السلام عليكم ورحمة الله وبركاته
وعدت انى أتكلم فى موضوع المذاكرة بالتفصيل
وأرجوا ان الاخوة يعذرونى لأنى مش بدخل النت غير تخاطيف خاصة ان السنادى ان شاء الله ماعنديش اجازة
أولا عشان نتكلم فى موضوع المذاكرة يبقى لازم نتكلم بنظام فى النقط التالية
وانا هاتكلم أكتر على الجانب العلمى (رياضة وعلوم)
أولا
ازاى أعرف قدراتى العقلية وأوظفها فى كل مادة؟
ثانيا
ازاى كل مادة أجيب فيها الدرجة النهائية؟
ثالثا
ازاى أذاكر بوجه عام وتقسيمة المواد؟
رابعا
ازاى أخد وقت راحة كافى ان الواحد يفضل يذاكر طول السنة بأذن الله بمعدل ثابت؟
""""""""""""""""""""""""""""
""""""""""""
"""
أول نقطتين متداخلتين
الثانوية العامة فيها الاتى
المرحلة الاولى
عربى
انجليزى
فرنساوى
رياضة 1
كيمياء أو أحياء
ويستحسن كيمياء
المرحلة الثانية
عربى
انجليزى
فيزياء
أحياء أو كيمياء
رياضة 2
اقتصاد واحصاء أو مادة أدبية أخرى
طبعا التركيز فى الثانوى بيكون على مواد الخمسين
والى بيدى للمواد الصغيرة أكبر من حقها بينقص على الفاضى وذلك للاسباب التالية
الانجليزى والعربى من المواد الى مهما تستفيض منها فهم واسعين جدا
يعنى مافيش حد عارف كل كلام الانجليزى ومافيش واحد عارف كل قواعد النحو الا ناس نادرة بتكون اللغة عندهم ملكة
المهم نبتدى ازاى أعرف قدراتى العقلية واستغلها على كل مادة
أولا ربنا خلق العقول متفاوتة ودى لازم تاخد بالك منها كويس أوى
وأهم صفات فى العقل الى تهمنا فى موضوعنا هو الاتى
قوة الملاحظة
سرعة الفهم
سرعة الحفظ
قوة الذاكرة
لازم تعلم ان الله سبحانه وتعالى أعطى ليك عضويين للتفكير
القلب والعقل
فى الدراسة طبعا بتستخدم العقل أما القلب فهو الى بيوجه العقل
المهم
كل واحد بيكون عارف قدرته على الحفظ والفهم
سرعة الحفظ انك تحفظ عن طريق سماع الشرح وقراءة الدرس باخذ فكرة كويسة عنه وحفظه بصورة مكثفة
ويستحسن انك تذاكر الدرس فى يوميها هايوفر كتير أوى عليك
أما سرعة الفهم دى بتكون ملكة انك تلاحظ مطاليب المسائل وتوظفها بسهولة
ومهما كانت قدرة عقلك فلازم يكون عندك خلفية واسعة من المسائل والاسئلة عشان تقدر تحل فى أى مادة
فيه مواد معينة بتفيد العقل
زى القهوة مثلا بتزيد من التنبيه
والخميرة بتزيد من قوة الذاكرة بشكل كبير
ببساطة شديدة انت ممكن تعرف قوة حفظك انك تجيب سورتين من القران ويكونوا تقريبا متقاربين
مثلا سورتى القيامة والانسان
وتحفظ كل سورة بطريقة مختلفة
الاولى تسمعها مرتين وتقرأها مرة وتوشف حفظت منها كام فى المية
التانية انك تحاول تحفظها فقط عن طريق الحفظ من اول مرة وتشوف هاتلم منها بعد 3مرات كام فى المية
لو كانت سرعة حفظك عالية فان الطريقة الاولى هاتكون الافضل والمناسبة ليك فى الحفظ
لو كانت سرعة الحفظ متوسطة فالطريقة التانية هى الى هاتكون مناسبة ليك
وسرعة الحفظ طبعا مهمة جدا
وانك تعرف انك ازاى هتذاكر
يعنى مثلا هاتيجى من الدرس تقراه الاول ولازم تكون مركز فيه
ولا أن اعتمادك على الشرح هايكون قليل وانك بتقدر تحفظ لواحدك والدرس هايكون ليك مجرد متابعة
عن نفسى كنت بعتمد على المدرس فى العربى بنسبة 70%
أما باقى المواد فكنت بعتمد فيها على نفسى وماكنتش بختار غير المدرسين الى مش بيسألوا كتير ودى بتفرق من عقل لتانى
لأن فيه ناس ماتعرفشى تذاكر الا لو كانت متابعة كويس جدا
وفيه ناس لو اتفرض عليها نظام واحد للمتابعة ما تعرفشى تذاكر
فلازم تحدد قدرتك فى الموضوع دة
ودة بيبان ليك من أول شهر
ثانيا حاول تختار المدرسين_ ان كنت هاتعتمد على الدروس_من الى غيرك أكدولك انهم ينفعوا ليك
::::::::::::::::::::
نيجى للمادة الاولى
العربى للمرحلة الاولى
القراءة يستحسن تحفظها فى صورة أسئلة وأجوبة
يعنى انا كنت بقسم الدرس عن مجموعة من الاسئلة أبقى عارف السؤال وعارف الاجابة بتاعته كويس
ويستحسن لو اخدت فيه درس انك تروح لمدرس من الى بيحاولوا يحفظوا الطلبة فى الحصة
هاتقولى صعبة هاقولك ولا صعبة ولا حاجة وصدقنى بتوفر جامد اوى عليك فى مذاكرة المادة
ولازم تكييف مخك على المادة يعنى مش كل ما تذاكر عربى تقعد تقول انا مخنوق انا مش بعرف أحفظ
مافيش حاجة اسمها ما بتعرفشى تحفظ لان مخك دة تركيبه معقد أكثر مما تتصور ويقدر يخزن معلومات لا حصر لها
نيجى على الجزئية المهمة اوى فى العربى وهى النصوص
النصوص خلاصتها انك تكون عارف معانيها طبعا كويس
تانى حاجة الجماليات بتطلعها من البلاغة
والحاجات الشاذة بتفهمها وتحفظها
يعنى مثلا الاساليب الانشائية واستخدامتها
هاتفضل ماشية معاك طول السنة
وكذلك الاطناب
الاستعارات ودى أكثر شىء طبعا
التشبيه وأنواعه
الحاجات دى يستحسن تكون عارفها بداية عشان تعرف تمشى كويس
لأن الى بيحفظ الجماليات يبقى بيتعب عقله على الفاضى
بحيث ان واحد يبص بس فيها يكون عارفها ويقرأ الجماليات يلاقيها ثبتت فى دماغه
والتانى قاعد يحفظها ويقول اسلوب كذا غرضه كذا يفيد كذا ويقعد يحفظها يبقى بيضيع وقت على الفاضى
أهم حاجة فى النصوص ودى بقولها للى عاوز يبقى متميز
التعليق على النص
ودى موجودة فى اخر كل درس فى كتاب الوزارة وأغلب المدرسين بيطنشوها والحمد لله ولكنها بتيجى للتمييز بين الطالب الفاهم والطالب الى كان بيذاكر نص مذاكرة
وغالبيتها من الصعب تألف فيها فلازم تكون مذاكرها
ولما هاتاخدوا النصوص هاتعرفوها زى ما بقولكم اخر كل درس تحت عنوان (التعليق)
أوعى تهملها
وسؤال النصوص بيكون زى أى سؤال فى العربى عادى
سؤال معانى وجمع ومضاد والحاجات دى
سؤال شرح ودة كله بياخد درجته
سؤال جماليات أو تعليق
لو كان من النصوص الحفظ فبيجيبلك معنى بيت او جزئية وتكتب ما يوافقها
نيجى بقى للجزء الكبير الى درجته صغيرة
القصة
وهى فى تانية قصة محمود سيف الدين قطز
ودى قصة غاية فى الروعة
القصة عموما تذاكرها ازاى
تقرأ أولا الفصل مرة او مرتين على حسب وقتك بحيث تكون القصة اترتبت فى عقلك فى صورة متسلسلة
وبعد كدة تبتدى تعرف ازاى تجاوب على اسئلتها
هاتقولى هى القصة بتتحفظ انا عن نفسى كنت بحفظها كما كتبت ودى بتختلف من واحد لتانى
انا كان مستوايا فى العربى مش كويس او بمعنى أصح ماليش فى الاساليب الادبية عشان كدة بحفظ الحاجة بنصها
اما لو عندك القدرة انك تكتب فى اى سؤال المعلومات الى هو عاوزها من غير ما تتوه المصحح يبقى كويس اوى
طبعا المعانى لو عملت فيها ايه فهى كتير
بس أهم حاجة يبقى عند القدرة انك تخمن المعنى من السياق العام
وتحاول تكون حافظ المعانى الغريبة الى هى بمعنى أصح الكلمات الى عمرك ما شفتها قبل كدة
انا عن نفسى مذكرتى كانت فيها معانى كتير
فكنت بكتب كل معنى فوق الكلمة بحيث انى كل ما أعدى على القصة يكون المعنى فوق الكلمة عشان ما انساهوش ويكون حفظه كدة بتسلسل والعقل يعرف يستوعبه
بدل ما تيجى اخر كل فصل تعمل جدول
مرادف كذا كذا
لا ركب المعنى مكان الكلمة فى الجملة وزى ما بقولك اكتبها فوقها وان شاء الله الطريقة هتلاقيها كويسة
ومافيش حاجة أسمها أذاكر 8 فصول واسيب 8
الا لو كنت من الناس الى بتدخل على (التنشين) وساعتها مش تبقى طالب ثانوية عامة يبقى التعليم الفنى أحسن
أما بقى قصة الايام
فالجزء الاول سهل وبسيط وبتذاكرها كويس
الجزء التانى مليان كلام على الفاضى والحشرات كانت بتشتغل طه حسين وعلى الحاج كان بيقعد يهزأ فيهم
اما الجزء التالت فهو منظم شوية
وطريقة مذاكرة القصة واحدة فى الاثنين
بس قصة الايام طبعا معانيها غريبة شوية فبتركز عليها
انا صراحة ما كنتش بطيق أشوف أسم الشخصية دى بس كنت بزاكرها مضطر
فذاكرت نص الجزء التانى والجزء التالت فى اخر السنة
ويستحسن فى تالتة مش تذاكر العربى أكتر من اللازم لأنه كبير وهياخد وقت أكبر من حجمه
ذاكره بما ينفعك للحل فى الامتحان
نيجى بقى للأدب
ودة حفظ طبعا ومافيش فيه لف وأسئلته كلها معروفة
أما النحو
فهو يعتمد أولا على مذاكرة القواعد النحوية الثابته
يعنى ما ياتى بعد هذا وهذة يعرب بدل مطلق كل شوية هاتقابلك
والممنوع من الصرف والقواعد السابقة لازم تكون على دراية بيها
غالبا فى تانية بيكون التركيز على أد القواعد الى عندك
انما فى تالتة العملية بتكون أكثر تعمقا بس بردة بتبقى معروفة
وسؤال المعجم بتكون انت معاك كدة زى جدول فيه الكلمات الشاذة
وبتدرب عليه كويس
حتة بقى أقعد ازاكر كام ساعة فى الدروس
طبعا دة بتتوقف عليك
انا العربى كنت بحفظه فى الدرس
وبرجع أذاكر الدرس فى حدود ربع ساعة وكنت بكون حفظه كما كتب
انما القصة كنت بديها أكتر من وقتها
لأن الواحد كان بيدى فى تانية متسع زيادة أوى من الوقت للمزاكرة
وحتة التنظيم دى لسة هانتكلم عليها
::::::::::::::::::::::::::::::::::
رياضة 1
طبعا دى من المواد السهلة والى غالبية الناس بتجيب فيها 50
وهى بسيطة جدا
انا عن نفسى بحب الرياضة جدا فكنت حليت كتاب لامى والمعاصر وطبعا دليل التقويم وكتاب الوزارة هما المصدريين الاساسين
بس عموما لو انت بتابع الدرس بدرسه وبأسئلته وأفكاره يبقى كويس اوى
وأحسن الافكار هى دليل التقويم
وكتاب الوزارة كام مسئلة فى الكتاب كله مش مستاهلين
لو عاوز تبقى مميز أوى فيها خلى ليك ملخص تحل منه بعد كل جزئية بتاخدها
واحسنهم ولكنه صعب لامى
بس الى فيها انك لو حليت كتاب زى لامى أى امتحان هاتشوفه هاتحس انه بيهزر معاك
يعنى أتذكر انى فى امتحانات رياضة 1 لما المراقب ادالى ورقة الاسئلة قلتله هى دى بس
قالى هى مش خمس أسئلة
قلتله اه قالى تبقى كاملة
كان الامتحان بيتحل فى ساعة بالكتير وقضى الامر على ذلك
امتحانها بيبقى امتحانين
كل امتحان 25 درجة
بس هى مادة مضمونة بمشيئة الرحمن
::::::::::::::::::::::::::::::::::::::::::
الانجليزى
الانجليزى امتحانه طبعا حاجة والمنهج حاجة تانية
فطبعا زى مانت متعود عادى تكون مذاكر الكلمات والقواعد لكل شبتر
وتكون مدرب كويس على السؤالين الوحيدين الى بيجولك من الى انت مذاكرهم
الى هم
Choose
وعليه أربع درجات وهما 16 جملة
و
Rewrite
دول محتاجين فهم للقواعد
أهم حاجة فى الانجليزى لتانية وتالتة التعبيرات وتركيبات الجمل
تقريبا كلها موجودة فى كتاب اسمه سربرايز
وبقيت الاسئلة بتعتمد على مقدار حفظك للكلمات
فحاول تحفظ وتعدى على قطع كتير عشان تحفظ قدر كويس من الكلمات
أما القصة
فالسؤال والجواب أفضل طريقة لمذاكرتهم
بعد بردة ما تكون قرئت الفصل مرة ولا مرتين
لان دى عملية مهمة للمخ فى ترتيب المعلومات
:::::::::::::::::::::::::::::::::::::::::::::::
الفرنساوى
مادة سهلة
ومالهاش طريقة معينة
قواعدها سهلة فى المذاكرة
وكلماتها مش صعبة
زيها زى الانجليزى من حيث أنك تلم عدد كبير من الاسئلة والمعانى
::::::::::::::::::::::::::::::::::::::::::
الكيمياء
أفضل انك تاخدها فى تانية عشان ماحدش عارف الظروف
لانك عارف انك فى دولة نامية مش قاعدين فى أمريكا
يعنى بتعتمد على الكلية بشكل كبير أوى فى شغلك وفى حاجات تانية كتير
أما حتة الفيزيا مع الاحياء صعبة انا شايف انها عادى
هو الافضل كمذاكرة وكتسهيل انك تاخد الفيزيا مع الكيميا
بس ألأغلبية بياخدوا الكيميا فى تانية عشان علمى علوم طبعا تنسيقه أعلى من علمى رياضة
المهم الكيميا مادة سهلة وجميلة جدا
الباب الاول والتانى والتالت بيكونوا فى جيبك
سهلين ومش عاوزين مجهود اوى
بس اهم حاجة فى الكيميا دليل التقويم وكتاب الوزارة
لانه غالبا من بيخرج عنهم
أنا عن نفسى حليت فيها ملخصات كتير أوى
أحسنهم طبعا الامتحان ومندليف وأفضل انك اخر السنة تجيب الماسى مراجعة
الباب الرابع والخامس
عاوزين مذاكرة كويسة
انا عن نفسى كنت بعمل كدة نظام معين على حسب المدرس الى بيديلى
انى كل يوم خميس بالليل براجع تلات ابواب من اول خمسة
يعنى طبعا فضلت فترة كبيرة اراجع اول تلاتة على ما خلصتهم
ولما خلصت الرابع والخامس كنت بمتحن فيهم كل اسبوع
دى طريقة مش سهلة للى بيحب يراجع تبقى كويس أوى
الباب السادس والسابع والتامن تفهمهم كويس وتحل اسئلتهم فى كتاب الوزارة والدليل والامتحان وكفاية اوى عليهم كدة مسائل
على فكرة الكيميا صعبة مش سهلة كمادة علمية
انما هى فى الثانوية سهلة
يعنى ما تحسسشى نفسك انك هاتخترع فيها
ذاكر من الملخصات الى بقولك عليها أحسن عشان ما تتوهشى فيها
الباب الاخير وهو العضوية
دة باب كويس عاوز حفظ بس خففوا منه كتير اوى
يعنى لو تسمع اى حد كبير يقولك الباب دة ومش عارف ايه وغبى
لا هو اتشال منه كتير اوى
وكان الاول عليه 22 درجة وتقريبا بدأت تنزل لغاية ما وصلت لحد علمى على 14
وعلى فكرة توزيع الدرجات دة بيكون صحيح 100% مش تأليف
ودة بينزل اخر السنة على غلاف كتاب الامتحان
وتبقى فى مراجعة مستمرة علي الكيميا لأنها بتتنسى بسرعة
وانا عامل موضوع كامل عنها فى قسم الكيميا
:::::::::::::::::::::::::::::::::::::::::::::
الاحياء
الاحياء مادة جميلة جدا
الى يقعد يقولك هى عاملة زى التاريخ فدة واحد مش بيفهم حاجة لأنها فعلا مادة صح
فيها أخطاء علمية عارف بس دى مش شغلتك دلوقتى لأنك هاتتعب لو قعدت تدور فى الموضوع وطبعا موضوع بلا جدوى
طبعا زى ما بيقولوا لا يفتى ومالك فى المدينة
يعنى بمعنى أصح الاكثر قدرة على الكلام عن الاحياء فى الموقع الاستاذ الدكتور هشام هيبة والاستاذ جمال الشمارقة
ودول ربنا جعلهم السبب الاول فى انى أجيب فيها درجة عالية
انا عامل موضوع نقلا عن الدكتور هشام فيها فى قسم الاحياء
كل الى فيها أعمل الى الدكتور هشام هايقولك أعمله ومش هاتقل عن 49 ان شاء الله
:::::::::::::::::::::::::::::::::::::::::::
الفيزياء
دى بردة ليها موضوع مطول فى قسم الفيزيا
::::::::::::::::::::::::::::::::::::::
رياضة 2 طبعا مش محتاجة كلام
أسئلة على اد ما تقدر
وانا طبعا ماكنتش رياضة اتنين بس معروفة رياضة تبقى مسائل
وطبعا هى عاوزة جهد كبير أكتر من أى مادة تانية عشان فروعها متعددة
وطبعا مش هاعرف أتكلم فيها كتير لأنها مش اختصاصى
::::::::::::::::::::::::::::::::::::::::::::
الاقتصاد والاحصاء
أسهل مواد الثانوية العامة
الاقتصاد دة تقريبا نص الباب الاول فى الاحياء
يعنى حاجة كدة لعب عيال بمعنى أصح
الاحصاء خلاصتها دليل التقويم وكتاب الوزارة
وقضى الامر فيهم على ذلك
:::::::::::::::::::::::::::::::::::::::::::
السؤال بقى ازاى اذاكر بوجه عام
هاقولك يقول الله تعالى
(وجعلنا الليل لباسا
وجعلنا النهار معاشا)
كل واحد متعود على وقت معين بيكون فايق فيه
يعنى فيه ناس متعودة على السهر
وفيه ناس متعودة تصحى من الفجر
أحسن وقت للمذاكرة هو من بعد الفجر لصلاة الظهر
هاتقولى المدرسة هاقولك لو بتاخد دروس يبقى المدرسة ضياع وقت كبير على الفاضى
هايتقالك المنازل تصحيحهم وحش هاقولك الورق كله بيروح مع بعضه
معدل النوم للانسان الطبيعى من 6 الى 10
بتعرفها بطريقة بسيطة جدا
انك تنام فى يوم 6 ساعات
ويوم 8
ويوم 9
مع العلم
ان لو معدل نومك زاد عن معدلك الطبيعى هاتصحى تعبان جسمك مهدود بمعنى أصح
وكذلك لو قل دماغك هاتبقى مش مركزة
طبعا مع الدروس والتعب مش بينفع معدل معين
الا انك احسن طريقة انك تقسم نومك
6 و 2 يبقى كويس اوى
انا فيه أيام كنت بنام الساعة 9 وأصحى 3
وأيام تانية بسهر لغاية الساعة 7 الصبح وبصحى الظهر واذاكر
وايام معينة وكانوا تلات اسابيع فى تانية كنت بنام فى اليوم 5 ساعات ساعتين بعد الفجر وتلاتة من الظهر للعصر بس قعدت بعدها تقريبا 3 أيام نايم أصحى أصلى وأنام تانى
فحتة انك تذاكر أمتى مالهاش معدل معين
مالهاش وقت معين
ذاكر على قدر مانت بتاخد
أى حاجة لاقيت نفسك مش فاكرها كويس سيبلها يوم الخميس بالليل
ودة متعود عليها ان كل خميس كنت بسهره لغاية الضحى
بس أهم حاجة فى تنظيم الوقت
انك تخلى مواعيد الدروس متناسقة مش تبقى بين الدرس والتانى ساعة تروح فى ربع ساعة تقعد نص ساعة فاضى تروح التانى فى ربع ساعة يبقى الساعة راحت فى الهوا
عن نفسى كنت بخلى الدروس ورا بعضها
بس طبعا مش يكون أكتر من درسين ورا بعض
والى تاخده تذاكره فى يومها
انا عن نفسى ماكنشى ليا نظام ثابت
انا كنت ماشى مع الدروس
وكنت بعمل نظام مراجعة
اى حد من أصحابى كان بيتزنق كنت بعمله جدول
الجدول دة بيقوم على مذاكرة المنهج كله فى 15 يوم. مراجعة بمعنى أصح بس دة للى عاوز يلم لأنه ضاع منه فترات معينة
عموما احنا معاكم من أول السنة
أى حاجة وقفت عليكم قولوا على طول
أى حد حصلتله ظروف بقى مضغوط فى مادة معينة يقول فى الموضوع لو حاجة ماينفعشى يقولها فى الموضوع ممكن على الرسايل الخاصة انما الايميل فهو مش بيتفتح والحمد لله
المهم أى مشكلة وليها حل
وما خلق الله داءا الا وخلق له الدواء
المهم بقولها مرة واتنين
الى تقابله أى مشكلة فى اى حاجة فى الدراسة
فيه أى ظروف أثرت عليك مش تتردد وأسأل واحنا هنا اخوات فى الدين
ولا نسالكم الا الدعاء ولا نرجوا منكم الا تكونوا موفقين بمشيئة الرحمن
""""""""""""""""""""""""""""""
"""""""""""""""""
حاول يكون ليك يوم مذاكرتك فيه ما تزيدشى عن أربع ساعات
ويكون اليوم دة تقريبا شبه خال من الدروس
عشان دة يوفرلك انك طول السنة تذاكر بمعدل متوازن
بدل ما تذاكر اسبوع وتزهق أسبوع
وحتة الزهقان دى
لو انت قريب من ربنا
وبتذاكر لهدف سامى فى عقلك
فمش هاتشعر بيها ان شاء الله
:::::::::::::::::::::::::::::::::::::::::::::::::: :::::
اما حتة بقى أولى ثانوى
انا أولى ثانوى دة كنت بصحى الفجر أسمع 3 خطب وأذاكرلى ساعتين أروح المدرسة لانها كانت الظهر واجى أنام شوية واذاكر ساعتين تانيية
فأولى ثانوى دى مش مقياس نهائيا
الا انها هاتفيدك فى الفرنساوى والانجليزى
وناس كتير هتلاقيهم أوائل فى السنين الى فاتت وفى الاخر ما يدخلوش حاجة
ودة لأن لكل سنة مذاكرتها
مش معنى انك كنت الاول على المحافظة فى تالتة اعدادى انك هاتدخل تحل بمذاكرة فى السنة دى!
وما تشغلوش بالكم بنقط مالهاش لازمة
وما التوفيق الا من عند الله
::::::::::::::::::::::::::::::::::::::::::::::::
وتذكر دائما قول سليمان عليه السلام
ومن شكر فانما يشكر لنفسه
ومن كفر فان الله غنى عن العالمين
يعنى أنت لما بتصلى دة بيكون اولا واخيرا لاخرتك
وبيترتب عليها توفيق فى حياتك
(أفنجعل المجرمين كالمؤمنين
مالكم كيف تحكمون)
وحتة انك فقط تصلى عشان المذاكرة
فلو انت بتصلى للسبب دة فقط مش هاقولك ما تصليش لأن الكلمة دى غلط جدا
بس هاقولك راجع نفسك كويس اوى لأن الله يعلم ما فى نفسك
وأنت لا تعلم مقدارك عند الله
فسيقول عيسى عليه السلام لملك الملوك يوم القيامة
(تعلم ما نفسى
ولا أعلم ما فى نفسك)
وممكن أنت أصلا مش تكون مؤمن بربنا وتؤمن بمعتقدات فاسدة ويكون معاك توفيق بردة
بس
دة توفيق استدراج
واعلم أيضا ان من سنن الله فى الكون ان الذى يجتهد فله أجره وان كان كافرا
والذى يخطأ فيتحمل عواقب عمله وان كان مؤمنا
أبسط مثال اليهود
أى نعم ليس لهم عقيدة
ولكنهم اخذوا بكل مقومات الدنيا فأصبح العالم سياسيا فى قبضتهم
::::::::::::::::::::::::::::::::::::::::::
نصايح عامة
حتة بتيجى فى دماغ كثير من الطلبة
(القدر)
ويقول
الى مكتوبلى مكتوبلى
ماشى كلنا نؤمن بالقدر
ولكن نؤمن أيضا بقول الله تعالى
(ونفس وما سواها
فألهمها فجورها وتقواها
قد أفلح من زكاها
وقد خاب من دساها)
الحتة دة دون الخوض فى تفاصيلها ان الانسان (مسير وليس مخير)
وان الكلية مكتوبة ليك مهما عملت
فدة اعتقاد خاطىء
حتة ان علم الله.المسبق بأنك ستدخل كلية كذا او هاتجيب كذا
فدة من كمال صفات الله سبحانه وتعالى
لأن الله يعلم ما كان وما هو كائن وما سيكون
وما لم يكن لو كان كيف يكون
لأن الله خلقك ويعلم من قبل ان يخلقك انك هتذاكر أد أيه وهتعمل مجهود ازاى
يعنى انا مثلا فى سنة تانية ثانوى مدرس العربى قال لى من شهر اتنين انى مش هاقل عن 200
وأخى الكبير قبل النتيجة قالى انت هاتجيب فى حدود 200
جبت 200.5
هما مش فرضوا عليا مجموع
ولكن من مجهودك بيبان مقدار مجموعك
فأعمل قدر ما تستطيع
وكن واثق ان الله من أسمائه الحسنى وصفاته العلى (العدل)
حاجة تانية وهى الحسد والعين والكلام دة
أولا كما قال النبى صلى الله عليه وسلم _العين حق)
ولو سبق شىء القدر لسبقت العين القدر
أو كما قال صلى الله عليه وسلم
(ولو هنا للاستحالة)
حتة بقى انك مش تظهر نفسك دة أمر كويس بس انا شايف انه مش ضرورى اوى
بس حتة الكذب دى حاجة تانية خالص ومش ليها أى مبرر
بس عموما عشان الناس تفهم
ايه الفرق بين الحسد والعين
وهما مثبوتان فى القران والسنة
أولا الحسد
او تمنى المرأ الشىء مع تمنى زواله عن الشخص المحسود
يعنى انا شايف واحد بيذاكر أكتر منى أتمنى أنه مش يعرف يذاكر
دة اسمه حسد وبيكون فى النفس (حقد)
أما العين
ان الانسان يشوفك فى مكانة معينة او فى فضل معين ولا يسمى باسم الله عليك
يعنى لا يقول ما شاء الله لا قوة الا بالله
ومن ثم فهى غالبا مش بتبقى مقصودة
من حقك انك مش تبين كل مذاكرتك
انما الكذب وانا مش بذاكر وانا مش عارف ايه
فدى ليها حالتين
الحالة الاولى انك تكون فعلا مش بتذاكر
وانت بالحالة دى بتسوء من ثقتك بنفسك لأنك مش بتشجع نفسك بل بتحبطها
والحالة الاخرى انك بتقول خالف ما تفعله
ودة اسمه كذب
وليس له مسمى اخر
ومع تكرره يخشى عليك من أن تكتب عند الله من الكذابين
وعلى فكرة انا عن نفسى مش كنت بخبى وماكنشى ليا فى الحاجات دى
ومافرقتشى كتير
أى نعم العين حق
والحسد موجود
انما زى ما النبى صلى الله عليه وسلم أثبت وجود العين
فبين استحالة ان تسبق العين القدر
لذلك استخدم الذى لا ينطق عن الهوى حرف (لو)
:::::::::::::::::::::::::::::::
كن منظم بقدر امكانك
وحاول يكون ليك كشكول اجندة اى حاجة تكتب فيها اى كلمة انجليزى جديدة عليك
أى جملة عجبتك تعرف تكتبها فى البراجراف
اى كلمة تقابلك من خارج المنهج فى الفرنساوى
لو عملت كدة من أول السنة هاتيجى على شهر تلاتة هاتلاقى نفسك مرتاح جدا
والى لازم تعرفه انك كل شغلك لنفسك أولا
(من يجهد فانما يجهد لنفسه
ان الله لغنى عن العالمين)
اشتغل بضمير عشان ربنا يوفقك
وكلمة اخيرة
انا عن نفسى ما شفتش حد فى محيط زمايلى ودروسى واصحابى ذاكروا وعملوا الى عليهم
الى ودخلوا الكليات الى كانوا عاوزينها
وأى امتحان مهما كان فبيتحل
امتحان الفيزيا والحمد لله خلصت الست أسئلة وراجعت منهم أربعة
وطبعا كانت فيه مسائل جديدة عليا
بس كله بيعدى بفضل الله
:::::::::::::::::::::::::::::::::::::::::::::
وأعلم
أن ما أصابك
لم يكن ليخطأك
وأن ما أخطأك
لم يكن ليصيبك
توكلوا على الله
وأخذوا بالاسباب
والله يعلم وانت لا تعلمون
::::::::::::::::::::::::::::::::::::::::::::::::
وجزاكم الله خيرا
فى امان الله