" عايز تعرف ولادك ليه بعاد عنك و عن البيت وبيهربوا منهم للـ مزيكا او الأفلام او الخروج كتير والكورة او القهوة او السجاير !! ؟
عشان الوقت اللى ابنك بيقضيه ف البيت بيبقى أنتقاد لـ كل حاجة بيعملها سواء كبيرة او صغيرة .. مثلاً اية اللى انت عامله ف شعرك دا ؟ محلقتش دقنك دى ليه ؟ وسايبها طويلة .. ايه اللى انت لابسه دا ؟ اية اللى انت بتتفرج عليه دا ؟ خليك كدا قاعد قدام الزفت دا ليل نهار لحد ما تموت .. ازاى تتكلم ف المواضيع دى ؟ كفاية اكل من برة البيت ! كفاية كلام مع صحابك ف التليفون ؟ بتكلم مين ؟ ما هى لو محترمة مش هتكلمك ف االتليفون !!! ؟ خليك كدا برة البيت طول النهار .. البيت بقى فندق بالنسبالك .. خليك كدا متسمعش الكلام .. تستاهل .. انتوا جيل فاشل .. وطى صوتك .. على صوتك ... أحلق شعرك .. متلبسش الشورت وتخرج بيه .. أقعد عدل .. وطى الأغانى .. نام بقى .. أصحى كفاية نوم .. كفاية سهر .. متصاحبش الواد دا .. خسيت ليه .. مفيش فايدة فيك .. انا قولتلك من الاول البنت دى مش هتنفعك ..
و لو قرر يقعد لوحده علشان تعب من الإنتقاد و الرخامة عليه و الصَدّ، تسألوه ببراءة "انت مش بتقعد معانا ليه و دايماً قاعد لوحدك؟"
املوا حياة ولادكم بالمدح .. سَمّعوهم الكلام اللي نفسهم يسمعوه منكم بدل ما يدوّروا على حد برة يسمّعّهُلهُم .. حسسوهم إنكم قابلينهم بأي حاجة مُتخَلّفة يعملوها حتى لو كانت إن ابنك قرر يحلق نُص راسه زيرو و يسيب النُص التاني كانيش .. اقبلوا إختلافهم عنكم ..
-
تقبّلوا فكرة إن الإبن لازم يعدّي بمرحلة التمرُد في حياته و لو ماعدّاش بيها ودّيه لدكتور نفساني .. اسمعوا منهم مُبرراتهم حتى لو جواكم عارفين إنها غلط .. إديلهم فُرصة يعبّروا عن رأيهم .. إختاروا الوقت المُناسب اللي تعرّفوهم فيه غلطهم .. مش و هم متعصّبين أو مجروحين أو مقهورين أو مظلومين، علشان مايحسّوش بالشماتة و انتوا مش شمتانين .. راجعوا كلماتكم و انتوا تعرفوا بيهربوا منكم ليه .. إعرفوا ليه بيلجأوا لغيركم .."
كلنا هذا الشخص
|