طالب فى كلية طب
 

وده طالب ف كليه طب
أهم حاجه لازم ابدأ بيها هي #العامل_النفسي فى الثانوية ، لأنه بيلعب دور رئيسي فى إن السنة دي تعدي بسلام :)
* أكبر ضغط نفسي بيواجهك هو ضغط الأسرة ( لما يقولولك ذاكر عشان تدخل كلية من كليات القمة ) و ضغط الأصدقاء ( لما تلاقي مستواهم أعلى منك و تحصيلهم أسرع و خلصوا مذاكرة و انت لسه )
* تتعامل إزاى معاهم ؟؟
= كبر دماغك و خليك مع نفسك و فكك من أي كلام يضغطك أو يوترك ، أول حاجه لازم تؤمن بيها و تحطها فى دماغك دايما إن كل واحد له قدراته المميزة عن غيره و بالتالي كل واحد له طريقته فى المذاكرة و له مدة استيعاب مختلفة و هكذا لكن أنت فى الآخر عندك القدرة انك تبقى حتى الأول ع الجمهورية بدون أى مبالغة ( لو فيه إرادة و إصرار ) .
= أقسم بالله أنا كان عندي واحد صاحبي بيجاوب بطريقة رهيبة فى الدروس على أسئلة تعجيزية و كنت شايف ان مستواه فى السما و انا فى قاع الارض ( بس دا كان بيحفزني بشكل ايجابي اني اذاكر اكتر يعني ما كانش بيحبطني ) و في الآخر فوجئت انه جايب زيي فى 2 ثانوي ( 97% ) و كان ممكن بكل سهولة أجيب أكتر بكتير لولا شوية تراخي و إهمال .
= فيه واحد بيحب يقعد على الكتاب كتير و عنده قدرة طول البال فى المذاكرة ، لكن فيه واحد تانى ما عندهوش قدرة طول البال لكن ربنا عوضه بقدرة سرعة الاستيعاب و الفهم ، فالاتنين فى الاخر متساويين ، و الاتنين لو ذاكروا بضمير هيجيبوا نفس المجموع ، أقسملك بالله الكلام دا عن تجربة و اتأكدت منه بنفسي فيما بعد .
= أوعي حد يضغطك خليك مع نفسك مع خطتك فى المذاكرة مع هدفك و خليك واثق إنك تقدر تعمل أى حاجه مهما أجمع كل الناس إنك غبي أو مستواك ضعيف ، و مش معنى إن فيه حد بيذاكر 18 ساعة يبقى لازم تذاكر زيه ، أو حد بيجاوب حلو فى الدروس أو سبقك فى المنهج يبقى أنت ضايع ، لا خلي الحاجات دي تحفزك بشكل إيجابي مش تحبطك .
= خد الثانوية ببساطة جداً زيها زي أى سنه .
= فكك من التركيز على كلية معينة و ركز على ازاى تذاكر بإحسان و بضمير ، ازاي ما تسبش ذرة إهمال أو تقصير ، و على رأي واحد : انحت فى الصخر :) ، فعلاً اتعب و ذاكر لحد ما تنام و أنت مرهق من المذاكرة ، لحد ما تحس إن اللى ذاكرته خد حقه و زيادة ، عشان قبل الامتحان تدخل و أنت راضي عن مجهودك و متوكل على الله ( مش متواكل ) و واثق إن ربنا هيكرمك لأنه وعدنا بألا يضيع أجر من أحسن عملا ، و بعد ما تمتحن تقول طز فى النتيجة طز فى أى شئ أنا عملت اللى عليا و كل اللى يجيبه ربنا أنا راضي بيه

موضووووووع جميل اوى
شكرا يا دكتر

المشكلة اللى بتواجهنى الاحباط والارهاق الشديد لدرجة انى مش قادرة اذاكر من كتر الارهاق والخوف الشديد

انا اكتر حاجة بخاف منها هى ورقة الامتحان بتوتر ومعرفش اكتب اى حاجة لدرجة انى بحس ان المنهج دا اول مرة اشوفه فى حياتى نفسى الاقى حل

السلام عليكم شكرا على كلامك الجميل.... بس ان مش دكتور ده نقلا عن واحد فى كلية طب انا عارفه
والمشكلة دى بتواجه معظم الطلبة بس هقولك كلام جميل اوى اتمنى ان تقومى بقرأته للنهاية .
اولا : شجعى نفسك دائما وتجاهلى كل الاحباطات كأنها لم تحدث ثق فى نفسك لان الثقة فى النفس هى اول مراحل النجاح
ثانيا : لا تفكرى فى الماضى كثيرا لانه قد مضى ولا تستطيعى ان تغيرى الماضى بعد حدوثه ( لهذا بعد الانتهاء من الامتحانات لاتقومى بمراجعى اجابتك لانك مثلا لوعرفت الاجابة الصح مش هتعرفى تغيريها فى ورقة الاجابة )
ثالثا : لا تفكرى بالمستقبل لانك لا تعرفى ماذا سوف يحدث فى المستقبل لانه فى علم الغيب
رابعا : توكلى على الله وتاكدى ان لكل مجتهد نصيب وان ربنا مش بيضيع مجهود حد.. ابذلى كل جهدك اثبتى لكل العالم من انتى.. لا تضعفى من نفسك ابدا ..حفزى نفسك بقوة
خامسا : لا تضايقى نفسك بمشكلة تافهة جدا تعلمى ان تكونى مبادرة ومبدعة تخيلى نفسك انك عندك مشكلة مثلا واستطعت ان تنجحى وتخيلى نفسك فى المستقبل وتفكرى نفسك انكى استطعتى ان تواجهى مشكلتك سوف تفرحى جدا انك استطعتى ان تواجهى تلك المشكلة
سادسا : ابتسمى دائما
سابعا : كل الطلبة بتحس انى هى مش فاكرة اى حاجة من المنهج ده طبيعى جدا حل المشكلة انك تهدأى وتتنفسى بعمق ولا توترى وابدأى بالحل
انتهت
اتمنى لك كل التوفيق واتمنى ان ينال الموضوع رضاكى

موضوع جميييل...ربنا يكرمك

رائع جدااا شكرا ..