نفسك تذاكر بس مش قادر ؟ ادخل هنا وشوف الحل

فن المذاكرة · #1 08-11-2016, 03:13 PM

نفسك تذاكر بس مش قادر ؟
عايز اعرف السبب والحل ؟ اقرأ الموضوع
.
المشكلة دي عند طلاب كثير وممكن نقول عند معظم الطلاب على الأقل في بعض الأوقات ، يكون مش قادر يقنع نفسه يقعد يذاكر ، ومجرد ما يبتدي مذاكرة تلاقيه بيدور على أي حجة مهما كانت عشان يقوم ويسيب الكتاب ، السؤال الحالة دي بتحصل ليه ؟ ونتغلب عليها إزاي ؟
.
أولا : المشكلة ليها جانب نفسي محتاجين نعرفه
------------------------------------------------------
ربنا خلق نفوسنا بتدور على السعادة والراحة ، وتحب الحاجة السهلة وتهرب من أي حاجة تسبب لها الألم أو تعرضها لمشقة وإزعاج ، ودي طبيعة في كل الناس ، كثير بيكون الطالب شايف أن المذاكرة صعبة ومملة هيتعب فيها وفي الآخر تعبه هيكون من غير فايدة ، وإن مذاكرته ولا هتقدر ولا تأخر ومش هتغير أي حاجة في حياته.
وكمان بعض الطلاب بتشوف المذاكرة تهديد ، لأنه لو سعى ناحية هدف كبير وذاكر عشانه وبذل كل جهده ومقدرش يحققه لا قدر الله هيعاني من الإحساس بالفشل ، وهيتعرض لسخرية أصحابه ، ويسمع كلام من عينة مش أنت كنت عامل الفالح اللي فينا ، وممكن أهله يتهموه بالتقصير ، ده غير أنه ممكن ثقته بنفسه تهتز ويحس أنه أقل من غيره
.
عارفين يا شباب لو كانت الأفكار دي موجودة في عقل الطالب حتى لو كانت غير واعية ، فإن الحاجة الطبيعية جدا إن عقله هيحاول يحميه من المذاكرة ويبعده عنها لأنها تهديد ، وهيبدع في ده والعقل عنده في الأمور دي حيل عجيبة
.
ما الحل ؟؟؟
--------------
الحل الأساسي والجذري أنك تغير طريقتك في التفكير ، اربط بين المذاكرة وبين كل شيء يحقق لك السعادة في الدنيا والآخرة ، المذاكرة هي اللي هتوصلك للجامعة ، فكر في المجال اللي نفسك تشتغل فيه ، فكر في حياتك بعد الدراسة ، تعب المذاكرة ساعة وثمرته سنين ، ولذة الكسل ساعة وألمه سنين
.
فكرة قوية جدا أنك تعمل لنفسك طقوس معينة للمذاكرة تدخلك فورا في الحالة المثالية للتعلم كل مرة قبل ما تقعد للمذاكرة جهز نفسك ورتب افكارك ، فكر نفسك بهدفك وردده بصوت عالي مسموع ، تخيل لحظة نجاحك فكر في التفاصيل ، خد في الموضوع ده دقيقتين أو ثلاثة مش أكثر
.
لو عملت كدة عقلك هنتعلم أن المذاكرة دي حاجة مهمة بالنسبة لك ، وإن احلامك مرتبطة بالمذاكرة ، وعشان كدة هيبطل يخترع لك الجحح اللي بتعطلك
خليها عادة عندك كل مرة قبل ما تبدأ مذاكرة اقرأ هدفك المكتوب أو سمعه من الذاكرة ، وتخيل حياتك بعد تحقيق هدفك ، واكتب ولو مرة واحدة 10 أسباب عايز تذاكر عشانها وعايز تحقق هدفك عشانها وخليها أسباب مهمة هتغير حياتك كلها بشكل كامل
.
تنبيه هام جدا ....
--------------------
تغيير التفكير السلبي محتاج صبر وتكرار ، وعايز الحاح غير عادي على العقل ، فكر نفسك كل يوم عشرات المرات بهدفك وحلمك ، خليه قدامك في كل مكان على أغلفة كتبك ، اكتبه وعلقه على الحيط ، خليه خلفية للكمبيوتر أو الفون ، خليه صورة الغلاف على الفيس بوك
خليه حواليك في كل مكان كل ما تبص يمين أو شمال تلاقي حاجة تفكرك بحملك وهدفك خصوصا الركن اللي بتذاكر فيه وربنا يوفقك.

ممكن ترد على الموضوع حت تقوم بتشجيعى وشكرا وانتظروا مواضيع اخرى شيقة