من أفكار محدود!!

المنهج
المنهج فيه اثباتات .... وبالطبع يرجو استشاره استاذ الماده ...يحفظ أم لا ..
أول محاضره تقريباً حتكون شرح للوحدات .. يعنى انت تعرف السنتيمتر و المتر والكيلو ... حتعرف ماهو أصغر من السنتتيمتر .. وماهو أكبر من الكيلو ..

ايضاً القوانين الفيزيائية الأساسية ..قوانين نيوتن ..قانون الجاذبية .. معادلة برنولى ودى مهمة جدا .. على صعيد الامتحان ...حالات المادة ...ديناميكا وميكانيكا الموائع ...أى خواص سريان الماء والزيت , واللزوجة وهكذا ... ومعادلة الاستمرارية ... والصوت .

وهناك جزء آخر للمنهج وهو الديناميكا الحرارية والحرارة ..لو أنت فاكر باب الحرارة فى فيزياء ثانوى ..فهنا حاجة زى كدا ولكن ابسط واشمل ...

مادة الكمياء
المادة ترم أول بس ..أو تانى بس ..يعنى لو درستها ترم أوم.. حتدرس مادة تانية بدلها فى الترم التانى وهى تكنولوجيا انتاج ..

المادة من 100 درجة ..منهم 40 درجة أعمال سنة ...يعنى 60 درجة امتحان نهاية الترم..

المادة عايزة مجهود ..شويا شويا ...تشمل جزء مسائل وجزء نظرى .. ركز اوى ... ولو تعرف تسجل وتصور محاضره التى فيها يتم تناول المسائل يبقى تامام ...ويغنيك عن هذا انك يكون معاك سكتش صديق كويس أكبر منك .. ولا يغنيك هذا عن فهم المسائل من الدكتور ..لأن يكون هناك خطأ احيانا ..لو مفهمتش ودا وارد.. تكون كتبت .. السكتش حيأكد انت كتبت كله ولا فى حجات عدتك .. ولا فى حجات غلط ...
ويبقى مجهودك .. تحل ... وتسأل وتفهم ..وتحل ..وهكذا ..

المسائل قصدت بيها ..مسائل الغازات واحتراق الوقود ... ومسائل الأسمنت .. مسائل طويلة ... ولها خطوات كال خطوه معتمده على التى تليها ... لو عرفت الخطوات ... وفهمت .. يبقى فضلك تحل بايدك ... وتدور على الافكار ... بحيث قبل الامتحان يكون التشييك ... وافكار جديدة اقل ..


عموما المنهج يشمل ..سلوك الغازات المثالية والحقيقية ... احتراق الوقود ...الكمياء الكهربية ...والتآكل ..الخلايا الجلفانية وكدا ...معالجة المياه ..صناعة مواد البناء ..انواع الاسمنت وانواع الطوب وكدا ...

بردوا المادة مادة امتياز .. و مش كله بيجيب امتياز فيها ... لو اهتميت وتعبت فيها شويا زى موضحتلك ..بإذن الله امتياز .... خلى بالك انا مش بكلم الطالب العبقرى ... انا بكلم طالب مثلى ومثلك ... ومثل معظم زميلك ... طالب دخل كلية الهندسة.

الف شكر يا محمود على المعلومات انا فى هندسه شبين

محدش يعرف المصاريف كاااام ؟؟؟

ألف شكر ع المعلومات الجامدة دى
وأنا معاك فى هندسة شبين ان شاء الله السنة دى