اقتباس:
المشاركة الأصلية كتبت بواسطة eng/el doktor
أحلى سلام للدكتور على قصدى البشمهندس على ف كلا الحاتين أنا إلتمست فيك إنك شخصيه ما شاء الله ناضج فكريا ومحترم ومتتخيلش أنا بحترم الشخصيه اللى كده أد إيه وطبعا أنا والله ما قصدت بالكلام الجارح ده إلا كل خير وأعتقد إنك إستوعبت كده وخساره إنك سبت حاسبات وإنت بالعقليه دى ربنا يكرمك وإن شاء الله تبقى دكتور ف الجامعه ومش أى دكتور كمان وطبعا أنا مش بشكك ف حبك لبلدك لكن كل واحد بيعبير عن مشاعره من وجهة نظره اللى هى مرايه للبيئه الأسريه والإجتماعيه اللى نشأ فيها وغالبا بيكون مقتنع بيها لدرجه أنه ممكن يصم آذانه عن أى وجهات نظر خارجيه بس إنت ما شاء الله متجاوب ودى حاجه نادره شويه انا بس حبيت أقول إن الإنسان اللى واثق من نفسه ومن قدراته لا يمكن ينحنى تحت أى عراقيل نفسيه كانت أو ماديه وبيثبت نفسه ف أى مجال وأنا بقولك اللى يقرأ عن الطب مش عشان يبقى دكتور ولا حاجه أنا أقصد إنه يبقى عنده ولو خلفيه عن كل شيئ أحسن من إنه يبقى متعمق فى مجال واحد وأنا عن نفسى ياااااااااااااااا ما سمعت عن حاسبات واللى يقولى روح المعهد العالى للتكنولوجيا ببنها دا أحسن من الهندسه واللى يقولك ملكش نقابه واللى يقولك زيك زى معهد حاسب آلى وطبعا إنت تفضلت مشكور ووضحت كل الكلام ده لكن أنا ملتفتش للكلام ده بصرف النظر كان صح ولا غلط أنا دخلت وسايبها لله وواثق فى نفسى الحمد لله لان أنا مؤمن جدا أنه ليس هناك ناجح وفاشل لكن هناك محاول ويائس وربنا يستر ...... نيجى بقى للمهم دلوقتى أنا زى ما قولت انا ف حاسبات حلوان وكان قدامى أحول المنصوره اللى هى بلدى ومع ذلك أنا معملتش تحويل بس موضوع القسم اللى ف حلوان ده قالقنى جدا وأعتقد البشمهندس على يقدر يفيدنى فيه لان انا بفكر فيه بس متخوف خصوصا إنه من أول سنه فياريت أعرف رأى البشمهندسين ويهمنى رأيك يا بشمهندس على لان الموضوع ده شاغلنى جدا وآسف جدا ع الاطاله دى وشكرا يا بشمهندس على زوئك
|
ياباشا و الله ده كرم منك ... كفاية كلمة شكراً بس ....
انا مدخلتش فنون جميلة عمارة تحت ضغوط نفسية , بس علشان ما اتقوقعش في مجال واحد بس .... لأن مجال الكمبيوتر رغم انه مفتوح بس في مصر محدود و شركاته المتخصصة ( المتخصصة فقط في مجال البرمجة و قواعد البيانات ) مش كتيرة ... فالواحد مش ضامن نفسه يعني , فبدل ان انا اخدم مجال واحد , اخدم مجالين , اخدم مجال العمارة و هندستها و اخدم في نفس الوقت مجال الكمبيوتر ...
علشان كده أنا مش ح اسيب نفسي للعمارة و بس , لازم ح اخد كورسات كتيير في البرمجة و الهاردوير كمان ... و يمكن مش ح ابقى قوة خريج حاسبات و معلومات طبعاً , إلا إني لازم يكون عندي خلفية عن كل ده ...
جزاك الله كل خير على كلامك الجميل اللي بجد يقنع اي حد يعني ...
اقتباس:
المشاركة الأصلية كتبت بواسطة eng/el doktor
على فكره القسم ده اسمه هندسة برمجيات اللى ف جامعة حلوان عشان بجد عاوز رأيكم عشان انا معرفش عنه معلومات قد كده ومشكورين جميعا
|
تعال بقي يا باشمهندس نكلمك عن هندسة البرمجيات ..
أولاً : انت لو سألت أي حد في القسم ده ... ح يكرهّك فيه لعدة أسباب ..
ثانياً : تعال نتكلم على المميزات و العيوب باختصار :
المميزات :
- قسم جديد و تخصص جديد .
- التخصص مش موجود طبعاً في أي كلية هندسة في مصر .
- عدد الطلاب اللي فيه قليل جداً .
- شهادتك اسمها : بكالوريوس حاسبات و معلومات - تخصص هندسة البرمجيات ... طبعاً انا قلت اسم الشهادة علشان فيه اشاعات بتقول ان الشهادة اسمها بكالوريوس حاسبات تخصص علوم حاسب و ده غلط طبعاً ..
- لقبك الوظيفي : مهندس برمجيات .
- مش موجود غير في جامعة حلوان و بس .
- له شئون طلبة خاص لوحده و له اتحاد طلبة لوحده .
- قسم مستقل عن بقية الأقسام العامة التانية .
العيوب :
- مقرراته عبارة عن مزيج من مقررات قسم علوم حاسب على مقررات قسم نظم معلومات و مقررات قسم تكنولوجيا معلومات .
- مفيش غير كام مادة عن هندسة البرمجيات .
- المادة بـ 500 جنيه , و السنة بـ 6000 و ممكن توصل لـ 7000 على حسب المواد اللي انت بتختارها .
- القسم بنظام الساعات المعتمدة , يعني ممكن تتخرج في تلات سنين و ممكن تتخرج في سبع سنين , و النظام ده طبعاً مخدش حقه في مصر .
- السقوط في مادة , بتدفع تمنها تاني عند الإعادة .
- بتدفع اربعة و عشرين الف جنيه في اربع سنين علشان لقب مهندس برمجيات .
رأي الطلبة اللي في القسم :
طبعاً أنا كلمت بعض الطلبة اللي في القسم ...
قلة قليلة منهم شجعوني على دخول القسم ..
أما الباقي فهما عاوزين ينقلوا لقسم عام ... لأن التخصص ده مواده زي مواد الاقسام العامة و مفيش جديد غير انك بتاخد لقب مهندس برمجيات .. طبعاً بيقولوا إن الإهتمام بالقسم مش قد كده رغم انه قسم خاص و مستقل ... و تكاليف القسم رغم انها شبه رخيصة إلا إن فيه مصاريف للكتب و كده و دي اللي بتقفل الموضوع شوية ...
و محدش بيعدي قد كده , لانه قسم بنظام الساعات المعتمدة يعني ممكن تريح لك سنة و تكمل عادي , أكنك بتعمل دراسات حرة ...
رأيي :
طبعاً انا من رأيي إنك متدخلش القسم لعدة أسباب ( رغم اني كنت متحمس زيك كده ) :
- القسم ده ح يبقى عام بعد كده في كل كليات الحاسبات و المعلومات ... جامعة اسيوط ناقشت تحويل قسم علوم الحاسب في كل الكليات الى قسم هندسة برمجيات ... و رغم انهم موصلوش لحل , إلا إن الاجتماعات دي مازالت قائمة و احتمال كبير انه يتم تحويل اسم علوم حاسب الى اسم هندسة برمجيات بعد انشاء النقابة ان شاء الله ...
- ممكن تدفع فلوسك في الأرض , لانك مش ضامن اذا كنت ح تعدي بتقديرات عالية و لا لأ ... على فكرا انت ممكن تريح لك كام سنة كمان , لأن القسم ماشي بالنظام الأوروبي ( نظام الساعات المعتمدة ) و زي ما قلت لك ممكن تتخرج في تلات سنين و ممكن تتخرج في عشر سنين ...
فمادام ح يبقى القسم عام بعد كده .. يبقى ملهاش لزمة انك تدفع فلوسك في الارض و خصوصاً انه ارخص قسم خاص من بين الاقسام الخاصة الجديدة اللي موجودة في كل كليات مصر زي الهندسة و الطب و الصيدلة و كده ...
و برضه القرار ليك يا باشمهندس ...
و حضرتك حر يعني ...
جزاكم الله كل خير